ಕರ್ನಾಟಕದ ಸಿಎಂ ಡಿ.ಕೆ. ಶಿವಕುಮಾರ್ ಅವರು ಕ್ಷೇತ್ರ ಮರುವಿಂಗಡಣೆಯಲ್ಲಿ 1971ರ ಜನಗಣತಿಯನ್ನು ಆಧಾರವಾಗಿರಿಸಬೇಕು ಎಂದು ಒತ್ತಾಯಿಸಿದರು. ಜನಸಂಖ್ಯೆ ನಿಯಂತ್ರಿಸಿದ ಕರ್ನಾಟಕ ಸೇರಿದಂತೆ ದಕ್ಷಿಣ ರಾಜ್ಯಗಳಿಗೆ Delimitation ಮೂಲಕ ರಾಜಕೀಯವಾಗಿ ನಷ್ಟವಾಗಬಾರದು ಎಂಬುದು ಅವರ ಪ್ರಮುಖ ವಾದವಾಗಿತ್ತು.

ಇನ್ನು ತಮಿಳುನಾಡು ಸಿಎಂ ಸಿ. ಜೋಸೆಫ್ ವಿಜಯ್ ಅವರು ನಿನ್ನೆ ನಡೆದ ದಕ್ಷಿಣ ವಲಯ ಮಂಡಳಿ ಸಭೆಯಲ್ಲಿ ಕ್ಷೇತ್ರ ಮರುವಿಂಗಡಣೆ, NEET, ಕಾವೇರಿ ನೀರು, ರಾಜ್ಯಗಳ ಹಣಕಾಸು ಹಕ್ಕು ಸೇರಿದಂತೆ ಹಲವು ಪ್ರಮುಖ ವಿಚಾರಗಳನ್ನು ಪ್ರಸ್ತಾಪಿಸಿದರು. ಜನಸಂಖ್ಯೆ ನಿಯಂತ್ರಣದಲ್ಲಿ ಯಶಸ್ವಿಯಾದ ದಕ್ಷಿಣ ರಾಜ್ಯಗಳಿಗೆ ಕ್ಷೇತ್ರ ಮರುವಿಂಗಡಣೆಯಿಂದ ರಾಜಕೀಯವಾಗಿ ಅನ್ಯಾಯವಾಗಬಾರದು ಎಂಬುದು ಅವರ ಪ್ರಮುಖ ಆತಂಕವಾಗಿತ್ತು.

ನಿನ್ನೆಯ ಸಭೆಯಲ್ಲಿ ವಿಜಯ್ ಅವರ ಒತ್ತು ತಮಿಳುನಾಡಿನ NEET, ಕಾವೇರಿ, Delimitation ಮತ್ತು ಹಣಕಾಸಿನ ಹಕ್ಕುಗಳ ಮೇಲೆ ಇದ್ದರೆ, ಡಿಕೆಶಿ ಅವರು 1971ರ ಜನಗಣತಿ, 543 ಲೋಕಸಭಾ ಸ್ಥಾನಗಳ ರಕ್ಷಣೆ, ಮಹಿಳಾ ಮೀಸಲಾತಿ, ಮೇಕೆದಾಟು ಮತ್ತು ಕರ್ನಾಟಕದ ಕೇಂದ್ರ ಅನುದಾನಗಳ ವಿಚಾರವನ್ನು ಪ್ರಮುಖವಾಗಿ ಪ್ರಸ್ತಾಪಿಸಿದರು. ಎರಡೂ ರಾಜ್ಯಗಳ ನಡುವೆ ಭಿನ್ನಾಭಿಪ್ರಾಯವಿರುವ ಕಾವೇರಿ–ಮೇಕೆದಾಟು ವಿಚಾರದ ಜೊತೆಗೆ, ದಕ್ಷಿಣ ರಾಜ್ಯಗಳ ರಾಜಕೀಯ ಪ್ರಾತಿನಿಧ್ಯ ಕುಗ್ಗಬಾರದು ಎಂಬ ಸಾಮಾನ್ಯ ಕಳವಳವೂ ಸಭೆಯಲ್ಲಿ ಎದ್ದು ಕಾಣಿಸಿತು.

ಕ್ಷೇತ್ರ ಮರುವಿಂಗಡಣೆ ವಿಚಾರದಲ್ಲಿ, ಪ್ರಸ್ತಾವಿತ Delimitation ಪ್ರಕ್ರಿಯೆಯಿಂದ ತಮಿಳುನಾಡಿನಂತಹ ರಾಜ್ಯಗಳ ಲೋಕಸಭಾ ಪ್ರಾತಿನಿಧ್ಯ ಕಡಿಮೆಯಾಗಬಾರದು. ಪ್ರಸ್ತುತ ರಾಜ್ಯಗಳ ಸಂಸದೀಯ ಪ್ರಾತಿನಿಧ್ಯದ ಪಾಲು ಕುಸಿಯದಂತೆ ಕೇಂದ್ರದಿಂದ ಕಾನೂನುಬದ್ಧ ಭರವಸೆ ನೀಡಬೇಕು ಎಂದು ವಿಜಯ್ ಒತ್ತಾಯಿಸಿದರು.

NEET ವಿಚಾರದಲ್ಲೂ ವಿಜಯ್ ತಮ್ಮ ನಿಲುವು ಸ್ಪಷ್ಟಪಡಿಸಿದರು. ತಮಿಳುನಾಡಿಗೆ NEET‌ನಿಂದ ವಿನಾಯಿತಿ ನೀಡಬೇಕು ಮತ್ತು ರಾಜ್ಯ ಕೋಟಾದ ವೈದ್ಯಕೀಯ ಸೀಟುಗಳಿಗೆ 12ನೇ ತರಗತಿ ಅಂಕಗಳ ಆಧಾರದ ಮೇಲೆ ಪ್ರವೇಶ ನೀಡಲು ಅವಕಾಶ ಕಲ್ಪಿಸಬೇಕು ಎಂದು ಕೇಂದ್ರದ ಮುಂದೆ ಬೇಡಿಕೆ ಇಟ್ಟರು.

ಕಾವೇರಿ ನೀರಿನ ವಿಚಾರವೂ ಸಭೆಯಲ್ಲಿ ಪ್ರಮುಖವಾಗಿತ್ತು. ಕಾವೇರಿ ನೀರು ಹಂಚಿಕೆಗೆ ಸಂಬಂಧಿಸಿದ ಸುಪ್ರೀಂ ಕೋರ್ಟ್ ಮತ್ತು ನ್ಯಾಯಮಂಡಳಿ ಆದೇಶಗಳನ್ನು ಕಟ್ಟುನಿಟ್ಟಾಗಿ ಪಾಲಿಸಬೇಕು ಎಂದು ವಿಜಯ್ ಆಗ್ರಹಿಸಿದರು. ಮೇಕೆದಾಟು ಸೇರಿದಂತೆ ಅಂತಾರಾಜ್ಯ ನದಿ ನೀರಿನ ಯೋಜನೆಗಳಲ್ಲಿ ತಮಿಳುನಾಡಿನ ಹಿತಾಸಕ್ತಿಯನ್ನು ಪರಿಗಣಿಸಬೇಕು ಎಂಬ ನಿಲುವನ್ನೂ ಅವರು ಮುಂದಿಟ್ಟರು.

ರಾಜ್ಯಗಳ ಹಣಕಾಸಿನ ಹಕ್ಕಿನ ಬಗ್ಗೆಯೂ ವಿಜಯ್ ಮಾತನಾಡಿದರು. ಜನಸಂಖ್ಯೆ ನಿಯಂತ್ರಣ ಮತ್ತು ಆರ್ಥಿಕ ಅಭಿವೃದ್ಧಿಯಲ್ಲಿ ಮುನ್ನಡೆ ಸಾಧಿಸಿರುವ ದಕ್ಷಿಣ ರಾಜ್ಯಗಳಿಗೆ ಕೇಂದ್ರದ ತೆರಿಗೆ ಹಂಚಿಕೆ ಮತ್ತು ಅನುದಾನದಲ್ಲಿ ನ್ಯಾಯಯುತ ಪಾಲು ದೊರೆಯಬೇಕು ಎಂಬ ಬೇಡಿಕೆಯನ್ನು ಅವರು ಮುಂದಿಟ್ಟರು.

ಲೋಕಸಭಾ ಸ್ಥಾನಗಳ ವಿಚಾರದಲ್ಲಿ, ಒಟ್ಟು 543 ಸ್ಥಾನಗಳ ಸಂಖ್ಯೆಯನ್ನು ಮುಂದಿನ 25 ವರ್ಷಗಳ ಕಾಲ ಕಾಯ್ದುಕೊಳ್ಳಬೇಕುಎಂದು ಡಿಕೆಶಿ ಪ್ರಸ್ತಾಪಿಸಿದರು. ಮಹಿಳಾ ಮೀಸಲಾತಿಯನ್ನು ಜಾರಿಗೊಳಿಸುವಾಗಲೂ ಹೊಸ ಸ್ಥಾನಗಳನ್ನು ಹೆಚ್ಚಿಸುವ ಬದಲು ಹಾಲಿ 543 ಸ್ಥಾನಗಳ ಮಿತಿಯೊಳಗೇ ಮೀಸಲಾತಿ ಕಲ್ಪಿಸಬೇಕು ಎಂದು ಅವರು ಅಭಿಪ್ರಾಯಪಟ್ಟರು.

ಮೇಕೆದಾಟು ಯೋಜನೆಯ ಬಗ್ಗೆಯೂ ಡಿಕೆಶಿ ಕರ್ನಾಟಕದ ನಿಲುವನ್ನು ಪುನರುಚ್ಚರಿಸಿದರು. ಈ ಯೋಜನೆ ಕರ್ನಾಟಕಕ್ಕೆ ಮಾತ್ರವಲ್ಲದೆ ತಮಿಳುನಾಡು ಮತ್ತು ಪುದುಚೇರಿಗೂ ನೀರು ನಿರ್ವಹಣೆಯಲ್ಲಿ ಪ್ರಯೋಜನಕಾರಿಯಾಗಬಹುದು ಎಂದು ಅವರು ಹೇಳಿದರು. ಯೋಜನೆ ಮುಂದುವರಿಸಲು ಅಗತ್ಯವಿರುವ ಕೇಂದ್ರದ ಅನುಮತಿಗೆ ಒತ್ತು ನೀಡಿದರು.ಇದರ ಜೊತೆಗೆ ಕರ್ನಾಟಕಕ್ಕೆ ಬಾಕಿ ಇರುವ ಕೇಂದ್ರದ ಅನುದಾನ, ರಾಜ್ಯದ ಪ್ರಮುಖ ಮೂಲಸೌಕರ್ಯ ಯೋಜನೆಗಳು ಹಾಗೂ ರಾಯಚೂರಿನಲ್ಲಿ AIIMS ಸ್ಥಾಪನೆ ಸೇರಿದಂತೆ ಕರ್ನಾಟಕದ ವಿವಿಧ ಬೇಡಿಕೆಗಳನ್ನೂ ಕೇಂದ್ರದ ಗಮನಕ್ಕೆ ತರಲಾಯಿತು.

##TamilNadu #Karnataka #Vijay #DKShivakumar #Delimitation #NEET #CauveryWater