ಮುಖವಾಡ ಧರಿಸಿದವರನ್ನು ನಂಬುವ ಮುನ್ನ ನೂರು ಬಾರಿ ಯೋಚಿಸಿ…!

Karavali Maruta | 2 months ago | 24 June 2026

ಲೋಹಗಢ ಕೋಟೆ ನಡುಕ: ಪ್ರೀತಿ ಹೆಸರಲ್ಲಿ ಭಾವಿ ಪತಿಯನ್ನೇ 400 ಅಡಿ ಪ್ರಪಾತಕ್ಕೆ ತಳ್ಳಿದ ಕ್ರೂರ ಕಥೆ!ಪ್ರಕೃತಿಯ ಸೌಂದರ್ಯ ನೋಡಲು ಹೋದವನು ಮನುಷ್ಯನ ವಿಕೃತ ಮನಸ್ಸಿಗೆ ಬಲಿಯಾದ!

ನಂಬಿಕೆ ಅನ್ನೋದು ಪ್ರತಿಯೊಂದು ಸಂಬಂಧದ ಜೀವಾಳ. ಅದರಲ್ಲೂ ಮದುವೆಯಾಗಲಿರುವ ಹೆಣ್ಣು ತನ್ನ ಬಾಳ ಸಂಗಾತಿಯನ್ನು ಕಣ್ಣಿನ ರೆಪ್ಪೆಯಂತೆ ಕಾಯುತ್ತಾಳೆ ಎಂಬ ನಂಬಿಕೆ ಎಲ್ಲರಲ್ಲಿದೆ. ಆದರೆ ಮಹಾರಾಷ್ಟ್ರದ ಪುಣೆಯಲ್ಲಿ ನಡೆದ ಈ ಘಟನೆ ಇಡೀ ಸಮಾಜ ತಲೆತಗ್ಗಿಸುವಂತೆ ಮಾಡಿದೆ. ಹಸೆಮಣೆ ಏರಬೇಕಾಗಿದ್ದ ಕೋಟ್ಯಧಿಪತಿ ಉದ್ಯಮಿ, 26 ವರ್ಷದ ಕೇತನ್ ವಿಶಾಲ್ ಅಗರ್ವಾಲ್ ಎಂಬ ಯುವಕನನ್ನು ಆತನ ಭಾವಿ ಪತ್ನಿಯೇ ಪ್ರಿಯಕರನೊಂದಿಗೆ ಸೇರಿ ಲೋಹಗಢ ಕೋಟೆಯ ೪೦೦ ಅಡಿ ಆಳದ ಪ್ರಪಾತಕ್ಕೆ ತಳ್ಳಿ ಕೊಲೆ ಮಾಡಿರುವ ಘಟನೆ ಈಗ ಇಡೀ ದೇಶವನ್ನೇ ಬೆಚ್ಚಿಬೀಳಿಸಿದೆ.

17 ಕೋಟಿಯ ಭವ್ಯ ಮದುವೆ ಕನಸು: ದುರಂತ ಅಂತ್ಯದ ಹಿನ್ನೆಲೆ

ಪುಣೆಯ ಪಿಂಪ್ರಿ-ಚಿಂಚವಾಡದ ಪ್ರಸಿದ್ಧ ರಿಯಲ್ ಎಸ್ಟೇಟ್ ಉದ್ಯಮಿ ವಿಶಾಲ್ ಅಗರ್ವಾಲ್ ಅವರ ಪುತ್ರ ಕೇತನ್, ವಿದೇಶದಲ್ಲಿ ಉನ್ನತ ಶಿಕ್ಷಣ ಮುಗಿಸಿ ತಂದೆಯ ವ್ಯವಹಾರ ಕೈಗೆತ್ತಿಕೊಂಡಿದ್ದರು. ಇವರಿಗೂ ಮತ್ತು ೨೦ ವರ್ಷದ ಸಿಯಾ ಗೋಯಲ್ ಎಂಬ ಯುವತಿಗೂ ಪೋಷಕರು ನಿಶ್ಚಿತಾರ್ಥ ಮಾಡಿಸಿದ್ದರು. ಬರುವ ನವೆಂಬರ್‌ನಲ್ಲಿ ರಾಜಸ್ಥಾನದ ಜೈಪುರದಲ್ಲಿ ಸುಮಾರು ೧೭ ಕೋಟಿ ರೂಪಾಯಿ ವೆಚ್ಚದಲ್ಲಿ ಅದ್ದೂರಿ ಅರಮನೆ ವಿವಾಹಕ್ಕೆ ಸಿದ್ಧತೆ ನಡೆದಿತ್ತು. ಅತಿಥಿಗಳನ್ನು ಕರೆತರಲು ಎರಡು ಖಾಸಗಿ ವಿಮಾನಗಳನ್ನೂ ಬುಕ್ ಮಾಡಲಾಗಿತ್ತು.

ಆದರೆ, ಹೊರನೋಟಕ್ಕೆ ಅದ್ಧೂರಿಯಾಗಿ ಕಾಣುತ್ತಿದ್ದ ಈ ಸಂಬಂಧದ ಹಿಂದೆ ಒಂದು ಭೀಕರ ಕರಾಳ ಸಂಚು ಅಡಗಿತ್ತು. ಸಿಯಾಗೆ ಚೇತನ್ ಬಾಬುಲಾಲ್ ಚೌಧರಿ (22) ಎಂಬ ಪ್ರಿಯಕರನಿದ್ದನು ಮತ್ತು ಆಕೆಗೆ ಈ ಅರೇಂಜ್ಡ್ ಮ್ಯಾರೇಜ್ ಇಷ್ಟವಿರಲಿಲ್ಲ.

ಜನ್ಮದಿನದ ನೆಪದಲ್ಲಿ ಮಸಣಕ್ಕೆ ಕರೆದೊಯ್ದ ಹೆಣ್ಣು!

ಜೂನ್ ೧೮ ರಂದು ಸಿಯಾಳ ಹುಟ್ಟುಹಬ್ಬವಿತ್ತು. ಭಾವಿ ಪತ್ನಿಯ ಹುಟ್ಟುಹಬ್ಬವನ್ನು ವಿಶೇಷವಾಗಿ ಆಚರಿಸಲು ಕೇತನ್ ತಿಂಗಳಿನಿಂದ ಭರಪೂರ ಸಿದ್ಧತೆ ಮಾಡಿಕೊಂಡಿದ್ದರು. ಸ್ನೇಹಿತರೊಂದಿಗೆ ಲೋನಾವಾಲಾ ಸಮೀಪದ ಲೋಹಗಢ ಕೋಟೆಗೆ ಟ್ರೆಕ್ಕಿಂಗ್ ಹೋಗಲು ಪ್ಲಾನ್ ಮಾಡಲಾಗಿತ್ತು. ಕೇತನ್ ಪ್ರೀತಿಯಿಂದ ಬಂದಿದ್ದರೆ, ಸಿಯಾ ಮಾತ್ರ ತನ್ನ ಪ್ರಿಯಕರ ಚೇತನ್‌ನೊಂದಿಗೆ ಸೇರಿ ಕೇತನ್‌ನನ್ನು ಮುಗಿಸಲು ಮೊದಲೇ ಸ್ಕೆಚ್ ಹಾಕಿದ್ದಳು.

ಕೋಟೆಯ ತುದಿಯಲ್ಲಿ ಕೇತನ್ ಫೋಟೋಗೆ ಪೋಸ್ ನೀಡುತ್ತಿದ್ದಾಗ, ಸಿಯಾ ಮತ್ತು ಆಕೆಯ ಪ್ರಿಯಕರ ಸೇರಿ ಆತನನ್ನು ೪೦೦ ಅಡಿ ಆಳದ ಕಂದಕಕ್ಕೆ ತಳ್ಳಿದ್ದಾರೆ. ಆರಂಭದಲ್ಲಿ, “ಕೇತನ್ ಫೋಟೋ ತೆಗೆದುಕೊಳ್ಳುವಾಗ ಕಾಲು ಜಾರಿ ಬಿದ್ದರು” ಎಂದು ಸಿಯಾ ಎಲ್ಲರನ್ನೂ ನಂಬಿಸಿ ನಾಟಕವಾಡಿದ್ದಳು. ಮೂರು ಗಂಟೆಗಳ ಕಷ್ಟದ ಕಾರ್ಯಾಚರಣೆಯ ನಂತರ ಕೇತನ್ ಶವ ಪತ್ತೆಯಾಗಿತ್ತು.

ಪೊಲೀಸರ ತನಿಖೆ ಮತ್ತು ಕರಾಳ ಸತ್ಯದ ಅನಾವರಣ

ಮೊದಲಿಗೆ ಇದು ಆಕಸ್ಮಿಕ ಅಪಘಾತ ಎಂದೇ ಭಾವಿಸಲಾಗಿತ್ತು. ಆದರೆ ಕೇತನ್ ತಂದೆ ವಿಶಾಲ್ ಅಗರ್ವಾಲ್ ಅವರಿಗೆ ಸಂಶಯ ಬಂದು ದೂರು ನೀಡಿದಾಗ, ಗ್ರಾಮಾಂತರ ಪೊಲೀಸರು ತನಿಖೆ ತೀವ್ರಗೊಳಿಸಿದರು.

ಮೊಬೈಲ್ ಮತ್ತು ಸೋಶಿಯಲ್ ಮೀಡಿಯಾ ದಾಖಲೆ: ಸಿಯಾ ಮತ್ತು ಚೇತನ್ ನಡುವಿನ ಚಾಟ್‌ಗಳು ಹಾಗೂ ಕರೆಗಳ ವಿವರಗಳನ್ನು ಪರಿಶೀಲಿಸಿದಾಗ ಪೊಲೀಸರಿಗೆ ಭಾರಿ ಇನ್ಫರ್ಮೇಷನ್ ಸಿಕ್ಕಿತು.
ವಿಚಾರಣೆಯಲ್ಲಿ ತಪ್ಪೊಪ್ಪಿಗೆ: ಪೊಲೀಸರು ತೀವ್ರವಾಗಿ ವಿಚಾರಣೆ ನಡೆಸಿದಾಗ ಸಿಯಾ ಮತ್ತು ಚೇತನ್ ಇಬ್ಬರೂ ತಮ್ಮ ತಪ್ಪು ಒಪ್ಪಿಕೊಂಡಿದ್ದಾರೆ.
ಮೊದಲೇ ನಡೆದಿತ್ತು ಕೊಲೆ ಯತ್ನ: ಜೂನ್ ೧೮ರ ಮುನ್ನ, ಅಂದರೆ ಜೂನ್ ೧೪ರಂದೂ ಇದೇ ಕೋಟೆಯ ತುದಿಯಿಂದ ಕೇತನ್‌ನನ್ನು ಸಿಯಾ ತಳ್ಳಿದ್ದಳು! ಆದರೆ ಅದೃಷ್ಟವಶಾತ್ ಕೇತನ್ ಮರವೊಂದನ್ನು ಹಿಡಿದು ಬದುಕುಳಿದಿದ್ದರು. ಆಗ ಸಿಯಾ, “ಅಲ್ಲಿ ಹಾವು ಇತ್ತು, ನಿನ್ನನ್ನು ಕಾಪಾಡಲು ತಳ್ಳಿದೆ” ಎಂದು ಸುಳ್ಳು ಹೇಳಿ ನಂಬಿಸಿದ್ದಳು ಎಂಬ ಆಘಾತಕಾರಿ ಸತ್ಯ ಈಗ ಹೊರಬಿದ್ದಿದೆ. ಪ್ರಸ್ತುತ ಪೊಲೀಸರು ಸಿಯಾ ಮತ್ತು ಆಕೆಯ ಪ್ರಿಯಕರನನ್ನು ಬಂಧಿಸಿದ್ದಾರೆ.

ಎತ್ತ ಸಾಗುತ್ತಿದೆ…. ಮಾನವೀಯತೆ? ತಾಳ್ಮೆ? ನಂಬಿಕೆ?ಪ್ರೀತಿ?ವಿಶ್ವಾಸ? ಅಂದ್ರೇನು ಅನ್ನುವಷ್ಟುರ ಮಟ್ಟಿಗೆ…?

ಹೆಣ್ಣನ್ನು ಸೃಷ್ಟಿಕರ್ತ ಪ್ರೀತಿ, ಕರುಣೆ, ಕ್ಷಮಾದಾತ್ರಿ ಮತ್ತು ತಾಳ್ಮೆಯ ಮೂರ್ತಿಯಾಗಿ ಸೃಷ್ಟಿಸಿದ್ದಾನೆ. ತಾಯಿ ಹೃದಯದ ಹೆಣ್ಣು ಇಷ್ಟೊಂದು ಕ್ರೂರಿಯಾಗಲು ಹೇಗೆ ಸಾಧ್ಯ? ಎಂಬ ಪ್ರಶ್ನೆ ಇಂದು ಪ್ರತಿಯೊಬ್ಬರನ್ನೂ ಕಾಡುತ್ತಿದೆ.

ನಿಜ, ಯಾವುದೇ ಒಬ್ಬ ಹೆಣ್ಣು ಇಂತಹ ಕ್ರೂರ ನಿರ್ಧಾರಕ್ಕೆ ಸುಲಭವಾಗಿ ಬರುವುದಿಲ್ಲ. ಆದರೆ ಇಂದಿನ ದಿನಗಳಲ್ಲಿ ಪ್ರೀತಿ, ಸಂಬಂಧಗಳಿಗಿಂತ ಸ್ವಾರ್ಥ ಮತ್ತು ಅತಿಯಾದ ಆವೇಶವೇ ಮೇಲುಗೈ ಸಾಧಿಸುತ್ತಿದೆ. ಈ ಮದುವೆ ಸಿಯಾಗೆ ಇಷ್ಟವಿರಲಿಲ್ಲ ಎಂದಾದರೆ, ಆಕೆ ಮನೆಯವರನ್ನು ಒಪ್ಪಿಸಬಹುದಿತ್ತು, ನಿರಾಕರಿಸಬಹುದಿತ್ತು, ಅಥವಾ ಕೇತನ್ ಬಳಿಯೇ ನೇರವಾಗಿ ಹೇಳಿ ಸಂಬಂಧದಿಂದ ದೂರ ಸರಿಯಬಹುದಿತ್ತು. ಇಷ್ಟೆಲ್ಲಾ ದಾರಿಗಳಿದ್ದರೂ, ಒಂದು ಜೀವವನ್ನು ಅತ್ಯಂತ ಕ್ರೂರವಾಗಿ ಕೊಲ್ಲುವ ಹಾದಿ ಹಿಡಿದಿದ್ದು ಅಕ್ಷಮ್ಯ ಅಪರಾಧ.

ಇದೇ ರೀತಿ ಇತ್ತೀಚೆಗೆ ಪಂಜಾಬ್‌ನ ಮೊಹಾಲಿಯಲ್ಲೂ ಕಚೇರಿಯಲ್ಲೇ ಎಲ್ಲರ ಎದುರೇ ಪ್ರೀತಿಯ ವೈಫಲ್ಯಕ್ಕಾಗಿ ಸಹೋದ್ಯೋಗಿಯನ್ನು ಕೊಲೆ ಮಾಡಿದ ಘಟನೆ ನಡೆದಿತ್ತು. ಅಲ್ಲಿ ಸ್ನೇಹಿತರಿದ್ದರೂ, ಇಲ್ಲಿ ಜೊತೆಗೆ ಆಪ್ತರಿದ್ದರೂ ಇಂತಹ ಘಟನೆಗಳು ನಡೆಯುತ್ತಿರುವುದು ನೋಡಿದರೆ “ಮಾನವೀಯತೆ ಎಲ್ಲಿದೆ? ಸಮಾಜ ಎತ್ತ ಸಾಗುತ್ತಿದೆ?” ಎಂಬ ಆತಂಕ ಮೂಡುತ್ತದೆ. ಸಂಬಂಧಗಳಲ್ಲಿ ಬಿರುಕು ಬಂದಾಗ ಅಥವಾ ಇಷ್ಟವಿಲ್ಲದಿದ್ದಾಗ ದೂರ ಸರಿಯುವ ತಾಳ್ಮೆ ಇರಬೇಕೇ ಹೊರತು, ಮತ್ತೊಬ್ಬರ ಬದುಕನ್ನು ಕಸಿಯುವ ಹಕ್ಕು ಯಾರಿಗೂ ಇಲ್ಲ. ಈ ಘಟನೆ ಇಡೀ ಯುವ ಪೀಳಿಗೆಗೆ ಮತ್ತು ಸಮಾಜಕ್ಕೆ ಒಂದು ಕಹಿ ಎಚ್ಚರಿಕೆಯಾಗಿದೆ.