ಮೆಸ್ಕಾಂ ಖಾಸಗೀಕರಣದ ಹಿಂದೆ ಅಡಗಿದೆಯೇ ಬ್ರಹ್ಮಾಂಡ ಲಂಚಾವತಾರ? ನಿಗಮ ಮಂಡಳಿಗಳ ರಾಜಕೀಯಕ್ಕೆ ಸಾರ್ವಜನಿಕರ ಜೇಬಿಗೆ ಕತ್ತರಿ!”ಜನರ ಮನೆಯ ಮೀಟರ್ ಮೇಲೆ ರಾಜಕೀಯ ‘ಚಕ್ರಬಡ್ಡಿಮೇಲೆ ಬಡ್ಡಿ’ ಲೂಟಿ! ಮೆಸ್ಕಾಂ ಬ್ರಹ್ಮಾಂಡ ಹಗರಣ ಸ್ಫೋಟಕ್ಕೆ ಮುಹೂರ್ತ ಫಿಕ್ಸ್….!??!

ಮಂಗಳೂರು: ಮೆಸ್ಕಾಂನ ವಿದ್ಯುತ್ ವಿತರಣಾ ವ್ಯವಸ್ಥೆಯನ್ನು ಟಾಟಾ ಕಂಪನಿಗೆ ಹಸ್ತಾಂತರಿಸುವ ಪ್ರಕ್ರಿಯೆಗೆ ಕರಾವಳಿಯಲ್ಲಿ ತೀವ್ರ ಮಿಶ್ರ ಪ್ರತಿಕ್ರಿಯೆ ವ್ಯಕ್ತವಾಗಿದೆ. ಒಂದೆಡೆ ಖಾಸಗೀಕರಣದ ವಿರುದ್ಧ ನೌಕರರು ಬೀದಿಗಿಳಿದು ಹೋರಾಡುತ್ತಿದ್ದರೆ, ಇನ್ನೊಂದೆಡೆ ಸದ್ಯದ ವ್ಯವಸ್ಥೆಯಲ್ಲಿನ ಭ್ರಷ್ಟಾಚಾರ ಮತ್ತು ರಾಜಕೀಯ ಹಿತಾಸಕ್ತಿಗಳಿಂದ ಬೇಸತ್ತಿರುವ ಸಾರ್ವಜನಿಕರು ಖಾಸಗೀಕರಣದ ಪರವಾಗಿ ತೀವ್ರ ಆಕ್ರೋಶದ ಧ್ವನಿ ಎತ್ತುತ್ತಿದ್ದಾರೆ.

ನೌಕರರಿಗೆ ಉದ್ಯೋಗದ ಆತಂಕ, ಜನರಿಗೆ ಭ್ರಷ್ಟಾಚಾರದ ಜಿಗುಪ್ಸೆ! ಮೆಸ್ಕಾಂ ಖಾಸಗೀಕರಣದ ಹಿಂದೆ ಅಡಗಿದೆಯೇ ಬ್ರಹ್ಮಾಂಡ ಹಗರಣ?”

ಮಂಗಳೂರಿನ ಬಿಜೆಯ ಮೆಸ್ಕಾಂ ಪ್ರಧಾನ ಕಚೇರಿ ಎದುರು ವಿದ್ಯುತ್ ವಿತರಣಾ ವ್ಯವಸ್ಥೆಯನ್ನು ಟಾಟಾ ಕಂಪನಿಗೆ ಹಸ್ತಾಂತರಿಸುವ ಕೆಇಆರ್‌ಸಿ ಪ್ರಸ್ತಾಪದ ವಿರುದ್ಧ ಮೆಸ್ಕಾಂ ಅಧಿಕಾರಿಗಳು ಮತ್ತು ಗುತ್ತಿಗೆ ನೌಕರರು ಒಟ್ಟಾಗಿ ಬೃಹತ್ ಪ್ರತಿಭಟನಾ ದ್ವಾರ ಸಭೆ ನಡೆಸಿದರು. ನೌಕರರ ಸಂಘಗಳ ಒಕ್ಕೂಟದ ಅಧ್ಯಕ್ಷ ಕೆ.ಬಲರಾಮ್ ಅವರು ಖಾಸಗೀಕರಣದ ವಿರುದ್ಧ ಜೂನ್ 23ರ ಒಳಗೆ ಗ್ರಾಹಕರು, ರೈತರು ಮತ್ತು ಶಾಸಕರು ಆಕ್ಷೇಪಣೆ ಸಲ್ಲಿಸಬೇಕೆಂದು ಕರೆ ನೀಡಿದರು. ಎಂಜಿನಿಯರ್‌ಗಳ ಸಂಘದ ಸಂಘಟನಾ ಕಾರ್ಯದರ್ಶಿ ಪ್ರಶಾಂತ್ ಪೈ ಮಾತನಾಡಿ, ಖಾಸಗೀಕರಣದಿಂದ ಹೊಸ ಸಿಬ್ಬಂದಿ ನೇಮಕಾತಿ ನಿಲ್ಲಲಿದ್ದು, ನಗರ ಮತ್ತು ಗ್ರಾಮೀಣ ಪ್ರದೇಶಗಳ ಸೇವೆಯಲ್ಲಿ ತಾರತಮ್ಯ ಉಂಟಾಗಲಿದೆ ಹಾಗೂ ಸರ್ಕಾರದ ಉಚಿತ ಸೌಲಭ್ಯಗಳು ರದ್ದಾಗಿ ಇಡೀ ವ್ಯವಸ್ಥೆ ಹದಗೆಡಲಿದೆ ಎಂದು ಆತಂಕ ವ್ಯಕ್ತಪಡಿಸಿದರು.

ರಾಜಕೀಯ ದಂಧೆ ಮತ್ತು ಲಂಚ ಸಾಮ್ರಾಜ್ಯದ ವಿರುದ್ಧ ಸಾರ್ವಜನಿಕರ ಆಕ್ರೋಶ!

ನೌಕರರು ತಮ್ಮ ಉದ್ಯೋಗ ರಕ್ಷಣೆಗಾಗಿ ಹೋರಾಡುತ್ತಿದ್ದರೆ, ಇತ್ತ ಸಾರ್ವಜನಿಕರು ಮೆಸ್ಕಾಂನ ಸದ್ಯದ ದುಸ್ಥಿತಿ ಮತ್ತು ಅದರ ಹಿಂದಿರುವ ರಾಜಕೀಯ ಲೂಟಿಯ ವಿರುದ್ಧ ಕಟು ಸತ್ಯಗಳನ್ನು ಬಿಚ್ಚಿಡುತ್ತಿದ್ದಾರೆ:

ನಿಗಮ ಮಂಡಳಿಗಳ ‘ರಾಜಕೀಯ ಸಾಕುಪ್ರಾಣಿಗಳನ್ನು’ ಸಲಹಲು ಸಾರ್ವಜನಿಕರೇ ಬಲಿಪಶು! ಮೆಸ್ಕಾಂ ಕದನದ ಕಟು ಸತ್ಯ!” “ಆಡಳಿತ ನಡೆಸುವ ರಾಜಕೀಯ ಪಕ್ಷಗಳು ತಮ್ಮದೇ ಆದ ಪ್ರಭಾವಿ ವ್ಯಕ್ತಿಗಳನ್ನು ಸಮಾಧಾನಪಡಿಸಲು ‘ನಿಗಮ ಮಂಡಳಿ’ಗಳ ಅಧ್ಯಕ್ಷ, ಸದಸ್ಯ ಸ್ಥಾನ ಎಂದು ಒಂದೊಂದು ಪೋಸ್ಟ್ ಹಂಚುತ್ತವೆ. ತಮಗೆ ಬೇಕಾದವರ ಅಕ್ರಮ ಕೆಲಸಗಳನ್ನು ಮಾಡಿಸಿಕೊಳ್ಳಲು ಈ ರಾಜಕೀಯ ನೇಮಕಾತಿಗಳನ್ನು ಬಳಸಿಕೊಳ್ಳಲಾಗುತ್ತದೆ. ಇಂತಹ ರಾಜಕೀಯ ಮುಖಂಡರನ್ನು ಮತ್ತು ಅವರ ಐಷಾರಾಮಿ ವ್ಯವಸ್ಥೆಯನ್ನು ಸಾಕಿ ಸಲಹಲು ಕೋಟ್ಯಂತರ ರೂಪಾಯಿ ಖರ್ಚಾಗುತ್ತದೆ. ಈ ಖರ್ಚು ಭರಿಸಲು ಇವರು ಮಾಡುವ ತಂತ್ರವೇ ಸಾರ್ವಜನಿಕರ ವಿದ್ಯುತ್ ಬಿಲ್ ಹೆಚ್ಚಳ!”
ನಮ್ಮ ಮನೆಯ ಮೀಟರ್ ಮೇಲೆ ‘ಚಕ್ರಬಡ್ಡಿ’ಯ ಪ್ರಹಾರ: “ರಾಜಕೀಯ ಲೂಟಿಕೋರರನ್ನು ಸಾಕೋಕೆ ಖರ್ಚಾಗುವ ಹಣವನ್ನು ಸಾಮಾನ್ಯ ಜನರಿಂದ ವಸೂಲಿ ಮಾಡಲಾಗುತ್ತಿದೆ. ನಮ್ಮ ಮನೆಯ ವಿದ್ಯುತ್ ಮೀಟರ್ ಮೇಲೆ ತಿರುಗುವ ಚಕ್ರಗಳು ಬರೀ ರೀಡಿಂಗ್ ತೋರಿಸುತ್ತಿಲ್ಲ, ಬದಲಿಗೆ ಸಾರ್ವಜನಿಕರ ರಕ್ತ ಹೀರುವ ‘ಚಕ್ರಬಡ್ಡಿ’ಯ ದರಗಳನ್ನು ನಮ್ಮ ತಲೆಗೆ ಕಟ್ಟುತ್ತಿವೆ! ಜನಸಾಮಾನ್ಯರ ಜೇಬಿಗೆ ಕತ್ತರಿ ಹಾಕಿ ರಾಜಕೀಯ ಬೇಳೆ ಬೇಯಿಸಿಕೊಳ್ಳುವ ಈ ವ್ಯವಸ್ಥೆಗೆ ಮದ್ದರಿಯುವವರು ಯಾರು?!”
ದುಡ್ಡು ಕೊಟ್ಟರೆ ಮಾತ್ರ ಫೈಲ್ ಮೂವ್: “ಇಂದು ಮೆಸ್ಕಾಂನಲ್ಲಿ ದುಡ್ಡು ಕೊಟ್ಟರೆ ಏನೂ ಬೇಕಾದರೂ ಮಾಡುತ್ತಾರೆ, ದುಡ್ಡು ಕೊಡದಿದ್ದರೆ ಕಾನೂನುಬದ್ಧ ಕೆಲಸವೂ ಆಗಲ್ಲ. ಒಂದು ಖಾಸಗಿ ಟ್ರಾನ್ಸ್‌ಫಾರ್ಮರ್ (Transformer) ಹಾಕಿಸಬೇಕಾದರೆ ಲಕ್ಷ ಲಕ್ಷ ರೂಪಾಯಿಗಳ ‘ಕವರ್’ ಕೊಟ್ಟರೆ ಮಾತ್ರ ಸಾಹೇಬರ ಸಹಿ ಆಗುತ್ತದೆ. ಒಂದೊಂದು ಪರ್ಮಿಷನ್‌ಗೆ ಅವರದ್ದೇ ಆದ ಫಿಕ್ಸ್ ರೇಟ್ ಕಾರ್ಡ್ ಇದೆ.”
ಬಡವರ ಜಾಗದಲ್ಲಿ ಅಕ್ರಮ ಕಂಬಗಳು: “ಯಾವುದೇ ಪವರ್ ಇಲ್ಲದ ಪಾಪದ ಬಡವರ ಖಾಸಗಿ ಜಾಗಗಳಲ್ಲಿ ಎಗ್ಗಿಲ್ಲದೆ ಸಾಲು ಸಾಲು ವಿದ್ಯುತ್ ಕಂಬಗಳನ್ನು ನೆಡಲಾಗುತ್ತದೆ. ಅದೇ ಸಾರ್ವಜನಿಕರೊಬ್ಬರು ದಪ್ಪನೆಯ ‘ಲಂಚದ ಕವರ್’ ಕೊಟ್ಟರೆ, ಅವರಿಗೆ ಅನುಕೂಲ ಮಾಡಿಕೊಡಲು ಬೇರೆಯವರ ಜಾಗದಲ್ಲಿ ಕಾನೂನುಬಾಹಿರವಾಗಿ ಲೈನ್ ಕಂಬಗಳನ್ನು ನಿಲ್ಲಿಸಲಾಗುತ್ತದೆ. ಹಣಕ್ಕೋಸ್ಕರ ಪಾಪದ ಜನರನ್ನು ಆಟ ಆಡಿಸುವ ಈ ವ್ಯವಸ್ಥೆಗೆ ಮುಕ್ತಿ ಬೇಡವೇ?”

ಖಾಸಗೀಕರಣವೇ ಇದಕ್ಕೆ ಕೊನೆಯ ಮದ್ದೇ?

ಮೆಸ್ಕಾಂನಲ್ಲಿ ಭ್ರಷ್ಟಾಚಾರ ಮತ್ತು ಭ್ರಷ್ಟ ಅಧಿಕಾರಿಗಳು ತುಂಬಿ ತುಳುಕುತ್ತಿದ್ದು, ಸದ್ಯದಲ್ಲೇ ಮೆಸ್ಕಾಂನ ‘ಬ್ರಹ್ಮಾಂಡ ಭ್ರಷ್ಟಾಚಾರದ ಹಗರಣ’ ಸಾಕ್ಷಿ ಸಮೇತ ಹೊರಬರಲಿದ್ದು, ದೊಡ್ಡ ದೊಡ್ಡ ಕುಳಗಳು ಸಿಕ್ಕಿಬೀಳಲಿವೆ ಎಂದು ನೊಂದ ಸಾರ್ವಜನಿಕರು ಮಾತನಾಡಿಕೊಳ್ಳುತ್ತಿದ್ದಾರೆ. ಹಣದ ಹಪಹಪಿಗೆ ಬಿದ್ದು ಬಡವರನ್ನು ಸತಾಯಿಸುವ ಮತ್ತು ರಾಜಕೀಯ ನಾಯಕರ ಸ್ವಾರ್ಥಕ್ಕೆ ಬಳಕೆಯಾಗುತ್ತಿರುವ ಈ ಸರ್ಕಾರಿ ವ್ಯವಸ್ಥೆ ಖಾಸಗೀಕರಣವಾದರೆ ಮಾತ್ರ ಇಂತಹ ಲಂಚಾವತಾರ ಮತ್ತು ಅಕ್ರಮಗಳಿಗೆ ಬ್ರೇಕ್ ಬೀಳಬಹುದು ಎನ್ನುವುದು ಸಾರ್ವಜನಿಕರ ತರ್ಕಬದ್ಧ ದೂರಾಲೋಚನೆಯಾಗಿದೆ.