ಸುಳ್ಯ ಪಟ್ಟಣದ ಶ್ರೀರಾಮ್ ಪೇಟೆಯಲ್ಲಿರುವ ಬಾರ್‌ನಲ್ಲಿ ಯುವಕನ ಮೇಲೆ ಚೂರಿಯಿಂದ ದಾಳಿ ನಡೆಸಿ ಕೊಲೆ ಮಾಡಲು ಯತ್ನಿಸಿದ ಘಟನೆ ಮಾರ್ಚ್ 14ರಂದು ಸಂಜೆ ನಡೆದಿದೆ. ಈ ಸಂಬಂಧ ಸುಳ್ಯ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.

ಪೊಲೀಸರ ಮಾಹಿತಿ ಪ್ರಕಾರ, ಬಂಟ್ವಾಳ ತಾಲೂಕಿನ ಕನ್ಯಾನ ಗ್ರಾಮದ ಜನತಾ ಕಾಲೋನಿಯ ನಿವಾಸಿ ನಿತೇಶ್ ಆರ್.ಕೆ (33) ಅವರು ಸುಳ್ಯ ಕಸಬಾ ಗ್ರಾಮದ ಸುಳ್ಯ ಪೇಟೆಯ ಸಂಗಮ್ ಬಿಲ್ಡಿಂಗ್‌ನ ಬಾಡಿಗೆ ಕೊಠಡಿಯಲ್ಲಿ ವಾಸವಾಗಿದ್ದು ಪೇಂಟಿಂಗ್ ಕೆಲಸ ಮಾಡಿಕೊಂಡಿದ್ದಾರೆ.

ಮಾರ್ಚ್ 14ರಂದು ನಿತೇಶ್ ಅವರು ತಮ್ಮ ಸ್ನೇಹಿತ ಹರೀಶ್ ಜೊತೆ ಸುಳ್ಯ ಸಮೀಪದ ಅರಂಬೂರು ಪ್ರದೇಶದಲ್ಲಿ ಪೇಂಟಿಂಗ್ ಕೆಲಸ ಮುಗಿಸಿಕೊಂಡು ಸಂಜೆ ಸುಮಾರು 5 ಗಂಟೆ ಸುಮಾರಿಗೆ ಶ್ರೀರಾಮ್ ಪೇಟೆಯಲ್ಲಿರುವ ರಾಜೇಶ್ ಬಾರ್‌ಗೆ ತೆರಳಿ ವಾರದ ಲೆಕ್ಕಾಚಾರ ಮಾಡುತ್ತಿದ್ದರು. ಆ ವೇಳೆ ಹರೀಶ್ ಲೆಕ್ಕಾಚಾರದ ಪುಸ್ತಕದಲ್ಲಿ ವಿವರಗಳನ್ನು ಬರೆಯುತ್ತಿದ್ದರು.

ಸುಮಾರು ಸಂಜೆ 5.45ರ ವೇಳೆಗೆ ಬಾರ್‌ನಲ್ಲಿ ಇದ್ದ ಇಬ್ಬರು ಯುವಕರು ನಿತೇಶ್ ಅವರ ಬಳಿಗೆ ಬಂದು ಏಕಾಏಕಿ ಜಗಳಕ್ಕೆ ಮುಂದಾದರು. ಅವರಲ್ಲಿ ಒಬ್ಬನು ತನ್ನ ಕೈಯಲ್ಲಿ ಹಿಡಿದಿದ್ದ ಚೂರಿಯಿಂದ ಹರೀಶ್ ಅವರನ್ನು ಕೊಲ್ಲುವ ಉದ್ದೇಶದಿಂದ ಕುತ್ತಿಗೆಗೆ ಕೊಯ್ಯಲು ಯತ್ನಿಸಿದ್ದಾನೆ. ಈ ವೇಳೆ ಹರೀಶ್ ಚೂರಿಯನ್ನು ಹಿಡಿದು ತಡೆಯಲು ಪ್ರಯತ್ನಿಸಿದ್ದು, ನಿತೇಶ್ ಕೂಡ ಬಲವಾಗಿ ಚೂರಿಯನ್ನು ಹಿಡಿದುಕೊಂಡು ತಡೆಯಲು ಯತ್ನಿಸಿದ್ದಾರೆ.

ಆದರೂ ದಾಳಿಕೋರನು ಚೂರಿಯಿಂದ ಹರೀಶ್ ಅವರ ಎಡ ಕುತ್ತಿಗೆಗೆ ಕೊಯ್ದ ಪರಿಣಾಮ ರಕ್ತ ಗಾಯವಾಗಿದೆ. ಅಲ್ಲದೆ, ಚೂರಿಯನ್ನು ತಡೆಯುವ ವೇಳೆ ನಿತೇಶ್ ಮತ್ತು ಹರೀಶ್ ಅವರ ಎಡ ಕೈಗಳ ಅಂಗೈಗಳಿಗೆ ಕೂಡ ಗಾಯಗಳಾಗಿವೆ. ನೋವಿನಿಂದ ಇಬ್ಬರೂ ಬೊಬ್ಬೆ ಹಾಕುತ್ತಿದ್ದಂತೆ ಬಾರ್‌ನಲ್ಲಿ ಇದ್ದ ಇತರರು ಮಧ್ಯಪ್ರವೇಶಿಸಿ ಹೆಚ್ಚಿನ ಹಲ್ಲೆ ನಡೆಯದಂತೆ ತಡೆದಿದ್ದಾರೆ.

ನಂತರ ಗಾಯಗೊಂಡ ಇಬ್ಬರನ್ನು ತಕ್ಷಣ ಸುಳ್ಯ ಸರ್ಕಾರಿ ಆಸ್ಪತ್ರೆಗೆ ಕರೆದೊಯ್ದು ಚಿಕಿತ್ಸೆ ಕೊಡಿಸಲಾಗಿದೆ.

ಬಳಿಕ ದಾಳಿ ನಡೆಸಿದವರ ಹೆಸರು ಹಾಗೂ ವಿಳಾಸ ಪತ್ತೆಯಾಗಿದ್ದು, ಸುಳ್ಯ ತಾಲೂಕು ಅಜ್ಜಾವರ ಗ್ರಾಮದ ಗಂಧದಗುಡ್ಡೆ ಕಾಂತಮಂಗಲ ನಿವಾಸಿಗಳಾದ ರಾಜೇಶ್ ಬಿ.ಆರ್ (27) ಮತ್ತು ದಯಾನಂದ್ (30) ಎಂಬವರಾಗಿದ್ದಾರೆ ಎಂದು ತಿಳಿದುಬಂದಿದೆ. ಅವರು ಹರೀಶ್ ಅವರ ಕುತ್ತಿಗೆಗೆ ಚೂರಿಯಿಂದ ಕೊಯ್ದು ಕೊಲೆ ಮಾಡಲು ಪ್ರಯತ್ನಿಸಿರುವುದಾಗಿ ದೂರಿನಲ್ಲಿ ಹೇಳಲಾಗಿದೆ.

ಆದರೆ ಆರೋಪಿಗಳು ಹರೀಶ್ ಅವರನ್ನು ಯಾವ ಕಾರಣಕ್ಕೆ ಕೊಲೆ ಮಾಡಲು ಯತ್ನಿಸಿದರು ಎಂಬುದು ಇನ್ನೂ ತಿಳಿದುಬಂದಿಲ್ಲ. ಈ ಸಂಬಂಧ ಸುಳ್ಯ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ಸಂಖ್ಯೆ 31/2026ರಡಿ BNS 2023ರ 118(1), 109 ಮತ್ತು 3(5) ಕಲಂಗಳ ಅಡಿಯಲ್ಲಿ ಪ್ರಕರಣ ದಾಖಲಾಗಿದ್ದು, ಪೊಲೀಸರು ಮುಂದಿನ ತನಿಖೆ ನಡೆಸುತ್ತಿದ್ದಾರೆ.