ಜಾಯಿಂಟ್ ವೆಂಚರ್ ಹೆಸರಲ್ಲಿ 16.75 ಸೆಂಟ್ಸ್ ಜಾಗ ಪಡೆದು ಮೋಸ ಎಂಬ ಆರೋಪ; 13 ವರ್ಷಗಳಿಂದ ಮನೆಗಾಗಿ ಕಾಯುತ್ತಿರುವ ಕುಟುಂಬ

ಮಂಗಳೂರು, ಅ. 22: ನಗರದ ಅತ್ತಾವರ ಸಮೀಪದ ಮಾರ್ನಮಿಕಟ್ಟೆ ಸರ್ಕಲ್ ಬಳಿ ಬಡ ಕುಟುಂಬವೊಂದಕ್ಕೆ ಸೇರಿದ 16.75 ಸೆಂಟ್ಸ್ ಜಾಗವನ್ನು ಜಾಯಿಂಟ್ ವೆಂಚರ್ ಮೂಲಕ ಅಪಾರ್ಟ್‌ಮೆಂಟ್ ನಿರ್ಮಿಸುವ ಉದ್ದೇಶದಿಂದ ಪಡೆದು, ಒಪ್ಪಂದದಂತೆ ಮನೆಗಳನ್ನು ನೀಡದೆ ವಂಚಿಸಿದ್ದಾರೆ ಎಂಬ ಆರೋಪದಡಿ ರಿಯಲ್ ಎಸ್ಟೇಟ್ ಬಿಲ್ಡರ್ ಡೊನಾಲ್ಡ್ ಪಿಂಟೋ ವಿರುದ್ಧ ಪಾಂಡೇಶ್ವರ ಪೊಲೀಸ್ ಠಾಣೆಯಲ್ಲಿ ಎಫ್‌ಐಆರ್ ದಾಖಲಾಗಿದೆ.

2013ರಲ್ಲಿ 66 ವರ್ಷದ ಮಹಿಳೆ ವಸಂತ ಹಾಗೂ ಅವರ ಕುಟುಂಬಸ್ಥರಿಗೆ ಸೇರಿದ ಜಾಗವನ್ನು ಡೊನಾಲ್ಡ್ ಪಿಂಟೋ ಕರಾರು ಪತ್ರದ ಮೂಲಕ ಪಡೆದಿದ್ದರು ಎನ್ನಲಾಗಿದೆ. ಜಾಗದಲ್ಲಿ ಅಪಾರ್ಟ್‌ಮೆಂಟ್ ನಿರ್ಮಿಸಿ, ದೂರುದಾರ ಮಹಿಳೆಗೆ ಎರಡು ಮನೆಗಳನ್ನು ಹಾಗೂ ಅವರ ಸಂಬಂಧಿ ವಸುಮತಿಗೆ ಒಂದು ಮನೆಯನ್ನು ನೀಡುವುದಾಗಿ ಒಪ್ಪಂದ ಮಾಡಿಕೊಳ್ಳಲಾಗಿತ್ತು ಎಂದು ದೂರಿನಲ್ಲಿ ತಿಳಿಸಲಾಗಿದೆ.

Also Read ಬೋಳಿಯಾರಿನಲ್ಲಿ ಸಣ್ಣ ಗಲಾಟೆಗೆ ಇಬ್ಬರ ಬಲಿ ಪ್ರಕರಣಕ್ಕೆ ಟ್ವಿಸ್ಟ್..! ಪಿಕಪ್ ಚಾಲಕನೇ ಕೊಲೆಗಾರ…?!

ಮಹಿಳೆಗೆ ತಿಳಿಯದ ಭಾಷೆಯಲ್ಲಿ ನೋಂದಣಿ?

2013ರ ಮೇ 7ರಂದು ಕುಟುಂಬದ ಹೆಸರಿನಲ್ಲಿ 99.90 ಲಕ್ಷ ರೂ. ಮೊತ್ತದ ಕರಾರು ಪತ್ರ ಮಾಡಲಾಗಿತ್ತು ಎನ್ನಲಾಗಿದೆ. ಆದರೆ, ಉಪನೋಂದಣಾಧಿಕಾರಿ ಕಚೇರಿಯಲ್ಲಿ ಮಹಿಳೆಗೆ ತಿಳಿಯದ ಇಂಗ್ಲಿಷ್ ಭಾಷೆಯಲ್ಲಿ 47 ಲಕ್ಷ ರೂ.ಗೆ ಜಾಗ ಮಾರಾಟ ಮಾಡಿರುವುದಾಗಿ ನೋಂದಣಿ ಮಾಡಲಾಗಿದೆ ಎಂದು ಕುಟುಂಬಸ್ಥರು ಆರೋಪಿಸಿದ್ದಾರೆ.

ಹಳೆಯ ಮನೆಯಿಂದ ಕುಟುಂಬವನ್ನು ತೆರವುಗೊಳಿಸಿದ ಬಳಿಕ ಬಾಡಿಗೆ ಮನೆಯಲ್ಲಿ ಇರಿಸಿ, ಬಾಡಿಗೆ ಹಣವನ್ನು ನೀಡುವುದಾಗಿ ಭರವಸೆ ನೀಡಲಾಗಿತ್ತು. ಆದರೆ, ಬಾಡಿಗೆ ಹಣವನ್ನೂ ಸರಿಯಾಗಿ ಪಾವತಿಸದೆ ಸಂತ್ರಸ್ತ ಕುಟುಂಬವನ್ನು ಸಂಕಷ್ಟಕ್ಕೆ ತಳ್ಳಲಾಗಿದೆ ಎಂಬುದು ಅವರ ಆರೋಪವಾಗಿದೆ.

ನಾಲ್ಕು ಅಂತಸ್ತಿನ ಕಟ್ಟಡ ನಿರ್ಮಾಣ, 12 ಫ್ಲ್ಯಾಟ್‌ಗಳ ಮಾರಾಟದ ಆರೋಪ!

ಸಂಬಂಧಿತ ಜಾಗದಲ್ಲಿ ನಾಲ್ಕು ಅಂತಸ್ತಿನ ಬೃಹತ್ ಅಪಾರ್ಟ್‌ಮೆಂಟ್ ನಿರ್ಮಾಣವಾಗಿದ್ದು, ಒಟ್ಟು 12 ಫ್ಲ್ಯಾಟ್‌ಗಳನ್ನು ನಿರ್ಮಿಸಲಾಗಿದೆ ಎಂದು ದೂರಿನಲ್ಲಿ ಉಲ್ಲೇಖಿಸಲಾಗಿದೆ. ಕಟ್ಟಡದ ಕೆಳ ಅಂತಸ್ತಿನ ರಸ್ತೆ ಬದಿಯ ಜಾಗವನ್ನು ವಾಣಿಜ್ಯ ಉದ್ದೇಶಕ್ಕೆ ಬಳಸಲಾಗಿದೆ ಎನ್ನಲಾಗಿದೆ.

Also Read ಗೋಲ್ಡ್ ಪ್ರಿಯರಿಗೆ ಗುಡ್ ನ್ಯೂಸ್! ಇಳಿದ ಚಿನ್ನದ ಬೆಲೆ….!ಖರೀದಿದಾರರಿಗೆ ಬಂಪರ್ ರಿಲೀಫ್.

ಆದರೆ, ಒಪ್ಪಂದದ ಪ್ರಕಾರ ತಮಗೆ ಸೇರಬೇಕಿದ್ದ ಮನೆಗಳನ್ನು ಈವರೆಗೂ ನೀಡಿಲ್ಲ. ಮನೆ ಕೊಡಿಸುವುದಾಗಿ ಭರವಸೆ ನೀಡುತ್ತಾ ಬಂದಿರುವ ಬಿಲ್ಡರ್, ಕಂತುಗಳ ರೂಪದಲ್ಲಿ ಕೇವಲ 17 ಲಕ್ಷ ರೂ. ಮಾತ್ರ ಪಾವತಿಸಿದ್ದಾರೆ ಎಂದು ಸಂತ್ರಸ್ತ ಕುಟುಂಬ ಆರೋಪಿಸಿದೆ.

ಪೊಲೀಸ್ ಕಮಿಷನರ್‌ಗೂ ಮನವಿ ಸಲ್ಲಿಸಿದ್ದ ಕುಟುಂಬ

ತಮಗಾದ ಅನ್ಯಾಯದ ಕುರಿತು ಸುಮಾರು ಒಂದು ವರ್ಷದ ಹಿಂದೆಯೇ ಕುಟುಂಬಸ್ಥರು ಮಂಗಳೂರು ಪೊಲೀಸ್ ಕಮಿಷನರ್ ಅವರನ್ನು ಭೇಟಿಯಾಗಿ ಅಹವಾಲು ಸಲ್ಲಿಸಿದ್ದರು ಎನ್ನಲಾಗಿದೆ. ಈ ಹಿನ್ನೆಲೆಯಲ್ಲಿ ಬಿಲ್ಡರ್‌ನನ್ನು ಪಾಂಡೇಶ್ವರ ಪೊಲೀಸ್ ಠಾಣೆಗೆ ಕರೆಸಲಾಗಿತ್ತು. ಈ ವೇಳೆ ಮೂರು ತಿಂಗಳೊಳಗೆ ಮನೆ ಒದಗಿಸುವುದಾಗಿ ಮುಚ್ಚಳಿಕೆ ಬರೆದುಕೊಟ್ಟಿದ್ದರೂ, ಭರವಸೆ ಈಡೇರಿಸಿಲ್ಲ ಎಂದು ಕುಟುಂಬಸ್ಥರು ದೂರಿದ್ದಾರೆ.

ನ್ಯಾಯಕ್ಕಾಗಿ ಹಲವು ವರ್ಷಗಳಿಂದ ಕಾಯುತ್ತಿದ್ದ ಕುಟುಂಬದ ದೂರಿನ ಆಧಾರದಲ್ಲಿ ಇದೀಗ ಪಾಂಡೇಶ್ವರ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.

Also Read 8 ವರ್ಷಗಳಿಂದ ತಲೆಮರೆಸಿಕೊಂಡಿದ್ದ ಆರೋಪಿಯ ಬಂಧನ

ಬಿಲ್ಡರ್ ನಾಪತ್ತೆ? ಬ್ಯಾಂಕ್ ಸಾಲದ ಸುಳಿಯಲ್ಲಿ ಆಸ್ತಿ!

ಮಾರ್ನಮಿಕಟ್ಟೆ ಸರ್ಕಲ್ ಬಳಿಯ ಅಪಾರ್ಟ್‌ಮೆಂಟ್ ಕುರಿತು ಸ್ಥಳೀಯರು ನೀಡಿರುವ ಮಾಹಿತಿಯ ಪ್ರಕಾರ, ಕಟ್ಟಡದಲ್ಲಿರುವ 11 ಫ್ಲ್ಯಾಟ್‌ಗಳಿಗೆ ಸಂಬಂಧಿಸಿದಂತೆ ಬ್ಯಾಂಕ್ ಸಾಲದ ವಿಚಾರವಿದ್ದು, ಅವುಗಳನ್ನು ಜಪ್ತಿ ಮಾಡಲಾಗಿದೆ ಎನ್ನಲಾಗಿದೆ. ಇದೇ ವೇಳೆ, ಡೊನಾಲ್ಡ್ ಪಿಂಟೋ ಅವರಿಗೆ ಸೇರಿದ ಸಮೀಪದ ಸ್ವಂತ ಮನೆಯೂ ಬ್ಯಾಂಕ್ ಸಾಲದ ಹಿನ್ನೆಲೆಯಲ್ಲಿ ಜಪ್ತಿಯಾಗಿದೆ ಎಂದು ಸ್ಥಳೀಯರು ತಿಳಿಸಿದ್ದಾರೆ.

ಬಿಲ್ಡರ್ ಡೊನಾಲ್ಡ್ ಪಿಂಟೋ ಸದ್ಯ ನಾಪತ್ತೆಯಾಗಿದ್ದಾರೆ ಎಂಬ ಮಾಹಿತಿಯೂ ಸ್ಥಳೀಯರ ಮೂಲಕ ದೊರಕುತ್ತಿದೆ.

ಒಟ್ಟಿನಲ್ಲಿ, ಜಾಗವನ್ನು ನೀಡಿದ ಬಡ ಕುಟುಂಬಕ್ಕೆ ಒಪ್ಪಂದದಂತೆ ಮನೆಗಳು ಸಿಗದೆ ಸಂಕಷ್ಟ ಎದುರಾಗಿದೆ ಎಂಬ ಆರೋಪ ಗಂಭೀರ ಚರ್ಚೆಗೆ ಕಾರಣವಾಗಿದೆ. ಪ್ರಕರಣದ ತನಿಖೆಯಿಂದ ಒಪ್ಪಂದದ ನೈಜ ಸ್ವರೂಪ, ಹಣಕಾಸಿನ ವ್ಯವಹಾರಗಳು ಹಾಗೂ ಸಂತ್ರಸ್ತ ಕುಟುಂಬಕ್ಕೆ ನ್ಯಾಯ ದೊರೆಯುವ ಸಾಧ್ಯತೆಗಳ ಕುರಿತು ಸ್ಪಷ್ಟತೆ ಸಿಗಬೇಕಿದೆ.