ನೇರ ಮಾತು, ತೀಕ್ಷ್ಣ ಟೀಕೆ ಮತ್ತು ವಿವಾದಾತ್ಮಕ ಹೇಳಿಕೆಗಳಿಗೆ ಹೆಸರುವಾಸಿಯಾದ ನಟ ಪ್ರಕಾಶ್ ರಾಜ್ ಮತ್ತೊಮ್ಮೆ ದೇಶದಾದ್ಯಂತ ಚರ್ಚೆಗೆ ಕಾರಣವಾಗಿದ್ದರು. ಪತ್ರಿಕಾಗೋಷ್ಠಿಯೊಂದರಲ್ಲಿ ಮಾತನಾಡುವ ವೇಳೆ ಅವರು ಕೆಲ ಮಾಧ್ಯಮಗಳನ್ನು ಉದ್ದೇಶಿಸಿ “ಮಾರಿಕೊಂಡ ಮಾಧ್ಯಮ ” (ಮಾರಾಟವಾದ ಮಾಧ್ಯಮ) ಎಂದು ಹೇಳಿದ್ದ ಮಾತು ಭಾರೀ ಸಂಚಲನ ಸೃಷ್ಟಿಸಿತ್ತು.

ಬೆಂಗಳೂರು, ಬುಧವಾರ: ನಟ ಹಾಗೂ ಸಾಮಾಜಿಕ ಕಾರ್ಯಕರ್ತ ಪ್ರಕಾಶ್ ರಾಜ್ ಅವರು ಬೆಂಗಳೂರು ಪ್ರೆಸ್ ಕ್ಲಬ್‌ನಲ್ಲಿ ನಡೆಸಿದ ಪತ್ರಿಕಾಗೋಷ್ಠಿ, ವಿವಾದಕ್ಕೆ ಕಾರಣವಾಯಿತು. ಬೆಳಗ್ಗೆ 10.30ಕ್ಕೆ ಆರಂಭವಾದ ಕಾರ್ಯಕ್ರಮ, ಪತ್ರಕರ್ತರ ಜೊತೆಗಿನ ಜಟಾಪಟಿಯಿಂದಾಗಿ ಮಧ್ಯಾಹ್ನ 12 ಗಂಟೆಯವರೆಗೆ ಗೊಂದಲದಲ್ಲಿ ಕಳೆಯಿತು.

ಜಟಾಪಟಿ ಹೇಗಾಯ್ತು?
ಪ್ರಕಾಶ್ ರಾಜ್ ಅವರು ತಮ್ಮ ಭಾಷಣದಲ್ಲಿ “ಮಾರಿಕೊಂಡ ಮಾಧ್ಯಮದವರು ಇದಾರೆ” ಎಂದು ಪರೋಕ್ಷವಾಗಿ ಟೀಕೆ ಮಾಡಿದರು. ಇದಕ್ಕೆ ಪತ್ರಕರ್ತರು ತಕ್ಷಣ ಪ್ರತಿಕ್ರಿಯಿಸಿ, “ಸರ್, ಮಾರಿಕೊಂಡ ಮಾಧ್ಯಮದವರು ಯಾರು? ಹೆಸರು ಹೇಳಿ” ಎಂದು ಪ್ರಶ್ನಿಸಿದರು.

ಪತ್ರಕರ್ತರ ಪ್ರಶ್ನೆಗೆ ಪ್ರಕಾಶ್ ರಾಜ್, ಉತ್ತರ ಹೇಳಲು ತಡಬಡಾಯಿಸಿದರು”ನಾನು ನಿಮಗೆ ಹೇಳಿದ್ದಲ್ಲ” ಎಂದು ತೇಪೆ ಹಾಕಲು ಪ್ರಯತ್ನಿಸಿದರು. ಪತ್ರಕರ್ತರು ಮತ್ತೆ ಅದೇ ಉತ್ತರಕ್ಕಾಗಿ ಆಗ್ರಹಿಸಿದಾಗ, “ಇನ್ಯಾರಿಗೆ ಹೇಳಿದ್ದು? ಹೆಸರು ಹೇಳಿ” ಎಂದು ಒತ್ತಾಯಿಸಿದರು. ಇದಕ್ಕೆ ಪ್ರಕಾಶ್ ರಾಜ್, “ಅದು ನಿಮಗೇ ಗೊತ್ತಿದೆ” ಎಂದು ಹೇಳಿದರು. “ಹೆಸರು ಹೇಳಿ” ಎಂಬ ಪತ್ರಕರ್ತರ ಪಟ್ಟಿಗೆ ಕೊನೆಗೆ “ನೀವಲ್ಲ..” ಎಂದು ಮಾತ್ರ ಉತ್ತರಿಸಿದರು.

12 ಗಂಟೆ ಬಳಿಕ ಏನಾಯ್ತು?
1.5 ಗಂಟೆ ಜಟಾಪಟಿ ಬಳಿಕ ಪ್ರಕಾಶ್ ರಾಜ್ ಅವರು ಧರ್ಮಸ್ಥಳ ಬುರುಡೆ ಪ್ರಕರಣ ಹಾಗೂ ಚಿನ್ನಪ್ಪ ವಿಚಾರದ ಬಗ್ಗೆ ಮಾತನಾಡಿದರು. ಆದರೆ ಪತ್ರಕರ್ತರು ನಿರೀಕ್ಷಿಸಿದಂತೆ ಯಾವುದೇ ಸ್ಪಷ್ಟ ಉತ್ತರ ಸಿಗಲಿಲ್ಲ.

ಸಭೆ ಮುಗಿದ ಬಳಿಕ ಹಾಜರಿದ್ದ ಪತ್ರಕರ್ತರೊಬ್ಬರು, “ಬೆಟ್ಟ ಅಗೆದು ಇಲಿಯೂ ಹಿಡಿಯಲಿಲ್ಲ” ಎಂದು ವ್ಯಂಗ್ಯವಾಡಿದರು.

ಪ್ರಕಾಶ್ ರಾಜ್ ಅವರು ಈ ಹಿಂದೆಯೂ “ಹಾಫ್ ಆಫ್ ಬಾಲಿವುಡ್ ಸೋಲ್ಡ್” ಮತ್ತು “ಮೀಡಿಯಾ ಆರ್ಗನೈಸ್ಡ್ ಆಗಿ ಖರೀದಿಯಾಗ್ತಿದೆ” ಎಂದು ಆರೋಪ ಮಾಡಿದ್ದರು. ಆದರೆ ಯಾವತ್ತೂ ನಿರ್ದಿಷ್ಟ ಹೆಸರು ಬಹಿರಂಗಪಡಿಸಿಲ್ಲ. ಒಂದು ತರ ಹಿಟ್ ಅಂಡ್ ರನ್ ಮಾಡಿದರು.

ಪ್ರಕಾಶ್ ರಾಜ್ ಅವರ ಆರೋಪ ಏನಂದರೆ, ಕೆಲವು ಮಾಧ್ಯಮ ಸಂಸ್ಥೆಗಳು ಅಧಿಕಾರದಲ್ಲಿರುವವರ ಪರವಾಗಿ ಮಾತ್ರ ಸುದ್ದಿಗಳನ್ನು ಪ್ರಸಾರ ಮಾಡುತ್ತಿವೆ. ಸರ್ಕಾರದ ವಿರುದ್ಧದ ಪ್ರಶ್ನೆಗಳು, ಭಿನ್ನಾಭಿಪ್ರಾಯಗಳು ಅಥವಾ ವಿರೋಧದ ಧ್ವನಿಗಳಿಗೆ ಬೇಕಾದಷ್ಟು ಪ್ರಾಮುಖ್ಯತೆ ನೀಡುತ್ತಿಲ್ಲ ಎಂಬುದು ಅವರ ವಾದವಾಗಿತ್ತು. “ನಾನು ಪತ್ರಿಕಾಗೋಷ್ಠಿ ನಡೆಸಿದರೂ ಕೆಲವು ಚಾನೆಲ್‌ಗಳು ಅದನ್ನು ತೋರಿಸುವುದೇ ಇಲ್ಲ” ಎಂದು ಅವರು ಬೇಸರ ವ್ಯಕ್ತಪಡಿಸಿದ್ದರು.

ಈ ಹೇಳಿಕೆ ಹೊರಬಿದ್ದ ತಕ್ಷಣ ಸಾಮಾಜಿಕ ಜಾಲತಾಣಗಳಲ್ಲಿ ಎರಡು ಬಣಗಳು ನಿರ್ಮಾಣವಾದವು. ಒಂದು ಕಡೆ ಪ್ರಕಾಶ್ ರಾಜ್ ಮಾತನ್ನು ಬೆಂಬಲಿಸಿದವರು, “ಮಾಧ್ಯಮ ಸ್ವಾತಂತ್ರ್ಯ ಅಪಾಯದಲ್ಲಿದೆ” ಎಂದು ವಾದಿಸಿದರು. ಮತ್ತೊಂದು ಕಡೆ ಅವರ ವಿರುದ್ಧ ಆಕ್ರೋಶ ವ್ಯಕ್ತಪಡಿಸಿದವರು, “ಎಲ್ಲ ಮಾಧ್ಯಮಗಳನ್ನು ಒಂದೇ ತಕ್ಕಡಿಯಲ್ಲಿ ತೂಗುವುದು ಸರಿಯಲ್ಲ” ಎಂದು ಟೀಕಿಸಿದರು.

ರಾಜಕೀಯ ವಿಚಾರಗಳಲ್ಲಿ ಮುಕ್ತವಾಗಿ ಮಾತನಾಡುವ ಪ್ರಕಾಶ್ ರಾಜ್, ಪ್ರಧಾನಿ ನರೇಂದ್ರ ಮೋದಿ ಮತ್ತು ಕೇಂದ್ರ ಸರ್ಕಾರದ ಕೆಲವು ನೀತಿಗಳ ವಿರುದ್ಧ ಹಲವಾರು ಬಾರಿ ಧ್ವನಿ ಎತ್ತಿದ್ದಾರೆ. ಇದರಿಂದ ಅವರ ಪ್ರತಿಯೊಂದು ಹೇಳಿಕೆಯೂ ರಾಜಕೀಯ ಚರ್ಚೆಗೆ ಕಾರಣವಾಗುತ್ತದೆ “ಮಾರಿಕೊಂಡ ಮಾಧ್ಯಮ ” ಹೇಳಿಕೆಯೂ ಅದಕ್ಕೆ ಹೊರತಾಗಿರಲಿಲ್ಲ.

ಆಸಕ್ತಿಕರ ಸಂಗತಿಯೆಂದರೆ, ಈ ಒಂದು ಪದವೇ ದೇಶದಾದ್ಯಂತ ಮಾಧ್ಯಮಗಳ ಪಾತ್ರ, ಪತ್ರಿಕೋದ್ಯಮದ ಸ್ವಾತಂತ್ರ್ಯ ಮತ್ತು ಸುದ್ದಿಗಳ ನಿಷ್ಪಕ್ಷಪಾತತೆ ಬಗ್ಗೆ ದೊಡ್ಡ ಚರ್ಚೆಗೆ ನಾಂದಿ ಹಾಡಿತ್ತು. ಕೆಲವರಿಗೆ ಅದು ಕಠಿಣ ಸತ್ಯವಾಗಿ ಕಂಡರೆ, ಇನ್ನೂ ಕೆಲವರಿಗೆ ಅದು ಅತಿರೇಕದ ಆರೋಪವಾಗಿ ಕಾಣಿಸಿತು.

. ಒಂದು ಹೇಳಿಕೆ ಹೇಗೆ ರಾಷ್ಟ್ರಮಟ್ಟದ ವಿವಾದವಾಗಿ ಬದಲಾಗಬಹುದು ಎಂಬುದಕ್ಕೆ ಇದು ಪ್ರಮುಖ ಉದಾಹರಣೆಯಾಗಿದೆ.