ಹಿಂದೂ-ಮುಸ್ಲಿಂ ಸೇರಿ ಸೀಮಂತ… ‘ರಾಮಕ್ಕ’ಗೆ ಜನರ ಪ್ರೀತಿಯ ಉಡುಗೊರೆ!

ತುಮಕೂರು: ಅದು ಕೇವಲ ಸೀಮಂತ ಕಾರ್ಯಕ್ರಮವಾಗಿರಲಿಲ್ಲ… ಧರ್ಮದ ಗಡಿಗಳನ್ನು ಮೀರಿ ಮನುಷ್ಯತ್ವ ಒಂದಾದ ಅಪರೂಪದ ಕ್ಷಣವಾಗಿತ್ತು. ಕೊರಟಗೆರೆಯ ಜನರ ಪ್ರೀತಿಗೆ ಪಾತ್ರರಾಗಿರುವ ತುಮಕೂರು ಉಪವಿಭಾಗಾಧಿಕಾರಿ ನಾಹೀದಾ ಜಮ್‌ಜಮ್ ಅವರಿಗೆ ಹಿಂದೂ-ಮುಸ್ಲಿಂ ಸೇರಿದಂತೆ ವಿವಿಧ ಸಮುದಾಯದವರು ಸೇರಿ ಸೀಮಂತ ನೆರವೇರಿಸಿ ಹಾರೈಸಿದರು.

ಒಂದೆಡೆ ಹಿಂದೂ ಸಂಪ್ರದಾಯದಂತೆ ಬಳೆ, ಸೀರೆ, ಹಣ್ಣು-ಹಂಪಲು, ಅಕ್ಷತೆ, ತೆಂಗಿನಕಾಯಿ, ಸಿಹಿತಿಂಡಿ ಸೇರಿದಂತೆ ಮಡಿಲು ತುಂಬಿದರೆ, ಮತ್ತೊಂದೆಡೆ ಮುಸ್ಲಿಂ ಸಮುದಾಯದವರು ಉಡುಗೊರೆ ನೀಡಿ ಶುಭ ಹಾರೈಸಿದರು. ಹೀಗೆ ಆಚರಣೆಗಳು ಬೇರೆಬೇರೆ ಇದ್ದರೂ ಹಾರೈಕೆಯ ಮನಸ್ಸು ಒಂದೇ ಆಗಿತ್ತು.

ಕೊರಟಗೆರೆಯಲ್ಲಿ ‘ರಾಮಕ್ಕ’ ಎಂದೇ ಆತ್ಮೀಯವಾಗಿ ಕರೆಯಲ್ಪಡುವ ನಾಹೀದಾ ಅವರಿಗೆ ಸಿಕ್ಕ ಈ ಗೌರವ, ಅವರು ಅಧಿಕಾರಿಯಾಗಿದ್ದಾಗ ಜನರೊಂದಿಗೆ ಬೆಳೆಸಿಕೊಂಡ ಬಾಂಧವ್ಯಕ್ಕೆ ಸಾಕ್ಷಿಯಾಯಿತು.

ಸಿದ್ದರಬೆಟ್ಟದ ಸಿದ್ದೇಶ್ವರ ಸ್ವಾಮಿ ದೇವಾಲಯದಲ್ಲಿ ಪೂಜೆ ಸಲ್ಲಿಸಿರುವ ನಾಹೀದಾ, ಗೊರವನಹಳ್ಳಿ ಮಹಾಲಕ್ಷ್ಮೀ ದೇವಾಲಯಕ್ಕೂ ಭೇಟಿ ನೀಡಿ ಪೂಜೆ ಸಲ್ಲಿಸಿದ್ದಾರೆ. ದೇವಾಲಯ, ಮಸೀದಿ, ಚರ್ಚ್ ಎಂಬ ಭೇದವಿಲ್ಲದೆ ಎಲ್ಲ ಧರ್ಮಗಳಿಗೂ ಗೌರವ ತೋರಿಸಿರುವ ಅವರ ನಡೆ ಕೂಡ ಜನರೊಂದಿಗೆ ಆತ್ಮೀಯತೆ ಬೆಳೆಸಲು ಕಾರಣವಾಗಿದೆ.

2021ರಿಂದ 2023ರವರೆಗೆ ಕೊರಟಗೆರೆ ತಹಸೀಲ್ದಾರ್ ಆಗಿದ್ದ ಅವಧಿಯಲ್ಲಿ ನಾಹೀದಾ ಹಲವು ಜನಪರ ಕಾರ್ಯಗಳಲ್ಲಿ ತೊಡಗಿಸಿಕೊಂಡಿದ್ದರು. ಕೊರೊನಾ ಕಾಲದಲ್ಲಿ ಗರ್ಭಿಣಿಯಾಗಿದ್ದರೂ ಕರ್ತವ್ಯಕ್ಕೆ ಹಾಜರಾಗಿ ಕೆಲಸ ಮಾಡಿದ್ದ ಅವರು, ಆಂಬ್ಯುಲೆನ್ಸ್ ಸೇವೆಯಲ್ಲಿನ ಅಕ್ರಮವನ್ನು ಬಯಲಿಗೆಳೆಯುವ ಮೂಲಕ ಗಮನ ಸೆಳೆದಿದ್ದರು.

ಹಕ್ಕಿಪಿಕ್ಕಿ ಸಮುದಾಯದ ವಸತಿ ವಿಚಾರ, ಕಾರ್ಮಿಕರ ರಕ್ಷಣೆ, ಹಿರಿಯ ನಾಗರಿಕರಿಗೆ ನ್ಯಾಯಾಲಯದ ಸೇವೆ ತಲುಪಿಸುವಂತಹ ಹಲವು ಕಾರ್ಯಗಳು ಅವರ ಜನಪರ ಸೇವೆಯ ನೆನಪುಗಳಾಗಿ ಉಳಿದಿವೆ.

ಹೀಗಾಗಿಯೇ ಸೀಮಂತದ ದಿನ ‘ಅಧಿಕಾರಿ’ ಎಂಬ ಅಂತರವೇ ಇರಲಿಲ್ಲ. ಕೊರಟಗೆರೆಯ ಜನರಿಗೆ ಅವರು ‘ನಮ್ಮ ರಾಮಕ್ಕ’. ಧರ್ಮ ಬೇರೆ… ಸಂಪ್ರದಾಯ ಬೇರೆ… ಆದರೆ ಪ್ರೀತಿ ಒಂದೇ ಎಂಬ ಸಂದೇಶವನ್ನು ಈ ಸೀಮಂತ ಕಾರ್ಯಕ್ರಮ ಸಾರಿತು.

ದ್ವೇಷಕ್ಕೆ ಜಾಗವಿಲ್ಲ… ಪ್ರೀತಿಗೆ ಗಡಿ ಇಲ್ಲ. ಕೊರಟಗೆರೆಯ ‘ರಾಮಕ್ಕ’ಗೆ ಜನರು ನೀಡಿದ ಈ ಸೀಮಂತ, ಸೌಹಾರ್ದತೆಯ ಸುಂದರ ಚಿತ್ರಣವಾಗಿ ಗಮನ ಸೆಳೆಯಿತು.

##NahidaJamJam #Koratagere #Tumakuru #Ramakka #CommunalHarmony #HinduMuslimUnity #Souharda #KarnatakaNews #ViralNews #LocalNews