ಮಂಗಳೂರು: ಉಚಿತವಾಗಿ ಎಲ್ಲ ಟಿವಿ ಚಾನೆಲ್‌ಗಳನ್ನು ವೀಕ್ಷಿಸಬಹುದು ಎಂಬ ಫೇಸ್‌ಬುಕ್ ಜಾಹೀರಾತನ್ನು ನಂಬಿ ಆ್ಯಪ್ ಡೌನ್‌ಲೋಡ್ ಮಾಡಿದ ವ್ಯಕ್ತಿಯೊಬ್ಬರು ಬರೋಬ್ಬರಿ ₹1,78,191 ಕಳೆದುಕೊಂಡಿದ್ದಾರೆ. ಈ ಸಂಬಂಧ ಮಂಗಳೂರು ಸೈಬರ್ ಕ್ರೈಂ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.

ಉಚಿತ ಮನರಂಜನೆಯ ಆಮಿಷ!

ಇತ್ತೀಚಿನ ದಿನಗಳಲ್ಲಿ ಸ್ಕ್ಯಾಮರ್‌ಗಳು ಫೇಸ್‌ಬುಕ್, ಇನ್‌ಸ್ಟಾಗ್ರಾಮ್ ಜಾಹೀರಾತುಗಳಲ್ಲಿ ಅಥವಾ ವಾಟ್ಸಾಪ್ ಲಿಂಕ್‌ಗಳ ಮೂಲಕ “ಎಲ್ಲಾ ಟಿವಿ ಚಾನೆಲ್‌ಗಳು ಮತ್ತು ಒಟಿಟಿಗಳು ಕೇವಲ ₹1 ಕ್ಕೆ ಅಥವಾ ಸಂಪೂರ್ಣ ಉಚಿತ” ಎಂದು ಆಮಿಷ ಒಡ್ಡುತ್ತಿದ್ದಾರೆ.

ಅಕ್ಟೋಬರ್ 15ರಂದು ದೂರುದಾರರು ಮನೆಯಲ್ಲಿ ಫೇಸ್‌ಬುಕ್ ವೀಕ್ಷಿಸುತ್ತಿದ್ದಾಗ, ಆ್ಯಪ್ ಡೌನ್‌ಲೋಡ್ ಮಾಡಿಕೊಂಡರೆ ಎಲ್ಲ ಟಿವಿ ಚಾನೆಲ್‌ಗಳನ್ನು ಉಚಿತವಾಗಿ ನೋಡಬಹುದು ಎಂಬ ಜಾಹೀರಾತು ಕಾಣಿಸಿಕೊಂಡಿತ್ತು. ಈ ಆಮಿಷವನ್ನು ನಂಬಿದ ಅವರು ಜಾಹೀರಾತಿನ ಮೇಲೆ ಕ್ಲಿಕ್ ಮಾಡಿ ಆ್ಯಪ್ ಡೌನ್‌ಲೋಡ್ ಮಾಡಿಕೊಂಡಿದ್ದರು.

Also Read “ಬೆಡ್‌ರೂಮ್ ರಾಜಕೀಯ”ಪಪ್ಪು ಯಾದವ್ ಹೇಳಿಕೆ ಸ್ಫೋಟಕ ಚರ್ಚೆ…!ಪಪ್ಪು ತಪ್ಪಾಗ್ ಮಾತಾಡಿದ್ದು ತಪ್ಪು

ಒಂದೇ ದಿನದಲ್ಲಿ ಲಕ್ಷಾಂತರ ರೂಪಾಯಿ ಮಾಯ!

ಅಕ್ಟೋಬರ್ 16ರಂದು ಅವರ ಎರಡು ಬ್ಯಾಂಕ್ ಖಾತೆಗಳಿಂದ ಕ್ರಮವಾಗಿ ₹98,000 ಮತ್ತು ₹30,191 ವರ್ಗಾವಣೆಯಾಗಿತ್ತು. ಮರುದಿನ ಅಕ್ಟೋಬರ್ 17ರಂದು ಮತ್ತೊಂದು ₹50,000 ಹಣವೂ ಅಪರಿಚಿತರಿಗೆ ವರ್ಗಾವಣೆಯಾಗಿತ್ತು. ಈ ವಹಿವಾಟುಗಳು ತಮ್ಮ ಗಮನಕ್ಕೆ ಬಾರದೆ ನಡೆದಿದ್ದವು.

ಅಕ್ಟೋಬರ್ 18ರಂದು ಖಾತೆಯಲ್ಲಿನ ಹಣದ ವಿವರ ಪರಿಶೀಲಿಸಿದಾಗ ಹಣ ಖಾಲಿಯಾಗಿರುವುದು ತಿಳಿದುಬಂದಿದೆ. ತಕ್ಷಣ ಸೈಬರ್ ಕ್ರೈಂ ಠಾಣೆಗೆ ತೆರಳಿ ಪರಿಶೀಲಿಸಿದಾಗ, ಮೊಬೈಲ್‌ನಲ್ಲಿ ಎಪಿಕೆ (APK) ಫೈಲ್ ಡೌನ್‌ಲೋಡ್ ಆಗಿರುವುದು ಪತ್ತೆಯಾಗಿದೆ. ಅಪರಿಚಿತ ವ್ಯಕ್ತಿಗಳು ಅನಧಿಕೃತವಾಗಿ ಒಟ್ಟು ₹1,78,191 ವರ್ಗಾಯಿಸಿ ವಂಚಿಸಿದ್ದಾರೆ ಎಂದು ಆರೋಪಿಸಿ ದೂರು ನೀಡಿದ್ದಾರೆ.

ಉಚಿತದ ಆಮಿಷಕ್ಕೆ ಬೀಳುವ ಮುನ್ನ ಎಚ್ಚರ!

ಈ ಘಟನೆ ಮೊಬೈಲ್ ಬಳಕೆದಾರರಿಗೆ ಎಚ್ಚರಿಕೆಯ ಗಂಟೆಯಾಗಿದೆ. ಸಾಮಾಜಿಕ ಜಾಲತಾಣಗಳಲ್ಲಿ ಕಾಣಿಸುವ ಪ್ರತಿಯೊಂದು ಜಾಹೀರಾತೂ ಸುರಕ್ಷಿತವಲ್ಲ. ಉಚಿತ ಸೇವೆಯ ಹೆಸರಿನಲ್ಲಿ ವಂಚಕರು ಅಪಾಯಕಾರಿ ಆ್ಯಪ್‌ಗಳನ್ನು ಡೌನ್‌ಲೋಡ್ ಮಾಡಿಸುವ ಮೂಲಕ ಮೊಬೈಲ್ ಮತ್ತು ಹಣಕಾಸಿನ ಮಾಹಿತಿಗೆ ಅಪಾಯ ಉಂಟುಮಾಡಬಹುದು.

Also Read ವೈರಲ್ ವೀಡಿಯೊ ….ನಗು ಆರೋಗ್ಯಕ್ಕೆ ಒಳ್ಳೆಯದು, ಆದ್ರೆ ಹೆಣ್ಣುಮಗುವಿನ ಹೆಣದ ಮುಂದೆ ನಕ್ಕರೆ.. ಏನಂತಾರೆ?ತಮಿಳುನಾಡಿನ ಜನ ಕಣ್ಣೀರಲ್ಲಿರುವಾಗ ಇವರಿಗೆ ಜೋಕ್ಸ್‌ ನೆನಪಾಯ್ತಾ? ಏನದು ಅಂತ ಜೋಕ್ಸ್ …

ಈ ನಕಲಿ ಆಪ್‌ಗಳು ನಿಮ್ಮ ಫೋನ್‌ಗೆ ಬರುವ OTP, ಎಸ್‌ಎಮ್‌ಎಸ್ ಮತ್ತು ಬ್ಯಾಂಕಿಂಗ್ ಪಾಸ್‌ವರ್ಡ್‌ಗಳನ್ನು ಕದ್ದು ವಂಚಕರಿಗೆ ರವಾನಿಸುತ್ತವೆ.ನೀವು ಆ ಲಿಂಕ್ ಕ್ಲಿಕ್ ಮಾಡಿ ಆಪ್ ಇನ್‌ಸ್ಟಾಲ್ ಮಾಡಿದಾಗ, ಅದು ನಿಮ್ಮ ಫೋನ್ ಅನ್ನು ಹ್ಯಾಕ್ ಮಾಡುತ್ತದೆ ,ಮಾಲ್‌ವೇರ್ ಇನ್‌ಸ್ಟಾಲ್ ಆಗುತ್ತದೆ.

ಕೆಲವೊಮ್ಮೆ ₹1 ಟ್ರಯಲ್ ಆಫರ್ ನೀಡಿ ನಂತರ ಪ್ರತಿ ತಿಂಗಳು ಆಟೋಮ್ಯಾಟಿಕ್ ಆಗಿ ನಿಮ್ಮ ಖಾತೆಯಿಂದ ಹಣ ಕಟ್‌ ಆಗುವಂತೆ ಮಾಡುತ್ತಾರೆ. Google Pay ಅಥವಾ PhonePe ಆಪ್‌ಗಳ “Auto-pay” ಸೆಕ್ಷನ್‌ಗೆ ಹೋಗಿ ಇಂತಹ ಸಬ್‌ಸ್ಕ್ರಿಪ್ಷನ್‌ಗಳನ್ನು ತಕ್ಷಣ ಕ್ಯಾನ್ಸಲ್ ಮಾಡಿ.

ಸಾರ್ವಜನಿಕರು ನೆನಪಿಡಬೇಕಾದ ಸುರಕ್ಷತಾ ಕ್ರಮಗಳು:

ಅಪರಿಚಿತ ಜಾಹೀರಾತುಗಳಲ್ಲಿರುವ ಲಿಂಕ್‌ಗಳನ್ನು ಕ್ಲಿಕ್ ಮಾಡಿ ಆ್ಯಪ್ ಡೌನ್‌ಲೋಡ್ ಮಾಡಬೇಡಿ.
ಅಧಿಕೃತ ಆ್ಯಪ್ ಸ್ಟೋರ್‌ಗಳ ಮೂಲಕವೇ ಆ್ಯಪ್‌ಗಳನ್ನು ಡೌನ್‌ಲೋಡ್ ಮಾಡಿ.
ಅಪರಿಚಿತ APK ಫೈಲ್‌ಗಳನ್ನು ಇನ್‌ಸ್ಟಾಲ್ ಮಾಡಬೇಡಿ.
ಆ್ಯಪ್ ಕೇಳುವ ಅನುಮತಿಗಳನ್ನು ಪರಿಶೀಲಿಸದೆ ಒಪ್ಪಿಗೆ ನೀಡಬೇಡಿ.
ಬ್ಯಾಂಕ್ ಖಾತೆಯ ವಹಿವಾಟುಗಳ ಮೇಲೆ ನಿರಂತರ ನಿಗಾ ಇರಿಸಿ.

Also Read ನಕಲಿ ಲೇಡಿ PSI ಅರೆಸ್ಟ್

ಹಣ ಕಳೆದುಕೊಂಡರೆ ತಕ್ಷಣ ಬ್ಯಾಂಕ್‌ಗೆ ಮಾಹಿತಿ ನೀಡಿ, ಸೈಬರ್ ವಂಚನೆ ಸಹಾಯವಾಣಿ 1930ಕ್ಕೆ ಕರೆ ಮಾಡಿ ಅಥವಾ ಅಧಿಕೃತ ಸೈಬರ್ ಕ್ರೈಂ ಪೋರ್ಟಲ್‌ನಲ್ಲಿ ದೂರು ದಾಖಲಿಸಿ. ತ್ವರಿತವಾಗಿ ದೂರು ನೀಡುವುದರಿಂದ ಹಣವನ್ನು ತಡೆಹಿಡಿಯುವ ಸಾಧ್ಯತೆ ಹೆಚ್ಚಬಹುದು; ಆದರೆ ಹಣ ವಾಪಸ್ ಸಿಗುವ ಭರವಸೆ ಇರುವುದಿಲ್ಲ.

ನೆನಪಿಡಿ: ಉಚಿತದ ಆಸೆಗೆ ಒಂದು ಕ್ಲಿಕ್ ಮಾಡುವ ಮುನ್ನ ಯೋಚಿಸಿ. ಆಕರ್ಷಕ ಜಾಹೀರಾತಿಗಿಂತ ನಿಮ್ಮ ಬ್ಯಾಂಕ್ ಖಾತೆಯ ಸುರಕ್ಷತೆ ಮುಖ್ಯ!