ದೇವಸ್ಥಾನದ ಪಕ್ಕದಲ್ಲೇ, ಅಪಾರ್ಟ್‌ಮೆಂಟ್‌ನ ಕೆಳಭಾಗದಲ್ಲೇ ಪಟಾಕಿಗಳ ಸಂಗ್ರಹವೇ? ಪರಿಶೀಲನೆಗೆ ಸಾರ್ವಜನಿಕರ ಒತ್ತಾಯ…. ಪಟಾಕಿ ಮಾರಾಟ ಮಾಡುವುದಕ್ಕೆ ನೀಡಲಾಗುವ ಲೈಸೆನ್ಸ್ ನಲ್ಲೂ ಸಾಕಷ್ಟು ನಿಯಮಗಳನ್ನು ಮುರಿಯಲಾಗಿದೆ ಎಂಬ ಆರೋಪಗಳು ಇವೆ.

ಮಂಗಳೂರು: ಕರಾವಳಿ ಭಾಗದಲ್ಲಿ ಪಟಾಕಿಗಳ ಸಂಗ್ರಹ ಮತ್ತು ಸಾಗಾಟಕ್ಕೆ ಸಂಬಂಧಿಸಿದಂತೆ ಗಂಭೀರ ಆರೋಪಗಳು ಕೇಳಿಬಂದಿದ್ದು, ಜನನಿಬಿಡ ಪ್ರದೇಶಗಳಲ್ಲಿ ಪಟಾಕಿಗಳನ್ನು ಸಂಗ್ರಹಿಸಲಾಗುತ್ತಿದೆ ಎಂಬ ಮಾಹಿತಿ ಸಾರ್ವಜನಿಕರ ಸುರಕ್ಷತೆಯ ಬಗ್ಗೆ ಆತಂಕ ಮೂಡಿಸಿದೆ. ಮಂಗಳೂರಿನ ಕಾಳಿಕಾಂಬ ರಸ್ತೆ, ಮುಖ್ಯಪ್ರಾಣ ದೇವಸ್ಥಾನದ ಸಮೀಪ ಹಾಗೂ ಎಂ.ಪಿ.ಟಿ. ರಸ್ತೆಯಲ್ಲಿರುವ ಕೆಲವು ವಾಣಿಜ್ಯ ಸ್ಥಳಗಳಲ್ಲಿ ಪಟಾಕಿಗಳನ್ನು ಸಂಗ್ರಹಿಸಲಾಗುತ್ತಿದೆ ಎಂಬ ಆರೋಪಗಳ ಹಿನ್ನೆಲೆಯಲ್ಲಿ ಸಂಬಂಧಪಟ್ಟ ಇಲಾಖೆಗಳು ಪರಿಶೀಲನೆ ನಡೆಸಬೇಕೆಂಬ ಒತ್ತಾಯ ವ್ಯಕ್ತವಾಗಿದೆ. ಹಾಗೆಯೇ ಪಟಾಕಿ ಮಾರಾಟಗಾರರು ಎಲ್ಲಾ ನಿಯಮಗಳನ್ನು ಪಾಲಿಸುತ್ತಿದ್ದಾರೆಯೇ, ಲೈಸನ್ಸ್ ಗಳನ್ನು ನಿಯಮಾನುಸಾರ ಪಡೆದಿದ್ದಾರೆಯೇ ಅನ್ನೋದು ಕನ್ಫರ್ಮ್ ಆಗಬೇಕಿದೆ ಎಂಬ ಆಗ್ರಹ ವ್ಯಕ್ತವಾಗುತ್ತಿದೆ ಸಾರ್ವಜನಿಕವಲಯದಿಂದ.

ದೇವಸ್ಥಾನದ ಪಕ್ಕದಲ್ಲೇ ಪಟಾಕಿ ದಾಸ್ತಾನು?

ಮಂಗಳೂರಿನ ಕಾಳಿಕಾಂಬ ರಸ್ತೆಯಲ್ಲಿರುವ ಮುಖ್ಯಪ್ರಾಣ ದೇವಸ್ಥಾನದ ಪಕ್ಕದಲ್ಲೇ ಪಟಾಕಿಗಳನ್ನು ಸಂಗ್ರಹಿಸಲಾಗುತ್ತಿದೆ ಎಂಬ ಆರೋಪ ಕೇಳಿಬಂದಿದೆ. ಧಾರ್ಮಿಕ ಸ್ಥಳಗಳು, ವಾಣಿಜ್ಯ ಮಳಿಗೆಗಳು ಹಾಗೂ ಜನರು ನಿರಂತರವಾಗಿ ಸಂಚರಿಸುವ ಪ್ರದೇಶಗಳ ಸಮೀಪ ಪಟಾಕಿ ಬಂಡಲ್ಗಳು ಬಂದು ಬೀಳುತ್ತಿವೆ, ಟ್ರಾನ್ಸ್ಪೋರ್ಟ್ ಮೂಲಕ ಬರುವ ಸ್ಫೋಟಕ ಸ್ವರೂಪದ ವಸ್ತುಗಳನ್ನು ಸಂಗ್ರಹಿಸಲಾಗುತ್ತಿದೆ ಎಂಬ ಆರೋಪ ನಿಜವೇ ಆಗಿದ್ದರೆ, ಇದು ಸಾರ್ವಜನಿಕ ಸುರಕ್ಷತೆಯ ದೃಷ್ಟಿಯಿಂದ ಗಂಭೀರವಾಗಿ ಪರಿಶೀಲಿಸಬೇಕಾದ ವಿಚಾರವಾಗಿದೆ.

Also Read Must read…ನಾಗಪ್ರಸನ್ನರ ನ್ಯಾಯಾಲಯದಲ್ಲಿ 'ಸುಳ್ಳು ಜಾತಿ-ಆದಾಯ ಪ್ರಮಾಣಪತ್ರ ಮುಂದಿಟ್ಟ ಸಾಹುಕಾರ್ ಪುತ್ರಿಗೆ ಕ್ಲಾಸ್! ಅರುಣ್ ಶ್ಯಾಮ್ ವಾದಕ್ಕೆ ನಾಗಪ್ರಸನ್ನರ ಒಂದೊಂದು ಪ್ರಶ್ನೆಯೂ ವ್ಯವಸ್ಥೆಗೆ ಕನ್ನಡಿಯಾಯಿತು!"

ಅಪಾರ್ಟ್‌ಮೆಂಟ್‌ನ ಕೆಳಭಾಗದ ಅಂಗಡಿ ಕೋಣೆಯಲ್ಲಿ ಪಟಾಕಿ ಸಂಗ್ರಹ?

ಇಲ್ಲಿನ ಅಪಾರ್ಟ್‌ಮೆಂಟ್‌ನ ಕೆಳಭಾಗದಲ್ಲಿರುವ ಅಂಗಡಿ ಕೋಣೆಯಲ್ಲಿ ಪಟಾಕಿಗಳನ್ನು ದಾಸ್ತಾನು ಮಾಡಲಾಗಿದೆ ಎಂಬ ಆರೋಪವೂ ಕೇಳಿಬಂದಿದೆ. ಜನವಸತಿ ಕಟ್ಟಡದ ಸಮೀಪ ಇಂತಹ ಸಂಗ್ರಹವಿದ್ದಲ್ಲಿ, ಅದರ ಪ್ರಮಾಣ, ಸಂಗ್ರಹಣೆಗೆ ಪಡೆದಿರುವ ಅನುಮತಿ, ಅಗ್ನಿ ಸುರಕ್ಷತಾ ವ್ಯವಸ್ಥೆಗಳು ಹಾಗೂ ಸ್ಥಳದ ಕಾನೂನುಬದ್ಧತೆಯನ್ನು ಅಧಿಕಾರಿಗಳು ಪರಿಶೀಲಿಸುವುದು ಅಗತ್ಯವಾಗಿದೆ.

ಮಿಸ್ಸ್ ಟ್ರಾನ್ಸ್‌ಪೋರ್ಟ್ ಸಂಸ್ಥೆಯಲ್ಲಿ ಪಟಾಕಿಗಳ ಬಾಕ್ಸ್‌ಗಳು?

ಮಂಗಳೂರಿನ ಎಂ.ಪಿ.ಟಿ. ರಸ್ತೆಯಲ್ಲಿರುವ ಎಂ.ಎಸ ಟ್ರಾನ್ಸ್‌ಪೋರ್ಟ್ ಸಂಸ್ಥೆಯ ಕಚೇರಿಯಲ್ಲಿ ಪಟಾಕಿಗಳದ್ದು ಎನ್ನಲಾದ ಹಲವಾರು ಬಾಕ್ಸ್‌ಗಳು ಕಂಡು ಬರುತ್ತಿವೆ ಎಂಬ ಆರೋಪ ಕೇಳಿ ಬರುತ್ತಿದೆ. ಟ್ರಾನ್ಸ್‌ಪೋರ್ಟ್ ಏಜೆನ್ಸಿಯನ್ನು ಪಟಾಕಿಗಳ ಸಂಗ್ರಹ ಮತ್ತು ವಿತರಣೆಗೆ ಬಳಸಲಾಗುತ್ತಿದೆಯೇ ಎಂಬ ಪ್ರಶ್ನೆಯೂ ಉದ್ಭವಿಸಿದೆ. ಟ್ರಾನ್ಸ್ಪೋರ್ಟ್ ಕಂಪನಿಗಳು ಪಟಾಕಿಗಳ ಬಾಕ್ಸಿಗೆ ಐದರಿಂದ ಹತ್ತು ಪಟ್ಟು ಹೆಚ್ಚು ಬಿಲ್ ಮಾಡುತ್ತಿದ್ದಾರೆ ಎನ್ನುವ ವರ್ತಮಾನವು ಅದೇ ವಲಯದಿಂದ ಕೇಳಿ ಬರುತ್ತದೆ.

ತಮಿಳುನಾಡಿನಿಂದ ಕೊರಿಯರ್ ಅಥವಾ ಸಾರಿಗೆ ಸೇವೆಯ ಮೂಲಕ ಪಟಾಕಿಗಳನ್ನು ತರಿಸಲಾಗುತ್ತಿದೆ ಎಂಬ ಆರೋಪವೂ ಕೇಳಿಬಂದಿದೆ. ಆದರೆ, ಪಟಾಕಿಗಳ ಸಾಗಾಟಕ್ಕೆ ಸಂಬಂಧಿಸಿದ ದಾಖಲೆಗಳು, ಪರವಾನಗಿಗಳು ಮತ್ತು ಸಂಗ್ರಹದ ನೈಜ ಸ್ಥಿತಿಯನ್ನು ಪರಿಶೀಲಿಸಿದ ಬಳಿಕವಷ್ಟೇ ಈ ಆರೋಪಗಳ ಸತ್ಯಾಸತ್ಯತೆ ಸ್ಪಷ್ಟವಾಗಬೇಕಿದೆ.

ಪರವಾನಗಿ ಇದೆಯೇ? ನಿಯಮಗಳ ಪಾಲನೆಯಾಗುತ್ತಿದೆಯೇ?

ಪಟಾಕಿಗಳ ಸಂಗ್ರಹ, ಮಾರಾಟ ಮತ್ತು ಸಾಗಾಟಕ್ಕೆ ಸಂಬಂಧಿಸಿದಂತೆ ಅನ್ವಯಿಸುವ ಸ್ಫೋಟಕ ನಿಯಮಗಳು ಹಾಗೂ ಅಗ್ನಿ ಸುರಕ್ಷತಾ ಮಾನದಂಡಗಳನ್ನು ಪಾಲಿಸಲಾಗಿದೆಯೇ ಎಂಬುದು ಪ್ರಮುಖ ಪ್ರಶ್ನೆಯಾಗಿದೆ. ಮಂಗಳೂರಿನಲ್ಲಿ ಕೇವಲ ಎರಡು ಸಂಸ್ಥೆಗಳಿಗಷ್ಟೇ ಎಕ್ಸ್ಪೋಸಿವ್ ಪರ್ಮಿಷನ್ ಇದೆ ಎನ್ನಲಾಗುತ್ತದೆ. ಆದರೆ ಉಳಿದವುಗಳ ಪರಿಸ್ಥಿತಿ ಏನು? ಅವುಗಳು ನಿಯಮಾನುಸಾರ ವ್ಯವಹಾರ ನಡೆಸುತ್ತಿದ್ದಾರಾ? ನಗರ ಪಾಲಿಕೆಯಿಂದ ಟ್ರೇಡ್ ಲೈಸೆನ್ಸ್ ಇದರ ಸಂಬಂಧ ಪಡೆದಿದ್ದಾರಾ? ಫೈರ್ ಇಲಾಖೆಯಿಂದ ಸರ್ಟಿಫಿಕೇಟ್ ಪಡೆದಿದ್ದಾರಾ? ಮೆಸ್ಕಾಂ ಪರಿಶೀಲಿಸಿದೆಯಾ ಬಿಲ್ಡಿಂಗ್ ಗಳನ್ನು. ಸಂಬಂಧಪಟ್ಟ ಸ್ಥಳಗಳಲ್ಲಿ ಅಗತ್ಯ ಪರವಾನಗಿ ಇದೆಯೇ, ಅನುಮತಿಸಲಾದ ಪ್ರಮಾಣಕ್ಕಿಂತ ಹೆಚ್ಚಿನ ಪಟಾಕಿಗಳನ್ನು ಸಂಗ್ರಹಿಸಲಾಗಿದೆಯೇ ಮತ್ತು ಸಂಗ್ರಹಣೆಗೆ ನಿಗದಿಪಡಿಸಿದ ಸುರಕ್ಷತಾ ಷರತ್ತುಗಳನ್ನು ಪಾಲಿಸಲಾಗಿದೆಯೇ ಎಂಬುದನನ್ನೆಲ್ಲ ಪರಿಶೀಲಿಸಬೇಕಾಗಿದೆ.

Also Read ಮಂಗಳೂರು ಏರ್‌ಪೋರ್ಟ್‌ನಲ್ಲಿ ಉಬರ್ …

ಅನಧಿಕೃತವಾಗಿ ಪಟಾಕಿಗಳನ್ನು ತಂದು ಗ್ರಾಹಕರಿಗೆ ವಿತರಿಸಲಾಗುತ್ತಿದೆ ಎಂಬ ಆರೋಪವೂ ಕೇಳಿಬಂದಿದ್ದು, ಈ ಕುರಿತು ಸಂಬಂಧಪಟ್ಟ ಅಧಿಕಾರಿಗಳು ದಾಖಲೆಗಳನ್ನು ಪರಿಶೀಲಿಸಿ ಸೂಕ್ತ ತನಿಖೆ ನಡೆಸಬೇಕಿದೆ.

ಪೊಲೀಸ್ ಇಲಾಖೆ ಮತ್ತು ಸಂಬಂಧಪಟ್ಟ ಅಧಿಕಾರಿಗಳ ಗಮನಕ್ಕೆ

ಜನವಸತಿ ಪ್ರದೇಶಗಳಲ್ಲಿ ಪಟಾಕಿಗಳ ಬೃಹತ್ ಸಂಗ್ರಹವಿದೆ ಎಂಬ ಆರೋಪಗಳ ಹಿನ್ನೆಲೆಯಲ್ಲಿ ಮಂಗಳೂರು ಪೊಲೀಸ್ ಇಲಾಖೆ, ಅಗ್ನಿಶಾಮಕ ಮತ್ತು ತುರ್ತು ಸೇವೆಗಳ ಇಲಾಖೆ ಹಾಗೂ ಸ್ಫೋಟಕ ಪರವಾನಗಿ ಮತ್ತು ನಿಯಂತ್ರಣಕ್ಕೆ ಸಂಬಂಧಿಸಿದ ಸಮರ್ಥ ಅಧಿಕಾರಿಗಳು ಸ್ಥಳ ಪರಿಶೀಲನೆ ನಡೆಸಬೇಕೆಂಬ ಒತ್ತಾಯ ವ್ಯಕ್ತವಾಗಿದೆ.

ಆರೋಪಗಳು ನಿಜವೇ ಎಂಬುದನ್ನು ಖಚಿತಪಡಿಸಿಕೊಳ್ಳುವುದು, ಸಂಗ್ರಹದ ಪ್ರಮಾಣವನ್ನು ಪರಿಶೀಲಿಸುವುದು, ಪರವಾನಗಿ ಮತ್ತು ಸಾಗಾಟದ ದಾಖಲೆಗಳನ್ನು ತಪಾಸಣೆ ಮಾಡುವುದು ಹಾಗೂ ನಿಯಮ ಉಲ್ಲಂಘನೆ ಕಂಡುಬಂದಲ್ಲಿ ಕಾನೂನುಬದ್ಧ ಕ್ರಮ ಕೈಗೊಳ್ಳುವುದು ಅತ್ಯಗತ್ಯವಾಗಿದೆ.

ಸಾರ್ವಜನಿಕರ ಸುರಕ್ಷತೆ ಮುಖ್ಯ

ಪಟಾಕಿಗಳ ಅಸುರಕ್ಷಿತ ಸಂಗ್ರಹದಿಂದ ಬೆಂಕಿ ಅವಘಡ ಅಥವಾ ಇತರ ಅನಾಹುತ ಸಂಭವಿಸಿದರೆ ಸುತ್ತಮುತ್ತಲಿನ ನಿವಾಸಿಗಳು, ವ್ಯಾಪಾರಿಗಳು, ಗ್ರಾಹಕರು ಹಾಗೂ ಸಾರ್ವಜನಿಕರು ಅಪಾಯಕ್ಕೆ ಸಿಲುಕುವ ಸಾಧ್ಯತೆ ಇರುತ್ತದೆ. ಹೀಗಾಗಿ, ಯಾವುದೇ ಅನಾಹುತ ಸಂಭವಿಸುವ ಮೊದಲು ಆರೋಪಗಳ ಕುರಿತು ನಿಷ್ಪಕ್ಷಪಾತ ಪರಿಶೀಲನೆ ನಡೆಸಿ ವಾಸ್ತವಾಂಶಗಳನ್ನು ಬಹಿರಂಗಪಡಿಸಬೇಕಿದೆ. ಕಳೆದ ವರ್ಷ ಕುಂದಾಪುರದಲ್ಲಿ ಪತ್ರಿಕೆಯು ನಿಯಮಬಾಹಿರವಾಗಿ ನಡೆಯುತ್ತಿರುವ ಪಟಾಕಿ ವ್ಯವಹಾರದ ಸ್ವತಂತ್ರ ವರದಿಯನ್ನು ಪ್ರಕಟಿಸಿತ್ತು . ಅವತ್ತು ಪೊಲೀಸರು ಸಂಬಂಧಪಟ್ಟ ಅಧಿಕಾರಿಗಳು ಯಾವುದೇ ಕ್ರಮ ಕೈಗೊಳ್ಳದ ಕಾರಣ ಕೆಲವೇ ತಿಂಗಳುಗಳಲ್ಲಿ ಅನಾಹುತ ವಾಗಿದ್ದು ಇನ್ನು ಮರೆತು ಹೋಗಿಲ್ಲ. ದುರ್ದೈವ ಏನಂದರೆ ನಿಯಮಬಾಹಿರವಾಗಿ ಜನ ಹೊಸತಿ ಪ್ರದೇಶದಲ್ಲಿ ಪಟಾಕಿ ವ್ಯವಹಾರ ಮಾಡಿದ್ದರು ಅವರ ಮೇಲೆ ಯಾವುದೇ ಕ್ರಮ ಆಗಿಲ್ಲ ಯಾಕೆ ಅಂದರೆ, ಅಧಿಕಾರಿಗಳು ಕೂಡ ಅದರಲ್ಲಿ ಶಾಮೀಲಾದ ಕಾರಣ ಎಂಬ ಆರೋಪ ಕುಂದಾಪುರದಿಂದ ಅವತ್ತು ಕೇಳಿದ್ದು ಸುಳ್ಳಲ್ಲ. ಅಂತಹ ಅವಘಡಗಳು ಮಂಗಳೂರಿನಲ್ಲಿ ಆಗಬಾರದು ಎನ್ನುವ ಕಾರಣಕ್ಕೆ ಅಧಿಕಾರಿಗಳು ತಪಾಸಣೆ ನಡೆಸಿ ನಿಯಮಬಾಹಿರ ಮಾರಾಟಗಾರರನ್ನು ಏಜೆನ್ಸಿಗಳನ್ನು ಕಂಡುಹಿಡಿದು ಕ್ರಮ ಕೈಗೊಳ್ಳಬೇಕು ಹಾಗೆಯೇ ನಿಯಮಬಾಹಿರವಾಗಿ ಸಕಲ ಕಾನೂನನ್ನು ಉಲ್ಲಂಘಿಸಿ ಲೈಸೆನ್ಸ್ ನೀಡಿದವರ ಮೇಲು ಕ್ರಮವಾಗಬೇಕು ಅನ್ನುವುದು ಈ ಭಾಗದ ಸಾರ್ವಜನಿಕರ ಹಿತ ಬಯಸುತ್ತಿರುವವರ ಆಗ್ರಹವಾಗಿದೆ

Also Read ಹೈಕೋರ್ಟ್‌ ಅಂಗಳಕ್ಕೆ ಮೂವರು ಹೊಸ ಮುಖ!ಆ ಮೂವರು ನ್ಯಾಯಾಂಗ ಅಧಿಕಾರಿಗಳು ಯಾರೆಲ್ಲಾ..ಹೇಗೆ ಆಯ್ಕೆ..

ಈ ಪ್ರಕರಣದಲ್ಲಿ ಸಂಬಂಧಪಟ್ಟ ಸಂಸ್ಥೆಗಳ ಪರವಾನಗಿ, ಸಂಗ್ರಹಣೆಯ ನೈಜ ಸ್ಥಿತಿ ಮತ್ತು ಸುರಕ್ಷತಾ ಕ್ರಮಗಳ ಕುರಿತು ಅಧಿಕೃತ ಸ್ಪಷ್ಟನೆ ದೊರೆಯಬೇಕಿದೆ. ಆರೋಪಗಳು ದೃಢಪಟ್ಟಲ್ಲಿ ನಿಯಮಾನುಸಾರ ಕ್ರಮ ಕೈಗೊಳ್ಳಬೇಕು.