ಬೆಂಗಳೂರು:
ಹಣ ಸಂಪಾದಿಸುವುದು ಮಾತ್ರವಲ್ಲ… ಹಣವನ್ನು ಹೇಗೆ ಉಳಿಸಬೇಕು, ಎಲ್ಲಿ ಖರ್ಚು ಮಾಡಬೇಕು, ಹೇಗೆ ಸುರಕ್ಷಿತವಾಗಿ ಬಳಸಬೇಕು ಎಂಬ ಅರಿವೂ ಜೀವನದ ಬಹುಮುಖ್ಯ ಪಾಠ. ಈ ಪಾಠವನ್ನು ಮಕ್ಕಳಿಗೆ ಶಾಲಾ ಹಂತದಲ್ಲೇ ಕಲಿಸುವ ಮಹತ್ವದ ಹೆಜ್ಜೆಯನ್ನು ಶಿಕ್ಷಣ ಇಲಾಖೆ ಇಟ್ಟಿದೆ.

ಭವಿಷ್ಯದ ಪೀಳಿಗೆಗೆ ಜೀವನದ ಮತ್ತೊಂದು ಮುಖ್ಯ ಪಾಠ

ಮಕ್ಕಳಿಗೆ ಗಣಿತ ಕಲಿಸುತ್ತೇವೆ… ವಿಜ್ಞಾನ ಕಲಿಸುತ್ತೇವೆ… ಭಾಷೆ ಕಲಿಸುತ್ತೇವೆ. ಆದರೆ ಜೀವನದಲ್ಲಿ ಗಳಿಸುವ ಹಣವನ್ನು ಹೇಗೆ ನಿರ್ವಹಿಸಬೇಕು ಎಂಬುದನ್ನೂ ಕಲಿಸುವುದು ಅಷ್ಟೇ ಮುಖ್ಯ.

ರಾಜ್ಯದ ಕರ್ನಾಟಕ ಪಬ್ಲಿಕ್ ಶಾಲೆಗಳು ಸೇರಿದಂತೆ 956 ಶಾಲೆಗಳಲ್ಲಿ 2026-27ನೇ ಶೈಕ್ಷಣಿಕ ವರ್ಷದಿಂದ 8ರಿಂದ 12ನೇ ತರಗತಿ ವಿದ್ಯಾರ್ಥಿಗಳಿಗೆ ಹಣಕಾಸು ಸಾಕ್ಷರತಾ ಶಿಕ್ಷಣ ನೀಡಲು ಕ್ರಮ ಕೈಗೊಳ್ಳಲಾಗಿದೆ.

ಹಣದ ಮೌಲ್ಯ ಅರಿಯುವ ವಯಸ್ಸಿನಲ್ಲೇ ಪಾಠ

ಇಂದಿನ ಮಕ್ಕಳು ಚಿಕ್ಕ ವಯಸ್ಸಿನಿಂದಲೇ ಡಿಜಿಟಲ್ ಪಾವತಿ, ಆನ್‌ಲೈನ್ ಖರೀದಿ ಹಾಗೂ ವಿವಿಧ ಹಣಕಾಸು ಸೇವೆಗಳನ್ನು ನೋಡುತ್ತಿದ್ದಾರೆ. ಆದರೆ ಹಣ ಕೈಗೆ ಬರುವುದು ಮತ್ತು ಹಣವನ್ನು ಜವಾಬ್ದಾರಿಯಿಂದ ನಿರ್ವಹಿಸುವುದು ಎರಡೂ ಬೇರೆ.

ಹೀಗಾಗಿ ಬ್ಯಾಂಕಿಂಗ್ ವ್ಯವಸ್ಥೆ ಹೇಗೆ ಕೆಲಸ ಮಾಡುತ್ತದೆ?
ಬಜೆಟ್ ಎಂದರೇನು?
ಉಳಿತಾಯ ಏಕೆ ಮುಖ್ಯ?
ಡಿಜಿಟಲ್ ಪಾವತಿಯಲ್ಲಿ ಯಾವ ಮುನ್ನೆಚ್ಚರಿಕೆ ಬೇಕು?
ಸಾಲ ಪಡೆಯುವಾಗ ಏನು ಗಮನಿಸಬೇಕು?
ವಿಮೆ ಮತ್ತು ಹೂಡಿಕೆ ಎಂದರೇನು?
ಆನ್‌ಲೈನ್ ಹಣಕಾಸು ವಂಚನೆಗಳಿಂದ ಹೇಗೆ ಎಚ್ಚರವಾಗಬೇಕು?

ಇಂತಹ ನಿಜ ಜೀವನಕ್ಕೆ ನೇರವಾಗಿ ಸಂಬಂಧಿಸಿದ ಹಣಕಾಸು ಜ್ಞಾನವನ್ನು ವಿದ್ಯಾರ್ಥಿಗಳಿಗೆ ಪರಿಚಯಿಸುವುದು ಯೋಜನೆಯ ಪ್ರಮುಖ ಉದ್ದೇಶವಾಗಿದೆ.

ತಿಂಗಳಿಗೆ ಒಂದು ವಿದ್ಯಾರ್ಥಿ ಕೇಂದ್ರಿತ ಚಟುವಟಿಕೆ

ಯೋಜನೆಯಡಿ ಶಾಲೆಗಳಲ್ಲಿ ತಿಂಗಳಿಗೆ ಒಂದು ವಿದ್ಯಾರ್ಥಿ ಕೇಂದ್ರಿತ ಚಟುವಟಿಕೆ ನಡೆಸಲು ಸೂಚಿಸಲಾಗಿದೆ. ಚಟುವಟಿಕೆಗಳ ಮೂಲಕ ಮಕ್ಕಳಿಗೆ ಕೇವಲ ಪಠ್ಯಜ್ಞಾನವಲ್ಲದೆ, ಹಣವನ್ನು ನಿರ್ವಹಿಸುವ ಪ್ರಾಯೋಗಿಕ ತಿಳುವಳಿಕೆಯನ್ನೂ ಬೆಳೆಸುವ ಉದ್ದೇಶ ಹೊಂದಲಾಗಿದೆ.

ಪ್ರತಿ ಶಾಲೆಗೆ ₹5,000 ಅನುದಾನ ನೀಡಲಾಗುತ್ತಿದ್ದು, ಒಟ್ಟು ₹47.80 ಲಕ್ಷ ಮೀಸಲಿಡಲಾಗಿದೆ ಎಂದು ನೀಡಿರುವ ಮಾಹಿತಿಯಲ್ಲಿ ತಿಳಿಸಲಾಗಿದೆ.

ಬ್ಯಾಂಕ್‌ಗಳು, ಹಣಕಾಸು ಸಂಸ್ಥೆಗಳು, ಚಾರ್ಟರ್ಡ್ ಅಕೌಂಟೆಂಟ್‌ಗಳು, ಹಣಕಾಸು ಸಲಹೆಗಾರರು ಹಾಗೂ ಉದ್ಯಮಶೀಲತಾ ಅಭಿವೃದ್ಧಿ ಕ್ಷೇತ್ರದ ಪರಿಣಿತರ ಸಹಕಾರದೊಂದಿಗೆ ಕಾರ್ಯಕ್ರಮಗಳನ್ನು ನಡೆಸುವ ಉದ್ದೇಶವೂ ಇದೆ.

ಮಕ್ಕಳಿಗೆ ಕಲಿಯಬೇಕಾದ ‘ಮನಿ ಮಂತ್ರ’

ಈ ಯೋಜನೆಯ ಪ್ರಮುಖ ಪಾಠವೆಂದರೆ — ಹಣದ ಮೌಲ್ಯ ತಿಳಿದುಕೊಳ್ಳುವುದು.

ಅಗತ್ಯ ಮತ್ತು ಆಸೆಯ ನಡುವಿನ ವ್ಯತ್ಯಾಸ ಅರಿಯುವುದು,
ಖರ್ಚು ಮಾಡುವ ಮುನ್ನ ಯೋಚಿಸುವುದು,
ಉಳಿತಾಯದ ಅಭ್ಯಾಸ ಬೆಳೆಸುವುದು,
ಡಿಜಿಟಲ್ ವಹಿವಾಟಿನಲ್ಲಿ ಎಚ್ಚರಿಕೆ ವಹಿಸುವುದು,
ಸಾಲ ಮತ್ತು ಹಣಕಾಸು ಬದ್ಧತೆಗಳ ಬಗ್ಗೆ ತಿಳಿದುಕೊಳ್ಳುವುದು,
ಹಾಗೂ ವಂಚನೆಗಳಿಂದ ಸ್ವತಃ ರಕ್ಷಿಸಿಕೊಳ್ಳುವುದು.

ಇವೆಲ್ಲವೂ ಮುಂದಿನ ಜೀವನದಲ್ಲಿ ಪ್ರತಿಯೊಬ್ಬರಿಗೂ ಬೇಕಾಗುವ ಮೂಲಭೂತ ಕೌಶಲಗಳು.