‘ಮೈ ಭಾರತ್’ ಪೋರ್ಟಲ್‌ನಲ್ಲಿ ಆನ್‌ಲೈನ್ ರಸಪ್ರಶ್ನೆ | ಗೆದ್ದವರಿಗೆ ಪ್ರಬಂಧ, ರಾಜ್ಯ–ರಾಷ್ಟ್ರೀಯ ಮಟ್ಟಕ್ಕೆ ಅವಕಾಶ..ಅದರಲ್ಲೂ ವಿಶೇಷವೆಂದರೆ, ಪ್ರಧಾನಿ, ಕೇಂದ್ರ ಸಚಿವರು ಹಾಗೂ ಕೇಂದ್ರ ಸರಕಾರದ ಹಿರಿಯ ಕಾರ್ಯದರ್ಶಿಗಳ ಮುಂದೆ ತಮ್ಮ ಆಲೋಚನೆಗಳನ್ನು ಹಂಚಿಕೊಳ್ಳುವ ವೇದಿಕೆ ಸಿಗಲಿದೆ.

ಮಂಗಳೂರು: ದಕ್ಷಿಣ ಕನ್ನಡದ ಯುವಕರ ಪ್ರತಿಭೆ, ಜ್ಞಾನ ಮತ್ತು ಆಲೋಚನೆಗಳಿಗೆ ಇದೀಗ ರಾಷ್ಟ್ರಮಟ್ಟದ ವೇದಿಕೆಯ ಬಾಗಿಲು ತೆರೆದಿದೆ. ಓದು, ಉದ್ಯೋಗದ ತಯಾರಿ, ದಿನನಿತ್ಯದ ಬ್ಯುಸಿ ಜೀವನದ ನಡುವೆ ನಿಮ್ಮ ಜ್ಞಾನವನ್ನು ಪರೀಕ್ಷಿಸಿಕೊಳ್ಳಲು ಹಾಗೂ ದೇಶದ ಪ್ರಮುಖ ವಿಚಾರಗಳ ಬಗ್ಗೆ ನಿಮ್ಮ ಅಭಿಪ್ರಾಯವನ್ನು ಮಂಡಿಸಲು ‘ಮೈ ಭಾರತ್’ ಪೋರ್ಟಲ್‌ನಲ್ಲಿ ಜಿಲ್ಲಾ ಮಟ್ಟದ ಆನ್‌ಲೈನ್ ರಸಪ್ರಶ್ನೆ ಅಭಿಯಾನ ಆರಂಭಿಸಲಾಗಿದೆ.

ವಿಕಸಿತ್ ಭಾರತ್ ಲೀಡರ್ಸ್ ಡೈಲಾಗ್ ವತಿಯಿಂದ ನಡೆಯುತ್ತಿರುವ ಈ ಅಭಿಯಾನದಲ್ಲಿ 15ರಿಂದ 29 ವರ್ಷದೊಳಗಿನ ದಕ್ಷಿಣ ಕನ್ನಡ ಜಿಲ್ಲೆಯ ಯುವಕರು ಭಾಗವಹಿಸಬಹುದು. ಜಿಲ್ಲೆಯಲ್ಲಿ ವಾಸಿಸುವವರು ಮಾತ್ರವಲ್ಲದೆ, ಜಿಲ್ಲೆಯಲ್ಲಿ ಅಧ್ಯಯನ ಮಾಡುತ್ತಿರುವ ಅರ್ಹ ಯುವಕರಿಗೂ ಅವಕಾಶವಿದೆ.

ಮೊದಲ ಹಂತದಲ್ಲೇ ನಿಮ್ಮ ಜ್ಞಾನಕ್ಕೆ ಪರೀಕ್ಷೆ

‘ಮೈ ಭಾರತ್’ ಪೋರ್ಟಲ್‌ನಲ್ಲಿ ಲೈವ್ ಇರುವ ಹಂತ-1ರ ಆನ್‌ಲೈನ್ ರಸಪ್ರಶ್ನೆಯಲ್ಲಿ ಭಾಗವಹಿಸಿ ನಿಮ್ಮ ಜ್ಞಾನವನ್ನು ಪ್ರದರ್ಶಿಸಬೇಕು. ನೋಂದಣಿ ಮಾಡಿಕೊಂಡ ಬಳಿಕ ಆಯ್ಕೆ ಮಾಡಿಕೊಂಡ ಆದ್ಯತೆಯ ಭಾಷೆಯಲ್ಲಿ ರಸಪ್ರಶ್ನೆಯನ್ನು ಪೂರ್ಣಗೊಳಿಸಬಹುದು.

ಇಲ್ಲಿ ಅಂಕ ಗಳಿಸುವುದಷ್ಟೇ ಗುರಿಯಲ್ಲ. ಹೆಚ್ಚು ಅಂಕ ಗಳಿಸುವವರಿಗೆ ಮುಂದಿನ ಹಂತಕ್ಕೆ ಕಾಲಿಡುವ ಅವಕಾಶ ಸಿಗಲಿದೆ. ಪ್ರಮುಖ ವಲಯಗಳ ವಿಷಯಗಳ ಕುರಿತು 500 ಪದಗಳ ಪ್ರಬಂಧ ಬರೆಯುವ ಮೂಲಕ ತಮ್ಮ ವಿಚಾರ ಮತ್ತು ಚಿಂತನಾ ಸಾಮರ್ಥ್ಯವನ್ನು ಪ್ರದರ್ಶಿಸಬೇಕು.

ದ.ಕ.ದಿಂದ ಇಬ್ಬರಿಗೆ ರಾಜ್ಯಮಟ್ಟದ ಅವಕಾಶ

ಈ ಸ್ಪರ್ಧೆಯಲ್ಲಿ ದಕ್ಷಿಣ ಕನ್ನಡ ಜಿಲ್ಲೆಯಿಂದ ಇಬ್ಬರು ಸ್ಪರ್ಧಿಗಳು ರಾಜ್ಯ ಮಟ್ಟಕ್ಕೆ ಪ್ರವೇಶ ಪಡೆಯಲಿದ್ದಾರೆ. ಅಲ್ಲಿಂದ ಮುಂದೆ ಪ್ರಾದೇಶಿಕ ಮಟ್ಟದಲ್ಲಿ ವಿಜೇತರಾಗುವವರಿಗೆ ಹೊಸದಿಲ್ಲಿಯಲ್ಲಿ ನಡೆಯುವ ರಾಷ್ಟ್ರೀಯ ಕಾರ್ಯಕ್ರಮದಲ್ಲಿ ತಮ್ಮ ವಿಚಾರಗಳನ್ನು ಮಂಡಿಸುವ ಅಪರೂಪದ ಅವಕಾಶ ಸಿಗಲಿದೆ.

ಮಂಗಳೂರಿನ ಕಾಲೇಜು ವಿದ್ಯಾರ್ಥಿಗಳು, ಯುವ ಉದ್ಯೋಗಾಕಾಂಕ್ಷಿಗಳು, ಸ್ಪರ್ಧಾತ್ಮಕ ಪರೀಕ್ಷೆಗಳ ತಯಾರಿಯಲ್ಲಿರುವವರು ಹಾಗೂ ದೇಶದ ಅಭಿವೃದ್ಧಿ ವಿಚಾರಗಳಲ್ಲಿ ಆಸಕ್ತಿ ಹೊಂದಿರುವ ಯುವಕರಿಗೆ ಇದು ತಮ್ಮ ಸಾಮರ್ಥ್ಯವನ್ನು ಗುರುತಿಸಿಕೊಳ್ಳಲು ಉತ್ತಮ ವೇದಿಕೆಯಾಗಿದೆ.

ಹೇಗೆ ಭಾಗವಹಿಸಬೇಕು?

ದಕ್ಷಿಣ ಕನ್ನಡದಲ್ಲಿ ವಾಸಿಸುವ ಅಥವಾ ಅಧ್ಯಯನ ಮಾಡುತ್ತಿರುವ 15ರಿಂದ 29 ವರ್ಷದ ಯುವಕರು ಮೊದಲು mybharat.gov.inಪೋರ್ಟಲ್‌ನಲ್ಲಿ ನೋಂದಣಿ ಮಾಡಿಕೊಳ್ಳಬೇಕು. ನಂತರ ಆದ್ಯತೆಯ ಭಾಷೆಯನ್ನು ಆಯ್ಕೆ ಮಾಡಿಕೊಂಡು ಹಂತ-1ರ ಆನ್‌ಲೈನ್ ರಸಪ್ರಶ್ನೆಯನ್ನು ಪೂರ್ಣಗೊಳಿಸಬೇಕು.

ಒಂದು ಆನ್‌ಲೈನ್ ಕ್ವಿಜ್‌ನಿಂದ ಆರಂಭವಾಗುವ ಈ ಅವಕಾಶ, ರಾಜ್ಯಮಟ್ಟದಿಂದ ರಾಷ್ಟ್ರಮಟ್ಟದ ವೇದಿಕೆಯವರೆಗೆ ಕರೆದೊಯ್ಯಬಹುದು. ಹೀಗಾಗಿ ದಕ್ಷಿಣ ಕನ್ನಡದ ಯುವಕರೇ—ನಿಮ್ಮ ಜ್ಞಾನಕ್ಕೆ ಒಂದು ಪರೀಕ್ಷೆ ನೀಡಿ, ನಿಮ್ಮ ಆಲೋಚನೆಗೆ ಒಂದು ವೇದಿಕೆ ಪಡೆದುಕೊಳ್ಳಿ!

ಈ ಕುರಿತು ಮೈ ಭಾರತ್ ಅಧಿಕಾರಿ ಉಲ್ಲಾಸ್ ಪತ್ರಿಕಾಗೋಷ್ಠಿಯಲ್ಲಿ ಮಾಹಿತಿ ನೀಡಿದರು. ದಕ್ಷಿಣ ಕನ್ನಡ ಎನ್ನೆಸ್ಸೆಸ್ ಸೀಮಾ ಹಾಗೂ ಆಡಳಿತಾಧಿಕಾರಿ ಜಗದೀಶ್ ಉಪಸ್ಥಿತರಿದ್ದರು.

##MyBharat #YouthIndia #ViksitBharat #YouthLeadership #Mangaluru #DakshinaKannada #OnlineQuiz