ಬೈಂದೂರು: ಶಿರೂರು ಗ್ರಾಮದ ಸುಮತಿ (36) ಅವರು ತಮ್ಮ ಪತಿ ಮತ್ತು ಮನೆಯ ಸದಸ್ಯರ ವಿರುದ್ಧ ಗಂಭೀರ ಆರೋಪಗಳನ್ನು ಮಾಡಿರುವ ಘಟನೆ ಬೆಳಕಿಗೆ ಬಂದಿದೆ. 07/04/2014 ರಂದು ಹಿಂದೂ ಬಂಟ್ಸ್ ಸಮುದಾಯದ ಸಂಪ್ರದಾಯದಂತೆ ಚಿತ್ತೂರು ಮಾರಣಕಟ್ಟೆ ವಾಸುಕಿ ಸಭಾಭವನದಲ್ಲಿ ರಾಘವೇಂದ್ರ ಶೆಟ್ಟಿ ಅವರೊಂದಿಗೆ ವಿವಾಹವಾಗಿದ್ದರು.

ಮದುವೆಗೆ ಮೊದಲು ಆರೋಪಿಗಳ ಬೇಡಿಕೆಯಂತೆ ಸುಮತಿ ಅವರ ಕುಟುಂಬವು 30 ಪವನ್ ಚಿನ್ನವನ್ನು ನೀಡಿದ್ದು, ಬಳಿಕ ಅವರು ಗಂಡನ ಮನೆಯಲ್ಲಿ ವೈವಾಹಿಕ ಜೀವನ ನಡೆಸುತ್ತಿದ್ದರು. ಈ ವೇಳೆ ಮನೆಯ ಇತರೆ ಸದಸ್ಯರು ಸಹ ವಾಸವಾಗಿದ್ದರು.
08/06/2018 ರಂದು ಗಂಡು ಮಗು ಜನಿಸಿದ ನಂತರ, ಪತಿ ರಾಘವೇಂದ್ರ ಶೆಟ್ಟಿ, ಕರುಣಾಕರ ಶೆಟ್ಟಿ ಮತ್ತು ನಾಗೇಂದ್ರ ಶೆಟ್ಟಿ ಅವರ ಪ್ರೇರಣೆಯಿಂದ ಪಾರ್ವತಿ ಶೆಟ್ಟಿ ಮತ್ತು ಸುಮಲತಾ ಅವರು ಹೆಚ್ಚುವರಿ ವರದಕ್ಷಿಣೆ ಹಣಕ್ಕಾಗಿ ಸುಮತಿ ಅವರಿಗೆ ನಿರಂತರವಾಗಿ ಮಾನಸಿಕ ಹಾಗೂ ದೈಹಿಕ ಹಿಂಸೆ ನೀಡುತ್ತಿದ್ದರೆಂದು ದೂರಲಾಗಿದೆ .
ಇದೇ ವೇಳೆ, ಮದುವೆಯ ಸಮಯದಲ್ಲಿ ತಂದ ಚಿನ್ನಾಭರಣಗಳನ್ನು ಪತಿ ಬ್ಯಾಂಕ್‌ನಲ್ಲಿ ಅಡವಿರಿಸಿ ಸಾಲ ಪಡೆದಿದ್ದು, ಇದುವರೆಗೆ ಬಿಡುಗಡೆ ಮಾಡದೇ ಕಿರುಕುಳ ನೀಡುತ್ತಿದ್ದರೆಂದು ಆರೋಪಿಸಲಾಗಿದೆ. ಈ ಕುರಿತು ಪ್ರಶ್ನಿಸಿದಾಗ ಅವಾಚ್ಯ ಶಬ್ದಗಳಿಂದ ನಿಂದನೆ ಮಾಡಲಾಗುತ್ತಿತ್ತಂತೆ.
ಎರಡನೇ ಹೆರಿಗೆಗಾಗಿ ತವರು ಮನೆಗೆ ಬಂದಿದ್ದ ಸುಮತಿ, 01/03/2026 ರಂದು ಮಕ್ಕಳೊಂದಿಗೆ ವೈವಾಹಿಕ ಮನೆಗೆ ಹೋದಾಗ, ಆರೋಪಿಗಳು ಮನೆಯೊಳಗೆ ಪ್ರವೇಶಿಸಲು ಬಿಡದೇ ಹೊರಗೆ ತಳ್ಳಿ, ಕೋಲಿನಿಂದ ಹಲ್ಲೆ ಮಾಡಿ ಕೊಲೆ ಬೆದರಿಕೆ ಹಾಕಿದ್ದಾರೆಂದು ತಿಳಿಸಿದ್ದಾರೆ.
ಮುಂದುವರೆದು, 06/03/2026 ರಂದು ಸಂಜೆ 7:30ರ ಸುಮಾರಿಗೆ, ಪತಿ ತವರು ಮನೆಗೆ ಬಂದು ಜಗಳವಾಡಿ ಸುಮತಿ ಮೇಲೆ ದೈಹಿಕ ಹಲ್ಲೆ ನಡೆಸಿದಷ್ಟೇ ಅಲ್ಲದೆ, ಅವರನ್ನು ರಕ್ಷಿಸಲು ಬಂದ ತಾಯಿ ಮತ್ತು ದೊಡ್ಡಮ್ಮನ ಮೇಲೂ ಹಲ್ಲೆ ಮಾಡಿ ಬೆದರಿಕೆ ಹಾಕಿರುವುದಾಗಿ ದೂರಿನಲ್ಲಿ ತಿಳಿಸಲಾಗಿದೆ.
ಈ ಹಿನ್ನೆಲೆಯಲ್ಲಿ ಬೈಂದೂರು ಪೊಲೀಸ್ ಠಾಣೆಯಲ್ಲಿ ಅಪರಾಧ ಕ್ರಮಾಂಕ 32/2026ರಡಿ ಕಲಂ 85, 115(2), 118(1), 352, 351(2) ಜೊತೆಗೆ BNS 3(5) ಮತ್ತು ಡಿಪಿ ಕಾಯ್ದೆಯ 3 ಹಾಗೂ 4ರಡಿ ಪ್ರಕರಣ ದಾಖಲಾಗಿದ್ದು, ಪೊಲೀಸರು ತನಿಖೆ ಮುಂದುವರೆಸಿದ್ದಾರೆ.

Also Read ಅಲ್ಪಸಂಖ್ಯಾತರ ಘಟಕ ಬರ್ಕಾಸ್ತು- ಡಿಕೆ ಶಿವಕುಮಾರ್ ಗಟ್ಟಿ ನಿರ್ಧಾರ.

##EndDowrySystem##StopDomesticViolence##WomenRights#marital dispute