ಘರ್ ವಾಪ್ಸಿ ಯಾದ ಯೋಗೇಶ್ ಶೆಟ್ಟಿ ಜೆಪ್ಪು

Karavali Maruta | 3 months ago | 10 March 2026

ತುಳುನಾಡ ರಕ್ಷಣಾ ವೇದಿಕೆಯ ಸ್ಥಾಪಕಾಧ್ಯಕ್ಷರಾದ ಯೋಗೀಶ್ ಶೆಟ್ಟಿ ಜೆಪ್ಪು ಮತ್ತು ಶಶಿರಾಜ್ ಶೆಟ್ಟಿ ಇವರಿಬ್ಬರೂ ಮಾಜಿ ಮುಖ್ಯಮಂತ್ರಿ ಹಾಗೂ ಹಾಲಿ ಕೇಂದ್ರ ಸಚಿವರಾದ ಹೆಚ್ ಡಿ ಕುಮಾರಸ್ವಾಮಿ ಅವರ ಸಮ್ಮುಖದಲ್ಲಿ ಜೆಡಿಎಸ್ ಪಕ್ಷಕ್ಕೆ ಮಗದೊಮ್ಮೆ ಸೇರ್ಪಡೆಗೊಂಡಿದ್ದಾರೆ

ಯೋಗೇಶ್ ಶೆಟ್ಟಿ ಜೆಪ್ಪು ಹಾಗೂ ಶಶಿ ರಾಜ್ ಶೆಟ್ಟಿ ಇಬ್ಬರು ಜೆಡಿಎಸ್ ನಲ್ಲಿ ಈ ಹಿಂದೆ ಕೆಲಸ ಮಾಡಿದವರೇ ಆಗಿದ್ದಾರೆ ಪಕ್ಷದ ವಿವಿಧ ಹುದ್ದೆಗಳಲ್ಲಿ ಸಕ್ರಿಯರಾಗಿದ್ದವರು, ಕಾರಣಾಂತರಗಳಿಂದ ಪಕ್ಷದಿಂದ ಹೊರಬಂದು ರಾಜಕಿಯೇತರ ಸಂಘಟನೆಗಳಲ್ಲಿ ಸಕ್ರಿಯರಾಗಿ ಕಾಣಿಸಿಕೊಳ್ಳುತ್ತಿದ್ದರು.

ಯೋಗೀಶ್ ಶೆಟ್ಟಿ ಜೆಪ್ಪು ತುಳುನಾಡ ರಕ್ಷಣಾ ವೇದಿಕೆ ಎಂಬ ಸಂಘಟನೆಯನ್ನು ಅವಳಿ ಜಿಲ್ಲೆಯಾದ್ಯಂತ ಅಂದರೆ ದಕ್ಷಿಣ ಕನ್ನಡ ಹಾಗೂ ಉಡುಪಿ ಜಿಲ್ಲೆಯಾದ್ಯಾತ್ಯಂತ ಸಂಘಟಿಸಿ ಸಮಾಜದ ವಿವಿಧ ಸ್ಥರದ ಸಮಸ್ಯೆಗಳನ್ನು ನೀಗಿಸುವ ನಿಟ್ಟಿನಲ್ಲಿ ಹೋರಾಟಗಳನ್ನು ಮಾಡುತ್ತಾ ಸಾರ್ವಜನಿಕವಾಗಿ ಚಾಲ್ತಿಯಲ್ಲಿದ್ದಂತಹ ವ್ಯಕ್ತಿಯನ್ನು ಜೆಡಿಎಸ್ ಪಕ್ಷದ ನಾಯಕರು, ಇವರ ಮನವೊಲಿಸಿ ವಾಪಾಸ್ ಪಕ್ಷದ ಅಂಗಳಕ್ಕೆ ಕರೆದುಕೊಂಡು ಬಂದಿದ್ದಾರೆ.

ಮಾಜಿ ಜಿಲ್ಲಾಧ್ಯಕ್ಷ ಎಂ ಬಿ ಸದಾಶಿವ್ ಈ ಇಬ್ಬರು ನಾಯಕರನ್ನು ವಾಪಾಸ್ ಪಕ್ಷದ ಅಂಗಳಕ್ಕೆ ಕರೆತರುವಲ್ಲಿ ಯಶಸ್ವಿಯಾಗಿದ್ದಾರೆ. ಇವರನ್ನು ಬೆಂಗಳೂರಿನಲ್ಲಿರುವ ಕೇಂದ್ರ ಕಚೇರಿಯಲ್ಲಿ ಸ್ವತಹ ಮಾಜಿ ಮುಖ್ಯಮಂತ್ರಿ ಹಾಲಿ ಕೇಂದ್ರ ಸಚಿವ ಕುಮಾರಸ್ವಾಮಿಯವರ ಸಮ್ಮುಖದಲ್ಲಿ ಘರ್ ವಾಪ್ಸಿಯನ್ನಾಗಿ ಮಾಡಿಕೊಂಡಿದ್ದಾರೆ.

ಇವರು ಪಕ್ಷಕ್ಕೇನೋ ವಾಪಸ್ ಹೋಗಿದ್ದಾರೆ. ಪಕ್ಷದಲ್ಲಿ ಈಗಿರುವ ನಾಯಕರುಗಳಲ್ಲಿ ಬಹುತೇಕರು ಚೈತನ್ಯ ರಹಿತರಾಗಿ ಕಾಣಿಸಿಕೊಳ್ಳುತ್ತಿದ್ದಾರೆ. ಯಾವುದೇ ಜನಪರ ಹೋರಾಟ, ಜನರ ಪರವಾಗಿ ಧ್ವನಿ ಎತ್ತುವುದು, ವಿವಿಧ ಜನೋಪಕಾರಿ ಕಾರ್ಯಕ್ರಮಗಳನ್ನು ಹಮ್ಮಿಕೊಳ್ಳುವುದು ಇದು ಯಾವುದರಲ್ಲೂ ಕಾಣಿಸಿಕೊಳ್ಳದಂತವರು, ಕೇವಲ ಲೆಟರ್ ಹೆಡ್ ನಾಯಕರುಗಳಾಗಿ ಇರುವುದರಿಂದಾಗಿ ಜಿಲ್ಲೆಯಲ್ಲಿ ಪಕ್ಷಕ್ಕೆ ಆಕ್ಸಿಜನ್ನೇ ಇಲ್ಲದಂತಹ ಸ್ಥಿತಿ ಇದೆ. ಅವಳಿ ಜಿಲ್ಲೆಯಲ್ಲಿ ಮೂರನೇ ಪಕ್ಷದ ಅವಶ್ಯಕತೆ ಖಂಡಿತವಾಗಿಯೂ ಇದೆ ಎನ್ನುವುದು ಹಲವರ ಅಭಿಪ್ರಾಯ. ಆದರೆ ಇಲ್ಲಿನ ನಾಯಕರ ನಿದ್ದಂಡಿತನ ಹಾಗೂ ರಿಸ್ಕ್ ತೆಗೆದುಕೊಳ್ಳುವಲ್ಲಿನ ಹಿಂಜರಿಕೆ ಇದೆಲ್ಲವುದರ ಪರಿಣಾಮ ಪಕ್ಷವು ಐಸಿಯು ನಲ್ಲಿದೆ. ಕಾರ್ಯಕರ್ತರಲ್ಲಿ ಹಿಂಜರಿಕೆ ಹಾಗೂ ಬ್ರಮನಿರಸನವಾದ ಕಾರಣ ಅನೇಕ ಕಾರ್ಯಕರ್ತರು ತಟಸ್ಥರಾಗಿದ್ದಾರೆ. ಇನ್ನು ಕೆಲವರು ಇತರ ಪಕ್ಷಗಳ ಬಾವುಟದಡಿಗೆ ಸಾಗಿ ಹೋಗಿದ್ದಾರೆ.

ಏನೇ ಇರಲಿ ಈಗ ಯೋಗೀಶ್ ಶೆಟ್ಟಿ ಜಪ್ಪುವಂತಹ ಚಟುವಟಿಕೆ ಯಲ್ಲಿರುವ ನಾಯಕರು ವಾಪಸ್ ಪಕ್ಷದ ಕಚೇರಿಗೆ ಬರುವಂತಾಗಿದ್ದಾರೆ. ಹಾಗಾಗಿ ಪಕ್ಷದ ಕಾರ್ಯಕರ್ತರಲ್ಲಿ ಏನೋ ಒಂದು ಆಶಾಭಾವನೆ ಮೂಡಿದೆ.

ಪಕ್ಷವು ಇಂತಹ ನಾಯಕರನ್ನು ಯೋಗ್ಯ ಕುರ್ಚಿಯಲ್ಲಿ ಕೂರಿಸುವ ಕೆಲಸ ಮಾಡಬೇಕು. ಗೌರವಯುತ ಸ್ಥಾನಮಾನ ನೀಡಿ ಅವರಿಂದ ಪಕ್ಷದ ಬೆಳವಣಿಗೆಯನ್ನು ನಿರೀಕ್ಷಿಸಬೇಕು. ಈ ಕೆಲಸ ರಾಜ್ಯ ಘಟಕವು ನಿರ್ವಹಿಸುತ್ತದೆಯೇ ಎನ್ನುವುದನ್ನು ಕಾದು ನೋಡಬೇಕು. ಆ ಕೆಲಸ ಮಾಡದಿದ್ದರೆ ಇಂತಹ ನಾಯಕರು ಪಕ್ಷಕ್ಕೆ ವಾಪಸ್ ಆಗಿಯೂ ಹೆಚ್ಚಿನ ಲಾಭ ಇರದು ಅನ್ನೋದನ್ನು, ಪಕ್ಷವು ಅರ್ಥ ಮಾಡಿಕೊಳ್ಳುತ್ತದೆ ಎನ್ನುವುದು ಜೆಡಿಎಸ್ ತಳ ಮಟ್ಟದ ಕಾರ್ಯಕರ್ತರ ನಂಬಿಕೆ.