ಯಾವುದೇ ಒಂದು ಪ್ರಜಾಪ್ರಭುತ್ವ ದೇಶದ ಇತಿಹಾಸವನ್ನು ವಿದ್ಯಾರ್ಥಿಗಳು ಕೇವಲ ಮೇಲ್ನೋಟಕ್ಕೆ ಕಲಿಯುವುದಕ್ಕಿಂತ, ಅದರ ಏಳು-ಬೀಳುಗಳನ್ನು ವಾಸ್ತವಿಕವಾಗಿ ಅರ್ಥಮಾಡಿಕೊಳ್ಳುವುದು ಅತ್ಯಂತ ಮುಖ್ಯ.

ಎನ್‌ಸಿಇಆರ್‌ಟಿ (NCERT) ತನ್ನ ಹೊಸ 9ನೇ ತರಗತಿಯ ‘ಅಂಡರ್‌ಸ್ಟ್ಯಾಂಡಿಂಗ್ ಸೊಸೈಟಿ: ಇಂಡಿಯಾ ಅಂಡ್ ಬಿಯಾಂಡ್’ (Understanding Society: India and Beyond) ಪಠ್ಯಪುಸ್ತಕದಲ್ಲಿ ‘ತುರ್ತು ಪರಿಸ್ಥಿತಿ’ (Emergency) ಕುರಿತು ಪ್ರತ್ಯೇಕ ವಿಭಾಗವನ್ನು ಸೇರಿಸಿದೆ.

ಭಾರತೀಯ ಇತಿಹಾಸದ ಅತ್ಯಂತ ಪ್ರಮುಖ ಘಟ್ಟವಾದ 1975-77ರ ‘ರಾಷ್ಟ್ರೀಯ ತುರ್ತು ಪರಿಸ್ಥಿತಿ’ಯನ್ನು ಎನ್‌ಸಿಇಆರ್‌ಟಿ ಮೊದಲ ಬಾರಿಗೆ 9ನೇ ತರಗತಿಯ ಸಮಾಜ ವಿಜ್ಞಾನ ಪಠ್ಯಪುಸ್ತಕದಲ್ಲಿ ಸೇರ್ಪಡೆಗೊಳಿಸಿದೆ. ದೇಶದಲ್ಲಿ ತುರ್ತು ಪರಿಸ್ಥಿತಿ ಘೋಷಣೆಯಾಗಿ 50 ವರ್ಷಗಳು ತುಂಬುತ್ತಿರುವ ಈ ಸಂದರ್ಭದಲ್ಲಿ, ಈ ವಿಷಯವನ್ನು ಕೇವಲ ಇತಿಹಾಸದ ಘಟನೆಯಾಗಿ ನೋಡದೆ “ಪ್ರಜಾಪ್ರಭುತ್ವಕ್ಕೆ ಎದುರಾದ ಸವಾಲು” ಎಂಬ ಶೀರ್ಷಿಕೆಯಡಿ ವಿದ್ಯಾರ್ಥಿಗಳಿಗೆ ಪರಿಚಯಿಸಲಾಗುತ್ತಿದೆ.

Also Read ಹಳ್ಳಿಯಿಂದ ಡೆಲ್ಲಿ ತನಕ ಉರಿ ಬಿಸಿಲು, ಮಾರ್ಚ್ ಆರಂಭದಲ್ಲೇ ಜನ ತತ್ತರ”

ಏಕೆ? ಬೇಕಿತ್ತಾ?…..

ಹಕ್ಕುಗಳ ಮೌಲ್ಯದ ಅರಿವು: ತುರ್ತು ಪರಿಸ್ಥಿತಿಯ ಸಮಯದಲ್ಲಿ ದೇಶದ ನಾಗರಿಕರ ‘ಮೂಲಭೂತ ಹಕ್ಕುಗಳನ್ನು’ (Fundamental Rights) ಹೇಗೆ ಅಮಾನತುಗೊಳಿಸಲಾಗಿತ್ತು ಮತ್ತು ಪತ್ರಿಕಾ ಸ್ವಾತಂತ್ರ್ಯವನ್ನು (Press Censorship) ಹೇಗೆ ಹತ್ತಿಕ್ಕಲಾಗಿತ್ತು ಎಂಬುದನ್ನು ವಿದ್ಯಾರ್ಥಿಗಳು ಕಲಿಯಲಿದ್ದಾರೆ. ಇದರಿಂದಾಗಿ ಇಂದು ನಾವು ಅನುಭವಿಸುತ್ತಿರುವ ಸ್ವತಂತ್ರ ಹಕ್ಕುಗಳ ಮೌಲ್ಯ ಎಷ್ಟು ದೊಡ್ಡದು ಎಂಬುದು ಅವರಿಗೆ ಅರ್ಥವಾಗುತ್ತದೆ.
ಪ್ರಜಾಪ್ರಭುತ್ವದ ಶಕ್ತಿಯ ಪರಿಚಯ: 21 ತಿಂಗಳುಗಳ ಕರಾಳ ಆಡಳಿತದ ನಂತರ 1977 ರಲ್ಲಿ ನಡೆದ ಸಾರ್ವತ್ರಿಕ ಚುನಾವಣೆಯಲ್ಲಿ ಸಾರ್ವಜನಿಕರು ಬ್ಯಾಲೆಟ್ (ಮತದಾನ) ಮೂಲಕ ಸರ್ಕಾರವನ್ನು ಹೇಗೆ ಬದಲಾಯಿಸಿದರು ಎಂಬುದನ್ನು ಪಠ್ಯದಲ್ಲಿ ವಿವರಿಸಲಾಗಿದೆ. ಇದು ಭಾರತೀಯ ಪ್ರಜಾಪ್ರಭುತ್ವದ ನಿಜವಾದ ಸ್ಥಿತಿಸ್ಥಾಪಕತ್ವ ಮತ್ತು ಮತದಾರನ ಶಕ್ತಿಯನ್ನು ವಿದ್ಯಾರ್ಥಿಗಳಿಗೆ ಮನವರಿಕೆ ಮಾಡಿಕೊಡುತ್ತದೆ.
ನೈಜ ನಾಯಕರ ಹೋರಾಟದ ಪಾಠ: ಸಮಾಜವಾದಿ ಚಿಂತಕ ‘ಲೋಕನಾಯಕ್’ ಜಯಪ್ರಕಾಶ್ ನಾರಾಯಣ್ (JP) ಅವರ ನೇತೃತ್ವದಲ್ಲಿ ಬಿಹಾರ ಮತ್ತು ಗುಜರಾತ್‌ನಲ್ಲಿ ವಿದ್ಯಾರ್ಥಿಗಳು ಹಾಗೂ ನಾಗರಿಕರು ನಡೆಸಿದ ಬೃಹತ್ ಜನ ಆಂದೋಲನಗಳ ಇತಿಹಾಸವನ್ನು ವಿದ್ಯಾರ್ಥಿಗಳು ಓದಲಿದ್ದಾರೆ. ಇದು ಅವರಲ್ಲಿ ಸಮಾಜದ ಬಗೆಗಿನ ಜವಾಬ್ದಾರಿಯನ್ನು ಹೆಚ್ಚಿಸಲಿದೆ.

Also Read ಅಮೆರಿಕಾ ವಿರುದ್ಧ ‘ಪೈರಸಿ’ ಆರೋಪ: ಇರಾನ್ ಯುಎನ್‌ಗೆ ದೂರು

ಈ ವಿಭಾಗವನ್ನು ಕೇವಲ ಹಳೆಯ ಇತಿಹಾಸಕ್ಕೆ ಸೀಮಿತಗೊಳಿಸದೆ, ಇಂದಿನ ಆಧುನಿಕ ಜಗತ್ತಿಗೆ ಕನೆಕ್ಟ್ ಮಾಡಲು ಎನ್‌ಸಿಇಆರ್‌ಟಿ “ಡೆಮಾಕ್ರಸಿ ಅಂಡ್ ಯೂ” (ಪ್ರಜಾಪ್ರಭುತ್ವ ಮತ್ತು ನೀವು) ಎಂಬ ವಿಶೇಷ ಉಪ-ವಿಭಾಗವನ್ನು ಸೇರಿಸಿದೆ. ಇದರಲ್ಲಿ ವಿದ್ಯಾರ್ಥಿಗಳು ಇಂದಿನ ಸಮಾಜ ಎದುರಿಸುತ್ತಿರುವ ನೈಜ ಸವಾಲುಗಳ ಬಗ್ಗೆ ಕಲಿಯಲಿದ್ದಾರೆ:

ಸುಳ್ಳು ಸುದ್ದಿ ಮತ್ತು ತಪ್ಪು ಮಾಹಿತಿ (Fake News & Misinformation): ಇಂದಿನ ಡಿಜಿಟಲ್ ಜಗತ್ತಿನಲ್ಲಿ ಸುಳ್ಳು ಸುದ್ದಿಗಳು ಹೇಗೆ ಪ್ರಜಾಪ್ರಭುತ್ವಕ್ಕೆ ಮಾರಕವಾಗುತ್ತಿವೆ ಎಂಬ ಅರಿವು ಮೂಡಿಸುವುದು.
ಸಾರ್ವಜನಿಕ ಆಸ್ತಿ ಪಾಸ್ತಿ ಧ್ವಂಸ: ಪ್ರತಿಭಟನೆಗಳ ಹೆಸರಿನಲ್ಲಿ ಕಾನೂನು ಕೈಗೆತ್ತಿಕೊಳ್ಳುವುದು ತಪ್ಪು ಎಂಬ ನಾಗರಿಕ ಪ್ರಜ್ಞೆ ಬೆಳೆಸುವುದು.
ಸಾಮಾಜಿಕ ಅಸಮಾನತೆ: ಲಿಂಗ ತಾರತಮ್ಯ, ಬಡತನ ಮತ್ತು ಜಾತಿ ತಾರತಮ್ಯಗಳು ಪ್ರಜಾಪ್ರಭುತ್ವದ ಯಶಸ್ಸಿಗೆ ಹೇಗೆ ಅಡ್ಡಿಯಾಗುತ್ತಿವೆ ಎಂಬುದರ ಚರ್ಚೆ.

ಮುಖ್ಯ ಉದ್ದೇಶ: ತರಗತಿಯ ಕೋಣೆಯಲ್ಲಿ ಕಲಿಯುವ ಸಂವಿಧಾನದ ಪಾಠಗಳು ಕೇವಲ ಅಂಕ ಗಳಿಸುವುದಕ್ಕಾಗಿ ಇರಬಾರದು. ವಿದ್ಯಾರ್ಥಿಗಳು ದೇಶದ ಜವಾಬ್ದಾರಿಯುತ ನಾಗರಿಕರಾಗಿ ರೂಪುಗೊಳ್ಳಲು ಮತ್ತು ಭವಿಷ್ಯದಲ್ಲಿ ಇಂತಹ ತಪ್ಪುಗಳು ಮರುಕಳಿಸದಂತೆ ತಡೆಯಲು ಈ ‘ವಾಸ್ತವ ಇತಿಹಾಸದ’ ಕಲಿಕೆ ಅತ್ಯಂತ ಅವಶ್ಯಕವಾಗಿದೆ.

#: #NCERTBooks #Emergency1975 #IndianEducation #DemocracyInIndia #SchoolCurriculum