ಅಭ್ಯರ್ಥಿತ್ವದ ಚರ್ಚೆ ನಡುವೆ ಕಾಂಗ್ರೆಸ್‌ನಲ್ಲಿ ಹೊಸ ರಾಜಕೀಯ ಲೆಕ್ಕಾಚಾರ

ಉಡುಪಿ: ಮುಂಬರುವ ವಿಧಾನಸಭಾ ಚುನಾವಣೆಗೆ ಇನ್ನೂ ಸಮಯವಿದ್ದರೂ ಉಡುಪಿ ವಿಧಾನಸಭಾ ಕ್ಷೇತ್ರದಲ್ಲಿ ಕಾಂಗ್ರೆಸ್‌ನ ಅಭ್ಯರ್ಥಿತ್ವದ ಕುರಿತು ರಾಜಕೀಯ ಚರ್ಚೆ ಈಗಾಗಲೇ ಗರಿಗೆದರತೊಡಗಿದೆ. ಪ್ರಸಾದ್ ರಾಜ್ ಕಂಚನ್ ಅವರ ಹೆಸರು ಮತ್ತೊಮ್ಮೆ ಮುನ್ನೆಲೆಗೆ ಬರುತ್ತಿರುವ ಬೆನ್ನಲ್ಲೇ, ಮಾಜಿ ಶಾಸಕ ಕೆ. ರಘುಪತಿ ಭಟ್ ಕಾಂಗ್ರೆಸ್ ಸೇರ್ಪಡೆ ಹಾಗೂ ಭವಿಷ್ಯದ ಅಭ್ಯರ್ಥಿತ್ವದ ಕುರಿತಾದ ಊಹಾಪೋಹಗಳು ಕಾಂಗ್ರೆಸ್ ಕಾರ್ಯಕರ್ತರ ವಲಯದಲ್ಲಿ ಚರ್ಚೆಗೆ ಕಾರಣವಾಗಿವೆ.

2023ರ ವಿಧಾನಸಭಾ ಚುನಾವಣೆಯಲ್ಲಿ ಉಡುಪಿ ಕ್ಷೇತ್ರದಿಂದ ಕಾಂಗ್ರೆಸ್ ಅಭ್ಯರ್ಥಿಯಾಗಿ ಪ್ರಸಾದ್ ರಾಜ್ ಕಂಚನ್ ಸ್ಪರ್ಧಿಸಿದ್ದರು. ಇದೀಗ ಮುಂದಿನ ಚುನಾವಣೆಯನ್ನು ಗಮನದಲ್ಲಿಟ್ಟುಕೊಂಡು ಕ್ಷೇತ್ರದಲ್ಲಿ ಸಂಘಟನಾ ಚಟುವಟಿಕೆಗಳನ್ನು ಚುರುಕುಗೊಳಿಸುವ ಪ್ರಯತ್ನಗಳು ನಡೆಯುತ್ತಿರುವುದು ರಾಜಕೀಯ ವಲಯದ ಗಮನ ಸೆಳೆದಿದೆ.

ಕಂಚನ್ ಪರವಾಗಿ ಸಂಘಟನಾ ಸಿದ್ಧತೆ?

ಪಕ್ಷದ ರಾಜ್ಯಮಟ್ಟದ ಮುಖಂಡರಿಂದ ಮುಂದಿನ ಚುನಾವಣೆಯನ್ನು ಗಮನದಲ್ಲಿಟ್ಟುಕೊಂಡು ಕ್ಷೇತ್ರದಲ್ಲಿ ಕೆಲಸ ಮುಂದುವರಿಸುವಂತೆ ಸೂಚನೆ ದೊರೆತಿದೆ ಎಂಬುದು ಕಂಚನ್ ಬೆಂಬಲಿಗರ ವಾದ. ಅದರ ಆಧಾರದ ಮೇಲೆ ಈಗಿನಿಂದಲೇ ವಿಧಾನಸಭೆ ಮಾತ್ರವಲ್ಲದೆ ತಾಲೂಕು ಪಂಚಾಯತ್ ಮತ್ತು ಜಿಲ್ಲಾ ಪಂಚಾಯತ್ ಚುನಾವಣೆಗಳನ್ನೂ ಗಮನದಲ್ಲಿಟ್ಟುಕೊಂಡು ಸಂಘಟನೆಯನ್ನು ಬಲಪಡಿಸುವ ಕೆಲಸ ನಡೆಯುತ್ತಿದೆ ಎಂದು ಅವರ ಆಪ್ತ ವಲಯ ಹೇಳುತ್ತಿದೆ.

ಆದರೆ, ಅಭ್ಯರ್ಥಿತ್ವದ ಅಂತಿಮ ನಿರ್ಧಾರವನ್ನು ಕಾಂಗ್ರೆಸ್ ಪಕ್ಷದ ಅಧಿಕೃತ ನಾಯಕತ್ವವೇ ಕೈಗೊಳ್ಳಬೇಕಾಗುತ್ತದೆ ಅನ್ನುವುದು ನಿಜವೇ ಆದರೂ ರಾಜ್ಯ ನಾಯಕತ್ವ ಈಗಾಗಲೇ ಪ್ರಸಾದ್ ಕಾಂಚನಿಗೆ ಕೆಲಸ ಮಾಡಲು ಚುನಾವಣೆಗೆ ತಯಾರಾಗಲು ಸೂಚಿಸಿದೆ ಅನ್ನುವುದು ಕೂಡ ಅಷ್ಟೇ ನಿಜ. ಆದರೂ ಚುನಾವಣೆಗೆ ಮುನ್ನ ಪಕ್ಷದ ಆಂತರಿಕ ಸಮಾಲೋಚನೆ, ಕ್ಷೇತ್ರದ ರಾಜಕೀಯ ಪರಿಸ್ಥಿತಿ ಮತ್ತು ಅಭ್ಯರ್ಥಿಗಳ ಅರ್ಹತೆ ಸೇರಿದಂತೆ ಹಲವು ಅಂಶಗಳು ನಿರ್ಧಾರದಲ್ಲಿ ಮಹತ್ತರ ಪಾತ್ರವಹಿಸುವ ಸಾಧ್ಯತೆ ಇದೆ.

Also Read '₹1ಕ್ಕೆ ಫ್ಯಾಷನ್' ಜಾಹೀರಾತು ವೈರಲ್... ಮಾಲಾಡ್ ಮಾಲ್‌ನಲ್ಲಿ ನಿಯಂತ್ರಣ ತಪ್ಪಿದ ಜನಸಾಗರ-ಸ್ಟ್ಯಾಂಪೀಡ್ ಭೀತಿ ಮೂಡಿಸಿದ ಜನಸಂದಣಿ!

ರಘುಪತಿ ಭಟ್ ಹೆಸರು ಏಕೆ ಚರ್ಚೆಗೆ ಬಂದಿದೆ?

ಇದರ ಮಧ್ಯೆ ಮಾಜಿ ಶಾಸಕ ಕೆ. ರಘುಪತಿ ಭಟ್ ಕಾಂಗ್ರೆಸ್ ಸೇರ್ಪಡೆಗೊಳ್ಳಲಿದ್ದಾರೆ ಮತ್ತು ಮುಂದಿನ ಚುನಾವಣೆಯಲ್ಲಿ ಉಡುಪಿ ಕ್ಷೇತ್ರದಿಂದ ಕಾಂಗ್ರೆಸ್ ಅಭ್ಯರ್ಥಿಯಾಗಬಹುದು ಎಂಬ ರೀತಿಯ ಚರ್ಚೆಗಳು ರಾಜಕೀಯ ವಲಯದಲ್ಲಿ ಕೇಳಿಬರುತ್ತಿವೆ. ಆದರೆ ಭಟ್ ಕಾಂಗ್ರೆಸ್ ಸೇರ್ಪಡೆಯಾಗಿದ್ದಾರೆ ಅಥವಾ ಅವರನ್ನು ಉಡುಪಿ ಅಭ್ಯರ್ಥಿಯಾಗಿ ಕಾಂಗ್ರೆಸ್ ಅಧಿಕೃತವಾಗಿ ಘೋಷಿಸಬಹುದು ಎನ್ನುವುದು ಕೇವಲ ಒಂದು ಊಹಾಪೋಹದ ಸೃಷ್ಟಿ ಅಷ್ಟೇ. ಅಂತಹ ಯಾವುದೇ ರಾಜಕೀಯ ದೊಡ್ಡ ಬದಲಾವಣೆಯು ಇಲ್ಲ ಎಂಬುದು ಉಡುಪಿ ಜಿಲ್ಲಾ ಕಾಂಗ್ರೆಸ್ನ ಹಿರಿಯ ಕಾರ್ಯಕರ್ತರುಗಳ ವಲಯದಿಂದ ಕೇಳಿ ಬರುವ ಮಾತು. ಈ ಊಹಾಪೋಹಗಳನ್ನೇ ಸತ್ಯವೆಂಬಂತೆ ಬಿಂಬಿಸುತ್ತಿದ್ದಾರೆ ಎನ್ನುವುದು ಅವರ ಆರೋಪವು ಹೌದು.

ರಘುಪತಿ ಭಟ್ ಅವರು 2024ರಲ್ಲಿ ನೈಋತ್ಯ ಪದವೀಧರ ಕ್ಷೇತ್ರದ ಟಿಕೆಟ್ ವಿಚಾರದಲ್ಲಿ ಬಿಜೆಪಿಯೊಂದಿಗೆ ಭಿನ್ನಾಭಿಪ್ರಾಯದ ಹಿನ್ನೆಲೆಯಲ್ಲಿ ಪಕ್ಷೇತರರಾಗಿ ಸ್ಪರ್ಧಿಸುವ ನಿರ್ಧಾರ ಕೈಗೊಂಡಿದ್ದರು ಅದರಿಂದ ಬಿಜೆಪಿಯು ಅವರನ್ನು ಪಕ್ಷದಿಂದ ಆರು ವರ್ಷಗಳವರೆಗೆ ಹೊರಗೆ ಹಾಕಿದೆ ಎಂಬುದು ಆಗಿನ ವರದಿಗಳಲ್ಲಿ ದಾಖಲಾಗಿದೆ.

ಹೀಗಾಗಿ ಅವರ ಮುಂದಿನ ರಾಜಕೀಯ ಹೆಜ್ಜೆ ಕುರಿತು ನಡೆಯುತ್ತಿರುವ ಚರ್ಚೆಯನ್ನು ಸದ್ಯಕ್ಕೆ ರಾಜಕೀಯ ಊಹಾಪೋಹದ ಹಂತದಲ್ಲೇ ನೋಡುವುದು ಸೂಕ್ತ.

Also Read ಬಂಟ್ವಾಳದಲ್ಲಿ ಸಿನಿಮೀಯ ರೀತಿಯಲ್ಲಿ ದರೋಡೆ: ತಲವಾರು ತೋರಿಸಿ ₹8.52 ಲಕ್ಷ ದೋಚಿದ ದುಷ್ಕರ್ಮಿಗಳು... ಪ್ರಕರಣದ ಸುತ್ತ ಸಂಶಯದ ಹುತ್ತ

ಕಾಂಗ್ರೆಸ್‌ನ ಮುಂದಿರುವ ಸಂಘಟನಾ ಸವಾಲು

2026ರ ಸೆಪ್ಟೆಂಬರ್‌ನಲ್ಲಿ ಕಿಶನ್ ಕುಮಾರ್ ಹೆಗ್ಡೆ ಕೊಳ್ಕೆಬೈಲ್ ಅವರನ್ನು ಉಡುಪಿ ಜಿಲ್ಲಾ ಕಾಂಗ್ರೆಸ್ ಅಧ್ಯಕ್ಷರನ್ನಾಗಿ ನೇಮಕ ಮಾಡಿರುವುದು ರಾಜಕೀಯ ಬದಲಾವಣೆಗೆ ಕಾರಣವಾಗುತ್ತದೆ ಎಂದು ನಂಬಿದವರಿಗೆ ಬ್ರಮನಿರತನವಾಗಿದೆ ಎನ್ನಲಾಗುತ್ತಿದೆ. ರಾಜ್ಯ ಕಾಂಗ್ರೆಸ್ ಕೂಡ ಮುಂದಿನ ಸ್ಥಳೀಯ ಸಂಸ್ಥೆ ಹಾಗೂ ವಿಧಾನಸಭಾ ಚುನಾವಣೆಗಳನ್ನು ಗಮನದಲ್ಲಿಟ್ಟುಕೊಂಡು ಸಂಘಟನೆಯನ್ನು ತಳಮಟ್ಟದಲ್ಲಿ ಬಲಪಡಿಸುವ ಕುರಿತು ಒತ್ತು ನೀಡಿದೆ.

ಈ ಹಿನ್ನೆಲೆಯಲ್ಲಿ ಉಡುಪಿ ಕ್ಷೇತ್ರದಲ್ಲಿ ಅಭ್ಯರ್ಥಿತ್ವದ ಪ್ರಶ್ನೆ ಕೇವಲ ಒಬ್ಬ ವ್ಯಕ್ತಿಯ ಆಯ್ಕೆಯಾಗಿ ಉಳಿಯದೆ, ಪಕ್ಷದ ಸಂಘಟನಾ ಬಲ, ಸ್ಥಳೀಯ ನಾಯಕತ್ವ, ಕಾರ್ಯಕರ್ತರ ಸ್ವೀಕಾರ ಮತ್ತು ಚುನಾವಣಾ ತಂತ್ರದ ಭಾಗವಾಗುವ ಸಾಧ್ಯತೆ ಇದೆ.

ಕಾರ್ಯಕರ್ತರ ನಿರೀಕ್ಷೆ ಏನು?

ಪ್ರಸಾದ್ ಕಂಚನ್ ಅವರನ್ನು ಬೆಂಬಲಿಸುವ ಕಾಂಗ್ರೆಸ್ ಕಾರ್ಯಕರ್ತರ ವಲಯದಲ್ಲಿ, ಈಗಾಗಲೇ ಕ್ಷೇತ್ರದಲ್ಲಿ ಪಕ್ಷಕ್ಕಾಗಿ ಕೆಲಸ ಮಾಡುತ್ತಿರುವ ನಾಯಕರಿಗೆ ಚುನಾವಣಾ ಸಂದರ್ಭದಲ್ಲಿ ಆದ್ಯತೆ ನೀಡಬೇಕು ಎಂಬ ಅಭಿಪ್ರಾಯವಿದೆ ಎನ್ನಲಾಗಿದೆ.

ಹೊಸ ನಾಯಕರು ಪಕ್ಷಕ್ಕೆ ಸೇರ್ಪಡೆಯಾಗುವುದಕ್ಕೆ ವಿರೋಧವಿಲ್ಲ; ಆದರೆ ಪಕ್ಷಕ್ಕೆ ಸೇರ್ಪಡೆಯಾದ ತಕ್ಷಣವೇ ಪ್ರಮುಖ ಚುನಾವಣಾ ಜವಾಬ್ದಾರಿ ನೀಡುವ ಬದಲು, ಅವರ ಸಂಘಟನಾ ಸಾಮರ್ಥ್ಯ ಮತ್ತು ಪಕ್ಷದೊಳಗಿನ ಕೊಡುಗೆಯನ್ನು ಪರಿಗಣಿಸಿ ಹಂತ ಹಂತವಾಗಿ ಜವಾಬ್ದಾರಿ ನೀಡಬೇಕು ಎಂಬ ಚರ್ಚೆಯೂ ಇದೆ.

ಇದು ಒಂದು ಕಡೆ ಹಳೆಯ ಕಾರ್ಯಕರ್ತರ ಅಸಮಾಧಾನವನ್ನು ತಪ್ಪಿಸುವ ಪ್ರಶ್ನೆಯಾದರೆ, ಮತ್ತೊಂದು ಕಡೆ ಚುನಾವಣಾ ಸಮಯದಲ್ಲಿ ಹೊಸ ಸಾಮಾಜಿಕ ಮತ್ತು ರಾಜಕೀಯ ಸಮೀಕರಣಗಳನ್ನು ರೂಪಿಸಿಕೊಳ್ಳುವ ಪಕ್ಷದ ತಂತ್ರದ ಪ್ರಶ್ನೆಯೂ ಆಗಿದೆ.

Also Read ಉಡುಪಿ ಜಿಲ್ಲಾಆಸ್ಪತ್ರೆಯಲ್ಲಿ ಹಗರಣ, ತಾರತಮ್ಯದ ಆರೋಪ: ವೀಣಾದೇವಿ ವಿರುದ್ಧದಕ್ರಮ ಕಣ್ಣೊರೆಸುವ ತಂತ್ರ

ಅಂತಿಮ ನಿರ್ಧಾರ ಹೈಕಮಾಂಡ್ ಕೈಯಲ್ಲಿ

ಕಾಂಗ್ರೆಸ್‌ನಲ್ಲಿ ಅಭ್ಯರ್ಥಿ ಆಯ್ಕೆ ಸಾಮಾನ್ಯವಾಗಿ ಸ್ಥಳೀಯ ಮಟ್ಟದ ಅಭಿಪ್ರಾಯ, ಜಿಲ್ಲಾ ಮತ್ತು ರಾಜ್ಯ ಸಂಘಟನೆ, ಪಕ್ಷದ ಆಂತರಿಕ ಸಮಾಲೋಚನೆ ಹಾಗೂ ಅಂತಿಮವಾಗಿ ಹೈಕಮಾಂಡ್ ನಿರ್ಧಾರಕ್ಕೆ ಒಳಪಟ್ಟಿರುತ್ತದೆ. 2026ರಲ್ಲಿ ಕರ್ನಾಟಕ ಕಾಂಗ್ರೆಸ್ ಸಂಘಟನಾತ್ಮಕ ಪುನರ್‌ವ್ಯವಸ್ಥೆ ನಡೆಸುತ್ತಿರುವುದರ ನಡುವೆಯೇ ಜಿಲ್ಲಾಧ್ಯಕ್ಷರ ನೇಮಕಾತಿಗಳಲ್ಲೂ ಉಡುಪಿಯ ಮಟ್ಟಿಗೆ ಒಂದಿಷ್ಟು ಗೊಂದಲವಾಗಿದೆ ಎಂಬ ಆರೋಪವು ಇದೆ ಇದರ ಮಧ್ಯ ಪಕ್ಷವೂ ಅಭ್ಯರ್ಥಿ ವಿಚಾರದಲ್ಲಿ ಕಾರ್ಯಕರ್ತರ ಮನದ ಮಾತನ್ನು ಕೇಳುತ್ತದೆ ಎಂದು ಭಾವಿಸಿದ್ದಾರೆ.

ಒಟ್ಟಿನಲ್ಲಿ, ಉಡುಪಿ ವಿಧಾನಸಭಾ ಕ್ಷೇತ್ರದಲ್ಲಿ ಕಾಂಗ್ರೆಸ್‌ನ ಮುಂದಿನ ಅಭ್ಯರ್ಥಿತ್ವದ ಸುತ್ತ ಚರ್ಚೆ ಆರಂಭವಾಗಿರುವುದು ಮಾತ್ರ ಸ್ಪಷ್ಟ. ಒಂದು ಕಡೆ ಈಗಾಗಲೇ ಕ್ಷೇತ್ರದಲ್ಲಿ ರಾಜಕೀಯ ನೆಲೆ ಹೊಂದಿರುವ ನಾಯಕರನ್ನು ಮುಂದುವರಿಸುವ ಒತ್ತಾಯ, ಮತ್ತೊಂದು ಕಡೆ ಹೊಸ ರಾಜಕೀಯ ಸೇರ್ಪಡೆಗಳಿಂದ ಹೊಸ ಸಮೀಕರಣ ರೂಪಿಸುವ ಸಾಧ್ಯತೆ—ಈ ಎರಡರ ನಡುವಿನ ಸಮತೋಲನವೇ ಕಾಂಗ್ರೆಸ್‌ಗೆ ಪ್ರಮುಖ ಸಂಘಟನಾ ಪ್ರಶ್ನೆಯಾಗಲಿದೆ.

ಉಡುಪಿ ಕಾಂಗ್ರೆಸ್‌ನಲ್ಲಿ ಅಭ್ಯರ್ಥಿತ್ವದ ಅಂತಿಮ ಚಿತ್ರಣ ಇನ್ನೂ ಸ್ಪಷ್ಟವಾಗಿಲ್ಲ; ಆದರೆ ಚುನಾವಣಾ ತಯಾರಿ ಮಾತ್ರ ಪ್ರಸಾದ್ ಕಾಂಚನ್ ಅವರಿಂದ ಈಗಿನಿಂದಲೇ ಆರಂಭಗೊಂಡಿರುವುದು ಕ್ಷೇತ್ರದ ರಾಜಕೀಯ ಚರ್ಚೆಗೆ ಹೊಸ ವೇಗ ನೀಡಿದೆ.