ಬೆಂಗಳೂರು: ವಿದೇಶದಲ್ಲಿ ಓದಬೇಕು ಎಂಬ ಕನಸು ಕಾಣುತ್ತಿರುವ ಕರ್ನಾಟಕದ ವಿದ್ಯಾರ್ಥಿಗಳಿಗೆ ಇದೀಗ ದೊಡ್ಡ ಅವಕಾಶವೊಂದು ತೆರೆದುಕೊಂಡಿದೆ. 18 ದೇಶಗಳ ಸುಮಾರು 80 ವಿಶ್ವವಿದ್ಯಾಲಯಗಳು ಕರುನಾಡಿನ ವಿದ್ಯಾರ್ಥಿಗಳಿಗೆ ಜಾಗತಿಕ ಶಿಕ್ಷಣದ ಬಾಗಿಲು ತೆರೆದಿವೆ. ಶುಲ್ಕ ರಿಯಾಯಿತಿ, ವಿದ್ಯಾರ್ಥಿ ವೇತನ ಹಾಗೂ ಶಿಕ್ಷಣ ಸಾಲದಂತಹ ಹಲವು ಸೌಲಭ್ಯಗಳು ವಿದ್ಯಾರ್ಥಿಗಳ ವಿದೇಶಿ ಶಿಕ್ಷಣದ ಕನಸಿಗೆ ಮತ್ತಷ್ಟು ಬಲ ನೀಡಿವೆ.

ವಿದೇಶಿ ಶಿಕ್ಷಣವನ್ನು ಕೆಲವೇ ಕೆಲವು ವಿದ್ಯಾರ್ಥಿಗಳಿಗೆ ಸೀಮಿತಗೊಳಿಸದೆ, ಹೆಚ್ಚು ಮಂದಿಗೆ ಕೈಗೆಟುಕುವಂತೆ ಮಾಡುವ ಉದ್ದೇಶದಿಂದ ಕರ್ನಾಟಕ ವೃತ್ತಿ ತರಬೇತಿ ಮತ್ತು ಕೌಶಲ ಅಭಿವೃದ್ಧಿ ನಿಗಮ ಇದೇ ಮೊದಲ ಬಾರಿಗೆ ದೊಡ್ಡ ಮಟ್ಟದ ‘ಸ್ಟಡಿ ಅಬ್ರಾಡ್–2026’ ಮೇಳ ಆಯೋಜಿಸಿತ್ತು. ವಿದ್ಯಾರ್ಥಿಗಳು ಹಾಗೂ ಪೋಷಕರು ವಿದೇಶಿ ವಿಶ್ವವಿದ್ಯಾಲಯಗಳ ಪ್ರತಿನಿಧಿಗಳೊಂದಿಗೆ ನೇರವಾಗಿ ಸಂವಾದ ನಡೆಸಿ ಕೋರ್ಸ್, ಶುಲ್ಕ, ಸ್ಕಾಲರ್‌ಶಿಪ್ ಮತ್ತು ಉದ್ಯೋಗಾವಕಾಶಗಳ ಕುರಿತು ಮಾಹಿತಿ ಪಡೆದರು.

18 ದೇಶಗಳು… 80 ವಿಶ್ವವಿದ್ಯಾಲಯಗಳು!

ಅಮೆರಿಕ, ಕೆನಡಾ, ಜರ್ಮನಿ, ಸ್ವಿಜರ್‌ಲ್ಯಾಂಡ್, ಫ್ರಾನ್ಸ್, ಮಲೇಷ್ಯಾ, ನ್ಯೂಜಿಲೆಂಡ್ ಸೇರಿದಂತೆ 18 ದೇಶಗಳ ಜಾಗತಿಕ ಶ್ರೇಯಾಂಕದ 500ರೊಳಗಿನ ಸುಮಾರು 80 ವಿಶ್ವವಿದ್ಯಾಲಯಗಳು ಮತ್ತು ಶಿಕ್ಷಣ ಸಂಸ್ಥೆಗಳು ಮೇಳದಲ್ಲಿ ಭಾಗವಹಿಸಿದ್ದವು.

ವಿದ್ಯಾರ್ಥಿಗಳಿಗೆ ಪದವಿಪೂರ್ವ, ಸ್ನಾತಕೋತ್ತರ, ಡಿಪ್ಲೊಮಾ ಹಾಗೂ ವಿವಿಧ ವೃತ್ತಿಪರ ಕೋರ್ಸ್‌ಗಳ ಕುರಿತು ನೇರ ಮಾಹಿತಿ ನೀಡಲಾಯಿತು. ಸಾವಿರಾರು ವಿದ್ಯಾರ್ಥಿಗಳು ಈ ಅವಕಾಶವನ್ನು ಬಳಸಿಕೊಂಡಿದ್ದು, ಆನ್‌ಲೈನ್ ಮೂಲಕವೂ ಭಾರೀ ಸಂಖ್ಯೆಯಲ್ಲಿ ನೋಂದಣಿ ನಡೆದಿದೆ.

ಶುಲ್ಕದಲ್ಲಿ ಭರ್ಜರಿ ರಿಯಾಯಿತಿ!

ವಿದೇಶಿ ಶಿಕ್ಷಣದ ದೊಡ್ಡ ಸವಾಲಾಗಿರುವ ಟ್ಯೂಷನ್ ಶುಲ್ಕದ ಹೊರೆ ಕಡಿಮೆ ಮಾಡಲು ಪ್ರಮುಖ ವಿಶ್ವವಿದ್ಯಾಲಯಗಳು ಕರ್ನಾಟಕದ ವಿದ್ಯಾರ್ಥಿಗಳಿಗೆ ವಿಶೇಷ ಕೊಡುಗೆ ಘೋಷಿಸಿವೆ.

ಜಾಗತಿಕ ಶ್ರೇಯಾಂಕದಲ್ಲಿ ಉತ್ತಮ ಸ್ಥಾನದಲ್ಲಿರುವ ಆಸ್ಟ್ರೇಲಿಯಾದ ದಿ ಯೂನಿವರ್ಸಿಟಿ ಆಫ್ ಕ್ವೀನ್ಸ್‌ಲ್ಯಾಂಡ್ ಅರ್ಹ ವಿದ್ಯಾರ್ಥಿಗಳಿಗೆ ಟ್ಯೂಷನ್ ಶುಲ್ಕದಲ್ಲಿ 25% ರಿಯಾಯಿತಿ ನೀಡುವ ಆಫರ್ ಘೋಷಿಸಿದೆ. ಕೃಷಿ ಜೈವಿಕ ತಂತ್ರಜ್ಞಾನ, ಎಂಜಿನಿಯರಿಂಗ್ ಮತ್ತು ವಾಣಿಜ್ಯ ಸೇರಿದಂತೆ ಹಲವು ಕ್ಷೇತ್ರಗಳಲ್ಲಿ ಈ ವಿಶ್ವವಿದ್ಯಾಲಯಕ್ಕೆ ಉತ್ತಮ ಮನ್ನಣೆ ಇದೆ.

ಇಂಗ್ಲೆಂಡ್‌ನ ಯೂನಿವರ್ಸಿಟಿ ಆಫ್ ಈಸ್ಟ್ ಆಂಗ್ಲಿಯಾ ಕಂಪ್ಯೂಟಿಂಗ್, ಪರಿಸರ ವಿಜ್ಞಾನ ಮತ್ತು ಆರೋಗ್ಯ ವಿಜ್ಞಾನ ಕ್ಷೇತ್ರಗಳಲ್ಲಿ ಅಧ್ಯಯನ ಮಾಡಲು ಬಯಸುವ ಕರ್ನಾಟಕದ ಅರ್ಹ ಇಬ್ಬರು ವಿದ್ಯಾರ್ಥಿಗಳಿಗೆ ಶೇ.50ರಷ್ಟು ಟ್ಯೂಷನ್ ಶುಲ್ಕ ರಿಯಾಯಿತಿ ನೀಡಲಿದೆ.

ಆಸ್ಟ್ರೇಲಿಯಾದ ಬಾಂಡ್ ವಿಶ್ವವಿದ್ಯಾಲಯ ಕೂಡ ರಾಜ್ಯದ ಅರ್ಹ ವಿದ್ಯಾರ್ಥಿಗಳಿಗೆ 30% ‘ಬಾಂಡ್ ಅಡ್ವಾಂಟೇಜ್ ಸ್ಕಾಲರ್‌ಶಿಪ್’ನೀಡುವುದಾಗಿ ಘೋಷಿಸಿದೆ.

ಶಿಕ್ಷಣ ಸಾಲಕ್ಕೂ ವ್ಯವಸ್ಥೆ

ವಿದೇಶದಲ್ಲಿ ಓದುವಾಗ ಹಣಕಾಸು ದೊಡ್ಡ ಅಡ್ಡಿಯಾಗದಂತೆ ವಿವಿಧ ಬ್ಯಾಂಕ್‌ಗಳ ಪ್ರತಿನಿಧಿಗಳೂ ಮೇಳದಲ್ಲಿ ಭಾಗವಹಿಸಿದ್ದರು. ಅರ್ಹ ವಿದ್ಯಾರ್ಥಿಗಳಿಗೆ ಸುಮಾರು ₹2 ಕೋಟಿ ವರೆಗೆ ಶಿಕ್ಷಣ ಸಾಲದ ಸೌಲಭ್ಯ ದೊರೆಯುವ ಸಾಧ್ಯತೆಗಳ ಬಗ್ಗೆ ಮಾಹಿತಿ ನೀಡಲಾಗಿದೆ.

ಇದರಿಂದ ವಿದೇಶಿ ಶಿಕ್ಷಣದ ಶುಲ್ಕ, ವಸತಿ, ಪ್ರಯಾಣ ಸೇರಿದಂತೆ ವಿವಿಧ ವೆಚ್ಚಗಳನ್ನು ಹೇಗೆ ನಿರ್ವಹಿಸಬಹುದು ಎಂಬುದರ ಕುರಿತು ವಿದ್ಯಾರ್ಥಿಗಳು ಮತ್ತು ಪೋಷಕರಿಗೆ ಮಾರ್ಗದರ್ಶನ ದೊರೆತಿದೆ.

5 ಸಾವಿರಕ್ಕೂ ಹೆಚ್ಚು ವಿದ್ಯಾರ್ಥಿಗಳ ಆಸಕ್ತಿ!

‘ಸ್ಟಡಿ ಅಬ್ರಾಡ್–2026’ ಮೇಳಕ್ಕೆ ವಿದ್ಯಾರ್ಥಿಗಳಿಂದ ಭರ್ಜರಿ ಸ್ಪಂದನೆ ವ್ಯಕ್ತವಾಗಿದೆ. 5,000ಕ್ಕೂ ಹೆಚ್ಚು ಮಂದಿ ನೇರವಾಗಿ ಆಗಮಿಸಿ ಮಾಹಿತಿ ಪಡೆದಿದ್ದು, ಸುಮಾರು 45,000 ಮಂದಿ ಆನ್‌ಲೈನ್ ಮೂಲಕ ನೋಂದಣಿ ಮಾಡಿಕೊಂಡಿದ್ದಾರೆ ಎಂದು ಆಯೋಜಕರು ತಿಳಿಸಿದ್ದಾರೆ.

ವಿದೇಶಿ ವಿಶ್ವವಿದ್ಯಾಲಯಗಳ ಪ್ರತಿನಿಧಿಗಳೊಂದಿಗೆ ನೇರ ಸಂವಾದ ನಡೆಸಲು ಅವಕಾಶ ಸಿಕ್ಕಿದ್ದು, ಹಲವು ವಿದ್ಯಾರ್ಥಿಗಳಿಗೆ ತಮ್ಮ ಭವಿಷ್ಯದ ಶಿಕ್ಷಣದ ಬಗ್ಗೆ ಸ್ಪಷ್ಟತೆ ಪಡೆಯಲು ನೆರವಾಗಿದೆ.

‘ಸ್ಟಾರ್ಟ್ ಯುವರ್ ಜರ್ನಿ’ ಮೂಲಕ ಮುಂದಿನ ಹೆಜ್ಜೆ

ವಿದೇಶದಲ್ಲಿ ಉನ್ನತ ಶಿಕ್ಷಣ ಪಡೆಯಲು ಆಸಕ್ತಿ ಇರುವ ವಿದ್ಯಾರ್ಥಿಗಳು ಕರ್ನಾಟಕ ವೃತ್ತಿ ತರಬೇತಿ ಮತ್ತು ಕೌಶಲ ಅಭಿವೃದ್ಧಿ ನಿಗಮದ Study Abroad ವೇದಿಕೆಯಲ್ಲಿರುವ ‘Start Your Journey’ ಆಯ್ಕೆಯ ಮೂಲಕ ಕೋರ್ಸ್‌ಗಳು ಹಾಗೂ ವಿದ್ಯಾರ್ಥಿ ವೇತನಗಳ ಕುರಿತು ಹೆಚ್ಚಿನ ಮಾಹಿತಿ ಪಡೆಯಬಹುದು.

ವಿದ್ಯಾರ್ಥಿಗಳ ಶೈಕ್ಷಣಿಕ ಸಾಮರ್ಥ್ಯಕ್ಕೆ ತಕ್ಕಂತೆ ವಿದೇಶಿ ವಿಶ್ವವಿದ್ಯಾಲಯಗಳನ್ನು ಆಯ್ಕೆ ಮಾಡಿಕೊಳ್ಳುವುದು, ವಿದ್ಯಾರ್ಥಿ ವೇತನಕ್ಕೆ ಅರ್ಜಿ ಸಲ್ಲಿಸುವುದು ಮತ್ತು ಶಿಕ್ಷಣ ಸಾಲದ ಕುರಿತು ಮಾಹಿತಿ ಪಡೆಯಲು ಈ ವ್ಯವಸ್ಥೆ ಸಹಕಾರಿಯಾಗಲಿದೆ.

GTTC ವಿದ್ಯಾರ್ಥಿಗಳಿಗೆ ₹56 ಲಕ್ಷದ ಉದ್ಯೋಗ ಪ್ಯಾಕೇಜ್!

ಮೇಳದ ಮತ್ತೊಂದು ಪ್ರಮುಖ ಆಕರ್ಷಣೆ ಉದ್ಯೋಗ ಕ್ಷೇತ್ರಕ್ಕೆ ಸಂಬಂಧಿಸಿದ್ದು. ಆಸ್ಟ್ರೇಲಿಯಾದ Nepean Engineering ಸಂಸ್ಥೆ GTTC ತರಬೇತಿ ಪಡೆದ ಅಭ್ಯರ್ಥಿಗಳಿಗೆ ಭರ್ಜರಿ ಉದ್ಯೋಗಾವಕಾಶ ನೀಡಿದೆ.

ಸಂಸ್ಥೆಯು ಪ್ರತಿ ಅಭ್ಯರ್ಥಿಗೆ ವಾರ್ಷಿಕ ₹56 ಲಕ್ಷದವರೆಗೆ ವೇತನ ಪ್ಯಾಕೇಜ್ ನೀಡಿದ್ದು, GTTCಯ 13 ಅಭ್ಯರ್ಥಿಗಳನ್ನು ಈಗಾಗಲೇ ಉದ್ಯೋಗಕ್ಕೆ ಆಯ್ಕೆ ಮಾಡಿಕೊಂಡಿದೆ ಎಂದು ಸಂಸ್ಥೆಯ ವ್ಯವಸ್ಥಾಪಕ ನಿರ್ದೇಶಕ ಸಿದ್ದಲಿಂಗಪ್ಪ ಪೂಜಾರಿ ತಿಳಿಸಿದ್ದಾರೆ.

ವಿದೇಶಿ ಶಿಕ್ಷಣ ಇನ್ನು ದೂರದ ಕನಸಲ್ಲ!

ವಿದೇಶಕ್ಕೆ ತೆರಳಿ ಓದುವುದು ಎಂದರೆ ಭಾರಿ ಶುಲ್ಕ ಮತ್ತು ದೊಡ್ಡ ಆರ್ಥಿಕ ಹೊರೆ ಎಂಬ ಭಾವನೆ ಹೊಂದಿದ್ದ ವಿದ್ಯಾರ್ಥಿಗಳಿಗೆ ಈ ಮೇಳ ಹೊಸ ದಾರಿ ತೋರಿಸಿದೆ. ಸ್ಕಾಲರ್‌ಶಿಪ್, ಶುಲ್ಕ ರಿಯಾಯಿತಿ, ಶಿಕ್ಷಣ ಸಾಲ ಮತ್ತು ಜಾಗತಿಕ ವಿಶ್ವವಿದ್ಯಾಲಯಗಳ ನೇರ ಸಂಪರ್ಕಒಂದೇ ವೇದಿಕೆಯಲ್ಲಿ ದೊರೆತಿರುವುದು ಕರುನಾಡಿನ ವಿದ್ಯಾರ್ಥಿಗಳಿಗೆ ಮಹತ್ವದ ಅವಕಾಶವಾಗಿದೆ.

ಕನಸು ವಿದೇಶದಲ್ಲಿರಬಹುದು… ಆದರೆ ಆ ಕನಸಿಗೆ ಮೊದಲ ಹೆಜ್ಜೆ ಕರುನಾಡಿನಿಂದಲೇ ಇಡಬಹುದು!

##StudyAbroad #KarnatakaStudents #ForeignEducation #Scholarships #GlobalEducation #InternationalUniversities #EducationNews