ಔಷಧಿ ಎಂದರೆ ಕೇವಲ ಒಂದು ಉತ್ಪನ್ನವಲ್ಲ… ಅದು ಒಬ್ಬರ ಜೀವದ ಮೇಲಿರುವ ನಂಬಿಕೆ. ನೋವು ಕಡಿಮೆ ಮಾಡಬೇಕು, ರೋಗ ಗುಣಪಡಿಸಬೇಕು, ಜೀವ ಉಳಿಸಬೇಕು ಎಂಬ ನಿರೀಕ್ಷೆಯಲ್ಲಿ ಜನರು ಔಷಧಿ ಖರೀದಿಸುತ್ತಾರೆ. ಆದರೆ ಇದೇ ನಂಬಿಕೆಯನ್ನು ಹಣ ಮಾಡುವ ಮಾರ್ಗವನ್ನಾಗಿ ಮಾಡಿಕೊಂಡಿರುವ ನಕಲಿ ಔಷಧ ದಂಧೆ ಈಗ ಆತಂಕಕ್ಕೆ ಕಾರಣವಾಗಿದೆ.

ಬಿಡದಿ ಸಮೀಪದ ಹೆಜ್ಜಾಲದಲ್ಲಿ ಪರವಾನಗಿಯೇ ಇಲ್ಲದ ಘಟಕದಲ್ಲಿ ಪ್ರತಿಷ್ಠಿತ ಅಂತರಾಷ್ಟ್ರೀಯ ಹಾಗೂ ಬಹುರಾಷ್ಟ್ರೀಯ ಕಂಪನಿಗಳ ಹೆಸರಿನಲ್ಲಿ ನಕಲಿ ಔಷಧಗಳನ್ನು ತಯಾರಿಸಿ, ಮರುಪ್ಯಾಕ್ ಮಾಡಿ ಮಾರುಕಟ್ಟೆಗೆ ಕಳುಹಿಸಲು ಸಿದ್ಧತೆ ನಡೆಸಲಾಗುತ್ತಿತ್ತು ಎಂಬ ಆರೋಪ ಕೇಳಿಬಂದಿದೆ. ಅಧಿಕಾರಿಗಳ ಕಾರ್ಯಾಚರಣೆಯಲ್ಲಿ 5 ಕೋಟಿಗೂ ಅಧಿಕ ಮೌಲ್ಯದ ನಕಲಿ ಔಷಧಗಳು ಹಾಗೂ ಕಚ್ಚಾವಸ್ತುಗಳು ವಶಕ್ಕೆ ಪಡೆದಿರುವುದು ಪ್ರಕರಣದ ಗಂಭೀರತೆಯನ್ನು ತೋರಿಸುತ್ತದೆ.

Also Read ಕನ್ನಡದ ನೆಲದಲ್ಲಿ ಕನ್ನಡಕ್ಕೇ ಗೇಟ್ ಪಾಸ್: ಇವರು ಕರ್ನಾಟಕದ ಸಚಿವರೊ⁉️ಇಂಗ್ಲೆಂಡಿನ ಪ್ರತಿನಿಧಿಯೋ?

ಅಸಿಡಿಟಿ, ನೋವು ನಿವಾರಕ ಮಾತ್ರೆಗಳು ಹಾಗೂ ಆ್ಯಂಟಿಬಯೋಟಿಕ್‌ಗಳಂತೆ ಬಳಸುವ ಔಷಧಿಗಳಿಗೆ ನಕಲಿ ಲೇಬಲ್ ಅಂಟಿಸಿ ಮಾರಾಟ ಮಾಡಲು ಸಿದ್ಧತೆ ನಡೆಸಲಾಗಿತ್ತು ಎನ್ನಲಾಗಿದೆ. ಅಂದರೆ ಗ್ರಾಹಕನಿಗೆ ಔಷಧಿ ನಿಜವೋ, ನಕಲಿಯೋ ಎಂಬ ಅನುಮಾನ ಬಾರದಂತೆ ಪ್ರತಿಷ್ಠಿತ ಕಂಪನಿಗಳ ಹೆಸರನ್ನೇ ಬಳಸಿಕೊಂಡಿರುವ ಆರೋಪವಿದೆ.

ಇಲ್ಲಿ ಪ್ರಶ್ನೆ ಕೇವಲ 5 ಕೋಟಿ ಮೌಲ್ಯದ ನಕಲಿ ಔಷಧ ಪತ್ತೆಯಾಗಿದೆ ಎಂಬುದಲ್ಲ. ಇನ್ನೆಷ್ಟು ಔಷಧಿಗಳು ಈಗಾಗಲೇ ಮಾರುಕಟ್ಟೆಗೆ ಹೋಗಿವೆ? ಎಷ್ಟು ಜನ ಇವುಗಳನ್ನು ನಿಜವಾದ ಔಷಧಿ ಎಂದು ನಂಬಿ ಸೇವಿಸಿದ್ದಾರೆ? ಒಂದು ನಕಲಿ ಮಾತ್ರೆಯಿಂದ ಆರೋಗ್ಯ ಹದಗೆಟ್ಟರೆ, ಅದರ ಹೊಣೆ ಯಾರು?

ಆಹಾರ ಕಲಬೆರಕೆಯಾದರೆ ಆರೋಗ್ಯಕ್ಕೆ ಅಪಾಯ. ಆದರೆ ಔಷಧಿಯೇ ನಕಲಿಯಾದರೆ, ಅದು ನೇರವಾಗಿ ಜೀವದ ಜೊತೆಗಿನ ಆಟ.ಜನರ ಅನಾರೋಗ್ಯವನ್ನು ಗುಣಪಡಿಸಬೇಕಾದ ಔಷಧವೇ ಕೆಲವರ ಪಾಲಿಗೆ ‘ಮನಿ ಮಿಂಟಿಂಗ್ ಮೆಷಿನ್’ ಆಗಿರುವುದು ಸಮಾಜಕ್ಕೆ ಎಚ್ಚರಿಕೆಯ ಗಂಟೆಯಾಗಿದೆ.

Also Read ಐಟಿ ಕ್ಷೇತ್ರದಲ್ಲಿ ಮತ್ತೆ ಲೇಆಫ್ ಭೀತಿ!

ಹಣಕ್ಕಾಗಿ ನಕಲಿ ಉತ್ಪನ್ನ ತಯಾರಿಸುವುದು ವ್ಯಾಪಾರದಲ್ಲಿ ಮೋಸವಾಗಬಹುದು; ಆದರೆ ನಕಲಿ ಔಷಧ ತಯಾರಿಸುವುದು ಮನುಷ್ಯನ ಆರೋಗ್ಯ ಮತ್ತು ಜೀವದ ಮೇಲೆ ನಡೆಸುವ ಅಪಾಯಕಾರಿ ವಂಚನೆ. ಆದ್ದರಿಂದ ಈ ಪ್ರಕರಣದಲ್ಲಿ ಕೇವಲ ನಕಲಿ ಔಷಧ ವಶಪಡಿಸಿಕೊಳ್ಳುವುದಷ್ಟೇ ಅಲ್ಲ, ಇದರ ಹಿಂದೆ ಇರುವ ಸಂಪೂರ್ಣ ಜಾಲವನ್ನು ಪತ್ತೆಹಚ್ಚಿ, ಔಷಧಗಳು ಎಲ್ಲಿಗೆಲ್ಲ ಪೂರೈಕೆಯಾಗಿದ್ದವು ಎಂಬುದನ್ನೂ ತನಿಖೆ ಮಾಡುವುದು ಅತ್ಯಂತ ಅಗತ್ಯ.

ಅಧಿಕಾರಿಗಳ ಕಾರ್ಯಾಚರಣೆ ಒಂದು ಜಾಲವನ್ನು ಬಯಲಿಗೆಳೆದಿದೆ. ಆದರೆ ದೊಡ್ಡ ಪ್ರಶ್ನೆ ಇನ್ನೂ ಉಳಿದಿದೆ — ಜೀವ ಉಳಿಸುವ ಔಷಧಕ್ಕೂ ಬೆಲೆ ಕಟ್ಟುವ ಈ ದಂಧೆ ಇನ್ನೆಷ್ಟು ಆಳಕ್ಕೆ ಹೋಗಿದೆ?

##FakeMedicines #DrugScam #MedicineFraud #HealthcareSafety #PharmaFraud #FakeDrugs #DrugControl