ಮೂಗಿನಿಂದ ಸತತವಾಗಿ ನೀರು ಸೋರಿಕೆ… ಅಪರೂಪದ ತಲೆಬುರುಡೆ ದೋಷಕ್ಕೆ ಬೆಂಗಳೂರಿನಲ್ಲಿ ಯಶಸ್ವಿ ಚಿಕಿತ್ಸೆ!

ಬೆಂಗಳೂರು: ಸುಮಾರು ಎರಡು ವರ್ಷಗಳಿಂದ ಮೂಗಿನಿಂದ ನಿರಂತರವಾಗಿ ನೀರಿನಂತ ದ್ರವ ಸೋರಿಕೆ ಹಾಗೂ ಪದೇಪದೇ ಮೆನಿಂಜೈಟಿಸ್‌ (ಮೆದುಳು ಮತ್ತು ಬೆನ್ನುಹುರಿಯನ್ನು ಆವರಿಸಿರುವ ಪದರಗಳಿಗೆ ಉಂಟಾಗುವ ಸೋಂಕು) ಸಮಸ್ಯೆಯಿಂದ ಬಳಲುತ್ತಿದ್ದ ಮಾಲ್ಡೀವ್ಸ್‌ನ 10 ವರ್ಷದ ಬಾಲಕನಿಗೆ ಕೊನೆಗೆ ಬೆಂಗಳೂರಿನ ಬನ್ನೇರುಘಟ್ಟ ರಸ್ತೆಯ ಅಪೋಲೋ ಆಸ್ಪತ್ರೆಯ (Apollo Hospitals) ವೈದ್ಯರಾದ ಡಾ. ಪಿ. ಸುಬ್ರಮಣ್ಯ ರಾವ್ ಅವರ ನೇತೃತ್ವದ ತಂಡವು, ಯಾವುದೇ ಬಾಹ್ಯ ಗಾಯದ ಗುರುತು ಇಲ್ಲದಂತೆ ಮೂಗಿನ ಮೂಲಕ ಅತ್ಯಾಧುನಿಕ ಎಂಡೋಸ್ಕೋಪಿಕ್ ಶಸ್ತ್ರಚಿಕಿತ್ಸೆ ನಡೆಸಿ ಈ ದೋಷವನ್ನು ಯಶಸ್ವಿಯಾಗಿ ಸರಿಪಡಿಸಿದೆ. ಬಾಲಕನು ಈಗ ಸಂಪೂರ್ಣ ಗುಣಮುಖನಾಗಿ ಶಾಲೆಗೆ ಮರಳಿದ್ದಾನೆ.ಈ ಹಿಂದೆ ಬೇರೆ ದೇಶಗಳಲ್ಲಿ ಎರಡು ಬಾರಿ ಶಸ್ತ್ರಚಿಕಿತ್ಸೆ ಮಾಡಿಸಿಕೊಂಡಿದ್ದರೂ ಗುಣಮುಖನಾಗಿರಲಿಲ್ಲ. ವೈದ್ಯರು ಅಪರೂಪದ ತಲೆಬುರುಡೆ ದೋಷವನ್ನು ಪತ್ತೆಹಚ್ಚಿ ಯಶಸ್ವಿಯಾಗಿ ಚಿಕಿತ್ಸೆ ನೀಡಿದ್ದಾರೆ.

Also Read ಅಕ್ರಮವಾಗಿ ಲಕ್ಷಾಂತರ ಮೌಲ್ಯದ ಎತ್ತುಗಳನ್ನು ವಧೆಗೆ….!

ಬಾಲಕನ ಮೂಗಿನಿಂದ ಹೊರಬರುತ್ತಿದ್ದ ದ್ರವ ಸಾಮಾನ್ಯ ಮೂಗಿನ ಸ್ರಾವವಾಗಿರಲಿಲ್ಲ. ಅದು ಮೆದುಳು ಮತ್ತು ಬೆನ್ನುಹುರಿಯನ್ನು ಸುತ್ತುವರಿದಿರುವ ಸೆರೆಬ್ರೊಸ್ಪೈನಲ್ ಫ್ಲೂಯಿಡ್‌ (CSF) ಆಗಿತ್ತು. ತಲೆಬುರುಡೆಯ ಕೆಳಭಾಗದಲ್ಲಿ ಸಹಜವಾಗಿ ಮುಚ್ಚಿಕೊಳ್ಳಬೇಕಿದ್ದ ಸಣ್ಣ ರಂಧ್ರವೊಂದು ಮುಚ್ಚಿಕೊಳ್ಳದೆ ಉಳಿದಿದ್ದರಿಂದ ಈ ದ್ರವ ಮೂಗಿನ ಮೂಲಕ ಸೋರಿಕೆಯಾಗುತ್ತಿತ್ತು.

ಈ ಅಪರೂಪದ ದೋಷವನ್ನು ವೈದ್ಯಕೀಯವಾಗಿ ಕ್ರೇನಿಯೊಫ್ಯಾರಿಂಜಿಯಲ್ ಕೆನಾಲ್ (Craniopharyngeal canal) ಎಂದು ಕರೆಯಲಾಗುತ್ತದೆ. ಸಾಮಾನ್ಯವಾಗಿ ಜನನದ ನಂತರವೇ ಈ ದಾರಿ ಮುಚ್ಚಿಕೊಳ್ಳುತ್ತದೆ. ಆದರೆ ಬಾಲಕನಲ್ಲಿ ಅದು ತೆರೆದೆಯೇ ಉಳಿದಿತ್ತು. ಅದರ ಮೇಲೆ ಅಡಿನಾಯ್ಡ್‌ (ಮೂಗಿನ ಹಿಂಭಾಗದಲ್ಲಿರುವ ಲಿಂಫಾಯ್ಡ್ ಅಂಗಾಂಶ) ಮುಚ್ಚಿಕೊಂಡಿದ್ದರಿಂದ ದೋಷವನ್ನು ಪತ್ತೆಹಚ್ಚುವುದು ಇನ್ನಷ್ಟು ಕಷ್ಟವಾಗಿತ್ತು.

ಬಾಲಕ ಈಗಾಗಲೇ ಎರಡು ಬಾರಿ ಶಸ್ತ್ರಚಿಕಿತ್ಸೆಗೆ ಒಳಗಾಗಿದ್ದರೂ CSF ಸೋರಿಕೆ ಮತ್ತೆ ಮತ್ತೆ ಕಾಣಿಸಿಕೊಂಡಿತ್ತು. ಬೆಂಗಳೂರಿನಲ್ಲಿ ವೈದ್ಯರು CT, MRI, CT Cisternography ಹಾಗೂ ಮೂಗಿನ ಎಂಡೋಸ್ಕೋಪಿ ಸೇರಿದಂತೆ ಹಲವು ಪರೀಕ್ಷೆಗಳನ್ನು ನಡೆಸಿ ಸೋರಿಕೆಯ ನಿಖರ ಮೂಲವನ್ನು ಪತ್ತೆಹಚ್ಚಿದರು.

Also Read ಧುರಂಧರ್ 2 ಕ್ರೇಜ್ ಓವರ್‌ಫ್ಲೋ ಕಲೆಕ್ಷನ್‌ನಲ್ಲಿಕರ್ನಾಟಕವೇ ಟಾಪ್… ದಕ್ಷಿಣ ಭಾರತದಲ್ಲಿ 300 ಕೋಟಿ ಕ್ಲಬ್!

ಹೊರಗಿನಿಂದ ಯಾವುದೇ ಕಟ್ ಇಲ್ಲದೆ ಸಂಕೀರ್ಣ ಶಸ್ತ್ರಚಿಕಿತ್ಸೆ

ಹಿಂದಿನ ಶಸ್ತ್ರಚಿಕಿತ್ಸೆಗಳಿಂದ ಮೂಗಿನ ಒಳಭಾಗದ ರಚನೆಯಲ್ಲೂ ಬದಲಾವಣೆಗಳಾಗಿದ್ದರಿಂದ ಚಿಕಿತ್ಸೆ ಮತ್ತಷ್ಟು ಸವಾಲಿನದ್ದಾಗಿತ್ತು. ಈ ಹಿನ್ನೆಲೆಯಲ್ಲಿ ವೈದ್ಯರು ನ್ಯಾವಿಗೇಶನ್‌ ಸಹಾಯದ ಎಂಡೋಸ್ಕೋಪಿಕ್ ಶಸ್ತ್ರಚಿಕಿತ್ಸೆ ಮೂಲಕ ಮೂಗಿನ ಮಾರ್ಗದಿಂದಲೇ ತಲೆಬುರುಡೆಯಲ್ಲಿದ್ದ ದೋಷವನ್ನು ತಲುಪಿ ಮುಚ್ಚುವಲ್ಲಿ ಯಶಸ್ವಿಯಾದರು.

ದೋಷವನ್ನು ಬಲಪಡಿಸಲು ಹಲವು ಪದರಗಳ ಟಿಷ್ಯೂ ಗ್ರಾಫ್ಟ್‌, ಬಯಾಲಾಜಿಕಲ್ ಗ್ಲೂ ಮತ್ತು ರಕ್ತನಾಳ ಹೊಂದಿರುವ ನಾಸೋಸೆಪ್ಟಲ್ ಫ್ಲಾಪ್ ಬಳಸಿ ದುರಸ್ತಿ ಮಾಡಲಾಯಿತು. ಇದರಿಂದ ತಲೆಬುರುಡೆಯ ದೋಷವನ್ನು ಸುರಕ್ಷಿತವಾಗಿ ಮುಚ್ಚಿ CSF ಸೋರಿಕೆಯನ್ನು ತಡೆಯಲಾಯಿತು.

ಶಸ್ತ್ರಚಿಕಿತ್ಸೆಯ ನಂತರ CSF ಸೋರಿಕೆ ತಕ್ಷಣವೇ ನಿಂತಿದ್ದು, ಬಾಲಕ ಯಾವುದೇ ಗಂಭೀರ ತೊಂದರೆಗಳಿಲ್ಲದೆ ಚೇತರಿಸಿಕೊಂಡಿದ್ದಾನೆ. ಇದೀಗ ಆತ ಮತ್ತೆ ಶಾಲೆಗೆ ತೆರಳುತ್ತಿದ್ದು, ತನ್ನ ಸಾಮಾನ್ಯ ಚಟುವಟಿಕೆಗಳನ್ನೂ ಮುಂದುವರಿಸಿದ್ದಾನೆ.

Also Read ಹವ್ಯಕ ಭಾಷಾ ಅಕಾಡೆಮಿ ಅಸ್ತಿತ್ವಕ್ಕೆ ಗ್ರೀನ್ ಸಿಗ್ನಲ್

ವೈದ್ಯಕೀಯ ಕ್ಷೇತ್ರದಲ್ಲಿ ಮಹತ್ವದ ಹೆಜ್ಜೆ

ಅಪರೂಪದ ಜನ್ಮಜಾತ ತಲೆಬುರುಡೆ ದೋಷವನ್ನು ಅತ್ಯಾಧುನಿಕ ಇಮೇಜಿಂಗ್ ತಂತ್ರಜ್ಞಾನದಿಂದ ನಿಖರವಾಗಿ ಪತ್ತೆಹಚ್ಚಿ, ಹೊರಗಿನಿಂದ ಯಾವುದೇ ದೊಡ್ಡ ಶಸ್ತ್ರಚಿಕಿತ್ಸಾ ಗಾಯ ಮಾಡದೆ ಮೂಗಿನ ಮೂಲಕವೇ ಸಂಕೀರ್ಣ ದುರಸ್ತಿ ನಡೆಸಿರುವುದು ಈ ಪ್ರಕರಣದ ಪ್ರಮುಖ ವಿಶೇಷತೆ. ಇಂತಹ ಪ್ರಕರಣಗಳಲ್ಲಿ ನಿಖರ ರೋಗನಿರ್ಣಯ, ನ್ಯಾವಿಗೇಶನ್‌ ತಂತ್ರಜ್ಞಾನ ಮತ್ತು ಎಂಡೋಸ್ಕೋಪಿಕ್ ಶಸ್ತ್ರಚಿಕಿತ್ಸೆಯ ಸಂಯೋಜನೆ ಭವಿಷ್ಯದ ಚಿಕಿತ್ಸಾ ವಿಧಾನಗಳಿಗೆ ಮಹತ್ವದ ದಾರಿದೀಪವಾಗಬಹುದು.

##Bengaluru #MedicalBreakthrough #RareSkullDefect #CSFLeak #EndoscopicSurgery #PediatricSurgery #ApolloHospitals #MedicalInnovation #Maldives #HealthNews