ಕರ್ನಾಟಕದಲ್ಲಿ ನಡೆಯುತ್ತಿರುವ ಮತದಾರರ ಪಟ್ಟಿಯ ವಿಶೇಷ ಸಮಗ್ರ ಪರಿಷ್ಕರಣೆ (SIR) ಪ್ರಕ್ರಿಯೆಯು ಅಂತಿಮ ಹಂತಕ್ಕೆ ತಲುಪಿದ್ದು, ಸರಿ ಸುಮಾರು 47.02 ಲಕ್ಷ ಮತದಾರರ ಹೆಸರುಗಳನ್ನು ಕರಡು ಪಟ್ಟಿಯಿಂದ ಕೈಬಿಡಲಾಗುತ್ತಿದೆ. ಈ ಪ್ರಕ್ರಿಯೆಯಲ್ಲಿ ರಾಜ್ಯದಲ್ಲಿ ಶೇಕಡಾ 99.96 ರಷ್ಟು ಎನ್ಯುಮರೇಷನ್‌ ಅರ್ಜಿಗಳ ವಿತರಣೆ ಪೂರ್ಣಗೊಂಡಿದೆ ಎಂದು ರಾಜ್ಯ ಮುಖ್ಯ ಚುನಾವಣಾಧಿಕಾರಿ ವಿ. ಅನ್ಬುಕುಮಾರ್‌ ತಿಳಿಸಿದ್ದಾರೆ.

ಮತದಾರರ ಹೆಸರು ಕೈಬಿಡಲು ಪ್ರಮುಖ 4 ಕಾರಣಗಳು (ASDO)

ಪರಿಶೀಲನೆ ವೇಳೆ ಪತ್ತೆಯಾದ 47.02 ಲಕ್ಷ ಮತದಾರರನ್ನು ASDO ವರ್ಗಕ್ಕೆ ಸೇರಿಸಿ ಪಟ್ಟಿಯಿಂದ ಹೊರಗಿಡಲಾಗುತ್ತಿದೆ:

ಆಬ್ಸೆಂಟ್‌ (Absent): ಸ್ಥಳದಲ್ಲೇ ಪತ್ತೆಯಾಗದವರು.
ಶಿಫ್ಟೆಡ್‌ (Shifted): ಬೇರೆಡೆಗೆ ಶಾಶ್ವತವಾಗಿ ಸ್ಥಳಾಂತರಗೊಂಡವರು.
ಡೈಡ್‌ (Died): ಮೃತಪಟ್ಟ ಮತದಾರರು.
ಡೂಪ್ಲಿಕೇಟ್‌ (Duplicate): ಒಂದಕ್ಕಿಂತ ಹೆಚ್ಚು ಕಡೆಗಳಲ್ಲಿ ನೋಂದಣಿ ಮಾಡಿಸಿಕೊಂಡವರು.

ಅರ್ಹ ಮತದಾರರಿಗೆ ಮರು-ನೋಂದಣಿಗೆ ಅವಕಾಶ

ಒಂದೊಮ್ಮೆ ಅರ್ಹ ಮತದಾರರ ಹೆಸರುಗಳು ತಪ್ಪಾಗಿ ಕೈಬಿಟ್ಟು ಹೋಗಿದ್ದರೆ, ಆತಂಕ ಪಡುವ ಅಗತ್ಯವಿಲ್ಲ. ಅಂತಹವರು ‘ಕ್ಲೇಮು ಮತ್ತು ಆಕ್ಷೇಪಣೆ’ ಹಂತದಲ್ಲಿ ಆಕ್ಷೇಪಣೆ ಸಲ್ಲಿಸಬಹುದು ಅಥವಾ ಅರ್ಜಿ ನಮೂನೆ-6 (Form 6) ಭರ್ತಿ ಮಾಡಿ ಹೊಸದಾಗಿ ಮತದಾರರ ಪಟ್ಟಿಗೆ ಸೇರ್ಪಡೆಯಾಗಬಹುದು. ಮೃತಪಟ್ಟವರ ಹೆಸರು ತೆಗೆದುಹಾಕಲು ಮರಣ ಪ್ರಮಾಣ ಪತ್ರ ಅಥವಾ ಸ್ಥಳ ಮಹಜರು ನಡೆಸುವುದು ಕಡ್ಡಾಯವಾಗಿದೆ.

2002ರ ಪಟ್ಟಿ ಮ್ಯಾಪಿಂಗ್ ಮತ್ತು ಮುಂದಿನ ಪ್ರಕ್ರಿಯೆ

ರಾಜ್ಯದ 5.54 ಕೋಟಿ ಮತದಾರರ ಪೈಕಿ ಶೇ. 91.61 ರಷ್ಟು ಜನರ ವಿವರಗಳನ್ನು 2002ರ ಮತದಾರರ ಪಟ್ಟಿಗೆ ಮ್ಯಾಪಿಂಗ್ ಮಾಡಲಾಗಿದೆ.
ವಿವರ ಮ್ಯಾಪಿಂಗ್ ಆಗದವರು ಅಥವಾ 2002ರ ವಿವರ ಭರ್ತಿ ಮಾಡದವರು ಎನ್ಯೂಮರೇಷನ್ ಅರ್ಜಿಯಲ್ಲಿ ತಮ್ಮ ವೈಯಕ್ತಿಕ ವಿವರ ಭರ್ತಿ ಮಾಡಿ BLO ಗಳಿಗೆ ಸಲ್ಲಿಸಿದರೆ, ಅವರ ಹೆಸರು ಆಗಸ್ಟ್ 8 ರಂದು ಪ್ರಕಟವಾಗಲಿರುವ ಕರಡು ಪಟ್ಟಿಯಲ್ಲಿ ಮುಂದುವರಿಯಲಿದೆ.
ಸುಮಾರು 17.19 ಲಕ್ಷ ಮತದಾರರು 2002ರ ವಿವರ ನೀಡದೆ ಅರ್ಜಿ ಹಿಂತಿರುಗಿಸಿದ್ದು, ಕರಡು ಪಟ್ಟಿ ಪ್ರಕಟಣೆಯ ನಂತರ ಮತದಾರರ ನೋಂದಣಾಧಿಕಾರಿಗಳು (ERO) ಅವರಿಗೆ ನೋಟಿಸ್‌ ನೀಡಲಿದ್ದಾರೆ. ನೋಟಿಸ್‌ ಬಂದಾಗ ಮಾತ್ರ ಅಗತ್ಯ ದಾಖಲೆಗಳನ್ನು ಒದಗಿಸಬೇಕಾಗುತ್ತದೆ.

ಇಆರ್‌ಒ (ERO) ಅಧಿಕಾರ ಮತ್ತು ದಾಖಲೆಗಳು

ದಾಖಲೆಗಳನ್ನು ಪರಿಶೀಲಿಸಿ ಮತದಾರರನ್ನು ಅಂತಿಮ ಪಟ್ಟಿಯಲ್ಲಿ ಉಳಿಸುವ ಅಥವಾ ಹೊರಗಿಡುವ ಸಂಪೂರ್ಣ ಅಧಿಕಾರ ಇಆರ್‌ಒ (ERO) ಅವರಿಗೆ ಇರಲಿದೆ. ಈ ನಿರ್ಧಾರವನ್ನು SIR ನಿಯಮಾವಳಿಗಳ ಚೌಕಟ್ಟಿನಲ್ಲೇ ಕೈಗೊಳ್ಳಲು ಅವರಿಗೆ ತರಬೇತಿ ನೀಡಲಾಗಿದೆ. ಚುನಾವಣಾ ಆಯೋಗವು ಸೂಚಿಸಿರುವ 12 ಅಧಿಕೃತ ದಾಖಲೆಗಳನ್ನು ಮಾತ್ರ ಪರಿಗಣಿಸಲಾಗುತ್ತದೆ.

##KarnatakaVoterList #VoterListRevision #KarnatakaNews #ElectionCommission #Form6#s: #VoterRegistration #VoterList2026 #KannadaHeadlines #VoterIdentity #KarnatakaPolitics