ನವದೆಹಲಿ: ಭಾರತದಾದ್ಯಂತ ಮುಂಗಾರು ಮಾರುತಗಳು ವ್ಯಾಪಿಸಿದ ಕೇವಲ ಎರಡೇ ದಿನಗಳಲ್ಲಿ ಮಳೆ ಪ್ರಮಾಣ ಗಣನೀಯವಾಗಿ ಕುಸಿದಿದ್ದು, ದೇಶದ 70 ರಿಂದ 80 ರಷ್ಟು ಭಾಗಗಳಲ್ಲಿ ಮೋಡಗಳೇ ಇಲ್ಲದ ಒಣ ಹವೆ ಆವರಿಸಿದೆ. ಈ ಹಠಾತ್ ಮಳೆ ವಿರಾಮದಿಂದ ಹವಾಮಾನ ತಜ್ಞರಲ್ಲಿ ಕುತೂಹಲ ಮತ್ತು ಆತಂಕ ಮೂಡಿದೆ.

ಮಳೆ ಕಸಿದ ಪೆಸಿಫಿಕ್ ಚಂಡಮಾರುತ

ಈ ಮಳೆ ವಿರಾಮಕ್ಕೆ ಪ್ರಮುಖ ಕಾರಣ ಸಾವಿರಾರು ಕಿಲೋಮೀಟರ್ ದೂರದ ಪೆಸಿಫಿಕ್ ಸಾಗರದಲ್ಲಿ ಉದ್ಭವಿಸಿರುವ ಪ್ರಬಲ ಉಷ್ಣವಲಯದ ಚಂಡಮಾರುತ ಎಂದು ಹವಾಮಾನ ತಜ್ಞರು ಹೇಳುತ್ತಿದ್ದಾರೆ.

ಭಾರತದ ಮುಂಗಾರು ಮಳೆಯು ಹಿಂದೂ ಮಹಾಸಾಗರದಿಂದ ಬರುವ ತೇವಾಂಶಭರಿತ ಮಾರುತಗಳನ್ನು ಅವಲಂಬಿಸಿರುತ್ತದೆ. ಆದರೆ ಪಶ್ಚಿಮ ಪೆಸಿಫಿಕ್ ಸಾಗರದಲ್ಲಿ ಎದ್ದಿರುವ ಈ ಚಂಡಮಾರುತವು ಭಾರತದತ್ತ ಬರಬೇಕಿದ್ದ ತೇವಾಂಶ ಮತ್ತು ಗಾಳಿಯ ಸುಳಿಯನ್ನು ತನ್ನತ್ತ ಸೆಳೆದುಕೊಳ್ಳುತ್ತಿದೆ.

ಮಾನ್ಸೂನ್ ಟ್ರಫ್ ದುರ್ಬಲ

ಪರಿಣಾಮವಾಗಿ ಭಾರತದ ಮೇಲೆ ಮಳೆ ತರಬೇಕಿದ್ದ ‘ಮಾನ್ಸೂನ್ ಟ್ರಫ್’ ಅಂದರೆ ಕಡಿಮೆ ಒತ್ತಡದ ಪಟ್ಟಿ ದುರ್ಬಲಗೊಂಡಿದೆ. ಮಾನ್ಸೂನ್ ಟ್ರಫ್ ದುರ್ಬಲಗೊಂಡಿರುವುದೇ ದೇಶದ ಬಹುತೇಕ ಭಾಗಗಳಲ್ಲಿ ಮಳೆ ಪ್ರಮಾಣ ಕುಸಿತಕ್ಕೆ ಕಾರಣವಾಗಿದೆ.

ಹವಾಮಾನ ಇಲಾಖೆ ಪ್ರಕಾರ, ಮುಂಗಾರು ಆರಂಭದ ಹಂತದಲ್ಲಿ ಇಂತಹ ವಿರಾಮಗಳು ಸಾಮಾನ್ಯವಾದರೂ, ಈ ಬಾರಿಯ ವಿರಾಮಕ್ಕೆ ಪೆಸಿಫಿಕ್ ಚಂಡಮಾರುತದ ಪ್ರಭಾವವೇ ಮುಖ್ಯ ಕಾರಣವಾಗಿದೆ.

ಚಂಡಮಾರುತದ ಚಲನೆ ಮತ್ತು ಮಾನ್ಸೂನ್ ಟ್ರಫ್ ಪುನಃ ಸಕ್ರಿಯವಾಗುವುದರ ಮೇಲೆ ಮುಂದಿನ ದಿನಗಳಲ್ಲಿ ಮಳೆ ಚೇತರಿಕೆ ಅವಲಂಬಿಸಿದೆ ಎಂದು ತಜ್ಞರು ಅಭಿಪ್ರಾಯಪಟ್ಟಿದ್ದಾರೆ.

ಗಮನಿಸಿ – ಮುಂದಿನ 4-5 ದಿನಗಳ ಹವಾಮಾನ ಮುನ್ಸೂಚನೆಗಾಗಿ ಸ್ಥಳೀಯ ಹವಾಮಾನ ಇಲಾಖೆ ಮಾಹಿತಿಯನ್ನು ಅನುಸರಿಸುವಂತೆ ರೈತರಿಗೆ ಸೂಚಿಸಲಾಗಿದೆ.