ಬ್ರಹ್ಮಾವರ ದಲ್ಲಿ, ಮೇ 22, 23, 24 ರಂದು ಆಯೋಜಿಸಿದ್ದ “ಹಲಸು ಮೇಳ” ಯಶಸ್ವಿಯಾಗಿ ಮುಗಿದ ಬೆನ್ನಲ್ಲೇ, ಮೇ 25 ರಂದು ಸೂಲ್ಕುದ್ರು ಮುಖ್ಯ ರಸ್ತೆ ಹಾಗೂ NH-66 ಹೆದ್ದಾರಿ ಬದಿಯಲ್ಲಿ ಕೊಳೆತ ಹಲಸಿನ ಹಣ್ಣುಗಳನ್ನು ವಾಹನಗಳಲ್ಲಿ ತಂದು ಎಸೆದು ಹೊಲಸು ಮಾಡಿರುವುದು ಬೆಳಕಿಗೆ ಬಂದಿದೆ.
ಮೂರು ದಿನಗಳ ಕಾಲ ನಡೆದ ಹಲಸು ಮೇಳದಲ್ಲಿ ಹಲಸು ಬೆಳೆಗಾರರಿಗೆ ಬೆಂಬಲ ಸೂಚಿಸಿ ಸಾವಿರಾರು ಜನರು ವಾಟ್ಸಾಪ್, ಫೇಸ್‌ಬುಕ್, ಇನ್‌ಸ್ಟಾಗ್ರಾಮ್‌ಗಳಲ್ಲಿ ಸ್ಟೇಟಸ್ ಹಾಕಿ ಪ್ರೋತ್ಸಾಹಿಸಿದ್ದರು. ಆದರೆ ಮೇಳ ಮುಗಿದ ಮರುದಿನವೇ, ಮಾರಾಟವಾಗದೇ ಉಳಿದ ಹಲವು ಕ್ವಿಂಟಾಲ್ ಹಲಸಿನ ಹಣ್ಣುಗಳನ್ನು ಕೆಲವು ತಿಳಿಗೇಡಿಗಳು NH-66 ಹೆದ್ದಾರಿ ಬದಿ ಮತ್ತು ಸೂಲ್ಕುದ್ರು ರಸ್ತೆಯ ಅಕ್ಕಪಕ್ಕದಲ್ಲಿ ಎಸೆದು ಹೋಗಿದ್ದಾರೆ.

ಇದರಿಂದ ಆ ಭಾಗದಲ್ಲಿ ದುರ್ವಾಸನೆ ಬೀರುತ್ತಿದ್ದು, ನೊಣಗಳ ಕಾಟ ಹೆಚ್ಚಾಗಿ ಪರಿಸರ ಮಾಲಿನ್ಯ ಉಂಟಾಗಿದೆ. ಸ್ಥಳೀಯರು ಇದನ್ನು “ಹೊಲಸು ಮೇಳ” ಎಂದು ವ್ಯಂಗ್ಯವಾಗಿ ಕರೆಯುತ್ತಿದ್ದಾರೆ.

ಸಾರ್ವಜನಿಕರ ಆಕ್ರೋಶ:
“ಹಲಸು ಬೆಳೆಗಾರರನ್ನು ಬೆಂಬಲಿಸಿ ಸಾಮಾಜಿಕ ಜಾಲತಾಣದಲ್ಲಿ ಸ್ಟೇಟಸ್ ಹಾಕಿ ಪ್ರೋತ್ಸಾಹಿಸಿದ ನಮಗೆ ಸಿಕ್ಕ ಬಹುಮಾನ ಇದೇನಾ?” ಎಂದು ನಾಗರಿಕರು ಪ್ರಶ್ನಿಸಿದ್ದಾರೆ. ಮೇಳ ಆಯೋಜಕರು ಮತ್ತು ಸ್ಥಳೀಯ ಆಡಳಿತವು ಮಾರಾಟವಾಗದ ಹಲಸನ್ನು ವೈಜ್ಞಾನಿಕವಾಗಿ ವಿಲೇವಾರಿ ಮಾಡಲು ವ್ಯವಸ್ಥೆ ಮಾಡಬೇಕಿತ್ತು. ಬದಲಾಗಿ ಹೆದ್ದಾರಿ ಬದಿ ಎಸೆದು ಪರಿಸರ ಹಾಳು ಮಾಡಿರುವುದು ಖಂಡನೀಯ ಎಂದು ಸಾರ್ವಜನಿಕರು ಆಕ್ರೋಶ ವ್ಯಕ್ತಪಡಿಸಿದ್ದಾರೆ.

ಈ ಬಗ್ಗೆ ಪುರಸಭೆ ಮತ್ತು ಮಾಲಿನ್ಯ ನಿಯಂತ್ರಣ ಮಂಡಳಿ ಕೂಡಲೇ ಕ್ರಮ ಕೈಗೊಂಡು, ತಪ್ಪಿತಸ್ಥರ ವಿರುದ್ಧ ದಂಡ ವಿಧಿಸಬೇಕು ಹಾಗೂ ಸ್ವಚ್ಛತಾ ಕಾರ್ಯ ನಡೆಸಬೇಕು ಎಂದು ಸ್ಥಳೀಯರು ಆಗ್ರಹಿಸಿದ್ದಾರೆ.