ದುಡಿದು ತಿನ್ನಲಾಗದ ಸೋಮಾರಿಗಳ ನೂರೆಂಟ್ ತಂತ್ರ: ಎಚ್ಚರವೇ ಏಕೈಕ ಮದ್ದು

ಸ್ವಂತ ಶ್ರಮದಿಂದ ದುಡಿದು ಬದುಕಲು ಯೋಗ್ಯತೆ ಇಲ್ಲದ ಹಾಗೂ ಕಷ್ಟಪಟ್ಟು ಕೆಲಸ ಮಾಡಲು ಇಷ್ಟಪಡದ ಇಂತಹ ವಂಚಕರು, ಇತರರ ಹಣವನ್ನು ದೋಚಲು ದಿನಕ್ಕೊಂದು ನೂರು ಸುಳ್ಳು ಉಪಾಯಗಳನ್ನು (Ideas) ಹೂಡುತ್ತಿರುತ್ತಾರೆ. ಇಂತಹ ಘಟನೆಗಳ ಬಗ್ಗೆ ಮಾಧ್ಯಮಗಳು ಜನರನ್ನು ಜಾಗೃತಗೊಳಿಸಲು ನಿರಂತರವಾಗಿ ವರದಿಗಳನ್ನು ಪ್ರಸಾರ ಮಾಡುತ್ತಲೇ ಇರುತ್ತವೆ. ಆದರೂ ಸಾರ್ವಜನಿಕರ ಸಣ್ಣ ನಿರ್ಲಕ್ಷ್ಯ ದೊಡ್ಡ ಆಪತ್ತನ್ನು ತಂದೊಡ್ಡುತ್ತಿದೆ. ಯಾವುದೇ ಅಪರಿಚಿತ ವ್ಯಕ್ತಿ ಫೋನ್ ಕಾಲ್ ಅಥವಾ ಮೆಸೇಜ್ ಮೂಲಕ ಬ್ಯಾಂಕ್ ಅಥವಾ ಸಿಮ್ ನವೀಕರಣದ ಬಗ್ಗೆ ಮಾತನಾಡಿದರೆ ಆತುರದ ನಿರ್ಧಾರ ಕೈಗೊಳ್ಳಬೇಡಿ. ನಿಮಗೆ ಯಾವುದೇ ಸಣ್ಣ ಅನುಮಾನ ಬಂದರೂ ಫೋನ್‌ನಲ್ಲೇ ಪ್ರಕ್ರಿಯೆ ಮುಂದುವರಿಸುವ ಬದಲು, ತಕ್ಷಣವೇ ಸಂಬಂಧಪಟ್ಟ ಮೊಬೈಲ್ ನೆಟ್‌ವರ್ಕ್ ಸ್ಟೋರ್, ಬ್ಯಾಂಕ್ ಶಾಖೆ ಅಥವಾ ಕಚೇರಿಗೆ ನೇರವಾಗಿ ಭೇಟಿ ನೀಡಿ ಖಚಿತಪಡಿಸಿಕೊಳ್ಳಿ.ಯಾವುದೇ ಅನಗತ್ಯ link ಗಳನ್ನ open ಮಾಡುವುದರಿಂದಲೂ ph ನಲ್ಲಿರುವ ಎಲ್ಲಾ ಡೇಟಾ ಕಳ್ಳರ ಕೈಸೇರಿ ಅನಾಹುತಗಳಾಗುತ್ತವೆ ಎಚ್ಚರವಹಿಸಿ..!

ಕಸ್ಟಮರ್ ಕೇರ್ ಹೆಸರಲ್ಲಿ ಗಾಳ: 23.98 ಲಕ್ಷ ರೂ. ಲೂಟಿ ಮಾಡಿದ ವಂಚಕರು

ಮಂಗಳೂರಿನ ದೂರುದಾರರಿಗೆ ಜುಲೈ 8ರಂದು ಮೊಬೈಲ್ ಸಿಮ್ ಕಂಪನಿಯೊಂದರ ಕಸ್ಟಮರ್ ಕೇರ್ ಅಧಿಕಾರಿ ಎಂದು ಹೇಳಿ ಕರೆ ಮಾಡಿದ ವ್ಯಕ್ತಿಯೊಬ್ಬ, “ನಿಮ್ಮ ಸಿಮ್ ಕಾರ್ಡ್ ಪ್ರಸ್ತುತ 4ಜಿ ಸೇವೆಯಲ್ಲಿದ್ದು, ಅದನ್ನು 5ಜಿ ಗೆ ನವೀಕರಿಸಬೇಕು (SIM Upgrade)” ಎಂದು ನಂಬಿಸಿದ್ದಾನೆ. ಇದನ್ನು ನಿಜವೆಂದು ನಂಬಿದ ದೂರುದಾರರು ಅದಕ್ಕೆ ಒಪ್ಪಿಗೆ ಸೂಚಿಸಿದಾಗ, ವಂಚಕನು “ನವೀಕರಣ ಪ್ರಕ್ರಿಯೆಗಾಗಿ ನಿಮ್ಮ ನೆಟ್‌ವರ್ಕ್ ಕೆಲವು ಗಂಟೆಗಳ ಕಾಲ ನಿಷ್ಕ್ರಿಯಗೊಳ್ಳಲಿದೆ” ಎಂದು ತಿಳಿಸಿದ್ದಾನೆ. ನಂತರ ದೂರುದಾರರ ಇಮೇಲ್‌ಗೆ ಬಂದ ಒಂದು ಸಂದೇಶಕ್ಕೆ ವಂಚಕನ ಸೂಚನೆಯಂತೆ ಅವರು ಒಪ್ಪಿಗೆ (Yes) ನೀಡಿದ್ದಾರೆ. ತದನಂತರ ನೆಟ್‌ವರ್ಕ್ ಬಾರದಿದ್ದಾಗ ಬೇರೆ ನಂಬರ್‌ನಿಂದ ಕರೆ ಮಾಡಿ ವಿಚಾರಿಸಿದರೆ, “ಸರ್ವರ್ ಸಮಸ್ಯೆಯಿದ್ದು ಸದ್ಯದಲ್ಲೇ ಸರಿಹೋಗುತ್ತದೆ” ಎಂದು ವಂಚಕನು ಜುಲೈ 9ರ ಸಂಜೆಯವರೆಗೂ ಕಾಲಹರಣ ಮಾಡಿದ್ದಾನೆ.

ಸಿಮ್ ನಿಷ್ಕ್ರಿಯತೆಯ ರಹಸ್ಯ ಮತ್ತು ಬ್ಯಾಂಕ್ ಖಾತೆಯಿಂದ ಲೋನ್ ಪಡೆದು ವಂಚನೆ

ಕೊನೆಗೆ ಅನುಮಾನ ಬಂದು ದೂರುದಾರರು ಮೊಬೈಲ್ ಸಂಸ್ಥೆಯ ಸ್ಥಳೀಯ ಕಚೇರಿಗೆ ಹೋಗಿ ವಿಚಾರಿಸಿದಾಗ, ಅಂತಹ ಯಾವುದೇ ಕರೆ ಮಾಡುವ ಪದ್ಧತಿ ಕಂಪನಿಯಲ್ಲಿ ಇಲ್ಲ ಎಂಬ ಕಹಿ ಸತ್ಯ ತಿಳಿದುಬಂದಿದೆ. ಅವರು ತಕ್ಷಣವೇ ಮೊಬೈಲ್‌ನಲ್ಲಿದ್ದ ನಿಷ್ಕ್ರಿಯ ಸಿಮ್ ಹೊರಗೆ ತೆಗೆದಿದ್ದಾರೆ. ಆದರೆ ಜುಲೈ 10ರಂದು ಬೆಳಗ್ಗೆ ಬ್ಯಾಂಕಿಗೆ ಹೋಗಿ ಪರಿಶೀಲಿಸಿದಾಗ ಸೈಬರ್ ಖದೀಮರು ದೊಡ್ಡ ಆಘಾತ ನೀಡಿದ್ದರು. ವಂಚಕರು ದೂರುದಾರರ ಬ್ಯಾಂಕ್ ಖಾತೆಗಳಿಂದ 2,89,000 ರೂ. ನಗದು ಹಾಗೂ ಅವರ ಕ್ರೆಡಿಟ್ ಕಾರ್ಡ್ ಬಳಸಿ ಬರೋಬ್ಬರಿ 9,00,000 ರೂ. ಸಾಲವನ್ನು (Loan) ಪಡೆದುಕೊಂಡಿದ್ದರು. ಅಷ್ಟೇ ಅಲ್ಲದೆ, ಮತ್ತೊಂದು ಕ್ರೆಡಿಟ್ ಕಾರ್ಡ್‌ನಿಂದ 4,06,138 ರೂ. ಹಾಗೂ ಇತರೆ ಬ್ಯಾಂಕುಗಳ ಕ್ರೆಡಿಟ್ ಕಾರ್ಡ್‌ಗಳಿಂದ 3,03,000 ರೂ. ಮತ್ತು 5,00,000 ರೂ. ಸೇರಿದಂತೆ ಒಟ್ಟು 23,98,138 ರೂ. ಗಳನ್ನು ವಿವಿಧ ನಕಲಿ ಖಾತೆಗಳಿಗೆ ವರ್ಗಾಯಿಸಿಕೊಂಡು ವಂಚಿಸಿದ್ದಾರೆ. ಸದ್ಯ ಮಂಗಳೂರಿನ ಸೆನ್ (SEN) ಪೊಲೀಸ್ ಠಾಣೆಯಲ್ಲಿ ಈ ಬಗ್ಗೆ ಪ್ರಕರಣ ದಾಖಲಾಗಿದೆ.

##CyberCrimeMangalore #SIMSwapScam #OnlineBankingFraud #CyberAwareness #FinancialFraudAlert