ದಕ್ಷಿಣ ಕನ್ನಡದ ಜೀವನಾಡಿ ಫಲ್ಗುಣಿ ವಿಷನದಿಯಾಗುತ್ತಿದೆಯೇ?

ಮಂಗಳೂರು ಹೊರವಲಯದ ಮಳವೂರು–ಕೆಂಜಾರ್ ವ್ಯಾಪ್ತಿಯಲ್ಲಿ ಹರಿಯುವ ಫಲ್ಗುಣಿ ನದಿ ಇಂದು ಜೀವನಾಡಿಯಲ್ಲ, ಮರಣದ ನದಿಯಂತಾಗಿದೆ ಎಂಬ ಆತಂಕಕಾರಿ ಚಿತ್ರಣ ಹೊರಬಂದಿದೆ.
ಒಮ್ಮೆ ಸಾವಿರಾರು ಜನರಿಗೆ ಕುಡಿಯುವ ನೀರು, ಮೀನುಗಾರಿಕೆ ಮತ್ತು ಕೃಷಿಗೆ ಆಧಾರವಾಗಿದ್ದ ಈ ನದಿ ಇಂದು ಕಪ್ಪು ಬಣ್ಣಕ್ಕೆ ತಿರುಗಿ, ವಿಷಕಾರಿ ದುರ್ವಾಸನೆಯಿಂದ ಜನರನ್ನು ಮೂಗು ಮುಚ್ಚಿಕೊಂಡು ಓಡಾಡುವ ಪರಿಸ್ಥಿತಿಗೆ ತಳ್ಳಿದೆ.

ಸ್ಥಳೀಯರ ಆರೋಪದ ಪ್ರಕಾರ, ಸುತ್ತಮುತ್ತಲಿನ ಕೈಗಾರಿಕೆಗಳಿಂದ ಹರಿಯುತ್ತಿರುವ ಸಂಸ್ಕರಿಸದ ರಾಸಾಯನಿಕ ತ್ಯಾಜ್ಯವೇ ಈ ಪರಿಸ್ಥಿತಿಗೆ ಪ್ರಮುಖ ಕಾರಣ. ಬೇಸಿಗೆ ಬಂದಾಗಲೆಲ್ಲ ಇದೇ ಸಮಸ್ಯೆ ಮರುಕಳಿಸುತ್ತಿದ್ದರೂ, ಶಾಶ್ವತ ಪರಿಹಾರ ಮಾತ್ರ ಕಾಣಿಸುತ್ತಿಲ್ಲ.

ING ಅಲ್ಲ — ಇದು ಪರಿಸರ ಹತ್ಯೆ!

ಸ್ಥಳೀಯರು ಮತ್ತು ಪರಿಸರ ಹೋರಾಟಗಾರರ ಮಾತಿನಲ್ಲಿ ಇದು “ಸಾಮಾನ್ಯ ಮಾಲಿನ್ಯ” ಅಲ್ಲ, “ನದಿಯ ಜೀವಹತ್ಯೆ”.

ನದಿ ನೀರು ಸಂಪೂರ್ಣ ಕಪ್ಪಾಗಿದೆ.ಮೀನುಗಳು ದೊಡ್ಡ ಪ್ರಮಾಣದಲ್ಲಿ ಸತ್ತು ತೇಲುತ್ತಿವೆ.ನದಿ ತೀರದ ಬಾವಿ ನೀರು ಕುಡಿಯಲು ಅಸಾಧ್ಯವಾಗಿದೆ.ದುರ್ವಾಸನೆಗೆ ಜನರು ಮನೆ ಬಿಟ್ಟು ಹೊರಗೆ ನಿಲ್ಲಲಾಗದ ಸ್ಥಿತಿ.ಮಕ್ಕಳ ಆರೋಗ್ಯದ ಬಗ್ಗೆ ಆತಂಕ ಹೆಚ್ಚಾಗಿದೆ.

ಸ್ಥಳೀಯ ನಿವಾಸಿ ಫ್ರಾಂಕಿ ಡಿಸೋಜಾ ಆಕ್ರೋಶ ವ್ಯಕ್ತಪಡಿಸಿ,
“ಇಂಡಸ್ಟ್ರಿಗಳ ವಿಷಕಾರಿ ನೀರನ್ನು ನದಿಗೆ ಬಿಡುವುದನ್ನು ತಕ್ಷಣ ನಿಲ್ಲಿಸಬೇಕು. ಜನರ ಜೀವದ ಜೊತೆ ಆಟವಾಡಲಾಗುತ್ತಿದೆ. ಅಧಿಕಾರಿಗಳು ಮೌನವಾಗಿದ್ದರೆ ದೊಡ್ಡ ಹೋರಾಟ ಅನಿವಾರ್ಯ” ಎಂದು ಎಚ್ಚರಿಸಿದ್ದಾರೆ.

ಜನರ ಪ್ರಶ್ನೆಗಳು ಗಂಭೀರ:

ಪರಿಸರ ನಿಯಮಗಳು ಕೇವಲ ಕಾಗದದಲ್ಲೇನಾ?
ಕೈಗಾರಿಕೆಗಳಿಗೆ ಯಾರು ಅನುಮತಿ ನೀಡುತ್ತಿದ್ದಾರೆ?
ಪ್ರತೀ ವರ್ಷ ಇದೇ ದುರಂತ ನಡೆದರೂ ಕ್ರಮ ಏಕೆ ಇಲ್ಲ?
ಜನರ ಆರೋಗ್ಯಕ್ಕಿಂತ ಕೈಗಾರಿಕೆಗಳ ಲಾಭ ಮುಖ್ಯವೇ?

ಅಧಿಕಾರಿಗಳ ಪರಿಶೀಲನೆ — ಆದರೆ ಕ್ರಮ ಯಾವಾಗ?

ಘಟನೆ ಬೆಳಕಿಗೆ ಬರುತ್ತಿದ್ದಂತೆ ಕರ್ನಾಟಕ ರಾಜ್ಯ ಮಾಲಿನ್ಯ ನಿಯಂತ್ರಣ ಮಂಡಳಿ ಅಧಿಕಾರಿಗಳು ಸ್ಥಳಕ್ಕೆ ಭೇಟಿ ನೀಡಿ ಪರಿಶೀಲನೆ ನಡೆಸಿದ್ದಾರೆ.
ಪಚ್ಚನಾಡಿ ಎಸ್.ಟಿ.ಪಿ ಘಟಕದಿಂದ ಸಂಸ್ಕರಿಸದ ತ್ಯಾಜ್ಯ ನೀರು ನದಿಗೆ ಸೇರುತ್ತಿದೆಯೇ ಎಂಬ ಅನುಮಾನ ವ್ಯಕ್ತವಾಗಿದೆ.

ನದಿ ಮತ್ತು ಬಾವಿ ನೀರಿನ ಮಾದರಿಗಳನ್ನು ಸಂಗ್ರಹಿಸಿ ಪರೀಕ್ಷೆಗೆ ಕಳುಹಿಸಲಾಗಿದೆ. ಆದರೆ ಜನರ ಪ್ರಶ್ನೆ ಒಂದೇ — “ವರದಿ ಬರುವವರೆಗೆ ಇನ್ನಷ್ಟು ಜೀವ ಹಾನಿಯಾಗಬೇಕಾ?”