ಸುಬ್ರಹ್ಮಣ್ಯದಲ್ಲಿ ಭಟ್ಟರಿಗೆ ದಕ್ಷಿಣೆ ಕೊಡುವoತಿಲ್ಲ- ಸಿಟ್ಟಿಗೆಳುತ್ತಿರುವ ಪುರೋಹಿತರು

Karavali Maruta | 4 months ago | 09 March 2026

ಕುಕ್ಕೆ ಸುಬ್ರಹ್ಮಣ್ಯ ಕ್ಷೇತ್ರದ ಪವಿತ್ರತೆಯ ಬಗ್ಗೆ ಆಸ್ತಿಕ ವರ್ಗದಲ್ಲಿ ಸಾಕಷ್ಟು ಗೌರವವಿದೆ. ಪ್ರತಿದಿನ ನೂರಾರು ಭಕ್ತರು ಕ್ಷೇತ್ರಕ್ಕೆ ಭೇಟಿ ನೀಡಿ ತಮ್ಮದೇ ಆದ ಸೇವಾ ಕೈಂಕರ್ಯಗಳನ್ನು ಪೂರೈಸಿ ವಾಪಸ್ ಆಗುತ್ತಿದ್ದಾರೆ. ಅಂತಹ ಕ್ಷೇತ್ರದಲ್ಲಿ ಆಡಳಿತ ಮಂಡಳಿಯು ಭಕ್ತರಿಗೆ ಕೊಡುತ್ತಿರುವ ಮೆಸೇಜು ಇಂದು ಬಹಳಷ್ಟು ಚರ್ಚೆಗೆ ಕಾರಣವಾಗಿದೆ. ಇದು ಹಲವು ರೀತಿಯಲ್ಲಿ ಭಕ್ತರು ಹಾಗೂ ಅರ್ಚಕರಲ್ಲಿ ಗೊಂದಲಕ್ಕು ಕಾರಣವಾಗಿದೆ. ಈ ಗೊಂದಲವನ್ನು ಸ್ವತಹ ಇಲ್ಲಿನ ಆಡಳಿತ ಮಂಡಳಿಯೇ ಸೃಷ್ಟಿಸಿದೆ ಅನ್ನುವುದಂತೂ ಸತ್ಯ

ಅಷ್ಟಕ್ಕೂ ಆಡಳಿತ ಮಂಡಳಿಯು ಸೃಷ್ಟಿಸಿದ ಗೊಂದಲವಾದರೂ ಎಂತಹುದು? ಸರ್ಪ ಸಂಸ್ಕಾರದ ಪೂಜೆಯನ್ನು ಭಕ್ತರು ಆನ್ಲೈನ್ನಲ್ಲಿ ಬುಕ್ ಮಾಡುತ್ತಾರೆ ಅಥವಾ ಬಂದ ತಕ್ಷಣವೇ ಚೀಟಿ ಬರೆಸುತ್ತಾರೆ. ಆಗಲೇ 4,200 ಹಣವನ್ನು ಪಾವತಿಸಿಕೊಳ್ಳುತ್ತಾರೆ. ಈ ಹಣದಲ್ಲಿ ಈ ಒಂದು ಪೂಜೆಯ ಎಲ್ಲಾ ವೆಚ್ಚಗಳು ಒಳಗೊಂಡಿರುತ್ತವೆ ಅನ್ನುವುದು ಆಡಳಿತ ಮಂಡಳಿಯ ಪ್ರಕಟಣೆಯಾಗಿದೆ. ಹಾಗಾಗಿ ಯಾವುದೇ ಭಕ್ತರು ಪೂಜೆಯ ಸಮಯದಲ್ಲಿ ಅಥವಾ ನಂತರ ಯಾವುದೇ ಸಂಭಾವನೆಯನ್ನು ಯಾರಿಗೂ ನೀಡಬೇಕಾಗಿಲ್ಲ. ಯಾವುದಾದರೂ ಪುರೋಹಿತರು ಡಿಮ್ಯಾಂಡ್ ಮಾಡಿದರೆ ತಕ್ಷಣವೇ ದೇವಸ್ಥಾನದ ಆಡಳಿತ ಕಚೇರಿಗೆ ಬಂದು ದೂರು ನೀಡಿ ಎನ್ನುವ ಸಂದೇಶವನ್ನು ಬಹಿರಂಗವಾಗಿ ವಿವಿಧ ಭಾಷೆಗಳಲ್ಲಿ ಬಿತ್ತರಿಸಲಾಗುತ್ತಿದೆ.

ಅದರಿಂದ ಈಗ, ಭಕ್ತರು ಹಾಗೂ ಪುರೋಹಿತ ವರ್ಗ ಎರಡರಲ್ಲೂ ಗೊಂದಲ ವೇರ್ಪಟ್ಟಿದೆ. ಪ್ರತಿ ಸರ್ಪಸಂಸ್ಕಾರಕ್ಕೂ, ಅದನ್ನು ನಿರ್ವಹಿಸಿದ ಪುರೋಹಿತರಿಗೆ ಆಡಳಿತ ಮಂಡಳಿಯಿಂದಲೇ ಅವರ ಸಂಭಾವನೆ ಹೋಗುತ್ತದೆ. ಹಾಗೆಯೇ ಬ್ರಹ್ಮಚಾರಿಗೂ ಆಡಳಿತ ಮಂಡಳಿಯಿಂದಲೇ ಸಂಭಾವನೆ ಹೋಗುತ್ತದೆ. ಹಾಗಾಗಿ ಪುರೋಹಿತರಾಗಲಿ ಬ್ರಹ್ಮಚಾರಿಯಾಗಲಿ ಪೂಜಾ ಕರ್ತರಿಂದ ಹಣ ಕೇಳುವ ಹಾಗಿಲ್ಲ ಎನ್ನುವುದು ಆಡಳಿತ ಮಂಡಳಿಯ ಕಟ್ಟಪ್ಪಣೆ. ಇದು ಸರಿಯೂ ಹೌದು.

ಆದರೆ ಇದು ಧಾರ್ಮಿಕ ಕಾರ್ಯಕ್ರಮ. ಇಲ್ಲಿ ಯಾವುದೇ ಭಕ್ತನು ತಾನು ಸಲ್ಲಿಸಿದ ಸೇವೆಯ ನಂತರ ಅರ್ಚಕರಿಗೆ ಸಂಭಾವನೆ ಕೊಟ್ಟು ಅವರಿಂದ ಮಂತ್ರಾಕ್ಷತೆಯನ್ನು ಪಡೆಯುವುದು ಧಾರ್ಮಿಕ ಪರಂಪರೆಯ ಭಾಗವಾಗಿದೆ. ಜೊತೆಗೆ ಹಸ್ತೋದಕದ ಮೂಲಕ ಊಟ ಬಡಿಸುವುದು ಕೂಡ ಅದರ ಭಾಗವಾಗಿರುತ್ತದೆ.

ಆದ್ರೆ ಇದ್ಯಾವುದನ್ನು ಮಾಡಲಾಗದಿದ್ರೆ, ಸೇವೆ ಮಾಡಿಸುವಾತನಿಗೆ ಫಲ ಇಲ್ಲ ಅನ್ನುವ ತಿಳುವಳಿಕೆ ಹೊಂದಿದವರು ಇದ್ದಾರೆ. ಇದರಿಂದ ಇರುಸು ಮುರುಸು ಆಗುತ್ತದೆ. ಇದು ಭಕ್ತರರ ವಲಯದಲ್ಲಿರೋ ಗೊಂದಲ.

ಒಟ್ಟಿನಲ್ಲಿ ಭಕ್ತರು ಮತ್ತು ಪುರೋಹಿತರು ಇಬ್ಬರವಲಯದಲ್ಲೂ ಈ ಗೊಂದಲ ಆಗಿದ್ದು ನಿಜ. ಆದ್ರಿಲ್ಲಿ ಪುರೋಹಿತರು ಒತ್ತಡ ಹೇರುವ ಹಾಗಿಲ್ಲ. ಡಿಮ್ಯಾಂಡ್ ಮಾಡುವ ಹಾಗಿಲ್ಲ. ಈ ಬಗ್ಗೆ ದೇವಸ್ಥಾನದ ಆಡಳಿತ ಮಂಡಳಿಯೇ ಯೋಗ್ಯ ತೀರ್ಮಾನ ಕೈಗೊಳ್ಳಬೇಕು. ಭಕ್ತರ ಮನದಲ್ಲಿ ಯಾವುದೇ ಅಸoತೃಪ್ತಿಯ ಭಾವನೆ ಮೂಡದಂತೆ ನೋಡಿಕೊಳ್ಳಬೇಕು…..ಅದಕ್ಕಾಗಿ ಒಬ್ಬರನ್ನು ನೇಮಿಸಿಕೊಂಡು ಪೂಜಾ ಸ್ಥಳದಲ್ಲಿಯೇ ಪುರೋಹಿತರಿಗೆ ನೀಡುವ ದಕ್ಷಿಣೆ, ಬ್ರಾಹ್ಮಚಾರಿಗೆ ನೀಡುವ ದಕ್ಷಿಣೆಯನ್ನು ಭಕ್ತರ ಕೈನಿಂದಲೇ ನೀಡಿಸಿದರೆ ಒಳ್ಳೆಯದು ಅನ್ನುವುದು ಅನೇಕ ಹಿರಿಯರ ಅನಿಸಿಕೆ.