ತೀವ್ರ ರಕ್ತಸ್ರಾವ ವಾಗುತ್ತಿದ್ದರೂ ,ಶಕ್ತಿಹೀನನಾಗಿದ್ದರೂ ಮಾನವೀಯತೆ ಮರೆತಿಲ್ಲ: ಐವರು ಗೆಳೆಯರನ್ನು ಕಾಪಾಡಿದ 9ನೇ ತರಗತಿಯ ಬಾಲಕನ ಸಾಹಸ
ಬಳ್ಳಾರಿ ಖಾಸಗಿ ವಸತಿ ಶಾಲೆಯ ಸಹಪಾಠಿಗಳ ಮೇಲಿನ ಕೊಲೆ ಮತ್ತು ಮಾರಣಾಂತಿಕ ಹಲ್ಲೆಗಳ ಆರೋಪಿ ಬಾಲಕನ ಸುಳಿವು ನೀಡಿದ ಪರಿಸರದ సిసిటివి ಕ್ಯಾಮೆರಾ, ಘಟನೆ ಬಳಿಕ ನಾಪತ್ತೆಯಾಗಿದ್ದ
ಬಾಲಕ ಸೈಕಲ್ ನಲ್ಲಿ ತೆರಳಿ ,ಫೋನ್‌ನಲ್ಲಿ
ಮಾತನಾಡುತ್ತಿರುವ ದೃಶ್ಯಗಳ ಜಾಡು ಹಿಡಿದು
ಕೂಲಂಕಷವಾಗಿ ದೃಶ್ಯಾವಳಿಗಳನ್ನು ಪರಿಶೀಲಿಸಿ
ಅಂತಿಮವಾಗಿ ಬಾಲಕನನ್ನು ಪತ್ತೆಹಚ್ಚುವಲ್ಲಿ ಪೊಲೀಸ್ ತಂಡ ಯಶಸ್ವಿಯಾಗಿದೆ.
ತಲೆಯಲ್ಲೂ ಎದೆಯಲ್ಲೂ ಗಂಭೀರ ಗಾಯಗಳಾಗಿದ್ದರೂ, ರಕ್ತಸ್ರಾವದಿಂದ ನಲುಗುತ್ತಿದ್ದರೂ ಸಹ ತನ್ನ ಗೆಳೆಯರ ಜೀವವನ್ನು ಉಳಿಸಲು ಹೋರಾಡಿದ ಒಬ್ಬ ಬಾಲಕನ ಧೈರ್ಯ ಮತ್ತು ಮಾನವೀಯತೆ ಬಳ್ಳಾರಿ ಜಿಲ್ಲೆಯ ಖಾಸಗಿ ವಸತಿ ಶಾಲೆಯ ಘಟನೆಯಲ್ಲಿ ಬೆಳಕಿಗೆ ಬಂದಿದೆ.
ಮಾರ್ಚ್ 7ರ ರಾತ್ರಿ ನಡೆದ ಈ ಆತಂಕಕಾರಿ ಘಟನೆಯಲ್ಲಿ, ವಸತಿ ನಿಲಯದಲ್ಲಿ ಇದ್ದ ಒಟ್ಟು 12 ವಿದ್ಯಾರ್ಥಿಗಳ ಪೈಕಿ ಏಳು ಮಂದಿ ಒಂದೇ ಕೊಠಡಿಯಲ್ಲಿ ಮತ್ತು ಇನ್ನೂ ಐವರು ಮೇಲಿನ ಕೊಠಡಿಯಲ್ಲಿ ತಂಗಿದ್ದರು. ಇದೇ ವೇಳೆ, ಏಕಾಏಕಿ ಒಬ್ಬ ವಿದ್ಯಾರ್ಥಿ ಸಮೀಪದಲ್ಲಿದ್ದ ಏಳು ಸಹಪಾಠಿಗಳ ಮೇಲೆ ದಾಳಿ ನಡೆಸಿದನು.

Also Read ನಾಲ್ಕು ವರ್ಷದ ಬಾಲಕಿ ಅಪಹರಿಸಿ, ಲೈಂಗಿಕ ದೌರ್ಜನ್ಯ ನಡೆಸಿ ಕೊಲೆಗೈದ ಆರೋಪಿಯನ್ನು ಎನ್ಕೌಂಟರ್ ಮಾಡಿದ ಪೊಲೀಸರು

ಈ ದಾಳಿಯಲ್ಲಿ 9ನೇ ತರಗತಿಯ ಬಾಲಕನೊಬ್ಬ ತೀವ್ರವಾಗಿ ಗಾಯಗೊಂಡಿದ್ದನು. ತಲೆಯಲ್ಲೂ ಎದೆಯಲ್ಲೂ ಬಿದ್ದ ಪೆಟ್ಟಿನಿಂದ ರಕ್ತಸ್ರಾವವಾಗುತ್ತಿದ್ದರೂ, ಆತ ತನ್ನ ನೋವನ್ನು ಮರೆತು ಮೇಲಿನ ಕೊಠಡಿಯಲ್ಲಿ ಮಲಗಿದ್ದ ಐವರು ಸಹಪಾಠಿಗಳತ್ತ ತೆವಳುತ್ತ ಸಾಗಿದನು.

ಬಲಹೀನಗೊಂಡಿದ್ದರೂ ಆತ ಬಾಗಿಲು ತಟ್ಟಿ, “ಬಾಗಿಲು ತೆರೆಯಬೇಡಿ” ಎಂದು ಎಚ್ಚರಿಸಿದನು. ಅವನ ಸಮಯೋಚಿತ ಎಚ್ಚರಿಕೆಯಿಂದ ಐವರು ವಿದ್ಯಾರ್ಥಿಗಳು ಅಪಾಯದಿಂದ ಪಾರಾದರು.

ಪ್ರಸ್ತುತ ಗಾಯಗೊಂಡ ಬಾಲಕನಿಗೆ ಬಿಎಂಸಿಆರ್‌ಸಿ ಟ್ರಾಮಾ ಕೇರ್‌ನಲ್ಲಿ ಚಿಕಿತ್ಸೆ ನೀಡಲಾಗುತ್ತಿದೆ. ಆಸ್ಪತ್ರೆಗೆ ಭೇಟಿ ನೀಡಿದ ಅಧಿಕಾರಿಗಳೊಂದಿಗೆ ಮಾತನಾಡಿದ ಬಾಲಕ, ಆ ರಾತ್ರಿ ನಡೆದ ಘಟನೆಯ ವಿವರವನ್ನು ಹಂಚಿಕೊಂಡಿದ್ದಾನೆ.

ಜಿಲ್ಲಾ ಪಂಚಾಯತ್ ಮುಖ್ಯ ಕಾರ್ಯನಿರ್ವಹಣಾಧಿಕಾರಿ ಮಹ್ಮದ್ ಹ್ಯಾರಿಸ್ ಸುಮೇರ್ ಅವರು ಆಸ್ಪತ್ರೆಗೆ ಭೇಟಿ ನೀಡಿ ಗಾಯಾಳು ವಿದ್ಯಾರ್ಥಿಗಳ ಆರೋಗ್ಯ ವಿಚಾರಿಸಿದರು. ಈ ವೇಳೆ, “ತೀವ್ರ ಗಾಯಗೊಂಡಿದ್ದರೂ ಸಹ ತನ್ನ ಗೆಳೆಯರನ್ನು ಎಚ್ಚರಿಸಿ ದಾಳಿಯಿಂದ ರಕ್ಷಿಸಿದ ಬಾಲಕನ ಧೈರ್ಯ ಮತ್ತು ಮಾನವೀಯತೆ ಶ್ಲಾಘನೀಯ,” ಎಂದು ಅವರು ಹೇಳಿದ್ದಾರೆ.

Also Read ಕಸ ಸಾಗಾಣಿಕೆ ಟೆಂಡರ್‌ನಲ್ಲಿ ₹133 ಕೋಟಿ ಅಕ್ರಮ ಆರೋಪ

ಘಟನೆಗೆ ಸಂಬಂಧಿಸಿದಂತೆ ಸಮಗ್ರ ತನಿಖೆ ನಡೆಸಲು ಜಿಲ್ಲಾಡಳಿತ ಕ್ರಮ ಕೈಗೊಂಡಿದೆ. ಡಿಡಿಪಿಐ, ಮಹಿಳಾ ಮತ್ತು ಮಕ್ಕಳ ಅಭಿವೃದ್ಧಿ ಇಲಾಖೆ ಹಾಗೂ ಕ್ಷೇತ್ರ ಶಿಕ್ಷಣಾಧಿಕಾರಿಗಳನ್ನು ಒಳಗೊಂಡ ಸಮಿತಿಯನ್ನು ರಚಿಸಲಾಗಿದೆ.

ಶಾಲೆಯ ಆಡಳಿತ ಮಂಡಳಿಯ ಹೊಣೆಗಾರಿಕೆ, ಮಕ್ಕಳ ಸುರಕ್ಷತೆಗಾಗಿ ಕೈಗೊಂಡ ಕ್ರಮಗಳು, ವಸತಿ ನಿಲಯದ ಪರವಾನಗಿ ಹಾಗೂ ಘಟನೆಯ ಹಿನ್ನೆಲೆ ಸೇರಿದಂತೆ ಹಲವು ಆಯಾಮಗಳಲ್ಲಿ ತನಿಖೆ ನಡೆಸಿ ಸಮಗ್ರ ವರದಿ ಸಲ್ಲಿಸುವಂತೆ ಜಿಲ್ಲಾಡಳಿತ ಸೂಚಿಸಿದೆ.

ಗಾಯಗೊಂಡಿದ್ದರೂ ಸಹ ತನ್ನ ನೋವನ್ನು ಮರೆತು ಇತರರ ಜೀವ ಉಳಿಸಲು ಜೀವ ಪಣ ತೊಟ್ಟು ಗೆಳೆಯರಿಗಾಗಿಸಹಾಯ ಮಾಡಲು ಮುಂದಾದ ಈ ಬಾಲಕನ ಸಾಹಸ ಎಲ್ಲರಿಗೂ ಪ್ರೇರಣೆ.