ಮುಂಜಾನೆ ಸಿಕ್ಕ ಟ್ರಾಫಿಕ್ ಪಾಠ:

ಪುಣೆಯ ಸ್ಟಾರ್ಟ್‌ಅಪ್ ಸಂಸ್ಥಾಪಕರಾದ ವಿಕ್ ಗಂಭೀರ್ ಅವರು ಮುಂಜಾನೆ 4 ಗಂಟೆಗೆ ವಿಮಾನ ನಿಲ್ದಾಣಕ್ಕೆ ಹೋಗಲು ಉಬರ್ ಕ್ಯಾಬ್ ಹತ್ತಿದ್ದರು. ಪ್ರಯಾಣದ ವೇಳೆ ಚಾಲಕನೊಂದಿಗೆ ಮಾತು ಆರಂಭಿಸಿದಾಗ, ಆತ ತಾನು ಉಬರ್ ಓಡಿಸುವುದಕ್ಕಿಂತ ಮುನ್ನ ಬರೋಬ್ಬರಿ 11 ವರ್ಷಗಳ ಕಾಲ ಆಂಬ್ಯುಲೆನ್ಸ್ ಚಾಲಕನಾಗಿ ಕೆಲಸ ಮಾಡಿದ್ದಾಗಿ ಹೇಳಿದನು. ಭಾರತದ ಟ್ರಾಫಿಕ್ ಸಮಸ್ಯೆ ಮತ್ತು ಜನರ ಬೇಜವಾಬ್ದಾರಿತನದ ಬಗ್ಗೆ ಚರ್ಚಿಸುವಾಗ ಆ ಚಾಲಕ ನೀಡಿದ ಒಂದು ಐಡಿಯಾ ಉದ್ಯಮಿಯನ್ನು ಬೆಚ್ಚಿಬೀಳಿಸಿತು.

ಲೈಸೆನ್ಸ್‌ಗೆ ಮುನ್ನ ಆಂಬ್ಯುಲೆನ್ಸ್ ಡ್ರೈವಿಂಗ್ ಕಡ್ಡಾಯ ಇರಲಿ:

ಆ ಚಾಲಕನ ಪ್ರಕಾರ, ಭಾರತದಲ್ಲಿ ಹೊಸದಾಗಿ ಡ್ರೈವಿಂಗ್ ಲೈಸೆನ್ಸ್ (DL) ಪಡೆಯಲು ಬಯಸುವ ಪ್ರತಿಯೊಬ್ಬರಿಗೂ ಕಡ್ಡಾಯವಾಗಿ 1 ವಾರಗಳ ಕಾಲ ಆಂಬ್ಯುಲೆನ್ಸ್ ಓಡಿಸುವ ಕೆಲಸ ನೀಡಬೇಕು. ಆಂಬ್ಯುಲೆನ್ಸ್‌ನ ಸೈರನ್ ಸೌಂಡ್ ಕೇಳಿದ ಮೇಲೂ ರಸ್ತೆಯಲ್ಲಿ ಜನರು ಹೇಗೆ ಜಾಗ ಬಿಡದೆ ಸತಾಯಿಸುತ್ತಾರೆ ಮತ್ತು ಸಾವು-ಬದುಕಿನ ಮಧ್ಯೆ ಹೋರಾಡುತ್ತಿರುವ ರೋಗಿಯನ್ನು ಆಸ್ಪತ್ರೆಗೆ ತಲುಪಿಸಲು ಒಬ್ಬ ಚಾಲಕ ಎಷ್ಟು ಮಾನಸಿಕ ಒತ್ತಡ ಅನುಭವಿಸುತ್ತಾನೆ ಎಂಬುದನ್ನು ಪ್ರತಿಯೊಬ್ಬ ನಾಗರಿಕನೂ ಕಣ್ಣಾರೆ ಕಂಡು ಅನುಭವಿಸಬೇಕು.

ರಸ್ತೆಯಲ್ಲಿ ಬೇಕಿರುವುದು ಮಾನವೀಯತೆ:

ನಮ್ಮ ದೇಶದಲ್ಲಿ ಜನರಿಗೆ ಗಾಡಿ ಓಡಿಸುವ ಕೌಶಲ್ಯವಿದೆ, ಆದರೆ ರಸ್ತೆಯಲ್ಲಿ ಇತರರ ಬಗ್ಗೆ ಇರಬೇಕಾದ ‘ಸಹಾನುಭೂತಿ’ ಅಥವಾ ‘ಮಾನವೀಯತೆ’ (Road Empathy) ಇಲ್ಲ ಎಂದು ಆ ಚಾಲಕ ಬೇಸರ ವ್ಯಕ್ತಪಡಿಸಿದನು. ಒಮ್ಮೆ ಆಂಬ್ಯುಲೆನ್ಸ್ ಚಾಲಕನ ಕಷ್ಟ ಅನುಭವಿಸಿದ ವ್ಯಕ್ತಿ, ಮುಂದಿನ ಬಾರಿ ತನ್ನ ಸ್ವಂತ ವಾಹನ ಓಡಿಸುವಾಗ ಆಂಬ್ಯುಲೆನ್ಸ್ ಕಂಡ ತಕ್ಷಣ ಸ್ವಯಂಪ್ರೇರಿತನಾಗಿ ರಸ್ತೆ ಬಿಟ್ಟು ಪಕ್ಕಕ್ಕೆ ನಿಲ್ಲುತ್ತಾನೆ. ಈ ಕಥೆಯನ್ನು ಉದ್ಯಮಿ ಲಿಂಕ್ಡ್‌ಇನ್‌ನಲ್ಲಿ ಹಂಚಿಕೊಂಡಿದ್ದು, ಇದು ಇಂಟರ್ನೆಟ್‌ನಲ್ಲಿ ಭಾರಿ ಸಂಚಲನ ಮೂಡಿಸಿದೆ.