ಬೆಂಗಳೂರು/ಮುಂಬೈ: ಸಾರ್ವಜನಿಕ ವೇದಿಕೆಯಲ್ಲಿ ಉದ್ಯಮಿಗಳನ್ನು ಕಠಿಣ ಪ್ರಶ್ನೆಗಳಿಂದ ಎದುರಿಸುವುದು ಹೊಸದೇನಲ್ಲ. ಆದರೆ ಆ ಪ್ರಶ್ನೆಗೆ ಅವರು ಹೇಗೆ ಪ್ರತಿಕ್ರಿಯಿಸುತ್ತಾರೆ ಎಂಬುದೇ ಅವರ ವ್ಯಕ್ತಿತ್ವವನ್ನು ತೋರಿಸುತ್ತದೆ. ಇದೇ ಮಾತಿಗೆ ಸಾಕ್ಷಿಯಾದ ಘಟನೆ ಇತ್ತೀಚೆಗೆ ನಡೆದ ಸಾರ್ವಜನಿಕ ಕಾರ್ಯಕ್ರಮದಲ್ಲಿ ನಡೆಯಿತು. ಝೆರೋಧಾ ಸಹ-ಸಂಸ್ಥಾಪಕ ನಿಖಿಲ್ ಕಾಮತ್ ಅವರನ್ನು ಮಹಿಳೆಯೊಬ್ಬರು ನೇರವಾಗಿ ಪ್ರಶ್ನಿಸಿದ ವಿಡಿಯೋ ಇದೀಗ ಸಾಮಾಜಿಕ ಜಾಲತಾಣಗಳಲ್ಲಿ ಭಾರೀ ವೈರಲ್ ಆಗಿದೆ.

ಕಾರ್ಯಕ್ರಮದ ಪ್ರಶ್ನೋತ್ತರ ಅವಧಿಯಲ್ಲಿ ಮಹಿಳೆ ಎದ್ದು ನಿಂತು, “ನಾನು ನಿಮಗೆ ಇ-ಮೇಲ್ ಕಳುಹಿಸಿದ್ದೆ. ಆದರೆ ಅದಕ್ಕೆ ಯಾವುದೇ ಉತ್ತರ ಬಂದಿಲ್ಲ” ಎಂದು ನೇರವಾಗಿ ಪ್ರಶ್ನಿಸಿದರು. ಸಭಾಂಗಣದಲ್ಲಿ ಕ್ಷಣಕಾಲ ಮೌನ ಆವರಿಸಿತು. ಹಲವರು ನಿಖಿಲ್ ಕಾಮತ್ ಹೇಗೆ ಪ್ರತಿಕ್ರಿಯಿಸುತ್ತಾರೆ ಎಂಬ ಕುತೂಹಲದಿಂದ ಕಾಯುತ್ತಿದ್ದರು.

Also Read ಮಾಜಿ ಮುಖ್ಯಮಂತ್ರಿಯ ಮೇಲೆ ಗುಂಡಿನ ದಾಳಿ,- Z+ ಭದ್ರತೆಯ ನಡುವೆ ದಾಳಿಕೋರ ಹೇಗೆ ಬಂದ?

ಆದರೆ ಯಾವುದೇ ಮುಜುಗರ, ಅಹಂಕಾರ ಅಥವಾ ನೆಪ ಹೇಳದೆ ನಿಖಿಲ್ ಕಾಮತ್ ಮೊದಲು ನಗುಮುಖದಿಂದಲೇ, “ಅದಕ್ಕಾಗಿ ಕ್ಷಮೆ ಕೇಳುತ್ತೇನೆ” ಎಂದು ಉತ್ತರಿಸಿದರು. ಬಳಿಕ, “ನನಗೆ ಪ್ರತಿದಿನ ಸಾವಿರಾರು ಇ-ಮೇಲ್‌ಗಳು ಬರುತ್ತವೆ. ಪ್ರತಿಯೊಂದಕ್ಕೂ ವೈಯಕ್ತಿಕವಾಗಿ ಉತ್ತರಿಸುವುದು ಸಾಧ್ಯವಾಗುವುದಿಲ್ಲ. ಆದರೂ ಅದು ನಿಮ್ಮ ನಿರಾಶೆಗೆ ಕಾರಣವಾಗಿದ್ದರೆ ವಿಷಾದಿಸುತ್ತೇನೆ. ಕಾರ್ಯಕ್ರಮದ ನಂತರ ನಿಮ್ಮನ್ನು ಭೇಟಿಯಾಗುತ್ತೇನೆ” ಎಂದು ಅತ್ಯಂತ ಶಾಂತವಾಗಿ ಹೇಳಿದರು.

ಈ ಉತ್ತರ ಕೇಳುತ್ತಿದ್ದಂತೆಯೇ ಸಭಾಂಗಣ ಚಪ್ಪಾಳೆಗಳಿಂದ ಮೊಳಗಿತು. ಸಾಮಾಜಿಕ ಜಾಲತಾಣಗಳಲ್ಲಿಯೂ ಇದೇ ವಿಡಿಯೋ ಲಕ್ಷಾಂತರ ವೀಕ್ಷಣೆ ಪಡೆದು ವೈರಲ್ ಆಗಿದೆ. ಅನೇಕರು “ನಿಜವಾದ ನಾಯಕತ್ವ ಎಂದರೆ ಇದೇ”, “ತಪ್ಪನ್ನು ಒಪ್ಪಿಕೊಳ್ಳುವ ಗುಣವೇ ದೊಡ್ಡತನ”, “ಕೋಪಗೊಳ್ಳದೇ, ಸಮಾಧಾನದಿಂದ ಉತ್ತರಿಸಿದ ರೀತಿ ಮಾದರಿಯಾಗಿದೆ” ಎಂದು ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ.

Also Read ಬೆಂಗಳೂರು ಮಾತ್ರವಲ್ಲ… ಮಂಗಳೂರಿನಿಂದಲೂ Startup ಹಾರಾಟ! ₹9.5 ಕೋಟಿಗೂ ಅಧಿಕ ಹೂಡಿಕೆಯ K-Combinatorಗೆ ಚಾಲನೆ

ವಿಶೇಷವಾಗಿ ಕರಾವಳಿ ಕರ್ನಾಟಕದ ಜನರು ಈ ಘಟನೆಯನ್ನು ಹೆಮ್ಮೆಯಿಂದ ಹಂಚಿಕೊಳ್ಳುತ್ತಿದ್ದಾರೆ. ದಕ್ಷಿಣ ಕನ್ನಡ ಮೂಲದ ನಿಖಿಲ್ ಕಾಮತ್ ಅವರ ಸರಳತೆ, ವಿನಯ ಮತ್ತು ಶಾಂತ ಸ್ವಭಾವ ಕರಾವಳಿಯ ಸಂಸ್ಕೃತಿಯನ್ನು ಪ್ರತಿಬಿಂಬಿಸುತ್ತದೆ ಎಂದು ಹಲವರು ಅಭಿಪ್ರಾಯಪಟ್ಟಿದ್ದಾರೆ. “ಮಂಗಳೂರಿನ ಹುಡುಗನ ಸಂಸ್ಕಾರ ಇದು”, “ಯಶಸ್ಸು ಎಷ್ಟೇ ದೊಡ್ಡದಾದರೂ ವಿನಯ ಕಳೆದುಕೊಳ್ಳಲಿಲ್ಲ” ಎಂಬ ಪ್ರತಿಕ್ರಿಯೆಗಳು ವ್ಯಾಪಕವಾಗಿ ಹರಿದಾಡುತ್ತಿವೆ.

ಸಾಮಾಜಿಕ ಜಾಲತಾಣಗಳಲ್ಲಿ ಇನ್ನೂ ಕೆಲವರು, “ಎಲ್ಲ ಮೇಲ್‌ಗಳಿಗೆ ಉತ್ತರಿಸುವುದು ಪ್ರಾಯೋಗಿಕವಾಗಿ ಅಸಾಧ್ಯ. ಆದರೆ ಉತ್ತರಿಸದಿದ್ದಕ್ಕೆ ಕ್ಷಮೆ ಕೇಳುವ ಮನಸ್ಸು ಎಲ್ಲರಲ್ಲೂ ಇರುವುದಿಲ್ಲ”, “ಇದು ಪಿಆರ್‌ಗಿಂತ ವ್ಯಕ್ತಿತ್ವವನ್ನು ತೋರಿಸುವ ಕ್ಷಣ” ಎಂದು ಬರೆದುಕೊಂಡಿದ್ದಾರೆ. ಕೆಲವರು ಉದ್ಯಮಿಗಳು ಸಾರ್ವಜನಿಕರೊಂದಿಗೆ ಸಂವಹನ ನಡೆಸುವ ವಿಧಾನಕ್ಕೆ ಇದು ಉತ್ತಮ ಉದಾಹರಣೆ ಎಂದು ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ.

Also Read 'ಈದ್' ರಜಾ ತೀರ್ಮಾನ ಕೈಗೊಳ್ಳಲು ಜಿಲ್ಲಾಡಳಿತ ಸಂಜೆ 6.30ರ ವರೆಗೂ ವಿಫಲ!

ಈ ಒಂದು ಘಟನೆ ಮತ್ತೊಮ್ಮೆ ಒಂದು ಸತ್ಯವನ್ನು ನೆನಪಿಸಿದೆ. ಯಶಸ್ಸು, ಹಣ ಅಥವಾ ಖ್ಯಾತಿಗಿಂತ ಜನರ ಮನಸ್ಸು ಗೆಲ್ಲುವುದು ನಮ್ಮ ಮಾತು, ನಮ್ಮ ವರ್ತನೆ ಮತ್ತು ವಿನಯದಿಂದಲೇ. ನಿಖಿಲ್ ಕಾಮತ್ ಅವರ ಈ ಪ್ರತಿಕ್ರಿಯೆ ಇದೀಗ ಕೇವಲ ವೈರಲ್ ವಿಡಿಯೋ ಆಗಿರದೇ, ನಾಯಕತ್ವ ಮತ್ತು ಸಂವಹನದ ಉತ್ತಮ ಮಾದರಿಯಾಗಿ ಚರ್ಚೆಯಾಗುತ್ತಿದೆ.

##NikhilKamath #ViralVideo #Leadership #InspiringStory #MangaluruPride