ಬಹಳ ಹಿಂದೆ ಸಂವಿಧಾನ ಕಾನೂನು ಸುವ್ಯವಸ್ಥೆಯ ಅಂದಾಜಿಲ್ಲದ ಸಮಯದಲ್ಲಿ ಉಳ್ಳವರು ಸಾಮಾಜಿಕ ಬಹಿಷ್ಕಾರದಂತಹ ದೌರ್ಜನ್ಯಗಳನ್ನು ಬಡವರ ಮೇಲೆ ಹೇರುತ್ತದೆ ಬಂದಿದ್ದರು. ಅದಕ್ಕೆಲ್ಲ ಇವತ್ತು ಜಾಗವಿಲ್ಲ ಅಂತ ಅಂದುಕೊಂಡಿದ್ದು ತಪ್ಪು ಅಂತ ಪ್ರೂ ಮಾಡುತ್ತಿದೆ ಈ ಎರಡು ಘಟನೆ.

ಒಂದು ಅನಿಷ್ಟ ಪ್ರಕರಣವು ಇತ್ತ ಚಾಮರಾಜನಗರದ ಜಂಗಲ್ ಪ್ರದೇಶದಲ್ಲಿ ನಡೆದರೆ, ಮತ್ತೊಂದು ಪ್ರಕರಣವು ಯಾದಗಿರಿ ಜಿಲ್ಲೆಯಂತಹ ಬಿಸಿಲ ನಾಡಿನಲ್ಲಿ ನಡೆದಿದೆ. ಇದರ ಪೈಕಿ ಒಂದು ಪ್ರಕರಣದಲ್ಲಿ ಜೀವ ಹಾನಿಯೂ ಆಗಿದೆ.

ಅದು ಚಾಮರಾಜನಗರ ಜಿಲ್ಲೆ ಹುನೂರು ತಾಲೂಕಿನ ಹೊಂಗ್ಯಾ ಗ್ರಾಮ. ಈ ಗ್ರಾಮದ ಕೆಂಚಮ್ಮ ಎಂಬ ಹೆಂಗಸುಹಾಗೂ ಅವಳ ಈಡಿ ಕುಟುಂಬ ಸಾಮಾಜಿಕ ಬಹಿಷ್ಕಾರಕ್ಕೆ ಒಳಗಾಗಿದ್ದಾಳೆ. ಅಷ್ಟಕ್ಕೂ ಈ ಬಹಿಷ್ಕಾರ ಯಾಕೆ? ಅಂತಹ ತಪ್ಪನ್ನು ಅವಳು ಏನು ಮಾಡಿದಳು? ಊರಿನವರು, ಕುಟುಂಬದವರು, ಸಮಾಜದವರು ತಲೆತಗ್ಗಿಸುವಂತಹ ತಪ್ಪನ್ನು ಆಕೆ ಏನು ಮಾಡಿದಳೇ? ಕೇಳಿದರೆ ನಕ್ಕು ಬಿಡುತ್ತೀರಾ. ಕೇವಲ ತನ್ನ ತಾಯಿಯು ಅನಾರೋಗ್ಯದಿಂದ ನರಳುತ್ತಿದ್ದಾಳೆ ಎನ್ನುವ ಕಾರಣಕ್ಕೆ, ಆರೈಕೆ ಮಾಡಲು ತವರು ಮನೆಗೆ ಹೋಗಿದ್ದಕ್ಕೆ ಈ ಸಾಮಾಜಿಕ ಬಹಿಷ್ಕಾರ. ಊರಿನ ಮುಖಂಡನ ಈ ದೌರ್ಜನ್ಯದ ವಿರುದ್ಧ ಕೆಂಚಮ್ಮ ಈಗ ಸೆಟೆದು ನಿಂತಿದ್ದಾಳೆ. ಈ ದೌರ್ಜನ್ಯದ ವಿರುದ್ಧ ಹೋರಾಟಕ್ಕೆ ಇಳಿದಿದ್ದಾಳೆ.

ಹೌದು , ಈ ಕೆಂಚಮ್ಮ ಜಿಲ್ಲೆಯ ಕರಂಬಾರಿ ಮೂಲದವಳು ರಾಮು ಎಂಬ ವ್ಯಕ್ತಿಯನ್ನು ಮದುವೆಯಾದ ನಂತರ ಹೊಂಗೆ ಗ್ರಾಮಕ್ಕೆ ಬರುತ್ತಾಳೆ. ಕಳೆದ ಕೆಲವು ಸಮಯದಿಂದ ಹೆತ್ತ ತಾಯಿ ಅನಾರೋಗ್ಯಕ್ಕೆ ಈಡಾಗುತ್ತಾಳೆ. ಅವಳನ್ನು ಆರೈಕೆ ಮಾಡಲು ಕರಂಬಾರಿಯ ತವರಿಗೆ ಹೋಗಿದ್ದಾಳೆ. ಹಾಗೆ ಹೋದವಳು ಸರಿ ಸುಮಾರು ಒಂದು ತಿಂಗಳಿಗೂ ಹೆಚ್ಚು ದಿನ ತಾಯಿಯ ಹಾರೈಕೆಯಲ್ಲಿ ಕಳೆಯುತ್ತಾಳೆ. ಇದು ಊರಿನ ಮುಖಂಡನ ಪಿತ್ತವನ್ನು ನೆತ್ತಿಗೇರಿಸಿದೆ. ಇದೇ ಕಾರಣವನ್ನು ಮುಂದಿಟ್ಟುಕೊಂಡು, ಆ ಊರಿನ ಮುಖಂಡ ಸಾಮಾಜಿಕ ಬಹಿಷ್ಕಾರಕ್ಕೆ ಕರೆ ನೀಡಿದ್ದಾನೆ. ಕೇವಲ ಕೆಂಚಮ್ಮನಿಗಷ್ಟೇ ಅಲ್ಲ, ಅವಳ ಇಡೀ ಕುಟುಂಬಕ್ಕೆ ಈ ಬಹಿಷ್ಕಾರದ ಬಿಸಿ ತಟ್ಟಿದೆ. ಅಷ್ಟೇ ಅಲ್ಲ, ಈ ಬಹಿಷ್ಕಾರವನ್ನು ವಾಪಸ್ ಪಡೆಯಬೇಕು ಎಂದರೆ ಲಕ್ಷಾಂತರ ರೂ ಹಣದ ಬೇಡಿಕೆಯನ್ನು ಇಟ್ಟಿದ್ದಾನೆ ಸಮಾಜದ ಮುಖಂಡ.

ಇದರಿಂದ ರೊಚ್ಚಿಗೆದ್ದಿರುವ ಕೆಂಚಮ್ಮ, ರಾಮಪುರ ಪೊಲೀಸ್ ಠಾಣೆಯಲ್ಲಿ ಅಧಿಕೃತವಾಗಿ ದೂರು ದಾಖಲಿಸಿದ್ದಾಳೆ. ಹಾಗೆಯೇ ದೌರ್ಜನ್ಯ ನಡೆಸುತ್ತಿರುವವರ ವಿರುದ್ಧ ಹೋರಾಟಕ್ಕೆ ಧುಮುಕಿದ್ದಾಳೆ.

ಇತ್ತ ಇನ್ನೊಂದು ಪ್ರಕರಣ ಯಾದಗಿರಿ ಜಿಲ್ಲೆಯ ಗಿರಿಯಾರ ಎಂಬಲ್ಲಿ ನಡೆದಿದೆ. ಇಲ್ಲಿನ ಕಮಲಮ್ಮ ಎಂಬ ಕುಟುಂಬದ ಮೇಲೆಯೇ ಸಾಮಾಜಿಕ ಬಹಿಷ್ಕಾರದ ಹೊರೆಯನ್ನು ಹೊರಿಸಲಾಗಿದೆ. ಸಿಳ್ಳೆಖ್ಯಾತ ಸಮುದಾಯಕ್ಕೆ ಸೇರಿರುವ ಕಮಲಮ್ಮ ಹಾಗೂ ಅವರ ಇಡೀ ಕುಟುಂಬವನ್ನು ಸಾಮಾಜಿಕ ಬಹಿಷ್ಕಾರದ ಶಿಕ್ಷೆಗೆ ಒಳಪಡಿಸಿರುವುದು ಇವತ್ತಿನ ಸುಶಿಕ್ಷಿತ ಜನರು ತಲೆತಗ್ಗಿಸುವಂತಹ ವಿಚಾರವಾಗಿದೆ. ಈ ಒಂದು ಸಾಮಾಜಿಕ ಬಹಿಷ್ಕಾರದಿಂದ ತೀವ್ರ ಅವಮಾನಕ್ಕೆ ಒಳಗಾದ ಕಮಲಮ್ಮ, ಕೃಷ್ಣಾ ನದಿಯ ಸೇತುವೆಯೊಂದರ ಮೇಲೆ ನಿಂತು, ನದಿಗೆ ಹಾರಿ ಆತ್ಮಹತ್ಯೆ ಮಾಡಿಕೊಂಡಿದ್ದಾಳೆ. ಅಗ್ನಿಶಾಮಕ ದಳದ ಸಿಬ್ಬಂದಿಗಳು ಮೃತ ದೇಹವನ್ನು ಹೊರಗೆ ತೆಗೆದಿದ ನಂತರವೇ ಗ್ರಾಮದಲ್ಲಿ ನಡೆದ ಈ ಪ್ರಕರಣವು ಹೊರಕ್ಕೆ ಬಂದಿದೆ.

ಕರ್ನಾಟಕದಲ್ಲಿ ನಡೆದಂತಹ ಈ ಎರಡು ಪ್ರಕರಣಗಳು ಯಾವತ್ತೋ ನಡೆದಿದ್ದಲ್ಲ. ಜಸ್ಟ್ ಇವಾಗಷ್ಟೇ ನಡೆದ ಪ್ರಕರಣ. ಆಧುನಿಕವಾಗಿ ಸಮಾಜವು ಎಷ್ಟೇ ಬೆಳೆದರು, ಸುಶಿಕ್ಷಿತ ನಾಡಾಗುತ್ತಿದ್ದರೂ ಅನಿಷ್ಠ ಪದ್ಧತಿ, ದೌರ್ಜನ್ಯ ಹಾಗೂ ಆಚರಣೆ ಇನ್ನೂ ಅಲ್ಲಲ್ಲಿ ತನ್ನ ಇರುವಿಕೆಯನ್ನು ತೋರಿಸುತ್ತಿದೆ ಅನ್ನೋದಕ್ಕೆ ಇವೆರಡು ಪ್ರಕರಣಗಳೇ ಸಾಕ್ಷಿ. ರಾಜಕೀಯ ಲಾಭ ನಷ್ಟ ಇವೆಲ್ಲವನ್ನೂ ಬಿಟ್ಟು, ಇಂತಹ ಅನಿಷ್ಟ ಪ್ರಕರಣಕ್ಕೆ ಕಾರಣರಾದವರ ಮೇಲೆ ಕಠಿಣಾತಿ ಕಠಿಣ ಕ್ರಮ ಕೈಗೊಳ್ಳುವ ಮೂಲಕ ಸ್ಪಷ್ಟವಾದಂತ ಮೆಸೇಜನ್ನು ನೀಡುವ ಕೆಲಸ ಆಗಬೇಕೆಂಬ ಆಗ್ರಹ ಸಾರ್ವಜನಿಕ ವಲಯದಿಂದ ಕೇಳಿ ಬರುತ್ತಿದೆ.