ಬಂಟ್ವಾಳ: ಪೊಲೀಸರ ಪ್ರಕಾರ, ಲಾವಣ್ಯ ಕೊಲೆ ಪ್ರಕರಣದ ನೈಜ ಆರೋಪಿಯ ಭಾವಚಿತ್ರವನ್ನು ದುಷ್ಕರ್ಮಿಗಳು ಎಡಿಟ್ ಮಾಡಿ, ಕೇಸರಿ ಶಾಲು ಮತ್ತು ಕುಂಕುಮ ಸೇರಿಸಿ, ಆತ ಬಜರಂಗದಳದ ಕಾರ್ಯಕರ್ತ ಎಂದು ಸುಳ್ಳಾಗಿ ಬಿಂಬಿಸಿದ್ದರು. ಅಲ್ಲದೆ, ಕೊಲೆಗೆ ಸಂಘಟನೆಯಿಂದಲೇ ತರಬೇತಿ ನೀಡಲಾಗಿದೆ ಎಂಬ ಯಾವುದೇ ಆಧಾರವಿಲ್ಲದ ಬರಹಗಳು, ಪೋಸ್ಟ್‌ಗಳು ಹಾಗೂ ವಿಡಿಯೋಗಳನ್ನು ವೈರಲ್ ಮಾಡಲಾಗಿತ್ತು. ಈ ಮೂಲಕ ಕರಾವಳಿಯಲ್ಲಿ ಕೋಮು ಉದ್ವಿಗ್ನತೆ ಸೃಷ್ಟಿಸಿ ಸಾರ್ವಜನಿಕ ಶಾಂತಿ ಕದಡುವ ಪ್ರಯತ್ನ ನಡೆದಿದೆ ಎಂದು ದೂರಿನಲ್ಲಿ ಉಲ್ಲೇಖಿಸಲಾಗಿದೆ.

ಈ ಕುರಿತು ವಿಶ್ವ ಹಿಂದೂ ಪರಿಷತ್ ಬಂಟ್ವಾಳ ಪ್ರಖಂಡದ ಉಪಾಧ್ಯಕ್ಷ ಕೇಶವ ದೈಪಾಲ ನೀಡಿದ ದೂರಿನ ಮೇರೆಗೆ ಬಂಟ್ವಾಳ ನಗರ ಪೊಲೀಸರು ಪ್ರಕರಣ ದಾಖಲಿಸಿಕೊಂಡಿದ್ದಾರೆ. ಹೆಡ್ ಕಾನ್‌ಸ್ಟೇಬಲ್ ಅಬ್ದುಲ್ ಲತೀಫ್ ಪ್ರಾಥಮಿಕ ತನಿಖೆ ನಡೆಸುತ್ತಿದ್ದು, ವೈರಲ್ ಪೋಸ್ಟ್‌ಗಳ ಮೂಲ, ಅವುಗಳನ್ನು ಸೃಷ್ಟಿಸಿದವರು ಹಾಗೂ ಹಂಚಿದವರ ವಿವರಗಳನ್ನು ತಾಂತ್ರಿಕವಾಗಿ ಪರಿಶೀಲಿಸಲಾಗುತ್ತಿದೆ.

ಬಿ.ಮೂಡ ಗ್ರಾಮದ ವ್ಯಾಪ್ತಿಯಲ್ಲಿ ನಡೆದ ಲಾವಣ್ಯ ಹತ್ಯೆ ಪ್ರಕರಣದ ಬೆನ್ನಲ್ಲೇ ಸಾಮಾಜಿಕ ಜಾಲತಾಣಗಳಲ್ಲಿ ಕೋಮು ಪ್ರಚೋದನೆ ಮೂಡಿಸುವ ಉದ್ದೇಶದಿಂದ ಸುಳ್ಳು ಮಾಹಿತಿ, ತಿರುಚಿದ ಫೋಟೋ ಹಾಗೂ ವಿಡಿಯೋಗಳನ್ನು ವೈರಲ್ ಮಾಡಿದ ಆರೋಪದಡಿ ಬಂಟ್ವಾಳ ನಗರ ಪೊಲೀಸ್ ಠಾಣೆಯಲ್ಲಿ Crime No.96/2026 ಪ್ರಕರಣ ದಾಖಲಾಗಿದೆ. ಭಾರತೀಯ ನ್ಯಾಯ ಸಂಹಿತೆ (BNS) 2023ರ ಸೆಕ್ಷನ್ 196 ಹಾಗೂ 353(2) ಅಡಿಯಲ್ಲಿ ಒಟ್ಟು ಆರು ಸಾಮಾಜಿಕ ಜಾಲತಾಣ ಖಾತೆಗಳು/ವಾಟ್ಸಾಪ್ ಗ್ರೂಪ್ ಸದಸ್ಯರ ವಿರುದ್ಧ ಎಫ್‌ಐಆರ್ ದಾಖಲಿಸಲಾಗಿದ್ದು, ಆರೋಪಿಗಳ ಪತ್ತೆಗೆ ಪೊಲೀಸರು ತನಿಖೆ ತೀವ್ರಗೊಳಿಸಿದ್ದಾರೆ.

ಪೊಲೀಸರ ಎಫ್‌ಐಆರ್‌ನಲ್ಲಿ ಆರೋಪಿಗಳಾಗಿ ಉಲ್ಲೇಖವಾಗಿರುವವರು:

Instagram ಖಾತೆ “troll_master” (A1),

“ಯುವ ಬೆಳ್ತಂಗಡಿ” ವಾಟ್ಸಾಪ್ ಗ್ರೂಪ್ ಸದಸ್ಯ (ಮೊ. 8884754121) (A2),

“Padmaraj Padmaraj Pari” ವಾಟ್ಸಾಪ್ ಗ್ರೂಪ್ ಸದಸ್ಯ (ಮೊ. 9964447828) (A3),

ಅದೇ ಗ್ರೂಪ್‌ನ ಅನ್ವರ್ (ಮೊ. 8089693753) (A4),

“ಯುವ ಕಾಂಗ್ರೆಸ್ ಬೆಳ್ತಂಗಡಿ” ವಾಟ್ಸಾಪ್ ಗ್ರೂಪ್‌ನ ಅಲೀಜಾ ಅಲಿಫಾ (ಮೊ. 9663610576) (A5),

ಹಾಗೂ “Facts and Justice” ವಾಟ್ಸಾಪ್ ಗ್ರೂಪ್‌ನ ರಶೀದ್ ಲೈಲಾ (rasheedlaila345) (ಮೊ. 9972094313) (A6). ತನಿಖೆಯ ಮುಂದಿನ ಹಂತದಲ್ಲಿ ಮತ್ತಷ್ಟು ಆರೋಪಿಗಳು ಸೇರ್ಪಡೆಯಾಗುವ ಸಾಧ್ಯತೆಯನ್ನೂ ಪೊಲೀಸರು ತಳ್ಳಿಹಾಕಿಲ್ಲ.

ಸಾರ್ವಜನಿಕರಿಗೆ ಎಚ್ಚರಿಕೆ

ಒಂದು ಕೊಲೆ, ಅಪಘಾತ ಅಥವಾ ಯಾವುದೇ ಸೂಕ್ಷ್ಮ ಘಟನೆ ನಡೆದಾಗ ಭಾವೋದ್ವೇಗದಲ್ಲಿ ಸಾಮಾಜಿಕ ಜಾಲತಾಣಗಳಲ್ಲಿ ಕಾಣುವ ಪ್ರತಿಯೊಂದು ಪೋಸ್ಟ್‌ನ್ನೂ ಸತ್ಯ ಎಂದು ನಂಬಬೇಡಿ. ಯಾರೋ ಒಬ್ಬರು ಮಾಡಿದ ಎಡಿಟ್, ನಕಲಿ ಫೋಟೋ ಅಥವಾ ಸುಳ್ಳು ಬರಹ ನಿಮ್ಮ ಒಂದು “ಫಾರ್ವರ್ಡ್” ಮೂಲಕ ಸಾವಿರಾರು ಜನರಿಗೆ ತಲುಪಿ ಸಮಾಜದಲ್ಲಿ ದ್ವೇಷದ ಕಿಡಿ ಹೊತ್ತಿಸಬಹುದು. ಒಂದು ತಪ್ಪು ಪೋಸ್ಟ್ ಕೆಲವೇ ನಿಮಿಷಗಳಲ್ಲಿ ಊರು, ಜಿಲ್ಲೆ, ರಾಜ್ಯದ ಶಾಂತಿಯನ್ನೇ ಹಾಳು ಮಾಡುವ ಶಕ್ತಿಯನ್ನು ಹೊಂದಿರುತ್ತದೆ.

“ನಾನು ಕೇವಲ ಫಾರ್ವರ್ಡ್ ಮಾಡಿದ್ದೇನೆ” ಎಂಬ ಕಾರಣ ಕಾನೂನಿನಲ್ಲಿ ರಕ್ಷಣೆ ನೀಡುವುದಿಲ್ಲ. ಸಮಾಜದಲ್ಲಿ ದ್ವೇಷ, ಗಲಭೆ ಅಥವಾ ಸಾರ್ವಜನಿಕ ಶಾಂತಿಗೆ ಧಕ್ಕೆ ತರುವ ಸುಳ್ಳು ಮಾಹಿತಿಯನ್ನು ಸೃಷ್ಟಿಸಿದವರು ಮಾತ್ರವಲ್ಲ, ಉದ್ದೇಶಪೂರ್ವಕವಾಗಿ ಹರಡಿದವರ ಮೇಲೂ ಕಾನೂನು ಕ್ರಮ ಜರುಗಬಹುದು. ಆದ್ದರಿಂದ ಯಾವುದೇ ಪೋಸ್ಟ್‌, ವಿಡಿಯೋ ಅಥವಾ ಫೋಟೋವನ್ನು ಹಂಚುವ ಮೊದಲು ಅದರ ಸತ್ಯಾಸತ್ಯತೆಯನ್ನು ಅಧಿಕೃತ ಮೂಲಗಳಿಂದ ಖಚಿತಪಡಿಸಿಕೊಳ್ಳುವುದು ಪ್ರತಿಯೊಬ್ಬ ನಾಗರಿಕನ ಜವಾಬ್ದಾರಿಯಾಗಿದೆ.

ಸಮಾಜಕ್ಕೆ ಸಂದೇಶ

ಒಂದು ಕುಟುಂಬ ದುಃಖದಲ್ಲಿರುವಾಗ, ಆ ದುರಂತವನ್ನು ಬಳಸಿಕೊಂಡು ಕೋಮು ದ್ವೇಷ ಹರಡುವುದು ಮಾನವೀಯತೆಯ ವಿರುದ್ಧದ ಕೃತ್ಯ. ಅಪರಾಧಿಗೆ ಧರ್ಮ, ಜಾತಿ ಅಥವಾ ರಾಜಕೀಯ ಬಣ್ಣ ಹಚ್ಚುವ ಬದಲು, ಸತ್ಯ ಹೊರಬರಲು ತನಿಖೆಗೆ ಅವಕಾಶ ನೀಡಬೇಕು. ವದಂತಿಗಿಂತ ವಾಸ್ತವಕ್ಕೆ ಬೆಲೆ ನೀಡಿ, ಪ್ರಚೋದನೆಗಿಂತ ಶಾಂತಿಗೆ ಬೆಂಬಲ ನೀಡಿ. ಸಾಮಾಜಿಕ ಜಾಲತಾಣದಲ್ಲಿ ನಿಮ್ಮ ಒಂದು ಕ್ಲಿಕ್ ಸಮಾಜವನ್ನು ಉಳಿಸಬಹುದು ಅಥವಾ ಸಂಕಷ್ಟಕ್ಕೆ ತಳ್ಳಬಹುದು — ಆಯ್ಕೆ ನಿಮ್ಮದು.

##Bantwal #LavanyaMurderCase #FakeNews #CommunalHarmony #DakshinaKannada