ಉಡುಪಿ: “ನಮ್ಮ ಸಂಸ್ಥೆಯಲ್ಲಿ ಹಣ ಹೂಡಿದರೆ ದ್ವಿಗುಣವಾಗುತ್ತದೆ” ಎಂದು ನಂಬಿಸಿ ಮಲ್ಪೆಯ ಶೇರ್ ಮಾರ್ಕೆಟಿಂಗ್ ಕಂಪನಿಯ 4 ಜನರು, 30 ಲಕ್ಷ 90 ಸಾವಿರ ರೂ. ವಂಚಿಸಿರುವ ಘಟನೆ ಬೆಳಕಿಗೆ ಬಂದಿದೆ.

ಘಟನೆಯ ವಿವರ
ದಿನಾಂಕ 19/06/2026 ರಂದು ಆಪಾದಿತರಾದ ಪ್ರದೀಪ ಆಚಾರ್ಯ, ಜ್ಯೋತಿ ಜತ್ತನ್, ದಮಯಂತಿ.ಎ, ರೋಹಿಣಿ ಇವರುಗಳು ದೂರುದಾರರಾದ ಇಂದಿರಾ ಬಂಗೇರ (51), ಕೋಡಿ ಗ್ರಾಮ, ಉಡುಪಿ ಇವರ ಮನೆಗೆ ಬಂದು, ಬಿ.ಜಿ. ವೆಲ್ತ್ ಶೇರಿಂಗ್ ಎಂಬ ಶೇರ್ ಮಾರ್ಕೆಟಿಂಗ್ ಕಂಪನಿಗೆ ಮಲ್ಪೆಯ ಕಾರ್ತಿಕ್ ಸಹಜ್ ಕಟ್ಟಡದಲ್ಲಿ ಕಛೇರಿ ಇದೆ ಎಂದೂ, ನಮ್ಮ ಸಂಸ್ಥೆಯಲ್ಲಿ ಹಣ ಹೂಡಿಕೆ ಮಾಡಿದರೆ ಹಣ ದ್ವಿಗುಣವಾಗುತ್ತದೆ ಎಂದು ದೂರುದಾರರನ್ನು ಪುಸಲಾಯಿಸಿದ್ದಾರೆ.

ಇದೊಂದು ವಿದೇಶಿ ಕಂಪನಿ, ಒಮ್ಮೆ ಮಾತ್ರ ಹಣ ಹೂಡಿಕೆ ಮಾಡಿದರೆ ಸಾಕು. ಡಾಲರ್ ರೂಪದಲ್ಲಿ ಐಡಿ ಓಪನ್ ಆಗುತ್ತದೆ ಎಂದು ನಂಬಿಸಿ ದೂರುದಾರರು ಮತ್ತು ಅವರ ಕುಟುಂಬದವರು ಹಾಗೂ ಇತರರಿಂದ ಸೇರಿ ಒಟ್ಟು 30,90,000 ರೂ. ಹಣವನ್ನು ಆರೋಪಿತರು ಪಡೆದಿದ್ದಾರೆ.

Also Read ಮಕ್ಕಳ ಸುರಕ್ಷತೆಯೇ ಮುಖ್ಯ - ಸಂದೇಶ ಕೊಟ್ಟ ಹೈಕೋರ್ಟ್

ವಂಚನೆ ಬಯಲು
ನಂತರದಲ್ಲಿ ಹೂಡಿಕೆ ಮಾಡಿದ ಹಣವನ್ನು ವಾಪಸ್ ನೀಡದೆ ಕಛೇರಿಯನ್ನು ಬಂದ್ ಮಾಡಿ ಆರೋಪಿತರು ಪರಾರಿಯಾಗಿದ್ದಾರೆ. ಇದರಿಂದ ದೂರುದಾರರಿಗೆ ಹಾಗೂ ಇತರರಿಗೆ ನಂಬಿಕೆ ದ್ರೋಹ ಹಾಗೂ ವಂಚನೆಯಾಗಿದೆ ಎಂದು ದೂರಿನಲ್ಲಿ ತಿಳಿಸಿದ್ದಾರೆ.

ಪ್ರಕರಣ ದಾಖಲು
ಈ ಸಂಬಂಧ ಮಲ್ಪೆ ಪೊಲೀಸ್ ಠಾಣೆಯಲ್ಲಿ ಅಪರಾಧ ಕ್ರಮಾಂಕ 76/2026 ರಂತೆ ಕಲಂ: 316(2), 318(4) ಜೊತೆಗೆ 3(5) BNS ರಂತೆ ಪ್ರಕರಣ ದಾಖಲಿಸಿಕೊಂಡು ತನಿಖೆ ಮುಂದುವರಿಸಲಾಗಿದೆ. ಪೊಲೀಸರು ಆರೋಪಿಗಳ ಪತ್ತೆಗೆ ಬಲೆ ಬೀಸಿದ್ದಾರೆ.

ವರದಿ: ಉಡುಪಿ ಅಪರಾಧ ವಿಭಾಗ