ನಾವು ನಂಬಿಕೆಯಿಂದ ಖರೀದಿಸುವ ಔಷಧವೇ ನಕಲಿಯಾಗಿದ್ದರೆ? ಬೆಂಗಳೂರಿನಲ್ಲಿ ಬೆಳಕಿಗೆ ಬಂದಿರುವ ₹4.91 ಕೋಟಿ ಮೌಲ್ಯದ ಶಂಕಿತ ನಕಲಿ ಔಷಧ ಜಾಲ ಇದೀಗ ಆತಂಕ ಮೂಡಿಸಿದೆ. ಈ ದಂಧೆಯ ಸುಳಿವು ಸಿಕ್ಕಿದ್ದು ಆಸ್ಪತ್ರೆ ಅಥವಾ ಮೆಡಿಕಲ್ ಶಾಪ್‌ನಿಂದಲ್ಲ… ಹೊಲದಲ್ಲಿ ಬಿದ್ದಿದ್ದ ಔಷಧ ತ್ಯಾಜ್ಯದಿಂದ!

ಹೊಲದಲ್ಲಿ ಕಂಡ ಔಷಧ ತ್ಯಾಜ್ಯ… ಪೊಲೀಸರಿಗೆ ಮಾಹಿತಿ… ತನಿಖೆ ನಡೆಸಿದಾಗ ಬಯಲಾಯ್ತು ಕೋಟಿ ಕೋಟಿ ಮೌಲ್ಯದ ನಕಲಿ ಔಷಧ ದಂಧೆ!

ರಾಮನಗರ ಜಿಲ್ಲೆಯ ಬಿಡದಿ ಸಮೀಪದ ಪ್ರದೇಶದಲ್ಲಿ ಕಾರ್ಮಿಕನೊಬ್ಬ ಔಷಧದ ವಯಲ್‌, ಪ್ಯಾಕೆಟ್‌ ಸೇರಿದಂತೆ ತ್ಯಾಜ್ಯ ಬಿದ್ದಿರುವುದನ್ನು ಗಮನಿಸಿ ಪೊಲೀಸರಿಗೆ ಮಾಹಿತಿ ನೀಡಿದ್ದಾನೆ. ಆ ಸುಳಿವಿನ ಆಧಾರದ ಮೇಲೆ ತನಿಖೆ ನಡೆಸಿದ ಅಧಿಕಾರಿಗಳು ಅಕ್ರಮ ಘಟಕವೊಂದನ್ನು ಪತ್ತೆಹಚ್ಚಿ ನಕಲಿ ಔಷಧ, ಅವಧಿ ಮೀರಿದ ಸ್ಟಾಕ್, ಪ್ಯಾಕೇಜಿಂಗ್ ಸಾಮಗ್ರಿ, ನಕಲಿ ಲೇಬಲ್‌ಗಳು ಮತ್ತು ಔಷಧ ತುಂಬುವ ಉಪಕರಣಗಳನ್ನು ವಶಪಡಿಸಿಕೊಂಡಿದ್ದಾರೆ.

ತನಿಖಾಧಿಕಾರಿಗಳ ಪ್ರಕಾರ, ಕಡಿಮೆ ಬೆಲೆಯ ಔಷಧಗಳನ್ನು ಹೊಸ ವಯಲ್‌ಗಳಿಗೆ ತುಂಬಿ, ದುಬಾರಿ ಬ್ರ್ಯಾಂಡ್‌ಗಳ ಹೆಸರಿನಲ್ಲಿ ಮರುಲೇಬಲ್ ಮಾಡಿ ಪೂರೈಕೆ ಮಾಡಿರುವ ಶಂಕೆ ಇದೆ. ಪತ್ತೆಯಾದ ಔಷಧಗಳಲ್ಲಿ ಗಂಭೀರ ಸೋಂಕುಗಳಿಗೆ ಬಳಸುವ ಇಂಜೆಕ್ಷನ್‌ಗಳೂ ಸೇರಿವೆ.

ಪ್ರಕರಣದ ತನಿಖೆ ಇದೀಗ ಮತ್ತಷ್ಟು ವಿಸ್ತರಿಸಿದ್ದು, ಬೆಂಗಳೂರಿನ 90ಕ್ಕೂ ಹೆಚ್ಚು ಆಸ್ಪತ್ರೆ ಮತ್ತು ಕ್ಲಿನಿಕ್‌ಗಳಿಗೆ ಶಂಕಿತ ನಕಲಿ ಔಷಧ ಪೂರೈಕೆಯಾಗಿರುವ ಸಾಧ್ಯತೆಯನ್ನು ಅಧಿಕಾರಿಗಳು ಪರಿಶೀಲಿಸುತ್ತಿದ್ದಾರೆ. ಮಿನರ್ವಾ ಸರ್ಕಲ್‌ನಲ್ಲಿರುವ ಔಷಧ ಸಂಸ್ಥೆಯ ಮೇಲೂ ದಾಳಿ ನಡೆಸಲಾಗಿದ್ದು, ಅದರ ಮಾಲೀಕನನ್ನು ಬಂಧಿಸಲಾಗಿದೆ. ಪ್ರಕರಣದ ಸಂಪೂರ್ಣ ಜಾಲವನ್ನು ಪತ್ತೆಹಚ್ಚಲು ರಾಜ್ಯ ಸರ್ಕಾರ ಆರು ಸದಸ್ಯರ SIT ರಚಿಸಿದೆ.

ಸಾರ್ವಜನಿಕರಿಗೆ ಎಚ್ಚರಿಕೆ

ಔಷಧ ಎಂದರೆ ಜೀವ ಉಳಿಸುವ ವಸ್ತು… ಅದರಲ್ಲೇ ವಂಚನೆ ನಡೆದರೆ ಪರಿಣಾಮ ಗಂಭೀರವಾಗಬಹುದು. ಹೀಗಾಗಿ ಔಷಧ ಖರೀದಿಸುವಾಗ ಪ್ಯಾಕೆಟ್‌, ಲೇಬಲ್‌, ಅವಧಿ ಮತ್ತು ಬಿಲ್‌ ಪರಿಶೀಲಿಸುವುದು ಮುಖ್ಯ. ಅನುಮಾನಾಸ್ಪದ ಔಷಧ ಕಂಡುಬಂದರೆ ಬಳಸದೆ ಸಂಬಂಧಪಟ್ಟ ಆರೋಗ್ಯ/ಔಷಧ ನಿಯಂತ್ರಣ ಅಧಿಕಾರಿಗಳಿಗೆ ಮಾಹಿತಿ ನೀಡುವುದು ಅಗತ್ಯ.

##FakeMedicine #FakeDrugs #DrugRacket #BengaluruNews #KarnatakaNews #HealthAlert #BreakingNews