ಮಂಗಳೂರು: ಹಿಂದೆ ದಸರಾ ರಜೆ ಎಂದರೆ ಮಕ್ಕಳಿಗೆ ಹಲವು ದಿನಗಳ ವಿಶ್ರಾಂತಿ, ಕುಟುಂಬದೊಂದಿಗೆ ಸಮಯ ಕಳೆಯುವ ಅವಕಾಶ. ಆದರೆ ಈಗ ಶೈಕ್ಷಣಿಕ ಸ್ಪರ್ಧೆ ಹೆಚ್ಚಾಗಿರುವುದರಿಂದ ರಜೆಯಲ್ಲೂ ಪಾಠದ ಒತ್ತಡ ಮಕ್ಕಳನ್ನು ಬಿಡುತ್ತಿಲ್ಲ. ಶಾಲೆಗಳ ಫಲಿತಾಂಶ, ಅಂಕಗಳು ಮತ್ತು ಶೈಕ್ಷಣಿಕ ಸಾಧನೆಗಳು ಶಾಲೆಗಳಿಗೂ ಒಂದು ರೀತಿಯ ಮಾನದಂಡವಾಗಿರುವ ಪರಿಸ್ಥಿತಿಯಲ್ಲಿ, ಮಳೆ ರಜೆಯಿಂದ ಕಳೆದುಹೋದ ಪಾಠದ ದಿನಗಳನ್ನು ಹೊಂದಾಣಿಕೆ ಮಾಡಲು ಈ ಬಾರಿ ದಸರಾ ರಜೆಯಲ್ಲೂ ವಿಶೇಷ ತರಗತಿಗಳಿಗೆ ಅವಕಾಶ ನೀಡಲಾಗಿದೆ.

ದಕ್ಷಿಣ ಕನ್ನಡ ಜಿಲ್ಲೆಯಲ್ಲಿ ಮಳೆಯಿಂದಾಗಿ ಶಾಲೆಗಳಿಗೆ ನೀಡಲಾಗಿದ್ದ ರಜೆಯನ್ನು ಹೊಂದಾಣಿಕೆ ಮಾಡುವ ಉದ್ದೇಶದಿಂದ ಅ.3ರಿಂದ 7ರವರೆಗೆ ವಿಶೇಷ ತರಗತಿಗಳನ್ನು ನಡೆಸಲು ಶಾಲಾ ಶಿಕ್ಷಣ ಇಲಾಖೆ ಷರತ್ತುಬದ್ಧ ಅನುಮತಿ ನೀಡಿದೆ. ವಿವಿಧ ಶಾಲಾ ಮುಖ್ಯಸ್ಥರು ಹಾಗೂ ಕ್ಷೇತ್ರ ಶಿಕ್ಷಣಾಧಿಕಾರಿಗಳ ಮನವಿಯನ್ನು ಪರಿಶೀಲಿಸಿದ ಬಳಿಕ ಜಿಲ್ಲಾ ಡಿಡಿಪಿಐ ಈ ಕ್ರಮಕ್ಕೆ ಒಪ್ಪಿಗೆ ನೀಡಿದ್ದಾರೆ.

Also Read ಆಸ್ಪತ್ರೆಯಲ್ಲೇ ಮೂರನೇ ಮಹಡಿಯಿಂದ ಬಿದ್ದು ಸಾವುನಿರ್ಲಕ್ಷ್ಯವೇ? ಸುರಕ್ಷತೆ ಪ್ರಶ್ನೆಗೊಳಗಾಗಿದೆ!

ಆದರೆ ರಜೆಯಲ್ಲೂ ಮಕ್ಕಳನ್ನು ಶಾಲೆಗೆ ಕರೆಯುವುದು ಕಡ್ಡಾಯವಲ್ಲ. ವಿಶೇಷ ತರಗತಿಗಳಿಗೆ ಮಕ್ಕಳನ್ನು ಕಳುಹಿಸಲು ಪೋಷಕರಿಂದ ಲಿಖಿತ ಒಪ್ಪಿಗೆ ಪಡೆಯುವುದು ಕಡ್ಡಾಯ. ಆ ಒಪ್ಪಿಗೆ ಪತ್ರವನ್ನು ಶಾಲೆಯಲ್ಲಿ ಸಂರಕ್ಷಿಸಬೇಕು. ಅಲ್ಲದೆ, ಎಸ್‌ಡಿಎಂಸಿ ಸಭೆ ನಡೆಸಿ, ಮುಖ್ಯ ಶಿಕ್ಷಕರು ಹಾಗೂ ಸಹಶಿಕ್ಷಕರು ಈ ಕುರಿತು ನಡಾವಳಿಯನ್ನು ದಾಖಲಿಸಬೇಕು.

ಅ.3ರಿಂದ ತರಗತಿಗಳನ್ನು ಆರಂಭಿಸದ ಶಾಲೆಗಳು ಮಳೆ ರಜೆಯನ್ನು ಹೊಂದಾಣಿಕೆ ಮಾಡಲು ಶನಿವಾರ ಮಧ್ಯಾಹ್ನದ ಬಳಿಕ ತರಗತಿಗಳನ್ನು ನಡೆಸಬಹುದು. ವಿಶೇಷ ತರಗತಿಗಳ ಮೂಲಕ ಕೈಗೊಂಡ ಕ್ರಮಗಳು ಹಾಗೂ ತರಗತಿಗಳ ವಿವರಗಳನ್ನು ಸಂಬಂಧಪಟ್ಟ ಕ್ಷೇತ್ರ ಶಿಕ್ಷಣಾಧಿಕಾರಿಗಳಿಗೆ ಲಿಖಿತವಾಗಿ ಸಲ್ಲಿಸುವಂತೆ ಸೂಚಿಸಲಾಗಿದೆ.

ಬೆಳ್ತಂಗಡಿ ತಾಲೂಕಿನ 10ಕ್ಕೂ ಅಧಿಕ ಶಾಲೆಗಳಿಂದ ಈಗಾಗಲೇ ಮನವಿಗಳು ಬಂದಿದ್ದು, ಬಳಿಕ ಜಿಲ್ಲೆಯ ಇತರ ಭಾಗಗಳಿಂದಲೂ ಮನವಿಗಳು ಬಂದ ಹಿನ್ನೆಲೆಯಲ್ಲಿ ಈ ಆದೇಶ ಹೊರಡಿಸಲಾಗಿದೆ. ಮಳೆ ರಜೆಯ ಐದು ದಿನಗಳನ್ನು ಮಾತ್ರ ಹೊಂದಾಣಿಕೆ ಮಾಡುವ ಉದ್ದೇಶದಿಂದ ಈ ವ್ಯವಸ್ಥೆ ಮಾಡಲಾಗಿದೆ ಎಂದು ಶಾಲಾ ಶಿಕ್ಷಣ ಮತ್ತು ಸಾಕ್ಷರತಾ ಇಲಾಖೆ ಉಪನಿರ್ದೇಶಕ ಜಿ.ಎಸ್. ಶಶಿಧರ್ ತಿಳಿಸಿದ್ದಾರೆ.

Also Read ಟಾಟಾ ಸನ್ಸ್ IPOಗೆ ಒತ್ತಾಯ: ಟ್ರಸ್ಟಿಗಳಲ್ಲಿ ಭಿನ್ನಾಭಿಪ್ರಾಯ ಹೆಚ್ಚಳ…!

ಮಕ್ಕಳಿಗೆ ರಜೆಯೋ, ಮತ್ತೊಂದು ಓಟವೋ?

ಇಂದಿನ ಶಿಕ್ಷಣ ವ್ಯವಸ್ಥೆಯಲ್ಲಿ ಅಂಕ, ಫಲಿತಾಂಶ ಮತ್ತು ಸ್ಪರ್ಧೆಗಳಿಗೆ ಹೆಚ್ಚಿನ ಮಹತ್ವ ಸಿಕ್ಕಿದೆ. ಉತ್ತಮ ಫಲಿತಾಂಶ ನೀಡಬೇಕೆಂಬ ಒತ್ತಡ ಒಂದು ಕಡೆ ಶಾಲೆಗಳ ಮೇಲಿದ್ದರೆ, ಮತ್ತೊಂದೆಡೆ ಮಕ್ಕಳನ್ನು ನಿರಂತರವಾಗಿ ಕಲಿಕೆಯಲ್ಲಿ ತೊಡಗಿಸಿಕೊಳ್ಳಬೇಕೆಂಬ ಒತ್ತಡ ಶಿಕ್ಷಕರ ಮೇಲೂ ಇದೆ. ಉತ್ತಮ ಅಂಕದ ನಿರೀಕ್ಷೆ ಪೋಷಕರಲ್ಲೂ ಇದೆ…!ಇದೇ ಕಾರಣಕ್ಕೆ ರಜೆಯ ದಿನಗಳನ್ನೂ ಪಾಠದ ದಿನಗಳಾಗಿ ಬಳಸುವ ಪರಿಸ್ಥಿತಿ ನಿರ್ಮಾಣವಾಗುತ್ತಿದೆ.

ಆದರೆ ಮಳೆ ರಜೆಯಿಂದ ಉಂಟಾದ ಪಾಠದ ಕೊರತೆಯನ್ನು ತುಂಬುವುದು ಅಗತ್ಯವಾಗಿದ್ದರೂ, ಮಕ್ಕಳಿಗೆ ವಿಶ್ರಾಂತಿ, ಆಟ, ಕುಟುಂಬದೊಂದಿಗೆ ಸಮಯ ಕಳೆಯುವ ಅವಕಾಶವೂ ಅಷ್ಟೇ ಮುಖ್ಯ. ಹೀಗಾಗಿ ವಿಶೇಷ ತರಗತಿಗಳು ನಡೆಯುವಾಗ ಮಕ್ಕಳ ವಯಸ್ಸು, ಕಲಿಕೆಯ ಒತ್ತಡ ಮತ್ತು ಪೋಷಕರ ಒಪ್ಪಿಗೆಗೂ ಸಮಾನ ಮಹತ್ವ ನೀಡಬೇಕಾಗಿದೆ.

Also Read ಇಬ್ಬರ ಸಣ್ಣ ಜಗಳದ ಎಫೆಕ್ಟ್ ನೋಡಿ..ಕಡಬದಲ್ಲಿ ಹೈಡ್ರಾಮಾ!ಸಿಲ್ಲಿAngry ಮೂಡ್‌ನಲ್ಲಿ ಎಸೆದ car ಕೀ ಚರಂಡಿಗೆ…

ಇದೇ ವೇಳೆ, ಮಂಗಳೂರಿನ ಸಾಂಸ್ಕೃತಿಕ ಹಿನ್ನೆಲೆಯನ್ನು ಗಮನದಲ್ಲಿಟ್ಟುಕೊಂಡು ದಸರಾ ರಜೆಯನ್ನು ಇನ್ನೂ ಎರಡು ದಿನ ವಿಸ್ತರಿಸುವಂತೆ ಶಾಸಕ ವೇದವ್ಯಾಸ ಕಾಮತ್ ಜಿಲ್ಲಾಡಳಿತದ ಮೂಲಕ ರಾಜ್ಯ ಸರ್ಕಾರವನ್ನು ಆಗ್ರಹಿಸಿದ್ದಾರೆ.

ಒಟ್ಟಿನಲ್ಲಿ, ಮಳೆ ರಜೆಯ ಹೊಂದಾಣಿಕೆಗಾಗಿ ಶಿಕ್ಷಣ ಇಲಾಖೆ ಕೈಗೊಂಡಿರುವ ಈ ಕ್ರಮವು ಶಾಲೆಗಳ ಶೈಕ್ಷಣಿಕ ವೇಳಾಪಟ್ಟಿಯನ್ನು ಸರಿದೂಗಿಸಲು ಸಹಾಯ ಮಾಡಬಹುದು. ಆದರೆ ರಜೆಯಲ್ಲೂ ತರಗತಿ ನಡೆಸುವಾಗ ಅಂಕಗಳ ಓಟದ ಜತೆಗೆ ಮಕ್ಕಳ ಮನಸ್ಸಿಗೂ ಕೊಂಚ ವಿಶ್ರಾಂತಿ ಸಿಗುತ್ತಿದೆಯೇ? ಎಂಬ ಪ್ರಶ್ನೆಯೂ ಗಮನ ಸೆಳೆಯುತ್ತಿದೆ.

##DasaraHoliday #KarnatakaEducation #DakshinaKannada #SpecialClasses #SchoolNews #StudentPressure