ಸುಳ್ಯ: ಸುಳ್ಯ ಪೊಲೀಸ್ ಠಾಣಾ ವ್ಯಾಪ್ತಿಯಲ್ಲಿ ವಿಶ್ವಾಸಕ್ಕೆ ಧಕ್ಕೆಯೊಡ್ಡುವ ರೀತಿಯ ಚಿನ್ನಾಭರಣ ಕಳವು ಪ್ರಕರಣ ಬೆಳಕಿಗೆ ಬಂದಿದೆ.
ಪುಣ್ಯಶ್ರೀ (20), ತಂದೆ ಜಯರಾಮ ಜಿ, ಕಜೆ ಮನೆ, ಉತ್ತರ ಬೀರಮಂಗಿಲ, ಸುಳ್ಯ ಕಸಬಾ ಗ್ರಾಮದ ನಿವಾಸಿಯಾಗಿರುವವರು ನೀಡಿದ ದೂರಿನಂತೆ, ಅವರ ತಂದೆ ಜಯರಾಮ ಜಿ ಅವರು ಕಳೆದ ಸುಮಾರು 8 ವರ್ಷಗಳಿಂದ ಮೈಸೂರು ಮೂಲದ ಶೃತಿ @ ವಿಶ್ಮೀತ (37) ಎಂಬ ಮಹಿಳೆಯೊಂದಿಗೆ ಸಂಪರ್ಕದಲ್ಲಿದ್ದರು. ಈ ಅವಧಿಯಲ್ಲಿ ಶೃತಿಗೆ ಸುಮಾರು ₹6 ಲಕ್ಷ ಸಾಲವಾಗಿ ನೀಡಿರುವುದು ತಿಳಿದುಬಂದಿದೆ.
ಹಣವನ್ನು ಹಿಂತಿರುಗಿಸುವಂತೆ ಕೇಳಿದಾಗ, ಶೃತಿ ಸುಳ್ಯಕ್ಕೆ ಬಂದು ಹಣ ನೀಡುವುದಾಗಿ ತಿಳಿಸಿದ್ದಾಳೆ. ಅದರಂತೆ, ಏಪ್ರಿಲ್ 7, 2026 ರಂದು ಬೆಳಿಗ್ಗೆ ಸುಮಾರು 11:30ಕ್ಕೆ ಶೃತಿ ತನ್ನ ಸುಮಾರು 3 ವರ್ಷದ ಮಗಳೊಂದಿಗೆ ಪಿರ್ಯಾದಿದಾರರ ಮನೆಗೆ ಬಂದಿದ್ದಾಳೆ. ಬಳಿಕ ಸ್ವಲ್ಪ ಸಮಯದ ನಂತರ ಹಣ ತರಲು ಸುಳ್ಯ ಪೇಟೆಗೆ ಹೋಗುವುದಾಗಿ ಹೇಳಿ ಮನೆ ಬಿಡುತ್ತಿದ್ದಾಳೆ.
ಅಂದು ಮಧ್ಯಾಹ್ನ ಪಿರ್ಯಾದಿದಾರರು ಮನೆಗೆ ಬಂದು ಊಟ ಮಾಡಿ ಕೆಲಸಕ್ಕೆ ತೆರಳಿದ್ದು, ರಾತ್ರಿ ಸುಮಾರು 11 ಗಂಟೆಗೆ ಮನೆಗೆ ಬಂದಾಗ ಅಲ್ಮಾರಿಯ ಲಾಕರ್ ಒಡೆದು ಒಳಗಿದ್ದ ಚಿನ್ನಾಭರಣ ಕಳುವಾಗಿರುವುದು ಬೆಳಕಿಗೆ ಬಂದಿದೆ. ಸ್ಥಳ ಪರಿಶೀಲನೆ ವೇಳೆ ಕಲ್ಲು ಮತ್ತು ಹಸಿರು ಬಣ್ಣದ ಬಳೆಗಳ ತುಂಡುಗಳು ಪತ್ತೆಯಾಗಿವೆ.
ಕಳುವಾಗಿರುವ ಚಿನ್ನಾಭರಣಗಳ ವಿವರ ಹೀಗಿದೆ:
24 ಗ್ರಾಂ ತೂಕದ 3 ಹಳೆಯ ಚಿನ್ನದ ಬಳೆಗಳು (₹1,92,000)
3 ಗ್ರಾಂ ತೂಕದ 2 ಕಿವಿಯೋಲೆಗಳು (₹24,000)
2 ಗ್ರಾಂ ತೂಕದ 3 ಉಂಗುರಗಳು (₹16,000)
½ ಗ್ರಾಂ ಚಿನ್ನದ ನಾಣ್ಯ (₹4,000)
14 ಗ್ರಾಂ ತೂಕದ ನಕ್ಲೇಸ್ (₹1,12,000)
16 ಗ್ರಾಂ ತೂಕದ ಚೈನ್ (ಪೆಂಡೆಂಟ್ ಸಹಿತ) (₹1,28,000)
1 ಗ್ರಾಂ ತೂಕದ 2 ಕಿವಿ ರಿಂಗ್‌ಗಳು (₹8,000)
2 ಗ್ರಾಂ ಬ್ರಾಸ್ ಲೈಟ್ (₹16,000)
ಒಟ್ಟು ಸುಮಾರು 62½ ಗ್ರಾಂ ಚಿನ್ನಾಭರಣಗಳು ಕಳವಾಗಿದ್ದು, ಅಂದಾಜು ಮೌಲ್ಯ ₹5 ಲಕ್ಷವಾಗಿರುತ್ತದೆ.
ಈ ಕುರಿತು ಸುಳ್ಯ ಪೊಲೀಸ್ ಠಾಣೆಯಲ್ಲಿ ಅಪರಾಧ ಸಂಖ್ಯೆ 49/2026, ಭಾರತೀಯ ನ್ಯಾಯ ಸಂಹಿತೆ (BNS) 2023ರ ಕಲಂ 331(3) ಮತ್ತು 305 ಅಡಿಯಲ್ಲಿ ಪ್ರಕರಣ ದಾಖಲಾಗಿದ್ದು, ತನಿಖೆ ಮುಂದುವರಿದಿದೆ.