ಬಂಟ್ವಾಳ, ಮೇ 24: ಪಾರ್ಸೆಲ್ ಡೆಲಿವರಿಗೆ ತೆರಳುತ್ತಿದ್ದ E-Cart ಕಂಪನಿಯ ಹಬ್ ಅಸಿಸ್ಟೆಂಟ್‌ಗೆ ದಾರಿ ಮಧ್ಯೆ ಅಡ್ಡಗಟ್ಟಿ, ಅವಾಚ್ಯವಾಗಿ ನಿಂದಿಸಿ ಹಲ್ಲೆ ನಡೆಸಿದ ಘಟನೆ ಬಂಟ್ವಾಳದಲ್ಲಿ ನಡೆದಿದೆ. ಈ ಸಂಬಂಧ ಬಂಟ್ವಾಳ ಗ್ರಾಮಾಂತರ ಪೊಲೀಸ್ ಠಾಣೆಯಲ್ಲಿ 5 ಮಂದಿ ವಿರುದ್ಧ ಪ್ರಕರಣ ದಾಖಲಾಗಿದೆ.

ದೂರುದಾರರಾದ ಮಹಮ್ಮದ್ ಆರೀಸ್ (20), ಅರಳ ಗ್ರಾಮ, ಬಂಟ್ವಾಳ, ಇವರು E-Cart ಕಂಪನಿಯಲ್ಲಿ ಡೆಲಿವರಿ ಮತ್ತು ಹಬ್ ಅಸಿಸ್ಟೆಂಟ್ ಆಗಿ ಕೆಲಸ ಮಾಡುತ್ತಿದ್ದಾರೆ.
ದಿನಾಂಕ 23-05-2026 ರಂದು ಮಧ್ಯಾಹ್ನ 3:00 ಗಂಟೆಗೆ ದೂರುದಾರರು ಲೊರೆಟ್ಟೋದಿಂದ ಕಂಪನಿಯ TATA Inst ಟೆಂಪೊದಲ್ಲಿ ಪಾರ್ಸೆಲ್ ಡೆಲಿವರಿಗೆ ತೆರಳುತ್ತಿದ್ದರು. ಸಂಗಬೆಟ್ಟು ಗ್ರಾಮದ ಮಂಚಕಲ್ಲು ಎಂಬಲ್ಲಿ ರಸ್ತೆ ಬದಿ ವಾಹನ ನಿಲ್ಲಿಸಿದಾಗ, ಸಿದ್ದಕಟ್ಟೆ ಕಡೆಯಿಂದ ಬುಲೆಟ್ ಮೋಟಾರ್ ಸೈಕಲ್‌ನಲ್ಲಿ ಬಂದ ಆರೋಪಿ ಮಧು ಎಂಬಾತನು ಉಡಾಫೆಯಿಂದ ಮಾತನಾಡಿದ್ದಾನೆ. ಪಿರ್ಯಾದಿದಾರರು ಇದಕ್ಕೆ ಆಕ್ಷೇಪಿಸಿದಾಗ ವಾಗ್ವಾದ ನಡೆದಿದೆ.

ನಂತರ ಮಧ್ಯಾಹ್ನ 3:10ಕ್ಕೆ ಪಿರ್ಯಾದಿದಾರರು ಎಳಿಯನಡುಗೋಡು ಗ್ರಾಮದ ಉಪ್ಪಿರಾ ಎಂಬಲ್ಲಿಗೆ ತಲುಪಿದಾಗ, ಅದೇ ಬುಲೆಟ್ ಸವಾರ ಮಧು ಅಲ್ಲಿಗೆ ಬಂದು ಟೆಂಪೊವನ್ನು ಅಡ್ಡಗಟ್ಟಿ ನಿಲ್ಲಿಸಿದ್ದಾನೆ. “ನೀನು ಇಲ್ಲಿಂದ ಹೋಗಬಾರದು, ನಿನ್ನ ಬಗ್ಗೆ ಕಂಪನಿಗೆ ಕಂಪ್ಲೇಂಟ್ ಮಾಡಬೇಕು, ಗಾಡಿ ತೆಗೆಯಬೇಡ” ಎಂದು ತಡೆದಿದ್ದಾನೆ.

ಈ ವೇಳೆ ಪಿರ್ಯಾದಿದಾರರು ಮೊಬೈಲ್‌ನಲ್ಲಿ ವಿಡಿಯೋ ಮಾಡಲು ಯತ್ನಿಸಿದಾಗ, ಅಲ್ಲಿಗೆ ಬಂದ ಪಿರ್ಯಾದಿಗೆ ಪರಿಚಯವಿರುವ ಸಂದೀಪ, ನವೀನ ಹೆಗ್ಡೆ, ಯಶವಂತ ಆಚಾರ್ಯ ಮತ್ತು ಇತರರು ಮಧು ಜೊತೆ ಸೇರಿಕೊಂಡಿದ್ದಾರೆ. ಎಲ್ಲರೂ ಸೇರಿ ಪಿರ್ಯಾದಿದಾರರನ್ನು ತಡೆದು ಎಳೆದಾಡಿ, “ನೀನು ಬಾರೀ ವಿಡಿಯೋ ಮಾಡುತ್ತೀಯಾ” ಎಂದು ಅವಾಚ್ಯವಾಗಿ ಬೈದು ಕೈಯಿಂದ ಹಲ್ಲೆ ನಡೆಸಿದ್ದಾರೆ.

ಹಲ್ಲೆಯಿಂದ ನೋವುಂಟಾಗಿ ಪಿರ್ಯಾದಿದಾರರು ಬಂಟ್ವಾಳ ಸರ್ಕಾರಿ ಆಸ್ಪತ್ರೆಗೆ ದಾಖಲಾಗಿ ಚಿಕಿತ್ಸೆ ಪಡೆಯುತ್ತಿದ್ದಾರೆ.

ಈ ಬಗ್ಗೆ ಬಂಟ್ವಾಳ ಗ್ರಾಮಾಂತರ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದ್ದು, ಪೊಲೀಸರು ತನಿಖೆ ಕೈಗೊಂಡಿದ್ದಾರೆ.