ನಂಬಲಸಾಧ್ಯ!: ರಭಸದ ಗಾಳಿಗೆ ಕೊಚ್ಚಿಬಂದು ವಿಮಾನಗಳಿಗೇ ಡಿಕ್ಕಿ ಹೊಡೆದ ಉಪಕರಣಗಳು….

ದೆಹಲಿಯ ಇಂದಿರಾ ಗಾಂಧಿ ಅಂತರರಾಷ್ಟ್ರೀಯ ವಿಮಾನ ನಿಲ್ದಾಣದ ಟರ್ಮಿನಲ್ 2 ರಲ್ಲಿ ಜೂನ್ 7, 2026ರ ಭಾನುವಾರ ಸಂಜೆ ಹಠಾತ್ತನೆ ಬೀಸಿದ ಭಾರೀ ಬಿರುಗಾಳಿ ಮತ್ತು ಮಳೆಗೆ ಏರ್ ಇಂಡಿಯಾ ಸಂಸ್ಥೆಯ ಮೂರು ವಿಮಾನಗಳು ಜಖಂಗೊಂಡಿವೆ. ಹವಾಮಾನ ಇಲಾಖೆಯಿಂದ ಈ ಬಿರುಗಾಳಿಯ ಬಗ್ಗೆ ಯಾವುದೇ ಮುನ್ಸೂಚನೆ ಇಲ್ಲದಿದ್ದರಿಂದ ಈ ಅನಿರೀಕ್ಷಿತ ಅವಘಡ ಸಂಭವಿಸಿದೆ ಎಂದು ವಿಮಾನ ನಿಲ್ದಾಣದ ಅಧಿಕಾರಿಗಳು ತಿಳಿಸಿದ್ದಾರೆ.

ವಿಮಾನ ನಿಲ್ದಾಣದ ಆವರಣದಲ್ಲಿ ನಿಲ್ಲಿಸಲಾಗಿದ್ದ ಗ್ರೌಂಡ್ ಸಪೋರ್ಟ್ ಎಕ್ವಿಪ್‌ಮೆಂಟ್ (ಲಗೇಜ್ ಹಾಗೂ ಇತರ ಉಪಕರಣಗಳು) ತೀವ್ರ ಗಾಳಿಯ ರಭಸಕ್ಕೆ ತಮ್ಮ ಜಾಗದಿಂದ ನುಗ್ಗಿ ಬಂದು, ಪಾರ್ಕ್ ಮಾಡಲಾಗಿದ್ದ ಏರ್ ಇಂಡಿಯಾ ವಿಮಾನಗಳಿಗೆ ಬಲವಾಗಿ ಡಿಕ್ಕಿ ಹೊಡೆದಿದ್ದರಿಂದ ಈ ಹಾನಿ ಸಂಭವಿಸಿದೆ. ಈ ಉಪಕರಣಗಳು ಏರ್ ಇಂಡಿಯಾ ಇಂಜಿನಿಯರಿಂಗ್ ಮತ್ತು ಇಂಡಿಗೋ ಸಂಸ್ಥೆಗೆ ಸೇರಿದ್ದವು ಎನ್ನಲಾಗಿದೆ. ಅದೃಷ್ಟವಶಾತ್ ಈ ಘಟನೆ ನಡೆದಾಗ ವಿಮಾನದಲ್ಲಿ ಯಾವುದೇ ಪ್ರಯಾಣಿಕರು ಇರಲಿಲ್ಲ ಮತ್ತು ನೆಲದ ಮೇಲಿದ್ದ ಸಿಬ್ಬಂದಿಗಳಿಗೂ ಯಾವುದೇ ಅಪಾಯ ಸಂಭವಿಸಿಲ್ಲ.

ಘಟನೆಯ ಬೆನ್ನಲ್ಲೇ ಮೂರೂ ವಿಮಾನಗಳನ್ನು ತಪಾಸಣೆ ಮತ್ತು ದುರಸ್ತಿಗಾಗಿ ಸೇವೆಯಿಂದ ತಾತ್ಕಾಲಿಕವಾಗಿ ಹಿಂಪಡೆಯಲಾಗಿದೆ. ಅಧಿಕಾರಿಗಳ ಮಾಹಿತಿ ಪ್ರಕಾರ, ಹಾನಿಗೊಳಗಾದ ಮೂರು ವಿಮಾನಗಳ ಪೈಕಿ ಎರಡು ವಿಮಾನಗಳು ಇನ್ನು ಕೆಲವು ದಿನಗಳಲ್ಲೇ ಮತ್ತೆ ಹಾರಾಟಕ್ಕೆ ಸಿದ್ಧವಾಗಲಿವೆ. ಆದರೆ, ಮೂರನೇ ವಿಮಾನಕ್ಕೆ ಹೆಚ್ಚಿನ ಹಾನಿಯಾಗಿದ್ದು (Substantial damage), ಅದು ಸುದೀರ್ಘ ಅವಧಿಯವರೆಗೆ ಹಾರಾಟ ನಡೆಸದೆ ನೆಲಕ್ಕಚ್ಚುವ ಸಾಧ್ಯತೆಯಿದೆ ಎಂದು ವರದಿಯಾಗಿದೆ.

##DelhiAirport #AirIndia #AviationNews#Delhi #WeatherUpdate"