ಸಾವು ಆದ್ಮೇಲೆ ಹೊಣೆಗಾರರಾ? ಅಥವಾ ಸಾವು ಆಗದಂತೆ ಈಗಲೇ ಕ್ರಮವೇ?”

ಮಳೆಗಾಲದಲ್ಲಿ ರಸ್ತೆ ಗುಂಡಿಗಳಿಂದ ಸಾರ್ವಜನಿಕರು ಪ್ರಾಣ ಕಳೆದುಕೊಂಡರೆ ಸಂಬಂಧಪಟ್ಟ ಇಂಜಿನಿಯರ್‌ಗಳನ್ನೇ ನೇರ ಹೊಣೆಗಾರರನ್ನಾಗಿ ಮಾಡಲಾಗುವುದು ಎಂದು ಜಿಲ್ಲಾ ಉಸ್ತುವಾರಿ ಸಚಿವ ಯು.ಟಿ. ಖಾದರ್ ಎಚ್ಚರಿಕೆ ನೀಡಿದ್ದಾರೆ. ರಸ್ತೆ ಗುಂಡಿಗಳಿಂದ ಜೀವಹಾನಿಯಾದರೆ ಇಂಜಿನಿಯರ್‌ಗಳ ವಿರುದ್ಧ ಕ್ರಮ ಕೈಗೊಳ್ಳಲಾಗುವುದು ಎಂದು ಅವರು ಸ್ಪಷ್ಟಪಡಿಸಿದ್ದಾರೆ. ಅಲ್ಲದೆ, ತಾತ್ಕಾಲಿಕ ದುರಸ್ತಿ ಬದಲು ಶಾಶ್ವತ ಪರಿಹಾರಕ್ಕೆ ಒತ್ತು ನೀಡುವಂತೆ ಅಧಿಕಾರಿಗಳಿಗೆ ಸೂಚನೆ ನೀಡಿದ್ದಾರೆ.

ಆದರೆ ಜನರ ಪ್ರಶ್ನೆ — “ಸಾವು ಆದ ಮೇಲೆ ಹೊಣೆಗಾರರನ್ನಾಗಿ ಮಾಡಿದರೆ ಸಾಕಾ ಸರಿ ಹೋಗುತ್ತಾ ?

ಸಾವು ಆಗದಂತೆ ತಡೆಯುವುದು ಸರ್ಕಾರ ಮತ್ತು ಇಲಾಖೆಗಳ ಮೊದಲ ಕರ್ತವ್ಯ ಅಲ್ಲವೇ?”

ಮಂಗಳೂರು ಸೇರಿದಂತೆ ದಕ್ಷಿಣ ಕನ್ನಡದ ಅನೇಕ ರಸ್ತೆಗಳಲ್ಲಿ ಮಳೆ ಆರಂಭವಾದ ಕೆಲವೇ ದಿನಗಳಲ್ಲಿ ಗುಂಡಿಗಳು ಬಾಯಿಬಿಟ್ಟಿವೆ. ಕೆಲವೆಡೆ ರಸ್ತೆ ಎಲ್ಲಿದೆ, ಗುಂಡಿ ಎಲ್ಲಿದೆ ಎಂಬುದೇ ಗೊತ್ತಾಗದ ಸ್ಥಿತಿ ನಿರ್ಮಾಣವಾಗಿದೆ. ವಾಹನ ಸವಾರರು ಪ್ರತಿದಿನ ಜೀವ ಕೈಯಲ್ಲಿ ಹಿಡಿದು ಸಂಚರಿಸುತ್ತಿದ್ದಾರೆ. ಪ್ರತಿ ವರ್ಷ ಮಳೆಗಾಲ ಬಂದಾಗ ಇದೇ ಕಥೆ, ಇದೇ ಭರವಸೆ, ಇದೇ ಎಚ್ಚರಿಕೆ. ಆದರೆ ರಸ್ತೆ ಮಾತ್ರ ಬದಲಾಗುವುದಿಲ್ಲ.

Also Read ಅಂಡಮಾನ್ boat ದುರಂತ-250 ಕ್ಕೂ ಹೆಚ್ಚು ಮಂದಿ ಕಾಣೆ..

ಇನ್ನೂ ಆಶ್ಚರ್ಯದ ಸಂಗತಿ ಎಂದರೆ, ಮಳೆ ಬರುವುದಕ್ಕೂ ಮುನ್ನವೇ ಗುಂಡಿ ಮುಚ್ಚುವ ಕೆಲಸ ಮುಗಿದಿರಬೇಕಾಗಿತ್ತು. ಸ್ವತಃ ಯು.ಟಿ. ಖಾದರ್ ಅವರು ಮೇ ತಿಂಗಳಲ್ಲೇ ರಸ್ತೆ ಗುಂಡಿಗಳನ್ನು ಮಳೆಗಾಲಕ್ಕೂ ಮುನ್ನ ಮುಚ್ಚುವಂತೆ ಅಧಿಕಾರಿಗಳಿಗೆ ಸೂಚನೆ ನೀಡಿದ್ದರು. ಆದರೂ ಜೂನ್‌ನಲ್ಲಿ ಮತ್ತೆ ಅಧಿಕಾರಿಗಳಿಗೆ ಎಚ್ಚರಿಕೆ ನೀಡಬೇಕಾದ ಪರಿಸ್ಥಿತಿ ಏಕೆ ಬಂತು? ಮೊದಲ ಆದೇಶವನ್ನು ಯಾರು ನಿರ್ಲಕ್ಷಿಸಿದರು? ಅದರ ಹೊಣೆ ಯಾರು ಹೊರುತ್ತಾರೆ?

ಮಂಗಳೂರಿನ ಹಲವೆಡೆ ರಸ್ತೆ ಕಾಮಗಾರಿಗಳ ಸ್ಥಿತಿ ನೋಡಿದರೆ ಜನರ ತೆರಿಗೆ ಹಣವನ್ನು “ನೀರಿನಲ್ಲಿ ಹೋಮ” ಮಾಡಿದಂತೆ ಕಾಣುತ್ತದೆ. ಒಂದು ಇಲಾಖೆ ರಸ್ತೆ ಅಗೆದು ಹೋಗುತ್ತದೆ. ಮತ್ತೊಂದು ಇಲಾಖೆ ಅದೇ ರಸ್ತೆಯನ್ನು ಮತ್ತೆ ಕಿತ್ತುಹಾಕುತ್ತದೆ. ಕೆಲ ದಿನಗಳ ಬಳಿಕ ಅದನ್ನು ತಾತ್ಕಾಲಿಕವಾಗಿ ಮುಚ್ಚಲಾಗುತ್ತದೆ. ಮಳೆ ಬಂದರೆ ಮತ್ತೆ ಗುಂಡಿ. ಮತ್ತೆ ಟೆಂಡರ್. ಮತ್ತೆ ಕಾಮಗಾರಿ. ಮತ್ತೆ ಸಾರ್ವಜನಿಕರ ಹಣ. ಈ ಅಂತ್ಯವಿಲ್ಲದ ಚಕ್ರಕ್ಕೆ ಕೊನೆ ಯಾವಾಗ?

Also Read ಅಂಡಮಾನ್ ಜೈಲಿನ ಕರಾಳ ಕೋಣೆಯಿಂದ ಹೊರಬರಲಿದೆ ಕರ್ನಾಟಕದ 59 ರಕ್ತೇತಿಹಾಸ'ಯಾರೂ ಅರಿಯದ ವೀರರು' …!

ರಸ್ತೆ ಕಾಮಗಾರಿಗಳ ಗುಣಮಟ್ಟದ ಬಗ್ಗೆ ಜನರಲ್ಲಿ ಗಂಭೀರ ಅನುಮಾನಗಳಿವೆ. ಕೆಲವು ರಸ್ತೆಗಳನ್ನು ನಿರ್ಮಿಸಿದ ಕೆಲವೇ ತಿಂಗಳಲ್ಲಿ ಅವು ಹಾಳಾಗುತ್ತಿರುವುದು ಸಾಮಾನ್ಯವಾಗಿದೆ. ಮಳೆ ಬಂದರೆ ರಸ್ತೆ ಕರಗುತ್ತದೆ, ಬಿಸಿಲು ಬಂದರೆ ಬಿರುಕು ಬಿಡುತ್ತದೆ. ಇದಕ್ಕೆ ಪ್ರಕೃತಿಯೇ ಕಾರಣವಲ್ಲ; ಕಳಪೆ ಕಾಮಗಾರಿ, ಮೇಲ್ವಿಚಾರಣೆಯ ಕೊರತೆ ಮತ್ತು ಜವಾಬ್ದಾರಿತನದ ಅಭಾವವೇ ಮುಖ್ಯ ಕಾರಣ ಎಂಬ ಆರೋಪಗಳು ಕೇಳಿಬರುತ್ತಿವೆ.

ಅತ್ಯಂತ ಕಳವಳಕಾರಿ ಸಂಗತಿ ಎಂದರೆ, ರಸ್ತೆ ಗುಂಡಿಗಳು ಕೇವಲ ಅಸೌಕರ್ಯವಲ್ಲ; ಅವು ಸಾವಿನ ಬಲೆಗಳಾಗಿವೆ. ದ್ವಿಚಕ್ರ ವಾಹನ ಸವಾರರು, ಶಾಲಾ ಮಕ್ಕಳು, ವೃದ್ಧರು, ತುರ್ತು ಸೇವೆಗಳ ವಾಹನಗಳು ಪ್ರತಿದಿನ ಅಪಾಯ ಎದುರಿಸುತ್ತಿವೆ. ಪ್ರತೀ ವರ್ಷ ಅಪಘಾತಗಳು ನಡೆಯುತ್ತವೆ, ಜೀವಗಳು ಹೋಗುತ್ತವೆ, ನಂತರ ತನಿಖೆ ಮತ್ತು ಆರೋಪ-ಪ್ರತ್ಯಾರೋಪಗಳು ಆರಂಭವಾಗುತ್ತವೆ. ಆದರೆ ಮೃತಪಟ್ಟ ವ್ಯಕ್ತಿಯ ಜೀವವನ್ನು ಯಾವ ಕ್ರಮವೂ ಮರಳಿ ತರಲು ಸಾಧ್ಯವಿಲ್ಲ.

Also Read ಹೋಳಿ ಮತ್ತು ರಂಜಾನ್ ಒಂದು ಜೀವವನ್ನೇ ನುಂಗಿತು..!

ಆದ್ದರಿಂದ ಈಗ ಜನರು ಕೇಳುತ್ತಿರುವ ಪ್ರಶ್ನೆ ಸ್ಪಷ್ಟವಾಗಿದೆ — “ಸಾವು ಆದ ಮೇಲೆ ಹೊಣೆಗಾರರ ಹುಡುಕಾಟ ಯಾಕೆ? ಸಾವು ಆಗದಂತೆ ಈಗಲೇ ರಸ್ತೆಗಳನ್ನು ಸುರಕ್ಷಿತಗೊಳಿಸುವ ಕೆಲಸ ಎಲ್ಲಿದೆ?”

ಮಂಗಳೂರು ನಗರದ ರಸ್ತೆಗಳಿಗೆ ಇನ್ನು ತಾತ್ಕಾಲಿಕ ತೇಪೆ ಪರಿಹಾರವಲ್ಲ, ಗುಣಮಟ್ಟದ ಶಾಶ್ವತ ಕಾಮಗಾರಿ ಬೇಕಿದೆ. ಮಳೆಗಾಲದ ಪ್ರತೀ ಹನಿಯ ಜೊತೆಗೆ ಜನರ ಜೀವಗಳು ದೊಂಬರಾಟ ಆಡಬಾರದು. ಅಧಿಕಾರಿಗಳ ಸಭೆಗಳಲ್ಲಿ ಎಚ್ಚರಿಕೆಗಳು ಕೇಳಿಸಿಕೊಳ್ಳುವುದಕ್ಕಿಂತ ರಸ್ತೆಗಳ ಮೇಲೆಯೇ ಬದಲಾವಣೆ ಕಾಣಬೇಕು. ಇಲ್ಲವಾದರೆ ಮುಂದಿನ ಮಳೆಗಾಲದಲ್ಲೂ ಇದೇ ಪ್ರಶ್ನೆ ಮತ್ತೆ ಕೇಳಿಸಿಕೊಳ್ಳಲಿದೆ — “ಹೊಣೆಗಾರರನ್ನು ಹುಡುಕುವುದೇ ಮುಖ್ಯವೇ, ಜೀವ ಉಳಿಸುವುದೇ ಮುಖ್ಯವೇ?”