ಉತ್ತರ ಪ್ರದೇಶದ ಲಕ್ನೋದಲ್ಲಿ ನಡೆದ ಈ ಘಟನೆ ಇಂದಿನ ಡಿಜಿಟಲ್ ಯುಗದ ಕರಾಳ ಮುಖ ಹಾಗೂ ಹದಿಹರೆಯದ ಮಕ್ಕಳ ಹಾದಿ ತಪ್ಪುತ್ತಿರುವ ರೀತಿಗೆ ಕನ್ನಡಿ ಹಿಡಿದಿದೆ.

ಸಾಮಾನ್ಯವಾಗಿ ಹೆಣ್ಣುಮಕ್ಕಳಿಗೆ ತಾಯಿ ಎಂದರೆ ಜೀವ. ಆದರೆ ಉತ್ತರ ಪ್ರದೇಶದ ಲಕ್ನೋದ ಕೃಷ್ಣಾನಗರದಲ್ಲಿ ನಡೆದ ಘಟನೆ ಇಡೀ ಸಮಾಜ ತಲೆತಗ್ಗಿಸುವಂತೆ ಮಾಡಿದೆ. ಇನ್‌ಸ್ಟಾಗ್ರಾಮ್ ಪ್ರಿಯಕರನ ಜೊತೆ ತಡರಾತ್ರಿಯವರೆಗೆ ಗುಟ್ಟಾಗಿ ಚಾಟಿಂಗ್ ಮಾಡಲು, ೧೫ ವರ್ಷದ ಅಪ್ರಾಪ್ತ ಮಗಳೊಬ್ಬಳು ಹೆತ್ತ ತಾಯಿಯ ಊಟದಲ್ಲಿ ದಿನವೂ ನಿದ್ದೆ ಮಾತ್ರೆ ಬೆರೆಸುತ್ತಿದ್ದ ಘೋರ ಸತ್ಯ ತಡವಾಗಿ ಬೆಳಕಿಗೆ ಬಂದಿದೆ. ಈ ದ್ರೋಹವನ್ನು ಕಂಡು ಹೆತ್ತ ಕರುಳು ಕಣ್ಣೀರು ಹಾಕಿದೆ.

ಮೂರು ತಿಂಗಳ ಕರಾಳ ಕೃತ್ಯ: ಬುಟಿಕ್ ಹಾಗೂ ಟಿಫಿನ್ ಸರ್ವೀಸ್ ನಡೆಸಿ ಕಷ್ಟಪಟ್ಟು ಸಂಸಾರ ತೂಗಿಸುತ್ತಿದ್ದ ಆ ತಾಯಿಗೆ ಕಳೆದ ಮೂರು ತಿಂಗಳಿಂದ ತೀವ್ರ ನಿಶ್ಯಕ್ತಿ, ಅತಿಯಾದ ನಿದ್ದೆ ಹಾಗೂ ತಲೆಸುತ್ತು ಕಾಣಿಸಿಕೊಳ್ಳುತ್ತಿತ್ತು. ಕಷ್ಟಪಟ್ಟು ದುಡಿಯುತ್ತಿರುವುದರಿಂದಲೇ ಆಯಾಸವಾಗುತ್ತಿದೆ ಎಂದು ಅವರು ಭಾವಿಸಿದ್ದರು. ಆದರೆ ದಿನದಿಂದ ದಿನಕ್ಕೆ ಆರೋಗ್ಯ ಕ್ಷೀಣಿಸಿದಾಗ ಅನುಮಾನಗೊಂಡು ವೈದ್ಯರನ್ನು ಸಂಪರ್ಕಿಸಿ ರಕ್ತ ಪರೀಕ್ಷೆ ಮಾಡಿಸಿದಾಗ, ಅವರ ರಕ್ತದಲ್ಲಿ ಅತಿಯಾದ ನಿದ್ದೆ ಮಾತ್ರೆಯ (Sleeping Pills) ಅಂಶಗಳು ಪತ್ತೆಯಾಗಿ ವೈದ್ಯರೇ ದಿಗ್ಭ್ರಮೆಗೊಂಡಿದ್ದರು.

Also Read ಬಂಟ್ವಾಳದಲ್ಲಿ ವ್ಯಕ್ತಿಗಳ ಆರೋಪ–ಪ್ರತ್ಯಾರೋಪಕ್ಕಿಂತ “ರಾಜಕೀಯದೊಳಗಿನ ರಾಜಕೀಯ”ಬಿಸಿ…!ಲಾಭ ಯಾರಿಗೆ?

ಪ್ರೀತಿಯ ಜಾಲ ಮತ್ತು ಸಂಚು: ವೈದ್ಯರ ವರದಿ ಬಂದ ನಂತರ ಮನೆಯಲ್ಲಿ ತೀವ್ರ ವಿಚಾರಣೆ ನಡೆಸಿದಾಗ ಅಸಲಿ ಅಪರಾಧಿ ಸ್ವಂತ ಮಗಳೇ ಎಂಬುದು ಬಯಲಾಗಿದೆ. ಇನ್‌ಸ್ಟಾಗ್ರಾಮ್ ಮೂಲಕ ಪರಿಚಯವಾಗಿದ್ದ ಪಕ್ಕದ ಮನೆಯ ಹುಡುಗನ ಜೊತೆ ರಾತ್ರಿ ಇಡೀ ಮಾತನಾಡಲು, ಅಮ್ಮ ತನಗೆ ತಡೆಯಾಗಬಾರದು ಎಂದು ಈ ಕೃತ್ಯ ಎಸಗಿರುವುದಾಗಿ ಬಾಲಕಿ ಒಪ್ಪಿಕೊಂಡಿದ್ದಾಳೆ. ಅಷ್ಟೇ ಅಲ್ಲದೆ, ಆ ಹುಡುಗನೇ ತನಗೆ ನಿದ್ದೆ ಮಾತ್ರೆಗಳನ್ನು ತಂದುಕೊಟ್ಟು, ಈ ಹಾದಿ ತಪ್ಪಿಸುವ ಐಡಿಯಾ ನೀಡಿದ್ದಾಗಿ ಹೆದರುತ್ತಲೇ ವಿವರಿಸಿದ್ದಾಳೆ.

ಕೌನ್ಸೆಲಿಂಗ್ ಕೇಂದ್ರದಲ್ಲಿ ಬಾಲಕಿ: ವಿಷಯ ತಿಳಿಯುತ್ತಿದ್ದಂತೆ ಬಾಲಕಿಯನ್ನು ಲಕ್ನೋದ ಲೋಕಬಂಧು ಆಸ್ಪತ್ರೆಯ ‘ಒನ್ ಸ್ಟಾಪ್ ಸೆಂಟರ್’ಗೆ ಕೌನ್ಸೆಲಿಂಗ್‌ಗಾಗಿ ದಾಖಲಿಸಲಾಗಿದೆ. ಸೆಂಟರ್ ಮ್ಯಾನೇಜರ್ ಅರ್ಚನಾ ಸಿಂಗ್ ಅವರ ಪ್ರಕಾರ, ಮೊಬೈಲ್ ಮತ್ತು ಸಾಮಾಜಿಕ ಜಾಲತಾಣಗಳ ಅತಿಯಾದ ವ್ಯಸನದಿಂದ ಬಾಲಕಿ ಇಂತಹ ಕ್ರೂರ ನಿರ್ಧಾರ ತಳೆದಿದ್ದಾಳೆ. ಸದ್ಯ ಆಕೆಗೆ ತಜ್ಞರಿಂದ ಮಾನಸಿಕ ತಿಳುವಳಿಕೆ ಮೂಡಿಸಲಾಗುತ್ತಿದ್ದು, ನಡವಳಿಕೆಯಲ್ಲಿ ಸುಧಾರಣೆ ಕಂಡುಬರುತ್ತಿದೆ.

Also Read ಮೊಬೈಲ್ ನಂಬರ್ ದುರ್ಬಳಕೆ; ನಿವೃತ್ತ ಉದ್ಯೋಗಿಯ ವಿವಿಧ ಬ್ಯಾಂಕ್ ಖಾತೆಗಳಿಂದ ₹2.12 ಕೋಟಿ ಆನ್‌ಲೈನ್ ವಹಿವಾಟು

ಕ್ಷಮಿಸಿದ ತಾಯಿ – ಸಮಾಜಕ್ಕೆ ದೊಡ್ಡ ಪಾಠ: ತನ್ನ ಮಗಳು ತನಗೆ ನಿಧಾನವಾಗಿ ವಿಷ ನೀಡುತ್ತಿದ್ದಳು ಎಂಬ ಸತ್ಯ ತಿಳಿದರೂ, ಆ ತಾಯಿ ಕರುಳಿನ ಕುಡಿತಿನ ಮೇಲೆ ಯಾವುದೇ ಪೊಲೀಸ್ ಕೇಸ್ ಜರುಗಿಸಲು ನಿರಾಕರಿಸಿದ್ದಾರೆ. ಮಗಳನ್ನು ಜೈಲಿಗೆ ಕಳುಹಿಸುವ ಬದಲು, ಆಕೆಯನ್ನು ತಿದ್ದಿ ಬುದ್ಧಿ ಕಲಿಸಿ ಒಳ್ಳೆಯ ದಾರಿಗೆ ತರುವುದೇ ಸರಿಯಾದ ಮಾರ್ಗ ಎಂದು ತಾಯಿ ನಿರ್ಧರಿಸಿದ್ದಾರೆ. ಸದ್ಯ ಬಾಲಕಿಗೆ ಮೊಬೈಲ್‌ನಿಂದ ದೂರವಿರಲು ಸೂಚಿಸಲಾಗಿದ್ದು, ಇಂದಿನ ಡಿಜಿಟಲ್ ಯುಗದಲ್ಲಿ ಪೋಷಕರು ತಮ್ಮ ಮಕ್ಕಳ ಮೊಬೈಲ್ ಚಟುವಟಿಕೆಗಳ ಮೇಲೆ ತೀವ್ರ ನಿಗಾ ಇಡಬೇಕು ಎಂದು ತಜ್ಞರು ಎಚ್ಚರಿಸಿದ್ದಾರೆ.

##FamilyFirst #ParentingAlert #DigitalAddiction##TeensMentalHealth #LucknowIncident