ಮಂಗಳೂರು: ಹಣದ ಅವಶ್ಯಕತೆಯಿದ್ದ ಮಹಿಳೆಗೆ ಪರಿಚಯದ ವ್ಯಕ್ತಿಯೊಬ್ಬರ ಮೂಲಕ ₹4.50 ಲಕ್ಷ ಸಾಲ ಕೊಡಿಸಿ, ಬಳಿಕ ಅತಿಯಾದ ಬಡ್ಡಿ ವಸೂಲಿ ಮಾಡಿರುವುದಲ್ಲದೆ ಚಕ್ರಬಡ್ಡಿ ಹೆಸರಿನಲ್ಲಿ ಮತ್ತಷ್ಟು ಹಣ ನೀಡುವಂತೆ ಬೆದರಿಕೆ ಹಾಕಿರುವ ಆರೋಪ ಕೇಳಿಬಂದಿದೆ. ಬಗ್ಗೆ ಉರುವ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಕಲಾಗಿದೆ.

ದೂರುದಾರರಾದ ಬಬಿತಾ ಅವರಿಗೆ ಹಣದ ಅಗತ್ಯವಿದ್ದ ಹಿನ್ನೆಲೆಯಲ್ಲಿ ಅವರೊಂದಿಗೆ ಕೆಲಸ ಮಾಡುತ್ತಿದ್ದ ರಾಜೇಶ್ವರಿ ಎಂಬುವರು ಪರಿಚಯದ ಕೊಟ್ಟಾರ ಚೌಕಿ ನಿವಾಸಿ ತಾನ್ ಸಿಂಗ್ ಎಂಬಾತನಿಂದ 2026ರ ಜುಲೈ ತಿಂಗಳಲ್ಲಿ ಹಂತ ಹಂತವಾಗಿ ಐದು ಬಾರಿ ಒಟ್ಟು ₹4.50 ಲಕ್ಷ ಹಣವನ್ನು ಪಡೆದು ಬಬಿತಾ ಅವರಿಗೆ ನೀಡಿದ್ದರು ಎನ್ನಲಾಗಿದೆ.

ಆರಂಭದಲ್ಲಿ ತಿಂಗಳ ಬಡ್ಡಿ ಆಧಾರದಲ್ಲಿ ಸಾಲ ನೀಡಿದ್ದ ತಾನ್ ಸಿಂಗ್, ಬಳಿಕ ದಿನದ ಬಡ್ಡಿಯಂತೆ ಪ್ರತಿ ₹1 ಲಕ್ಷಕ್ಕೆ ₹15 ಸಾವಿರ ಬಡ್ಡಿ ನೀಡಬೇಕು ಎಂದು ರಾಜೇಶ್ವರಿ ಅವರಿಗೆ ಒತ್ತಡ ಹಾಗೂ ಬೆದರಿಕೆ ಹಾಕಿದ್ದಾನೆ ಎಂದು ದೂರಿನಲ್ಲಿ ಆರೋಪಿಸಲಾಗಿದೆ.

ಈ ವಿಚಾರ ತಿಳಿದ ಬಬಿತಾ, ತಮ್ಮ ಬಳಿ ಹಣವಿಲ್ಲದ ಕಾರಣ ಪರಿಚಯಸ್ಥರಿಂದ ಸಾಲ ಪಡೆದು, ರಾಜೇಶ್ವರಿ ಮೂಲಕ ಈವರೆಗೆ ಸುಮಾರು ₹7ರಿಂದ ₹8 ಲಕ್ಷದವರೆಗೆ ಬಡ್ಡಿ ಹಣ ಪಾವತಿಸಿರುವುದಾಗಿ ತಿಳಿಸಿದ್ದಾರೆ.

ಬಳಿಕ ಬಡ್ಡಿ ಪಾವತಿಯನ್ನು ನಿಲ್ಲಿಸಿ ಅಸಲು ಹಣವನ್ನು ವಾಪಸ್ ನೀಡುವುದಾಗಿ ರಾಜೇಶ್ವರಿ ಮೂಲಕ ತಾನ್ ಸಿಂಗ್‌ಗೆ ತಿಳಿಸಲಾಗಿತ್ತು. ಅದರಂತೆ ಜುಲೈ 17ರಂದು ₹3 ಲಕ್ಷ ಹಣವನ್ನು ರಾಜೇಶ್ವರಿ ಮೂಲಕ ನೀಡಲಾಗಿತ್ತು. ಆದರೆ, ಇನ್ನೂ ಬಡ್ಡಿ ಸೇರಿ ₹4.50 ಲಕ್ಷ ಬಾಕಿ ಇದೆ. ಅದಕ್ಕೆ ಮತ್ತೆ ₹1 ಲಕ್ಷ ಚಕ್ರಬಡ್ಡಿ ಸೇರಿಸಿ ನೀಡಬೇಕು ಎಂದು ತಾನ್ ಸಿಂಗ್ ಒತ್ತಾಯಿಸಿದ್ದಾನೆ ಎಂದು ದೂರಿನಲ್ಲಿ ತಿಳಿಸಲಾಗಿದೆ.

ಸಮಯಾವಕಾಶ ನೀಡುವಂತೆ ಬಬಿತಾ ಮನವಿ ಮಾಡಿಕೊಂಡರೂ, ಆರೋಪಿ ಒಪ್ಪದೆ, “ನಿಮ್ಮಿಬ್ಬರನ್ನು ಸಾಯಿಸುತ್ತೇನೆ, ನೀವು ಕೆಲಸ ಮಾಡುವ ಸ್ಥಳಕ್ಕೆ ಬರುತ್ತೇನೆ” ಎಂದು ಜೀವ ಬೆದರಿಕೆ ಹಾಕಿದ್ದಾನೆ ಎಂದು ಆರೋಪಿಸಲಾಗಿದೆ.

ಇದಲ್ಲದೆ, ಜುಲೈ 23ರಂದು ತಾನ್ ಸಿಂಗ್ ಇನ್ನೂ ₹9.37 ಲಕ್ಷ ಹಣ ಬಾಕಿ ಇದೆ ಎಂದು ತಿಳಿಸಿದ್ದಾನೆ ಎನ್ನಲಾಗಿದೆ. ಮುಂದೆಯೂ ಚಕ್ರಬಡ್ಡಿಯ ನೆಪದಲ್ಲಿ ಬಬಿತಾ ಹಾಗೂ ರಾಜೇಶ್ವರಿ ಅವರನ್ನು ಬೆದರಿಸಿ ಹೆಚ್ಚಿನ ಹಣ ವಸೂಲಿ ಮಾಡುವ ಸಾಧ್ಯತೆ ಇರುವುದಾಗಿ ಆತಂಕ ವ್ಯಕ್ತಪಡಿಸಿರುವ ಪಿರ್ಯಾದಿದಾರರು, ಆರೋಪಿಯ ವಿರುದ್ಧ ಸೂಕ್ತ ಕಾನೂನು ಕ್ರಮ ಕೈಗೊಳ್ಳುವಂತೆ ಉರ್ವ ಪೊಲೀಸರಿಗೆ ದೂರು ನೀಡಿದ್ದಾರೆ.

ದೂರಿನ ಆಧಾರದ ಮೇಲೆ ಉರ್ವ ಪೊಲೀಸರು ದೂರು ದಾಖಲಿಸಿಕೊಂಡು ಪ್ರಕರಣದ ಆರೋಪಗಳನ್ನು ಪರಿಶೀಲಿಸಿ ಮುಂದಿನ ಕಾನೂನು ಕ್ರಮ ಕೈಗೊಳ್ಳುತ್ತಿದ್ದಾರೆ.