“ಅಕ್ಕಾ, ಮನೆಗೆ ಹೋಗೋಣ” ಎಂದು ಅಕ್ಕನನ್ನು ಕರೆತರಲು ಬಂದ ಅಪೂರ್ವ… ಕೆಲವೇ ಕ್ಷಣಗಳಲ್ಲಿ ಕಬ್ಬಿಣದ ಗೇಟ್ ಅಡಿಯಲ್ಲಿ ಅಂತ್ಯ

Karavali Maruta | 2 months ago | 08 August 2026

ಕುಶಾಲನಗರದಲ್ಲಿ ಹೃದಯವಿದ್ರಾವಕ ದುರಂತ: ಶಾಲೆಯ ಶಿಥಿಲಗೊಂಡ ಕಬ್ಬಿಣದ ಗೇಟ್‌ ಬಿದ್ದು 4 ವರ್ಷದ ಬಾಲಕಿ ಅಪೂರ್ವ ಬಲಿ..

ಕುಶಾಲನಗರ: ಶಾಲೆಗೆ ಅಕ್ಕನನ್ನು ಕರೆತರಲು ಬಂದಿದ್ದ ನಾಲ್ಕು ವರ್ಷದ ಪುಟ್ಟ ಬಾಲಕಿ, ಕೆಲವೇ ಕ್ಷಣಗಳಲ್ಲಿ ಜೀವ ಕಳೆದುಕೊಂಡ ಹೃದಯವಿದ್ರಾವಕ ಘಟನೆ ಕೊಡಗು ಜಿಲ್ಲೆಯ ಕುಶಾಲನಗರ ತಾಲೂಕಿನ ಬಸವನಹಳ್ಳಿ ಹಾಡಿಯಲ್ಲಿ ನಡೆದಿದೆ. ಮಳೆಯಿಂದ ದುರ್ಬಲಗೊಂಡಿದ್ದ ಶಾಲೆಯ ಕಾಂಪೌಂಡ್‌ನ ಭಾರೀ ಕಬ್ಬಿಣದ ಗೇಟ್‌ ಕಳಚಿ ಬಿದ್ದ ಪರಿಣಾಮ ಅಂಗನವಾಡಿ ವಿದ್ಯಾರ್ಥಿನಿ ಅಪೂರ್ವ (4)ಸ್ಥಳದಲ್ಲೇ ಮೃತಪಟ್ಟಿದ್ದಾಳೆ.

ಮೃತ ಅಪೂರ್ವ, ಬಸವನಹಳ್ಳಿ ಹಾಡಿಯ ನಿವಾಸಿಗಳಾದ ಸತೀಶ್ ಮತ್ತು ಪವಿತ್ರ ದಂಪತಿಯ ಮೂರನೇ ಪುತ್ರಿ. ಪ್ರತಿದಿನದಂತೆ ತನ್ನ ಅಕ್ಕಂದಿರಾದ ಅಮೂಲ್ಯ (5ನೇ ತರಗತಿ) ಮತ್ತು ಶ್ರಾವಣಿ (1ನೇ ತರಗತಿ) ಅವರನ್ನು ಕರೆದುಕೊಂಡು ಹೋಗಲು ಶಾಲೆಯ ಗೇಟ್ ಬಳಿ ಬಂದಿದ್ದಳು. ಸ್ಥಳೀಯರ ಮಾಹಿತಿ ಪ್ರಕಾರ, ಗೇಟ್ ಬಳಿ ಆಟವಾಡುವುದು ಅಪೂರ್ವನ ದಿನನಿತ್ಯದ ಅಭ್ಯಾಸವಾಗಿತ್ತು.

Also Read 🎬 ಸೀನ್ ಹಿಂದೆ ಇರುವ ಸೀಕ್ರೆಟ್ ಏನು?ಧುರಂಧರ್ ಚಿತ್ರದ ಈ ಸಣ್ಣ ಕ್ಷಣವೇ ಈಗ ದೊಡ್ಡ ಸೆನ್ಸೇಶನ್ ಆಗಿದೆ…ಮುಸ್ತಫಾ ಫುಲ್ ಖುಷ್

ಆದರೆ ಶುಕ್ರವಾರ ಸಂಜೆ ಮಳೆಯ ನಡುವೆ ಶಿಥಿಲಗೊಂಡಿದ್ದ ಕಾಂಪೌಂಡ್ ಏಕಾಏಕಿ ಕುಸಿದು, ಅದರೊಂದಿಗೆ ಭಾರೀ ತೂಕದ ಕಬ್ಬಿಣದ ಗೇಟ್ ಬಾಲಕಿಯ ಮೇಲೆ ಬಿದ್ದಿದೆ. ತಲೆಗೆ ಗಂಭೀರ ಗಾಯಗೊಂಡ ಅಪೂರ್ವಳನ್ನು ತಕ್ಷಣ ಕುಶಾಲನಗರ ಸಮುದಾಯ ಆರೋಗ್ಯ ಕೇಂದ್ರಕ್ಕೆ ಕರೆದೊಯ್ಯಲಾಯಿತಾದರೂ, ವೈದ್ಯರು ಆಕೆ ಮೃತಪಟ್ಟಿರುವುದಾಗಿ ತಿಳಿಸಿದ್ದಾರೆ.

ಘಟನೆ ಬಳಿಕ ಬಸವನಹಳ್ಳಿ ಹಾಡಿಯಲ್ಲಿ ಶೋಕದ ವಾತಾವರಣ ನಿರ್ಮಾಣವಾಗಿದ್ದು, ಕುಟುಂಬದವರ ಆಕ್ರಂದನ ಕಂಡು ಸ್ಥಳೀಯರ ಕಣ್ಣಲ್ಲೂ ನೀರು ತರಿಸಿದೆ.

15 ದಿನಗಳಿಂದ ಮಳೆಯ ಹೊಡೆತ – ದುರಸ್ತಿ ಮಾಡದ ಅಧಿಕಾರಿಗಳ ವಿರುದ್ಧ ಆಕ್ರೋಶ

ಕಳೆದ ಸುಮಾರು 15 ದಿನಗಳಿಂದ ಈ ಭಾಗದಲ್ಲಿ ನಿರಂತರ ಮಳೆಯಾಗುತ್ತಿದ್ದು, ಶಾಲೆಯ ಕಾಂಪೌಂಡ್ ಗೋಡೆ ಮತ್ತು ಗೇಟ್ ಅಪಾಯಕಾರಿಯಾಗಿ ಶಿಥಿಲಗೊಂಡಿತ್ತು ಎಂದು ಗ್ರಾಮಸ್ಥರು ಆರೋಪಿಸಿದ್ದಾರೆ. ಗೇಟ್ ಯಾವಾಗ ಬೇಕಾದರೂ ಬೀಳುವ ಸ್ಥಿತಿಯಲ್ಲಿದ್ದರೂ, ಯಾವುದೇ ಮುನ್ನೆಚ್ಚರಿಕೆ ಕ್ರಮ ಕೈಗೊಳ್ಳಲಾಗಿಲ್ಲ ಎಂದು ಸ್ಥಳೀಯರು ಆಕ್ರೋಶ ವ್ಯಕ್ತಪಡಿಸಿದ್ದಾರೆ.

Also Read ಚಿನ್ನ ಖರೀದಿಸುವ ಕಾಲ ಹೋಯ್ತಾ? ಗಗನಕ್ಕೇರಿದ ದರ ಕೇಳಿ ಬೆಚ್ಚಿಬಿದ್ದ ಜನ!ಒಂದೂವರೆ ಲಕ್ಷ ರೂಪಾಯಿ ಗಡಿದಾಟಿತಾ …?ಬೆಳ್ಳಿಎರಡೇ ದಿನದಲ್ಲಿ ಆರು ಸಾವಿರ ಏರಿಕೆ

ನೂರಾರು ಮಕ್ಕಳು ಪ್ರತಿದಿನ ಓಡಾಡುವ ಶಾಲೆಯ ಆವರಣದಲ್ಲಿ ಇಂತಹ ಅಪಾಯಕಾರಿ ಸ್ಥಿತಿ ಇದ್ದರೂ, ಅಧಿಕಾರಿಗಳು ನಿರ್ಲಕ್ಷ್ಯ ವಹಿಸಿರುವುದೇ ಈ ದುರಂತಕ್ಕೆ ಕಾರಣ ಎಂದು ನಿವಾಸಿಗಳು ದೂರಿದ್ದಾರೆ.

ಅಧಿಕಾರಿಗಳ ಭೇಟಿ – ಪರಿಹಾರದ ಭರವಸೆ

ಘಟನಾ ಸ್ಥಳಕ್ಕೆ ತಹಸೀಲ್ದಾರ್ ಕೆ.ಕೆ. ಕೃಷ್ಣಮೂರ್ತಿ, ತಾಲೂಕು ಗ್ಯಾರಂಟಿ ಯೋಜನೆಗಳ ಅನುಷ್ಠಾನ ಸಮಿತಿ ಅಧ್ಯಕ್ಷ ವಿ.ಪಿ. ಶಶಿಧರ್, ಗಿರಿಜನ ಮುಖಂಡ ಆರ್.ಕೆ. ಚಂದ್ರ ಸೇರಿದಂತೆ ಅಧಿಕಾರಿಗಳು ಭೇಟಿ ನೀಡಿ ಪರಿಶೀಲನೆ ನಡೆಸಿದರು.

ತಹಸೀಲ್ದಾರ್ ಕೆ.ಕೆ. ಕೃಷ್ಣಮೂರ್ತಿ ಮಾತನಾಡಿ, “ಇದು ಪ್ರಕೃತಿ ವಿಕೋಪದಿಂದ ಉಂಟಾದ ದುರ್ಘಟನೆ. ಇತ್ತೀಚಿನ ಭಾರೀ ಮಳೆಯಿಂದ ಮಣ್ಣು–ಇಟ್ಟಿಗೆ ಮಿಶ್ರಿತ ಕಾಂಪೌಂಡ್ ದುರ್ಬಲಗೊಂಡು ಭಾರೀ ಗೇಟ್ ಬಿದ್ದಿದೆ. ಪೋಷಕರು ಅಗತ್ಯ ದಾಖಲೆ ಸಲ್ಲಿಸಿದರೆ ಎನ್‌ಡಿಆರ್‌ಎಫ್ ಹಾಗೂ ಎಸ್‌ಡಿಆರ್‌ಎಫ್ ನಿಯಮಗಳಡಿ ಪರಿಹಾರ ಒದಗಿಸಲಾಗುತ್ತದೆ” ಎಂದು ತಿಳಿಸಿದ್ದಾರೆ.

Also Read ಒಂದು ತಪ್ಪು ಹೆಜ್ಜೆ…25 ಅಡಿ ಬಾವಿಗೆ ಬಿದ್ದ ಆನೆ …ನೋಡಿ ಈ ಸ್ಮಾರ್ಟ್ ಆಪರೇಷನ್!

ಪ್ರಶ್ನೆ ಮಾತ್ರ ಉಳಿದಿದೆ

ಒಂದು ಶಾಲೆಯ ಶಿಥಿಲಗೊಂಡ ಗೇಟ್‌ ಸಮಯಕ್ಕೆ ದುರಸ್ತಿ ಮಾಡಿದ್ದರೆ, ನಾಲ್ಕು ವರ್ಷದ ಅಪೂರ್ವ ಇಂದು ಜೀವಂತವಾಗಿರುತ್ತಿರಲಿಲ್ಲವೇ? ಎಂಬ ಪ್ರಶ್ನೆ ಈಗ ಬಸವನಹಳ್ಳಿ ಹಾಡಿಯ ಜನರನ್ನು ಕಾಡುತ್ತಿದೆ. ಈ ದುರಂತ ಕೇವಲ ಪ್ರಕೃತಿ ವಿಕೋಪವೇ, ಅಥವಾ ಆಡಳಿತದ ನಿರ್ಲಕ್ಷ್ಯದ ಮತ್ತೊಂದು ಬಲಿಯೇ ಎಂಬ ಚರ್ಚೆ ವ್ಯಾಪಕವಾಗಿದೆ.

##ಕುಶಾಲನಗರ #ಕೊಡಗು #ಶಾಲಾದುರಂತ #ಅಪೂರ್ವ #ಗೇಟ್ಬಿದ್ದುಸಾವು #ಕರ್ನಾಟಕಸುದ್ದಿ #NegligenceCase