ಕಾರ್ಕಳ: ಇಲ್ಲಿನ ಪೊಲೀಸ್ ಠಾಣೆಯಲ್ಲಿ ಸಾಮಾಜಿಕ ತಾಣವಾದ ಇನ್ಸ್ಟ್ರಾಗ್ರಾಂ ಮೂಲಕ ಪರಿಚಯಿಸಿಕೊಂಡ ವ್ಯಕ್ತಿಯು, ಹಂತ ಹಂತವಾಗಿ ಹಣ ಪಡೆದು ವಂಚಿಸಿದ್ದಾನೆಂದು ಕರ್ಕಳ ಮೂಲದ ಗಣೇಶ್ ಆಚಾರ್ಯ ಎಂಬವರು ಸುಜನ್ ಶೆಟ್ಟಿ ಸಿದ್ದಾಪುರ ಎಂಬಾತನ ವಿರುದ್ಧ ಪ್ರಕರಣ ದಾಖಲಿಸಿದ್ದಾರೆ. ಪ್ರಕರಣದ ದೂರುದಾರರ ವಿಚಾರವಾಗಿಯೂ ಶಂಕೆ ವ್ಯಕ್ತವಾಗುತ್ತಿದೆ.

ಗಣೇಶ ಆಚಾರ್ಯ ಎಂಬ ವ್ಯಕ್ತಿಯ ದೂರಿನ ಮೇರೆಗೆ ಕಾರ್ಕಳ ಗ್ರಾಮಾಂತರ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.

ಆರೋಪಿಯು ಇನ್ ಸ್ಟ್ರಾಗ್ರಾಂ ಮೂಲಕ ಪರಿಚಯ ಮಾಡಿಕೊಂಡು, ವಿವಿಧ ಕಾರಣಗಳನ್ನು ನೀಡಿ 2024 ರಿಂದ 26ರ ಏಪ್ರಿಲ್ ವರೆಗೆ ಹಂತಹಂತವಾಗಿ ಗಣೇಶ್ ಆಚಾರ್ಯರಿಂದ ಒಟ್ಟು 25 ಲಕ್ಷದ 66ಸಾವಿರ ರೂ ಹಣವನ್ನು ತಮ್ಮ ಖಾತೆಗೆ ವರ್ಗಾವಣೆ ಮಾಡಿಸಿಕೊಂಡು, ವಾಪಾಸು ಕೊಡದೇ ಮೋಸ ಮಾಡಿದ್ದಾನೆ ಅನ್ನುವುದು ಅವರು ಕೊಟ್ಟ ದೂರಿನ ಸಾರಾಂಶ.

ಯಾರಾದರೂ ಸಾಮಾಜಿಕ ತಾಣದಲ್ಲಿ ಪರಿಚಿತರಾದವರಿಗೆ, ಇಷ್ಟು ದೊಡ್ಡ ಮೊತ್ತವನ್ನು ಸಾಲದ ರೂಪದಲ್ಲಿ ನೀಡುತ್ತಾರಾ? ಏನೇ ಸಹಾಯ, ಮಾನವೀಯ ದೃಷ್ಟಿ ಅಂತಂದ್ರೂ ಅದಕ್ಕೂ ಒಂದು ಮಿತಿ ಅಂತ ಇದೆ. ಎರಡು ವರ್ಷಗಳ ಕಾಲ ಕಾಲೇಜು ಫೀಸು, ಲ್ಯಾಪ್ಟಾಪ್ ರಿಪೇರಿ, ಕೃಷಿ ಸಾಲ ಕಟ್ಟಲು, ಆರೋಗ್ಯದ ಸಮಸ್ಯೆ ಇಂತಹ ಒಂದಲ್ಲ ಒಂದು ನೆಪಗಳ ಮೂಲಕ ದೂರುದಾರರಿಂದ 25 ಲಕ್ಷದಷ್ಟು ಹಣವನ್ನು ಪಡೆಡಿದ್ದಾನೆ ಎಂದರೆ, ಇದುಯಾರ ತಪ್ಪು? ಪಡೆದುಕೊಂಡವರ ತಪ್ಪೋ ಕೊಟ್ಟವರ ತಪ್ಪೋ? ಕೊಟ್ಟವ ಕೊಡಂಗಿ ಇಸ್ಕೊಂಡವ ವೀರಭದ್ರ ಅಂತಾರಲ್ವಾ , ಇದು ಹಾಗೆ ತಾನೇ?

ಇಲ್ಲಿ ಬೇರೇನೋ ವ್ಯವಹಾರ ನಡೆದಿರುವ ಶಂಕೆ ಇದೆ. ಅದನ್ನು ಮುಚ್ಚಿಟ್ಟು ದೂರುದಾರರು ಈ ರೀತಿಯ ದೂರನ್ನು ಕೊಟ್ಟಿರಬಹುದು ಎಂಬ ಅನುಮಾನವೂ ಇದೆ. ಯಾಕಂದ್ರೆ, ಈ ರೀತಿಯಲ್ಲಿ ಎರಡು ವರ್ಷದಿಂದ ಅಪರಿಚಿತ ಅಂದರೆ ಸಾಮಾಜಿಕ ತಾಣಗಳ ಮೂಲಕ ಪರಿಚಯವಾದ ವ್ಯಕ್ತಿಗೆ ಇಷ್ಟು ದೊಡ್ಡ ಪ್ರಮಾಣದಲ್ಲಿ ಹಣ ನೀಡಲು ಹೇಗೆ ಸಾಧ್ಯ? ದೂರುದಾರರು ಸತ್ಯವನ್ನು ಮುಚ್ಚಿಟ್ಟು ಬೇರೆ ಆಂಗಲ್ ನಲ್ಲಿ ದೂರು ಕೊಟ್ಟಂತೆ ಕಾಣುತ್ತಿದೆ. ಅದೇನೇ ಆದರೂ, ತನಿಖೆಯ ನಂತರ ಸತ್ಯ ಹೊರಬರುತ್ತದೆ.