ಹಳಿಯಾಳ ವಿಧಾನಸಭಾ ಕ್ಷೇತ್ರದ ವ್ಯಾಪ್ತಿಯಲ್ಲಿ ಹಾಲಿ ಶಾಸಕ ಆರ್ ವಿ ದೇಶಪಾಂಡೆ ಅವರ ವಿರುದ್ಧ ಜನಾಕ್ರೋಶ ಏರ್ಪಡುತ್ತಿದೆ.

ರೈತರಿಗೆ ನೀರಿನ ಸಮಸ್ಯೆ ವಿಪರೀತವಾಗಿ ಕಾಡಲಾರಂಭಿಸಿರುವುದರಿಂದಾಗಿ 9 ಬಾರಿ ಈ ಕ್ಷೇತ್ರವನ್ನು ಆಳಿದ ಆರ್ ವಿ ದೇಶಪಾಂಡೆ ವಿರುದ್ಧ ಜನರ ಆಕ್ರೋಶ ಹುಟ್ಟಿಕೊಂಡಿದೆ. ಅದರ ಪರಿಣಾಮ ಯುವ ನಾಯಕ ಕುಮಾರ್ ಬೊಬಟಿ ನೇತೃತ್ವದಲ್ಲಿ ಮಾರ್ಚ್ 16ರಂದು ಬೃಹತ್ ಪ್ರತಿಭಟನೆಗೆ ಹಳಿಯಾಳ ಸಜ್ಜಾಗುತ್ತಿದೆ.

ರೈತರು, ನೀರಿನ ಸಮಸ್ಯೆಯಿಂದಾಗಿ ಕೃಷಿ ಕಾರ್ಯಕ್ಕೆ ತೊಂದರೆ ಅನುಭವಿಸುತ್ತಿದ್ದಾರೆ. ಕೆಲವೇ ಕಿಲೋಮೀಟರ್ ದೂರದಲ್ಲಿ ದಾಂಡೇಲಿ ಇದೆ. ಅಲ್ಲಿನಿಂದ ನೀರನ್ನು ಹಳಿಯಾಳದ ಸುತ್ತಮುತ್ತಲಿನ ಕೃಷಿ ಚಟುವಟಿಕೆಗಾಗಿ ತರುವಂತಹ ಕೆಲಸವನ್ನು ಮಾಡಬಹುದಿತ್ತು. ಅದ್ಯಾವುದನ್ನು ಮಾಡದೆ, ಕೇವಲ ಶೋ ರಾಜಕಾರಣ ಮಾಡಿಕೊಂಡಿದ್ದಾರೆ. ಈ ತರಹದ ನಡವಳಿಕೆ ಇನ್ನು ನಡೆಯುವುದಿಲ್ಲ . ಹಳಿಯಾಳದ ರೈತರಿಗೆ ನೀರು ಬೇಕು. ಅದನ್ನು ಕೊಡಲಾಗದಿದ್ದರೆ ಮೊದಲು ರಾಜೀನಾಮೆ ಕೊಟ್ಟು ಮನೆಗೆ ಹೋಗಿ ಎಂದು ಖಡಕ್ಕಾಗಿ ಕುಮಾರ್ ಬೊಬಾಟೆ ತಾಕೀತು ಮಾಡಿದ್ದಾರೆ.

ಯುವ ರೈತನಾಯಕ ಹಳಿಯಾಳದ ರೈತ ಮುಖಂಡರ ಜೊತೆ ಪತ್ರಿಕಾಗೋಷ್ಠಿಯಲ್ಲಿ ಮಾತನಾಡುತ್ತಾ, ಮಾರ್ಚ್ 16ರಂದು ನೀರಿಗಾಗಿ ನಾವು ಪ್ರತಿಭಟನೆ ಮಾಡುತ್ತಿದ್ದೇವೆ. ಶೋ ರಾಜಕಾರಣವನ್ನು ಇಲ್ಲಿಗೆ ನಿಲ್ಲಿಸಿ ದೇಶಪಾಂಡೆ ಅವರೇ, ನಾವು ರೈತರು ಆಕ್ರೋಶಗೊಳ್ಳದಂತೆ ನೋಡಿಕೊಳ್ಳಿ. ರಕ್ತ ಕ್ರಾಂತಿಗೆ ಅವಕಾಶ ಮಾಡಿಕೊಡಬೇಡಿ. ನಿಮ್ಮಲ್ಲಿ ಕೆಲಸ ಮಾಡಲು ಆಗದಿದ್ದರೆ ಸೈಲೆಂಟಾಗಿ ರಾಜೀನಾಮೆ ಕೊಟ್ಟು ಮನೆಗೆ ಹೋಗಿಬಿಡಿ ಅದು ಬಿಟ್ಟು ಕೆಲಸ ಮಾಡದೆ ಆ ಕುರ್ಚಿಯಲ್ಲಿ ಕುಳಿತುಕೊಳ್ಳಲು ಇನ್ನು ನಾವಂತೂ ಬಿಡುವುದಿಲ್ಲ ಎಂಬ ಎಚ್ಚರಿಕೆಯನ್ನು ಕುಮಾರ್ ಬೊಬಾಟೆ, ಶಾಸಕ ಆರ್ ವಿ ದೇಶಪಾಂಡೆ ಅವರಿಗೆ ನೀಡಿದ್ದಾರೆ. ಈ ಸಂದರ್ಭದಲ್ಲಿ ನೂರಾರು ರೈತ ಮುಖಂಡರುಗಳು ಉಪಸ್ಥಿತರಿದ್ದರು.