SMA ಎಂಬ ಅಪರೂಪದ ಕಾಯಿಲೆಯಿಂದ ಬಳಲುತ್ತಿದ್ದ ಎರಡು ವರ್ಷದ ಕಂದಮ್ಮ ಸಾಯಿ ಚಿರಾಗ್‌ನನ್ನು ಬದುಕಿಸಲು, ಸಾಮಾಜಿಕ ಕಾರ್ಯಕರ್ತ ಫಯಾಝ್ ಮಾಡೂರು ಅವರು ನಡೆಸಿದ ನಿಸ್ವಾರ್ಥ ಹೋರಾಟ ಮತ್ತು ಇಡೀ ನಾಡಿನ ಜನತೆ ಸ್ಪಂದಿಸಿದ ರೀತಿ ಪ್ರತಿಯೊಬ್ಬರ ಕಣ್ಣಾಲಿಗಳನ್ನು ತುಂಬಿ ಬರುವಂತೆ ಮಾಡುತ್ತದೆ.

ಹೆತ್ತವರ ಕಣ್ಣೀರು ಮತ್ತು ಫಯಾಝ್ ಮಾಡೂರು ಅವರ ಪ್ರವೇಶ

ಎಂಟು ತಿಂಗಳಿನಿಂದ ಮಗುವಿನ ಜೀವ ಉಳಿಸಲು ಪೋಷಕರಾದ ಸಾಯಿ ಭಾರ್ಗವಿ ಹಾಗೂ ಚೇತನ್ ಗೌಡ ಪಡಬಾರದ ಕಷ್ಟ ಪಟ್ಟಿದ್ದರು. ಇಂಡೋನೇಷ್ಯಾದಲ್ಲಿ ನಡೆಯಬೇಕಿದ್ದ ದುಬಾರಿ ಚಿಕಿತ್ಸೆಗೆ ಬರೋಬ್ಬರಿ 2 ಕೋಟಿ ರೂಪಾಯಿ ಅಗತ್ಯವಿತ್ತು. ಮಧ್ಯಮ ವರ್ಗದ ಈ ಪೋಷಕರಿಗೆ ಅಷ್ಟೊಂದು ದೊಡ್ಡ ಮೊತ್ತವನ್ನು ಹೊಂದಿಸುವುದು ಅಸಾಧ್ಯದ ಮಾತಾಗಿತ್ತು. ಕಣ್ಣೆದುರೇ ಮಗು ದಿನ ದಿನವೂ ಸಾವು-ಬದುಕಿನ ನಡುವೆ ಹೋರಾಡುವುದನ್ನು ಕಂಡು ಪೋಷಕರು ಅಸಹಾಯಕರಾಗಿದ್ದಾಗ, ದೇವದೂತರಂತೆ ಎಂಟ್ರಿ ಕೊಟ್ಟವರೇ ಸಾಮಾಜಿಕ ಕಾರ್ಯಕರ್ತ ಫಯಾಝ್ ಮಾಡೂರು. ಹೆತ್ತವರ ಕಣ್ಣೀರನ್ನು ಕಂಡ ಫಯಾಝ್, “ನಿಮ್ಮ ಮಗುವನ್ನು ಉಳಿಸುವ ಜವಾಬ್ದಾರಿ ನಮ್ಮದು” ಎಂದು ಧೈರ್ಯ ತುಂಬಿ ಕಣಕ್ಕಿಳಿದರು.

Also Read ಆರು ಲಕ್ಷ ರೂ. ಶುಲ್ಕದ ಸಂಕಷ್ಟಕ್ಕೆ ಮಾನವೀಯ ಸ್ಪಂದನೆ: ವಿದ್ಯಾರ್ಥಿನಿಯ ಕನಸಿಗೆ ಸಚಿವ ಬಾಲಕೃಷ್ಣ ಬೆನ್ನೆಲುಬು

40 ದಿನಗಳ ಕಾಲ ದಣಿವರಿಯದ ಹೋರಾಟ

2 ಕೋಟಿ ರೂಪಾಯಿ ಎಂಬುದು ಸಣ್ಣ ಮೊತ್ತವಲ್ಲದಿದ್ದರೂ ಫಯಾಝ್ ಧೃತಿಗೆಡಲಿಲ್ಲ. ಬಿಸಿಲು, ಮಳೆ ಎನ್ನದೆ ಫಯಾಝ್ ಮತ್ತು ಅವರ ತಂಡದವರು ರಾಜ್ಯದ ಬೇರೆ ಬೇರೆ ನಗರಗಳ ಬೀದಿ ಬೀದಿಗಳಲ್ಲಿ ಸಾರ್ವಜನಿಕ ಜಾಥಾ ನಡೆಸಿ ಪ್ರತಿಯೊಬ್ಬರ ಬಳಿಯೂ ಮಗುವಿನ ಪ್ರಾಣ ಭಿಕ್ಷೆ ಬೇಡುತ್ತಾ ಸಾಗಿದರು. ಇದರೊಂದಿಗೆ ಫೇಸ್‌ಬುಕ್, ವಾಟ್ಸಾಪ್‌ಗಳ ಮೂಲಕ ಮಗುವಿನ ಪರಿಸ್ಥಿತಿಯನ್ನು ನಾಡಿನ ಮೂಲೆ ಮೂಲೆಗೂ ತಲುಪಿಸಿದರು. ಸತತ 40 ದಿನಗಳ ಕಾಲ ಮನೆ, ಸಂಸಾರವನ್ನು ಮರೆತು ಕೇವಲ ಮಗುವಿನ ಚಿಕಿತ್ಸೆಯ ಹಣ ಸಂಗ್ರಹಿಸುವುದನ್ನೇ ಫಯಾಝ್ ತಮ್ಮ ದೈನಂದಿನ ಧ್ಯೇಯವಾಗಿಸಿಕೊಂಡಿದ್ದರು.

ನಂಬಲಾಗದ ಪವಾಡ: 2 ಕೋಟಿ ರೂ. ಸಂಗ್ರಹ!

ಫಯಾಝ್ ಅವರ ನಿಷ್ಕಲ್ಮಶ ಶ್ರಮಕ್ಕೆ ರಾಜ್ಯದ ಜನತೆ ಕೊಟ್ಟ ಕೊಡುಗೆ ಅಸಾನ್ಯವಾದದ್ದು. ದಿನಗೂಲಿ ನೌಕರರಿಂದ ಹಿಡಿದು ದೊಡ್ಡ ಉದ್ಯಮಿಗಳವರೆಗೆ, ಪ್ರತಿಯೊಬ್ಬರೂ ತಮಗೆ ತೋಚಿದ ಸಹಾಯ ಮಾಡಿದರು. ಒಂದು ಜೀವವನ್ನು ಉಳಿಸಲು ಧರ್ಮ, ಜಾತಿಯ ಬೇಲಿಗಳನ್ನು ಬದಿಗೊತ್ತಿ ಇಡೀ ಕರ್ನಾಟಕವೇ ಒಂದಾಗಿ ನಿಂತಿತ್ತು! ಅಂತಿಮವಾಗಿ ಅಂದುಕೊಂಡಂತೆ ಕೇವಲ 40 ದಿನಗಳಲ್ಲಿ ಬರೋಬ್ಬರಿ 2 ಕೋಟಿ ರೂಪಾಯಿ ಮೊತ್ತ ಸಂಗ್ರಹವಾಯಿತು. ಇಷ್ಟೊಂದು ಬೃಹತ್ ಮೊತ್ತ ಇಷ್ಟು ಕಡಿಮೆ ಅವಧಿಯಲ್ಲಿ ಸಂಗ್ರಹವಾಗಿದ್ದು ನಿಜಕ್ಕೂ ನಂಬಲಾಗದ ಮತ್ತು ಇತಿಹಾಸ ಸೃಷ್ಟಿಸಿದ ಘಟನೆಯಾಗಿದೆ.

Also Read ಕೊಡಗಿನಲ್ಲಿ ಪ್ರವಾಸಿ ಬಸ್ ಪಲ್ಟಿ20 ಪ್ರವಾಸಿಗರು ಕೂದಲೆಳೆಯ ಅಂತರದಲ್ಲಿ ಪಾರು; ಜೆಸಿಬಿಯಿಂದ ಬಸ್‌ ರಕ್ಷಣೆ!

ಕೋಟಿ ಕೋಟಿ ಧನ್ಯವಾದಗಳು

ಒಬ್ಬ ಅಪರಿಚಿತ ಮಗುವಿಗಾಗಿ ಫಯಾಝ್ ಮಾಡೂರು ಅವರು ತೋರಿದ ಕಾಳಜಿ ಮತ್ತು ನಿಸ್ವಾರ್ಥ ಸೇವೆಗೆ ಇಡೀ ನಾಡು ತಲೆಬಾಗಬೇಕಿದೆ. ತಮಗಿರುವ ಆರ್ಥಿಕ ಸಂಕಷ್ಟಗಳ ನಡುವೆಯೂ, ಮಗುವಿನ ಮುಖ ನೋಡಿ ಕೈಲಾದಷ್ಟು ಸಹಾಯ ಮಾಡಿದ ಪ್ರತಿಯೊಬ್ಬ ಸಹೃದಯಿ ಜನರಿಗೂ ಧನ್ಯವಾದಗಳು. ಹನಿ ಹನಿ ಸೇರಿದರೆ ಹಳ್ಳ ಎಂಬಂತೆ, ಜನರ ಒಂದೊಂದು ರೂಪಾಯಿಯೂ ಇಂದು ಮಗುವಿಗೆ ಮರುಜನ್ಮ ನೀಡಿದೆ. ಹಣದ ಕೊರತೆಯಿಂದ ಮಗು ಸತ್ತುಹೋಗಬಹುದು ಎಂಬ ಹೆದರಿಕೆಯಲ್ಲಿದ್ದ ಪೋಷಕರಿಗೆ ಇಂದು ಇಡೀ ನಾಡಿನ ಜನತೆ ಹೊಸ ಭರವಸೆ ನೀಡಿದ್ದಾರೆ. ಮಾನವೀಯತೆ ಎಂದಿಗೂ ಸಾಯುವುದಿಲ್ಲ ಎಂಬುದನ್ನು ಈ ಘಟನೆ ಮತ್ತೊಮ್ಮೆ ಸಾಬೀತುಪಡಿಸಿದೆ.

##FayazMaduru #SaveSaiChirag #HumanityWins #MangaloreMiracle #KarnatakaUnites