ಬಾಳೆಗೊನೆಗಳ ನಡುವೆ ಎಂಡಿಎಂಎ ಸಾಗಿಸುತ್ತಿದ್ದ ಕೃಷಿಕ ಅರೆಸ್ಟ್…!

ನಂಜನಗೂಡು: ಹೊರನೋಟಕ್ಕೆ ಬಾಳೆ ಕೃಷಿ, ಒಳಗೊಳಗೆ ಮಾದಕ ವಸ್ತುಗಳ ಸಾಗಣೆ! ಕೃಷಿಕನ ಸೋಗಿನಲ್ಲಿ ಡ್ರಗ್ಸ್ ದಂಧೆಯಲ್ಲಿ ತೊಡಗಿದ್ದ ಆರೋಪದ ಮೇಲೆ ಕೇರಳ ಮೂಲದ ವ್ಯಕ್ತಿಯೊಬ್ಬನನ್ನು ಪೊಲೀಸರು ನಂಜನಗೂಡಿನಲ್ಲಿ ಬಂಧಿಸಿದ್ದಾರೆ. ಬಾಳೆಗೊನೆಗಳ ನಡುವೆ ಮಾದಕ ವಸ್ತುಗಳನ್ನು ಅಡಗಿಸಿಟ್ಟು ಕೇರಳಕ್ಕೆ ಸಾಗಿಸುತ್ತಿದ್ದ ಆರೋಪ ಈತನ ಮೇಲಿದೆ.

ಬಂಧಿತನನ್ನು ಕೇರಳದ ಆಲಪ್ಪುಳ ಜಿಲ್ಲೆಯ ಹರಿಪಾಡ್ ಮೂಲದ ಧನೇಶ್ ಎಸ್. ನಾಯರ್ ಅಲಿಯಾಸ್ ದನ್ನಿ (31) ಎಂದು ಗುರುತಿಸಲಾಗಿದೆ. ಈತ ಪತ್ನಿ ಹಾಗೂ ಇಬ್ಬರು ಮಕ್ಕಳೊಂದಿಗೆ ನಂಜನಗೂಡಿನಲ್ಲಿ ವಾಸವಾಗಿದ್ದ.

2024ರಿಂದ ಕುರಿಹುಂಡಿ ಗ್ರಾಮದ ನಿವೃತ್ತ ಮುಖ್ಯ ಶಿಕ್ಷಕ ಚಿನ್ನಸ್ವಾಮಿ ನಾಯಕ ಅವರಿಗೆ ಸೇರಿದ ಆರು ಎಕರೆ ಜಮೀನನ್ನು ಗುತ್ತಿಗೆ ಪಡೆದು ಬಾಳೆ ಕೃಷಿ ಮಾಡುತ್ತಿದ್ದ ಎನ್ನಲಾಗಿದೆ. ಇದೇ ಕೃಷಿಯ ನೆಪದಲ್ಲಿ ಬಾಳೆಗೊನೆಗಳ ನಡುವೆ ಡ್ರಗ್ಸ್ ಅಡಗಿಸಿಟ್ಟು ಕೇರಳಕ್ಕೆ ಸಾಗಿಸುತ್ತಿದ್ದ ಎಂಬ ಅಂಶ ತನಿಖೆಯಲ್ಲಿ ಬೆಳಕಿಗೆ ಬಂದಿದೆ.

Also Read ನಾಸಿಕ್ TCS ಪ್ರಕರಣ-ಸತ್ಯ ಮರೆಮಾಚಿದವರಾರು?ಕಾರ್ಪೊರೇಟ್ ಜಗತ್ತಿನ ಕತ್ತಲೆ ಮುಖ:HRಮಹಿಳೆಯಾಗಿಯೂ…..

ಮೊಬೈಲ್‌ನಿಂದ ಸಿಕ್ಕಿತು ಸುಳಿವು!

ಕೇರಳದ ಆಲುವ ಡಿವೈಎಸ್ಪಿ ಬೈಜು ಪೌಲೋಸ್ ನೇತೃತ್ವದ ಪೊಲೀಸರು ಮೊದಲು ಎರ್ನಾಕುಲಂ ಜಿಲ್ಲೆಯ ಅಂಗಮಲೈನಲ್ಲಿ ದಾಳಿ ನಡೆಸಿ ಶಿನು ಸೆಬಾಸ್ಟಿಯನ್ ಎಂಬಾತನನ್ನು ಬಂಧಿಸಿದ್ದರು. ಆತನಿಂದ 803 ಗ್ರಾಂ ಹಶೀಶ್ ಆಯಿಲ್ ಹಾಗೂ 8 ಗ್ರಾಂ ಎಂಡಿಎಂಎ ವಶಪಡಿಸಿಕೊಳ್ಳಲಾಗಿತ್ತು.

ನಂತರ ಆಲುವದಲ್ಲಿ ಕೆ.ಎಸ್. ಹರಿಕೃಷ್ಣನ್ ಎಂಬಾತನನ್ನು ಬಂಧಿಸಿ ಆತನಿಂದಲೂ 185 ಗ್ರಾಂ ಎಂಡಿಎಂಎ ವಶಪಡಿಸಿಕೊಳ್ಳಲಾಗಿತ್ತು. ಹರಿಕೃಷ್ಣನ್‌ನ ಮೊಬೈಲ್ ಪರಿಶೀಲನೆ ನಡೆಸಿದಾಗ ನಂಜನಗೂಡಿನಲ್ಲಿ ವಾಸವಾಗಿದ್ದ ಧನೇಶ್‌ನ ಸುಳಿವು ಪೊಲೀಸರಿಗೆ ಸಿಕ್ಕಿದೆ.

ತಕ್ಷಣ ಕಾರ್ಯಾಚರಣೆ ನಡೆಸಿದ ಕೇರಳ ಪೊಲೀಸರ ವಿಶೇಷ ತನಿಖಾ ತಂಡ ನಂಜನಗೂಡಿಗೆ ತೆರಳಿ ಧನೇಶ್‌ನನ್ನು ಬಂಧಿಸಿದೆ.

ಕೃಷಿಯ ಹೆಸರಿನಲ್ಲಿ ನಡೆಯುತ್ತಿದ್ದ ಮಾದಕ ವಸ್ತುಗಳ ಸಾಗಣೆ ಜಾಲದ ಹಿಂದೆ ಇನ್ನೂ ಯಾರಾದರೂ ಇದ್ದಾರೆಯೇ? ಈ ಜಾಲದ ಸಂಪರ್ಕ ಎಷ್ಟು ದೂರ ವ್ಯಾಪಿಸಿದೆ ಎಂಬ ಬಗ್ಗೆ ಪೊಲೀಸರ ತನಿಖೆ ಮುಂದುವರಿದಿದೆ.

Also Read KIOCL ಮತ್ತು NDMC ವಿಲೀನಕ್ಕೆ ಶಾಸಕ ಡಾ. ಭರತ್ ಶೆಟ್ಟಿಯಿಂದ ಕೇಂದ್ರ ಸಚಿವರಿಗೆ ಮನವಿ

##DrugSmuggling #MDMA #Nanjangud #KeralaPolice #DrugRacket #KarnatakaNews #CrimeNews