ತಮಿಳು ಸೂಪರ್‌ಸ್ಟಾರ್ Rajinikanth ಅಭಿನಯದ ಬಹುನಿರೀಕ್ಷಿತ Jailer 2 ಚಿತ್ರದ ಚಿತ್ರೀಕರಣದ ವೇಳೆ ದುರ್ಘಟನೆಯೊಂದು ಸಂಭವಿಸಿದ್ದು, ಚಿತ್ರತಂಡ ಹಾಗೂ ಅಭಿಮಾನಿಗಳಲ್ಲಿ ತೀವ್ರ ಆಘಾತ ಮೂಡಿಸಿದೆ. ಸಿನಿಮಾದ ಸೆಟ್‌ನಲ್ಲಿ ಕೆಲಸ ಮಾಡುತ್ತಿದ್ದ 28 ವರ್ಷದ ಕಲಾ ವಿಭಾಗದ ಸಿಬ್ಬಂದಿ ಕಾರ್ತಿಕೇಯನ್ ವಿದ್ಯುತ್ ಶಾಕ್‌ಗೆ ಒಳಗಾಗಿ ದುರ್ಮರಣ ಹೊಂದಿದ್ದಾರೆ ಎಂಬ ಸುದ್ದಿ ಚಿತ್ರರಂಗವನ್ನು ಬೆಚ್ಚಿಬೀಳಿಸಿದೆ.

ಚೆನ್ನೈನ ಪಣಯೂರ್ ಪ್ರದೇಶದಲ್ಲಿರುವ ಖಾಸಗಿ ಸ್ಟುಡಿಯೋವೊಂದರಲ್ಲಿ ಚಿತ್ರದ ಅಂತಿಮ ಹಂತದ ಸೆಟ್ ನಿರ್ಮಾಣ ಕಾರ್ಯಗಳು ಭರದಿಂದ ಸಾಗುತ್ತಿದವು. ಮನೆಯ ಮಾದರಿಯ ಭವ್ಯ ಸೆಟ್ ನಿರ್ಮಾಣ ಮಾಡಲಾಗುತ್ತಿದ್ದು, ಇದೇ ವೇಳೆ ಅಚಾನಕ್ ವಿದ್ಯುತ್ ತಂತಿ ಕಾರ್ತಿಕೇಯನ್ ಅವರಿಗೆ ತಗುಲಿದ ಪರಿಣಾಮ ಭೀಕರ ಶಾಕ್ ಹೊಡೆದಿದೆ. ಘಟನೆಯ ತೀವ್ರತೆಯಿಂದ ಅವರು ಸ್ಥಳದಲ್ಲೇ ಕುಸಿದು ಬಿದ್ದಿದ್ದು, ಕೂಡಲೇ ಸಹೋದ್ಯೋಗಿಗಳು ಅವರನ್ನು ಆಸ್ಪತ್ರೆಗೆ ಸಾಗಿಸಲು ಹರಸಾಹಸ ಪಟ್ಟಿದ್ದಾರೆ.

ಆದರೆ, ಆಸ್ಪತ್ರೆಗೆ ಕರೆದೊಯ್ಯುವಷ್ಟರಲ್ಲೇ ಕಾರ್ತಿಕೇಯನ್ ಕೊನೆಯುಸಿರೆಳೆದಿದ್ದಾರೆ ಎಂದು ವೈದ್ಯರು ತಿಳಿಸಿದ್ದಾರೆ. ಯುವ ಸಿಬ್ಬಂದಿಯ ಅಕಾಲಿಕ ಸಾವಿನಿಂದ ಚಿತ್ರತಂಡ ಕಂಗಾಲಾಗಿದ್ದು, ಸೆಟ್‌ನಲ್ಲಿದ್ದ ಹಲವರು ಕಣ್ಣೀರಿಟ್ಟಿದ್ದಾರೆ ಎನ್ನಲಾಗಿದೆ. ದುಡಿಯುವ ವಯಸ್ಸಿನ ಯುವಕನೊಬ್ಬ ಹೀಗೆ ದಾರುಣವಾಗಿ ಸಾವನ್ನಪ್ಪಿರುವುದು ಕುಟುಂಬಸ್ಥರು ಮತ್ತು ಸ್ನೇಹಿತರನ್ನು ಶೋಕ ಸಾಗರದಲ್ಲಿ ಮುಳುಗಿಸಿದೆ.

ಈ ದುರ್ಘಟನೆ ಕುರಿತು ಕಾನತ್ತೂರು ಪೊಲೀಸರು ಪ್ರಕರಣ ದಾಖಲಿಸಿಕೊಂಡು ತನಿಖೆ ಆರಂಭಿಸಿದ್ದಾರೆ. ಸೆಟ್‌ನಲ್ಲಿ ಸುರಕ್ಷತಾ ಕ್ರಮಗಳಲ್ಲಿ ಏನಾದರೂ ನಿರ್ಲಕ್ಷ್ಯವಾಗಿತ್ತೇ? ವಿದ್ಯುತ್ ಸಂಪರ್ಕ ವ್ಯವಸ್ಥೆಯಲ್ಲಿ ದೋಷವಿತ್ತೇ? ಎಂಬ ಹಲವು ಆಯಾಮಗಳಲ್ಲಿ ಪೊಲೀಸರು ಪರಿಶೀಲನೆ ನಡೆಸುತ್ತಿದ್ದಾರೆ. ಚಿತ್ರರಂಗದ ಕೆಲಸಗಾರರ ಸುರಕ್ಷತೆ ಕುರಿತು ಮತ್ತೊಮ್ಮೆ ಗಂಭೀರ ಪ್ರಶ್ನೆಗಳು ಉದ್ಭವಿಸಿವೆ.

ಇದೀಗಾಗಲೇ Jailer ಚಿತ್ರದ ಮೊದಲ ಭಾಗ ಭಾರೀ ಯಶಸ್ಸು ಕಂಡಿತ್ತು. ವಿಶೇಷವಾಗಿ Shivarajkumar ಅವರ ಅತಿಥಿ ಪಾತ್ರ ಸಿನಿಪ್ರೇಕ್ಷಕರಿಂದ ಅದ್ಭುತ ಪ್ರತಿಕ್ರಿಯೆ ಪಡೆದಿತ್ತು. ಥಿಯೇಟರ್‌ಗಳಲ್ಲಿ ಶಿವಣ್ಣನ ಎಂಟ್ರಿಗೆ ಅಭಿಮಾನಿಗಳು ಕೂಗಿ ಕುಣಿದ ದೃಶ್ಯಗಳು ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದ್ದವು. ಇದೇ ಕಾರಣಕ್ಕೆ ಸೀಕ್ವೆಲ್‌ನಲ್ಲಿ ಶಿವರಾಜ್‌ಕುಮಾರ್ ಅವರ ಪಾತ್ರವನ್ನು ಇನ್ನಷ್ಟು ಪ್ರಭಾವಶಾಲಿಯಾಗಿ ತೋರಿಸಲು ಚಿತ್ರತಂಡ ಯೋಜನೆ ರೂಪಿಸಿತ್ತು ಎನ್ನಲಾಗುತ್ತಿದೆ.

ಆದರೆ, ಚಿತ್ರದ ಕೆಲಸಗಳು ಜೋರಾಗಿ ಸಾಗುತ್ತಿದ್ದ ಈ ಹೊತ್ತಿನಲ್ಲಿ ಸಂಭವಿಸಿದ ಈ ದಾರುಣ ಘಟನೆ ಅಭಿಮಾನಿಗಳ ಮನಸ್ಸಿಗೆ ನೋವು ತಂದಿದೆ. ಒಂದು ಕಡೆ ಬಹುನಿರೀಕ್ಷಿತ ಸಿನಿಮಾದ ಮೇಲಿನ ಕುತೂಹಲ ಇದ್ದರೂ, ಮತ್ತೊಂದು ಕಡೆ ಕಾರ್ತಿಕೇಯನ್ ಅವರ ಸಾವಿನ ಸುದ್ದಿ ಚಿತ್ರರಂಗದಲ್ಲಿ ಕಹಿ ನೆನಪನ್ನ ಬಿಟ್ಟು ಹೋಗಿದೆ.

##Jailer2 #Rajinikanth #Shivarajkumar #Kollywood #Jailer2Update #CinemaNews #RIPKarthikeyan