MRPL ಸ್ಫೋಟ FIR… ದಾಖಲು…MRPL ಅಧಿಕಾರಿಗಳ ವಿರುದ್ಧ ನಿರ್ಲಕ್ಷ್ಯದ ಆರೋಪ…!

Karavali Maruta | 2 weeks ago | 30 September 2026

ಮಂಗಳೂರು: MRPLನ ಫೇಸ್-3ರ Coker Hydro Treater Unitನಲ್ಲಿ ಸೆ.30ರಂದು ಮಧ್ಯಾಹ್ನ 12.15ರ ಸುಮಾರಿಗೆ ಸಂಭವಿಸಿದ ಭಾರೀ ಸ್ಫೋಟ ಪ್ರಕರಣಕ್ಕೆ ಸಂಬಂಧಿಸಿದಂತೆ ಸುರತ್ಕಲ್ ಪೊಲೀಸ್ ಠಾಣೆಯಲ್ಲಿ Crime No.132/2026ರಡಿ FIR ದಾಖಲಾಗಿದೆ. ಭಾರತೀಯ ನ್ಯಾಯ ಸಂಹಿತೆಯ (BNS) ಸೆಕ್ಷನ್ 287, 125(b) ಮತ್ತು 106 ಅಡಿಯಲ್ಲಿ ಪ್ರಕರಣ ದಾಖಲಿಸಿ ತನಿಖೆ ಆರಂಭಿಸಲಾಗಿದೆ. ಘಟನೆ ನಡೆದ ಸ್ಥಳ MRPLನ ಬಾಲ–ಕಾಟಿಪಳ್ಳ ವ್ಯಾಪ್ತಿಯ Coker Hydro Treater Unit ಎಂದು FIRನಲ್ಲಿ ಉಲ್ಲೇಖಿಸಲಾಗಿದೆ.

FIRನಲ್ಲಿರುವ ಮಾಹಿತಿಯ ಪ್ರಕಾರ, MRPLನ ಉದ್ಯೋಗಿಗಳಿಗೆ ಊಟ, ಉಪಹಾರ ಮತ್ತು ನೀರು ಸರಬರಾಜು ಮಾಡುವ K Star Food and Hospitality Servicesನಲ್ಲಿ ಕೆಲಸ ಮಾಡುತ್ತಿದ್ದ ದೂರುದಾರರು ಘಟನಾ ಸಮಯದಲ್ಲಿ ಸ್ಥಳದಲ್ಲಿದ್ದರು. ಮಧ್ಯಾಹ್ನ 12.15ರ ಸುಮಾರಿಗೆ Coker Hydro Treater Unitನಲ್ಲಿ ಏಕಾಏಕಿ ಸ್ಫೋಟ ಸಂಭವಿಸಿ, ಯಂತ್ರೋಪಕರಣಗಳು ಹಾಗೂ ಬಿಡಿಭಾಗಗಳು ಚಿದ್ರಗೊಂಡು ಬೆಂಕಿಯ ಜ್ವಾಲೆಯೊಂದಿಗೆ ಸುತ್ತಮುತ್ತ ಚಿಮ್ಮಿದ ಪರಿಣಾಮ ಹಲವರು ಗಾಯಗೊಂಡಿದ್ದಾರೆ ಎಂದು FIRನಲ್ಲಿ ದಾಖಲಾಗಿದೆ.

12 ಮಂದಿ ಗಾಯ? ಮನೀಶ್ ಕರ್ಕಡ ಸಾವು

FIRನಲ್ಲಿ ದೂರುದಾರರೊಂದಿಗೆ ರಾಜೇಶ್ ಪ್ರಸಾದ್, ಇಂದ್ರಜಿತ್, ರಮಣ್ ಕುಮಾರ್, ಲೋಕೇಶ್ ಕುಳಾಯಿ, ಜಯರಾಮ್, ಜೆರೋಮ್, ಅವಿನಾಶ್, ಅಕ್ಷಯ್, ಜಗಜೀವನ್ ಸಿಂಗ್, ಶರತ್ ಶೆಟ್ಟಿ, ರಾಜೇಶ್ ಪೂಜಾರಿ ಹಾಗೂ ಮನೀಶ್ ಕರ್ಕಡ ಸೇರಿದಂತೆ ಹಲವರ ಹೆಸರುಗಳನ್ನು ಉಲ್ಲೇಖಿಸಲಾಗಿದೆ. ಇವರಲ್ಲಿ ರಾಜೇಶ್ ಮತ್ತು ಮನೀಶ್ ಕರ್ಕಡ ಅವರಿಗೆ ಗಂಭೀರ ಗಾಯಗಳಾಗಿದ್ದವುಎಂದು FIRನಲ್ಲಿ ದಾಖಲಿಸಲಾಗಿದೆ. ಗಾಯಾಳುಗಳನ್ನು ಆಸ್ಪತ್ರೆಗೆ ಸಾಗಿಸುವ ವೇಳೆ ಮನೀಶ್ ಕರ್ಕಡ ಮೃತಪಟ್ಟಿದ್ದಾರೆ ಎಂದು ಪೊಲೀಸ್ ದಾಖಲೆಯಲ್ಲಿ ಸ್ಪಷ್ಟವಾಗಿ ಉಲ್ಲೇಖಿಸಲಾಗಿದೆ.

Also Read ಕನಸು ಹೊತ್ತ ಯುವತಿಯರ ಮೇಲೆ ಕಾಮುಕ ಸಮಾಜದ ಕಣ್ಣು! ಮೌನವಾಗಿರುವ ಸಾವಿರಾರು ಕಥೆಗಳಲ್ಲೊಂದು ಬೆಂಗಳೂರು ಘಟನೆ!

ಮನೀಶ್ ಕರ್ಕಡ ಅವರು MRPLನಲ್ಲಿ ಗುತ್ತಿಗೆ ಕಾರ್ಮಿಕರಾಗಿ ಕಾರ್ಯನಿರ್ವಹಿಸುತ್ತಿದ್ದರು ಎಂದು ಸ್ಥಳೀಯ ಮಾಹಿತಿಯಂತೆ ತಿಳಿದುಬಂದಿದ್ದು, ಅವರ ಅಕಾಲಿಕ ಸಾವು ಕುಟುಂಬಸ್ಥರು ಹಾಗೂ ಹಳೆಯಂಗಡಿ ಸಿಎಸ್‌ಐ ಅಮ್ಮನ್ ಮೆಮೋರಿಯಲ್ ಚರ್ಚ್‌ನ ಸದಸ್ಯರು ಸೇರಿದಂತೆ ಸಮುದಾಯದಲ್ಲಿ ತೀವ್ರ ದುಃಖಕ್ಕೆ ಕಾರಣವಾಗಿದೆ.

MRPL ಅಧಿಕಾರಿಗಳ ವಿರುದ್ಧ ನಿರ್ಲಕ್ಷ್ಯದ ಆರೋಪ

ಘಟನೆಗೆ ಸಂಬಂಧಿಸಿದಂತೆ FIRನಲ್ಲಿ Coker Hydro Treater Unitನ ಉಪಕರಣಗಳನ್ನು ಘಟಕದ ಮುಖ್ಯಸ್ಥರು ಹಾಗೂ MRPL ಸಂಸ್ಥೆಯವರು ಸರಿಯಾಗಿ ಪರಿಶೀಲಿಸದೆ ನಿರ್ಲಕ್ಷ್ಯ ವಹಿಸಿದ್ದರಿಂದಲೇ ಘಟನೆ ಸಂಭವಿಸಿದೆ ಎಂಬ ಆರೋಪ ದಾಖಲಿಸಲಾಗಿದೆ. ಈ ಆರೋಪವು FIRನಲ್ಲಿ ದಾಖಲಾದ ದೂರುದಾರರ ಹೇಳಿಕೆಯ ಭಾಗವಾಗಿದ್ದು, ಅದರ ಸತ್ಯಾಸತ್ಯತೆ ತನಿಖೆಯ ನಂತರವೇ ಅಂತಿಮವಾಗಿ ಸ್ಪಷ್ಟವಾಗಲಿದೆ.

ಪ್ರಕರಣದಲ್ಲಿ Coker Hydro Treater Unitನ ಮುಖ್ಯಸ್ಥರನ್ನು A1 ಹಾಗೂ MRPLನನ್ನು A2 ಎಂದು ದಾಖಲಿಸಿರುವುದು FIRನಲ್ಲಿ ಕಾಣಿಸುತ್ತದೆ. ಪೊಲೀಸರು ಪ್ರಕರಣದ ತನಿಖೆ ಮುಂದುವರಿಸಿದ್ದಾರೆ.

Also Read ಅರ್ಧರಾತ್ರಿ ತಾಯಿ-ಮಗುವಿನ ಅಕ್ರಮ ಬಂಧನ: ಇಡೀ ಪೊಲೀಸ್ ಠಾಣೆಯನ್ನೇ ಸಸ್ಪೆಂಡ್ ಮಾಡಿದ ಜಡ್ಜ್!

25 ಮನೆಗಳಿಗೆ ಹಾನಿ; ಪ್ರಾರ್ಥನಾ ಮಂದಿರಗಳಿಗೂ ಹೊಡೆತ

ಸ್ಫೋಟದ ತೀವ್ರತೆಗೆ ಸುತ್ತಮುತ್ತಲಿನ ಪ್ರದೇಶಗಳಲ್ಲೂ ಹಾನಿಯಾಗಿದೆ. ಲಭ್ಯವಿರುವ ಸ್ಥಳೀಯ ಮಾಹಿತಿಯ ಪ್ರಕಾರ ಜೋಕಟ್ಟೆಯಲ್ಲಿ 25, ಕಳವಾರಿನಲ್ಲಿ 19 ಮತ್ತು ಬಾಳದಲ್ಲಿ 10 ಮನೆಗಳಿಗೆ ಹಾನಿಯಾಗಿದೆ ಎನ್ನಲಾಗಿದೆ. ಅಲ್ಲದೆ ಜೋಕಟ್ಟೆಯ 5 ಹಾಗೂ ಕಳವಾರಿನ 3 ಸೇರಿದಂತೆ ಒಟ್ಟು 8 ಪ್ರಾರ್ಥನಾ ಮಂದಿರಗಳಿಗೂ ಹಾನಿಯಾಗಿದೆ ಎಂದು ತಿಳಿದುಬಂದಿದೆ. ಈ ಹಾನಿಯ ಪ್ರಮಾಣದ ಅಧಿಕೃತ ಮೌಲ್ಯಮಾಪನ ಜಿಲ್ಲಾಡಳಿತದ ಪರಿಶೀಲನೆಯ ಬಳಿಕ ಇನ್ನಷ್ಟು ಸ್ಪಷ್ಟವಾಗಲಿದೆ.

MRPL ಸ್ಫೋಟ ಇದೀಗ ಕೇವಲ ಕೈಗಾರಿಕಾ ಘಟಕದೊಳಗಿನ ಘಟನೆ ಎಂಬುದನ್ನು ಮೀರಿ, ಕಾರ್ಮಿಕರ ಸುರಕ್ಷತೆ, ಕೈಗಾರಿಕಾ ಘಟಕಗಳ ನಿರ್ವಹಣೆ ಮತ್ತು ಸುತ್ತಮುತ್ತ ವಾಸಿಸುವ ಜನರ ಸುರಕ್ಷತೆಯ ಬಗ್ಗೆಯೂ ಗಂಭೀರ ಪ್ರಶ್ನೆಗಳನ್ನು ಎತ್ತಿದೆ. ಒಬ್ಬ ಕಾರ್ಮಿಕನ ಜೀವ ಕಳೆದುಕೊಂಡಿರುವ ಹಿನ್ನೆಲೆಯಲ್ಲಿ ಘಟನೆಯ ಸಂಪೂರ್ಣ ತನಿಖೆ ಹಾಗೂ ಸುರಕ್ಷತಾ ಕ್ರಮಗಳ ಪರಿಶೀಲನೆಗೆ ಒತ್ತಾಯ ಹೆಚ್ಚಾಗಿದೆ.

Also Read ಮಂಗಳೂರಲ್ಲಿ 10ನೇ ತರಗತಿ ತಾಯಿಯಿಲ್ಲದ ಬಾಲಕಿ ಮೇಲೆ ಜಲೀಲ್ ಎಂಬಾತ 7 ತಿಂಗಳು ನಿರಂತರ ದೌರ್ಜನ್ಯ!

ಸುರತ್ಕಲ್ ಪೊಲೀಸರು ಪ್ರಕರಣದ ತನಿಖೆ ಕೈಗೊಂಡಿದ್ದು, FIR ಅನ್ನು ಸೆ.30ರಂದು ರಾತ್ರಿ 7.45ಕ್ಕೆ ನ್ಯಾಯಾಲಯಕ್ಕೆ ರವಾನಿಸಲಾಗಿದೆ.

##MRPLBlast #ManishKarkada #Mangaluru #Surathkal #MRPL #KarnatakaNews #BreakingNews