ಎಲ್ಪಿಜಿ ಗ್ಯಾಸ್ ದರದಲ್ಲಿ ಏರಿಕೆ: ಮಧ್ಯಮ ವರ್ಗದವರಲ್ಲಿ ಹತಾಶೆ

Karavali Maruta | 3 months ago | 07 March 2026

ನಿರೀಕ್ಷಿತ ಬೆಲೆ ಏರಿಕೆಯೇ ಇದು. ತೈಲ ಹಾಗೂ ಗ್ಯಾಸ್ ದರ ಏರುತ್ತದೆ ಎಂಬ ನಿರ್ಧಾರಕ್ಕೆ ಈಗಾಗಲೇ ಸಾಮಾನ್ಯ ಜನರು ಬಂದುಬಿಟ್ಟಿದ್ದರು. ಈ ದರ ಏರಿಕೆಯು, ಇದಕ್ಕೆ ರಿಲೇಟೆಡ್ ಆಗಿರುವ ಅನೇಕ ವಸ್ತುವಿನ ಬೆಲೆ ಏರಿಕೆಗೆ ಕಾರಣವಾಗಲಿದೆ ಅನ್ನುವುದು ಸಹ ಇಲ್ಲಿ ಗಮನಿಸಬೇಕಾದ ಸೂಕ್ಷ್ಮ ವಿಚಾರವಾಗಿದೆ. ಗ್ಯಾಸ್ ದರ ಏರಿಕೆಯಿಂದ ಮುಖ್ಯವಾಗಿ ಮಧ್ಯಮವರ್ಗದವರ ಮುಖದಲ್ಲಿ ಕಪ್ಪು ಕಾಣಿಸಿಕೊಳ್ಳುತ್ತಿದೆ. ಅವರ ಮುಖದಲ್ಲಿ ಸ್ಪಷ್ಟವಾಗಿ ಹತಾಶೆಯ ಲಕ್ಷಣ ಗೋಚರವಾಗುತ್ತಿದೆ.

ಮಧ್ಯ ಪ್ರಾಚ್ಯದ ಪ್ರಾಂತ್ಯಗಳಲ್ಲಿ ಯುದ್ಧದ ಪ್ರಾರಂಭಿಕ ಕಹಳೆಯು ಈಗಷ್ಟೇ ಮೊಳಗಿದೆ. ಆಗಲೇ ತೈಲ ಬೆಲೆಯಲ್ಲಿ ಏರಿಕೆ ಕಂಡಿದೆ ಗ್ಯಾಸ್ ದರವು ಸಹ 60 ರಿಂದ 70 ರೂ ಏರಿಕೆಯಾಗಿದೆ.

ನಮ್ಮ ದೇಶದ ಸರ್ಕಾರ ಇಂತಹ ಸಂದರ್ಭದಲ್ಲಿ ಒಂದಷ್ಟು ಕಟ್ಟು ನಿಟ್ಟಿನ ನಿರ್ಧಾರ ಹಾಗೂ ಕ್ರಮ ಎರಡನ್ನೂ ಮಾಡಬೇಕಿತ್ತು. ಆದರೆ ಆ ಕೆಲಸವನ್ನು ಈ ಕ್ಷಣದವರೆಗೆ ನಮ್ಮ ದೇಶದ ಸರ್ಕಾರಗಳು ಮಾಡಲು ಆಸಕ್ತಿಯನ್ನೇ ತೋರಿಸಿಲ್ಲ. ಅಷ್ಟಕ್ಕೂ ಇಂತಹ ಸಂದರ್ಭದಲ್ಲಿ ತಕ್ಷಣದ ಕ್ರಮಕ್ಕೆ ಅಂದರೆ ಜನಸಾಮಾನ್ಯರ ಮೇಲೆ ಯಾವುದೇ ರೀತಿಯ ಹೆಚ್ಚಿನ ಹೊರೆ ಬೀಳದ ರೀತಿಯಲ್ಲಿ ಮಾರ್ಕೆಟ್ ನಿಯಂತ್ರಣವನ್ನು ಸರ್ಕಾರವು ಖುದ್ದಾಗಿ ಮಾಡಬೇಕಿತ್ತು. ಅರಬ್ ರಾಷ್ಟ್ರಗಳ ಪೈಕಿ ಕೆಲವು ರಾಷ್ಟ್ರಗಳು ಈ ಕೆಲಸವನ್ನು ನಾಲ್ಕು ದಿನಗಳ ಹಿಂದೆಯೇ ಮಾಡಿವೆ. ಯಾವುದೇ ಅಗತ್ಯ ವಸ್ತುಗಳ ಮೇಲಿನ ದರ ಏರಿಸದಂತೆ ಕಟ್ಟುನಿಟ್ಟಿನ ಆದೇಶವನ್ನು ಆ ದೇಶದ ಉದ್ಯಮಿಗಳಿಗೆ ವ್ಯಾಪಾರಸ್ಥರಿಗೆ ನೀಡಿದ್ದಾರೆ. ಆ ದೇಶವು ನೀಡುವ ಆದೇಶವನ್ನು, ಅಲ್ಲಿನ ವ್ಯಾಪಾರಸ್ಥರು ಉದ್ಯಮಿಗಳು ಪಾಲಿಸುವಂತೆ ನೋಡಿಕೊಳ್ಳುತ್ತಾರೆ ಅದು ಕೂಡ ಮುಖ್ಯ ಎನಿಸಿಕೊಳ್ಳುತ್ತದೆ.

ನಮ್ಮ ದೇಶದ ಸರ್ಕಾರಗಳಿಂದಲೂ ನಾವು ಇಂಥವುದೇ ನಡೆಯನ್ನು ನಿರೀಕ್ಷಿಸುವುದು ತಪ್ಪಲ್ಲ ತಾನೇ? ದುರ್ದೈವ ಎಂದರೆ, ಇಂತಹ ಮಾತನ್ನು ಆಡಿದರೆ ನಮ್ಮಲ್ಲಿ ಸರ್ಕಾರದ ಪರವಾಗಿ ನಿಂತ ಕೆಲವು ನಾಗರಿಕರು ಸರ್ಕಾರದ ನಿರ್ಧಾರವೇ ಸರಿ ಅನ್ನುವ ರೀತಿಯಲ್ಲಿ ವಾದ ಮಾಡುತ್ತ ನಾಗರಿಕರ ಮೇಲಿನ ಹೊರೆಯನ್ನು ಸಮರ್ಥಿಸಿ ಕೊಳ್ಳುವ ಮೂಲಕ ಸರ್ಕಾರಕ್ಕೆ ಬಿಸಿ ತಟ್ಟದಂತೆಯೂ ನೋಡಿಕೊಳ್ಳುತ್ತಾರೆ. ಇಂತಹ ವಿಚಾರದಲ್ಲಿ ದೇಶದ ನಾಗರಿಕರು ಒಟ್ಟಾಗಿ ಸರ್ಕಾರವನ್ನು ನಾಗರಿಕರ ಪರ ಸರ್ಕಾರವನ್ನಾಗಿಸುವ ನಿಟ್ಟಿನಲ್ಲಿ ಸಾಗಬೇಕಿತ್ತು. ಆದರೆ ಅದು ನಮ್ಮಲ್ಲಿ ಸಾಧ್ಯವಾಗುತ್ತಿಲ್ಲ ಜನರನ್ನು ಆಳುವ ವರ್ಗವು ಉದ್ಯಮಿಗಳ ಅಥವಾ ಹಲವು ಉದ್ಯಮ ಸ್ನೇಹಿ ಮಾಧ್ಯಮಗಳ ಸಹಾಯದಿಂದ ಸಾಮಾನ್ಯ ಜನರನ್ನು ಯಾವತ್ತೂ ಒಂದಾಗದಂತೆ ವಿಭಜಿಸಿಯಾಗಿದೆ. ಈ ವಿಭಜನೆಯ ಕಾರಣದಿಂದಾಗಿ ನಮ್ಮ ದೇಶದ ಸರ್ಕಾರಗಳು ಯಾವ ಅಂಜಿಕೆಯೂ ಇಲ್ಲದೆ ತಮಗೆ ಹೇಗೆ ಬೇಕೋ ಹಾಗೆ ನಿರ್ಧಾರಗಳನ್ನು ತೆಗೆದುಕೊಳ್ಳುತ್ತಾರೆ, ಆಡಳಿತವನ್ನು ನಡೆಸುತ್ತಾರೆ.

ದೇಶದಲ್ಲಿ ಒಂದು ತಿಂಗಳಿಗಾಗುವಷ್ಟು ತೈಲಗಳು ಸ್ಟಾಕ್ ಇವೆ. ಅದು ಎಲ್ಲಾ ದೇಶದಲ್ಲೂ ಇದ್ದೇ ಇರುತ್ತದೆ. ಹಾಗಿರುವಾಗ ಆ ಸ್ಟಾಕುಗಳ ಮೇಲಿನ ದರವನ್ನು ಹೆಚ್ಚಿಸಲು ಅವಕಾಶ ಇರಬಾರದು. ಆದ್ರೂ ತೈಲೋದ್ಯಮಿಗಳು, ಅದನ್ನು ಯಾವುದೇ ಕ್ಷಣದಲ್ಲಾದರೂ ಏರಿಸುತ್ತಾರೆ. ಈ ಬಗ್ಗೆ ಆಳುವವರು ಮಾತನಾಡುವುದಿಲ್ಲ ಆಳುವವರನ್ನು ಪ್ರಶ್ನಿಸಬೇಕಾದ ವಿರೋಧಪಕ್ಷದವರು ಗಂಭೀರವಾಗಿ ಪ್ರಶ್ನಿಸುವ ಗೋಜಿಗೆ ಹೋಗುವುದಿಲ್ಲ. ಹಾಗಾಗಿ ನಮ್ಮ ಜನರ ಮೇಲಿನ ಹೊರೆಯನ್ನು ಇಳಿಸುವ ಪ್ರಯತ್ನ ಬೇಡ, ಹೊರಿಸುವ ವಿಚಾರಧಲ್ಲಾದರೂ ಸರ್ಕಾರ ಅಂಕುಶ ಇಟ್ಟುಕೊಳ್ಳದೆ ಇರುವಂತದ್ದು ದುರ್ದೈವ. ಇವೆಲ್ಲವನ್ನು ಉದ್ಯಮ ಮಾಫಿಯಾ ನಿಯಂತ್ರಿಸುತ್ತಿದೆ ಅನ್ನುವುದಕ್ಕೆ ಇದಕ್ಕಿಂತಲೂ ದೊಡ್ಡ ಉದಾಹರಣೆಯೇ ಬೇಕಿಲ್ಲ ನೋಡಿ.

ಈಗಾಗಲೇ ಇರಾನ್ ಅಮೆರಿಕ ಇಸ್ರೇಲ್ ನಡುವಿನ ಕಾಳಗ ಎಂಟನೆಯ ದಿನಕ್ಕೆ ಕಾಲಿಟ್ಟಿದೆ. ನಮ್ಮ ದೇಶಕ್ಕೆ ಇರಾನ್ ದೇಶದ ತೈಲ ಅತ್ಯವಶ್ಯಕ. ಈಗ ಅದಕ್ಕೆ ಈ ಕ್ಷಣದ ತಡೆ ಬಿದ್ದಿದೆ. ಕೇವಲ ಎಂಟನೇ ದಿನದಲ್ಲಿಯೇ ತೈಲ ಬೆಲೆಯಲ್ಲಿ ಏರಿಕೆಯೂ ಆಗಿದೆ. ಗ್ಯಾಸ್ ದರ ಏರಿಕೆ ಕಂಡಿದೆ. ಇದರ ಪರಿಣಾಮ, ಅಗತ್ಯ ವಸ್ತುಗಳ ಬೆಲೆಯು ಹೆಚ್ಚಾಗಲಿದೆ ಎನ್ನುವುದರಲ್ಲಿ ಎರಡು ಮಾತೇ ಇಲ್ಲ. ಒಂದು ವಾರದಿಂದ ಆರ್ಥಿಕ ಹೊರೆ ಬೀಳುವ ಸಾಧ್ಯತೆ ಯ ಬಗ್ಗೆ ಸಾಕಷ್ಟು ಚರ್ಚೆಗಳು ನಡೆದಿದೆ ಕೂಡ. ಆದರೆ ಸರ್ಕಾರವು ಮಾತ್ರ ಈ ವಿಚಾರದಲ್ಲಿ ಆರ್ಥಿಕತೆಯ ಪರಿಣಾಮ ಬೀರದ ಹಾಗೆ ಯಾವ ರೀತಿ ನಿಭಾಯಿಸಬೇಕು ಅನ್ನುವುದರ ಬಗ್ಗೆ ಗಂಭೀರ ಚಿಂತನೆ ಮಾಡದಿರುವುದು ಮೇಲ್ನೋಟಕ್ಕೆ ಕಂಡುಬರುತ್ತದೆ. ಈ ಸಂದರ್ಭದಲ್ಲಿ ನಾಗರಿಕರ ಪರವಾಗಿ ಹಾಗೂ ಮಾರ್ಕೆಟ್ ನಿಯಂತ್ರಣ ಮಾಡುವವರ ಮೇಲೆ ಕಣ್ಣಿಡುವ ಕೆಲಸ ಜರೂರ್ ಆಗಿ ಆಗಬೇಕಿತ್ತು , ಅದು ಯಾವುದು ಇಲ್ಲಿ ಆಗಿಲ್ಲ ಅನ್ನೋದು, ಸರ್ಕಾರದ ಕಡೆಯಿಂದ ಈ ವಿಚಾರದಲ್ಲಿ ಯಾವುದೇ ರೀತಿಯ ತಿಳುವಳಿಕೆಯಾಗಲಿ, ಆದೇಶ ಮಾಡಿದ್ದಾಗಲಿ ಕಾಣದೆ ಇರುವಂತದ್ದನ್ನು ನಾವು ನೋಡಬಹುದು.

ಈಗಲೂ ಕಾಲ ಮಿಂಚಿಲ್ಲ ಸರ್ಕಾರವು ಜನಸಾಮಾನ್ಯರ ಮೇಲೆ ಹೊರೆ ಹೆಚ್ಚಾಗದಂತೆ ನೋಡಿಕೊಳ್ಳಬೇಕು. ಈಗಾಗಲೇ ದೇಶದ ಜನರು ಸಾಕಷ್ಟು ಸಂಕಷ್ಟದಲ್ಲಿದ್ದಾರೆ. ಆದಾಯದಲ್ಲಿ ಸ್ವಲ್ಪವೂ ಹೆಚ್ಚಾಗಿಲ್ಲ ಅನ್ನುವ ಕೊರಗು ಕಳೆದ ಎರಡು ಮೂರು ವರ್ಷದಿಂದ ಇರುವುದು ಗೌಪ್ಯ ವಿಚಾರವಲ್ಲ. ಆದರೆ ಕಳೆದ ಎರಡು ಮೂರು ವರ್ಷದಲ್ಲಿ ಜನರ ಮೇಲೆ ಹೊರೆಯಂತು ಆಗಾಗ ಬೀಳುತ್ತಲೇ ಇದೆ. ಜನರ ಆದಾಯದಲ್ಲಿ ಏರಿಕೆ ಕಾಣದೆ ಇರುವಾಗ ಅವರ ಮೇಲಿನ ಹೊರೆ ಹೆಚ್ಚಾಗದಂತೆ ನೋಡಿಕೊಳ್ಳುವುದು ಸರ್ಕಾರದ ಆದ್ಯ ಕರ್ತವ್ಯವಾಗುತ್ತದೆ. ಇಷ್ಟರಲ್ಲಾಗಲೇ ಬೆಲೆ ಏರಿಕೆಯ ಬಿಸಿಯಿಂದ ಸಾಕಷ್ಟು ನಲಿಗಿರುವ ನಾಗರಿಕರಿಗೆ ಇನ್ನೊಮ್ಮೆ ಬೆಲೆ ಏರಿಕೆಯ ಪೆಟ್ಟನ್ನು ಕೊಡಬೇಡಿ ಎಂಬ ಮಾತುಗಳು ನಾಗರಿಕ ಸಮಾಜದ ಮುಖಂಡರುಗಳಿಂದ ಕೇಳಿಬರುತ್ತಿವೆ