ಉತ್ತರ ಕನ್ನಡ ಜಿಲ್ಲೆಯ ಭಟ್ಕಳ ತಾಲೂಕಿನ ಶಿರಾಲಿ ಪರಿಸರದ ನದಿಯೊಂದರಲ್ಲಿ ಕಪ್ಪೆ ಚಿಪ್ಪು ತೆಗೆಯುತ್ತಿದ್ದ 10 ಮಹಿಳೆಯರ ಪೈಕಿ ಎಂಟು ಮಹಿಳೆಯರು ಏಕಾಏಕಿ ನೀರಿನ ಮಟ್ಟ ಏರಿದ ಪರಿಣಾಮ ನೀರಿನ ಸುಳಿಗೆ ಸಿಲುಕಿ ಮೃತಪಟ್ಟಿದ್ದರೆ. ಇಬ್ಬರು ಮಹಿಳೆಯರು ಮಣಿಪಾಲ್ ಆಸ್ಪತ್ರೆಯಲ್ಲಿ ಸಾವು ಬದುಕಿನ ನಡುವೆ ಹೋರಾಡುತ್ತಿದ್ದಾರೆ.

ಭಟ್ಕಳ ತಾಲೂಕಿನ ಶಿರಾಲಿ ಸಮೀಪದ ಆಳ್ವೆ ಕೊಡಿ ಪರಿಸರದಲ್ಲಿನ ಕಲ್ಲಿನ ಕಟ್ಟಿ ನದಿಯಲ್ಲಿಂದು ಈ ಘೋರ ದುರಂತ ಸಂಭವಿಸಿದೆ.

ನಿನ್ನೆ ರಾತ್ರಿ ಬಂದಂತಹ ಮಳೆಯ ಕಾರಣದಿಂದಾಗಿ, ಹಾಗೂ ಸಮುದ್ರದ ರಕ್ಕಸ ಅಲೆಯ ಪರಿಣಾಮ ಇದ್ದಕ್ಕಿದ್ದಂತೆ ನದಿಯ ನೀರಿನ ಮಟ್ಟ ವಿಪರೀತವಾಗಿ ಏರಿ ಈ ದುರ್ಘಟನೆ ಸಂಭವಿಸಿದೆ ಎನ್ನಲಾಗುತ್ತಿದೆ.

ಎಂದಿನಂತೆ, ಕಪ್ಪೆ ಚಿಪ್ಪು ತೆಗೆಯಲು ನದಿಗೆ ಇಳಿದಿದ್ದ ಮಹಿಳೆಯರು, ಚುರುಕಿನಿಂದ ಕಪ್ಪೆ ಚಿಪ್ಪು ಹೆಕ್ಕುವ ಕಾರ್ಯದಲ್ಲಿ ತಲ್ಲೀನರಾಗಿದ್ದಾಗ ಇದ್ದಕ್ಕಿದ್ದಂತೆಯೇ ನೀರಿನ ಮಟ್ಟವು ವಿಪರೀತವಾಗಿ ಹೆಚ್ಚಿದೆ. ನದಿಯ ಬಗ್ಗೆ ಸಾಕಷ್ಟು ತಿಳುವಳಿಕೆ ಇದ್ದರೂ ಸಹ, ಒಮ್ಮೆಲೇ ನೀರಿನ ಮಟ್ಟ ಏರಿದ ಪರಿಣಾಮ ಮಹಿಳೆಯರು ಬಚಾವಾಗಲು ಆಗಲಿಲ್ಲ. ಅದೃಷ್ಟವಶಾತ್ ನಾಗರತ್ನ ಹಾಗೂ ಮಹಾದೇವಿ ಎನ್ನುವವರು ಬಚಾವಾಗಿದ್ದರೂ ಸಹ, ಅವರು ತೀವ್ರ ಅಸ್ವಸ್ಥ ಕ್ಕೆ ಒಳಗಾಗಿದ್ದಾರೆ. ಅವರನ್ನು ಹೆಚ್ಚಿನ ಚಿಕಿತ್ಸೆಗಾಗಿ ಉಡುಪಿಯ ಮಣಿಪಾಲ ಆಸ್ಪತ್ರೆಗೆ ದಾಖಲಿಸಲಾಗಿದೆ.

Also Read ಪ್ರಜ್ವಲ್ ರೇವಣ್ಣ ಕೇಸ್‌ಗೆ ಬಿಗ್ ಟ್ವಿಸ್ಟ್: ಸಾಕ್ಷಿಗೆ ಬೆದರಿಕೆ ಕರೆ!

ಮೃತ ಪಟ್ಟ ಮಹಿಳೆಯರೆಲ್ಲಾ ಮಧ್ಯ ವಯಸ್ಕರರಾಗಿದ್ದು, ಮಹಾಲಕ್ಷ್ಮಿ ನಾಯಕ್, ಶಾರದಾ, ಲಕ್ಷ್ಮಿ ಮಹದೇವ್ , ಲಕ್ಷ್ಮಿ ಅಣ್ಣಪ್ಪ, ಲಕ್ಷ್ಮಿ ಶಿವರಾಂ, ಜ್ಯೋತಿ, ಮಾಲತಿ ಹಾಗೂ ಮಾಸ್ತಮ್ಮ ಎನ್ನುವವರೇ ಆಗಿದ್ದಾರೆ.

ಮೃತರೆಲ್ಲರೂ ಪಡುಶಿರಾಲಿಯ ಬೆಂಗ್ರೆ ನಿವಾಸಿಗಳೆಂದು ತಿಳಿದು ಬಂದಿದೆ. ಕುಟುಂಬದವರ ಆಕ್ರಂದನ ಮುಗಿಲು ಮುಟ್ಟಿದ್ದು, ಇಡೀ ಪರಿಸರ ದುಃಖದಿಂದ ಹೆಪ್ಪುಗಟ್ಟಿದೆ.