ಖಾಂಡ್ವಾ, ಮಧ್ಯಪ್ರದೇಶ: ಇಂದಿನ ಐಷಾರಾಮಿ ಯುಗದಲ್ಲಿ ಉನ್ನತ ಹುದ್ದೆ ಎಂದರೆ ಸರ್ಕಾರಿ ಬಂಗಲೆ, ವಿಐಪಿ ಕಾರು, ಭದ್ರತಾ ಸಿಬ್ಬಂದಿ ಎಂಬ ಲೆಕ್ಕಾಚಾರವೇ ಇದೆ. ಆದರೆ ಮಧ್ಯಪ್ರದೇಶದ ಖಾಂಡ್ವಾದಲ್ಲಿ ಹೆಚ್ಚುವರಿ ಸೆಷನ್ಸ್ ನ್ಯಾಯಾಧೀಶರಾಗಿ ಕಾರ್ಯನಿರ್ವಹಿಸುತ್ತಿರುವ ಅಕ್ಷಯ್ ಕುಮಾರ್ ದ್ವಿವೇದಿ ಅವರು ಈ ಎಲ್ಲಾ ವ್ಯಾಖ್ಯಾನಗಳಿಗೂ ಅಪವಾದವಾಗಿ ನಿಂತು ಇಡೀ ದೇಶದ ಗಮನ ಸೆಳೆದಿದ್ದಾರೆ.

ಸರ್ಕಾರಿ ಸೌಲಭ್ಯಗಳಿಗೆ “ನೋ”
ನ್ಯಾಯಾಧೀಶ ಅಕ್ಷಯ್ ಕುಮಾರ್ ಅವರು ತಮಗೆ ಸಿಗಬೇಕಾದ ಸರ್ಕಾರಿ ಬಂಗಲೆ, ವಿಐಪಿ ಕಾರು ಮತ್ತು ಇತರ ಭದ್ರತಾ ಸೌಲಭ್ಯಗಳನ್ನು ಸ್ಪಷ್ಟವಾಗಿ ನಿರಾಕರಿಸಿದ್ದಾರೆ. ಪ್ರಸ್ತುತ ಅವರು ಒಂದು ಸಣ್ಣ ಸಾಮಾನ್ಯ ಕೊಠಡಿಯಲ್ಲಿಯೇ ವಾಸಿಸುತ್ತಿದ್ದಾರೆ. ಅಡುಗೆಯನ್ನು ತಾವೇ ಮಾಡಿಕೊಳ್ಳುತ್ತಾರೆ. ಪ್ರತಿದಿನ ಯಾವುದೇ ಆಡಂಬರವಿಲ್ಲದೆ ಕೋರ್ಟ್‌ಗೆ ನಡೆದುಕೊಂಡೇ ತೆರಳುತ್ತಾರೆ.

“ಸಂಬಳ ಅರ್ಧಕ್ಕೆ ಇಳಿಸಿ” ಎಂದು ಅರ್ಜಿ
ಅವರ ಪ್ರಾಮಾಣಿಕತೆಯ ಪರಾಕಾಷ್ಠೆಗೆ ಉದಾಹರಣೆಯೆಂದರೆ, ತಮಗೆ ಬರುವ ಸಂಬಳ ತೀರಾ ಹೆಚ್ಚು ಎಂದು ಭಾವಿಸಿ “ನನ್ನ ಸಂಬಳವನ್ನು ಅರ್ಧಕ್ಕೆ ಇಳಿಸಿ” ಎಂದು ಮಧ್ಯಪ್ರದೇಶ ಹೈಕೋರ್ಟ್‌ಗೆ ಅಧಿಕೃತವಾಗಿ ಅರ್ಜಿ ಸಲ್ಲಿಸಿರುವುದು. ಅವರ ಸ್ವಂತ ಆಸ್ತಿ ಎಂದರೆ ತಾಯಿ ಪ್ರೀತಿಯಿಂದ ನೀಡಿದ ಒಂದು ಸಾಮಾನ್ಯ ಮೊಬೈಲ್ ಫೋನ್ ಮಾತ್ರ.

ಜೀವನಪೂರ್ತಿ ಮದುವೆಯಾಗದೆ ಒಂಟಿಯಾಗಿಯೇ ಸಮಾಜ ಸೇವೆ ಮಾಡಲು ನಿರ್ಧರಿಸಿರುವ ಅವರು, ಮುಂದೆ ವರ್ಗಾವಣೆಯಾದರೂ ಕನಿಷ್ಠ ಸೌಲಭ್ಯಗಳನ್ನು ಮಾತ್ರ ಬಳಸಿಕೊಳ್ಳುವುದಾಗಿ ಇಲಾಖೆಗೆ ಲಿಖಿತವಾಗಿ ತಿಳಿಸಿದ್ದಾರೆ.

ಜಡ್ಜ್ ಆಗಲು ಬಾಲ್ಯದ ಘಟನೆಯೇ ಸ್ಫೂರ್ತಿ
ಅಕ್ಷಯ್ ಅವರು ನ್ಯಾಯಾಧೀಶರಾಗಲು ಅವರ ಬಾಲ್ಯದ ಒಂದು ಕಹಿ ಘಟನೆಯೇ ಕಾರಣ. ಆಸ್ತಿ ಜಗಳದ ವಿಚಾರವಾಗಿ ತಮ್ಮ ತಾಯಿ ಕೋರ್ಟ್‌ಗಳ ಸುತ್ತ ಅಲೆಯುತ್ತಾ ಅನುಭವಿಸಿದ ನೋವನ್ನು ಅವರು ಕಣ್ಣಾರೆ ಕಂಡಿದ್ದರು. “ತಾಯಿ ಅನುಭವಿಸಿದ ನೋವು ಬೇರೆ ಯಾರಿಗೂ ಬರಬಾರದು” ಎಂಬ ದೃಢ ನಿರ್ಧಾರದಿಂದ ಅವರು ನ್ಯಾಯಾಧೀಶರಾದರು.

ಈ ಹಿನ್ನೆಲೆಯಲ್ಲಿಯೇ ಅವರು ತಮ್ಮ ಕೋರ್ಟ್‌ಗೆ ಬರುವ ಭೂಮಿ ಮತ್ತು ಆಸ್ತಿ ವಿವಾದ ಪ್ರಕರಣಗಳನ್ನು ಅತ್ಯಂತ ವೇಗವಾಗಿ ಇತ್ಯರ್ಥಪಡಿಸುತ್ತಾರೆ. ಇದರಿಂದ ಬಡ ಮತ್ತು ಸಾಮಾನ್ಯ ಜನರಿಗೆ ಕಚೇರಿ ಅಲೆಯುವ ಜಂಜಾಟವಿಲ್ಲದೆ ತ್ವರಿತ ನ್ಯಾಯ ಸಿಗುತ್ತಿದೆ.

ಭ್ರಷ್ಟಾಚಾರದ ಆರೋಪಗಳು ಕೇಳಿಬರುತ್ತಿರುವ ಇಂದಿನ ವ್ಯವಸ್ಥೆಯಲ್ಲಿ ಅಕ್ಷಯ್ ಕುಮಾರ್ ದ್ವಿವೇದಿ ಅವರ ಸರಳತೆ, ನಿಷ್ಠೆ ಮತ್ತು ಜನಪರ ಕಾಳಜಿ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದೆ. ಸಾರ್ವಜನಿಕರು ಅವರ ಮಾನವೀಯ ಗುಣಕ್ಕೆ “ಸಲಾಮ್” ಹೇಳುತ್ತಿದ್ದಾರೆ.

ವರದಿ: ವಿಶೇಷ ವರದಿಗಾರ

#* #HighCourt #Judge #VIPCulture #Judiciary #IndiaNews #ViralNews