ಪೆಟ್ರೋಲ್, ಡೀಸೆಲ್ ತುಂಬಿಸುವಾಗ ನಾವು ಪಾವತಿಸುವ ಹಣಕ್ಕೆ ಸರಿಯಾದ ಪ್ರಮಾಣದ ಇಂಧನ ಸಿಗುತ್ತಿದೆಯೇ? ಎಂಬ ಪ್ರಶ್ನೆ ಇದೀಗ ಗಂಭೀರವಾಗಿದೆ.

ರಾಜ್ಯದ ಪೆಟ್ರೋಲ್ ಬಂಕ್‌ಗಳಲ್ಲಿ ಆಹಾರ ಮತ್ತು ನಾಗರಿಕ ಸರಬರಾಜು ಇಲಾಖೆ ನಡೆಸಿದ ತಪಾಸಣೆಯಲ್ಲಿ ಅಳತೆಯಲ್ಲಿ ವ್ಯತ್ಯಾಸ ಕಂಡುಬಂದಿರುವುದು ಬೆಳಕಿಗೆ ಬಂದಿದೆ. ರಾಜ್ಯದಲ್ಲಿರುವ ಒಟ್ಟು 5,946 ಬಂಕ್‌ಗಳ ಪೈಕಿ ಈವರೆಗೆ 805 ಬಂಕ್‌ಗಳಲ್ಲಿ ತಪಾಸಣೆ ನಡೆಸಲಾಗಿದೆ. ಈ ಪೈಕಿ 768 ಬಂಕ್‌ಗಳಲ್ಲಿ ಅಳತೆಗೆ ಸಂಬಂಧಿಸಿದ ಲೋಪಗಳು ಪತ್ತೆಯಾಗಿವೆ ಎಂದು ಸಚಿವ ರಿಜ್ವಾನ್ ಅರ್ಷದ್ ತಿಳಿಸಿದ್ದಾರೆ.

ಅಳತೆ ವ್ಯತ್ಯಾಸ ಕಂಡುಬಂದ ಬಂಕ್‌ಗಳ ವಿರುದ್ಧ ಪ್ರಕರಣ ದಾಖಲಿಸುವ ಕ್ರಮ ಕೈಗೊಳ್ಳಲಾಗಿದೆ. ನಿಯಮ ಉಲ್ಲಂಘನೆ ಮುಂದುವರಿದರೆ ಕಠಿಣ ಕ್ರಮ ಕೈಗೊಳ್ಳುವುದಾಗಿ ಇಲಾಖೆ ಎಚ್ಚರಿಕೆ ನೀಡಿದೆ.

ಗ್ರಾಹಕರಿಗಾಗಿ ಹೊಸ ವ್ಯವಸ್ಥೆ

ಪೆಟ್ರೋಲ್ ಬಂಕ್‌ಗಳಲ್ಲಿ ಕ್ಯಾಲಿಬರೇಷನ್ ಹಾಗೂ ಪರಿಶೀಲನೆಯ ದಿನಾಂಕವನ್ನು ಸಾರ್ವಜನಿಕರಿಗೆ ಸ್ಪಷ್ಟವಾಗಿ ಕಾಣುವಂತೆ ಪ್ರದರ್ಶಿಸುವ ವ್ಯವಸ್ಥೆ ಮಾಡಲಾಗುತ್ತಿದೆ.

ಅನುಮಾನ ಬಂದರೆ ಗ್ರಾಹಕರು ನಿಗದಿತ ಮಾಪಕಗಳ ಮೂಲಕ ಇಂಧನದ ಪ್ರಮಾಣವನ್ನು ಪರಿಶೀಲಿಸುವ ಅವಕಾಶ ಕಲ್ಪಿಸಲಾಗುತ್ತದೆ.

ಇದಲ್ಲದೆ, ರಾಜ್ಯದ ಪೆಟ್ರೋಲ್ ಬಂಕ್‌ಗಳ ಸರಕಾರದ ಪ್ರಮಾಣೀಕೃತ ಮಾಹಿತಿಯನ್ನು ಒಳಗೊಂಡ ಆನ್‌ಲೈನ್ ಡ್ಯಾಶ್‌ಬೋರ್ಡ್ಆರಂಭಿಸುವ ಯೋಜನೆಯೂ ಇದೆ.

ಅಳತೆಯಲ್ಲಿ ಮೋಸ ಕಂಡುಬಂದರೆ ಗ್ರಾಹಕರು 1800 5991100 ಟೋಲ್‌ಫ್ರೀ ಸಹಾಯವಾಣಿಗೆ ದೂರು ದಾಖಲಿಸಬಹುದು.

ವ್ಯವಸ್ಥೆ ಎಷ್ಟೇ ಜಾಗೃತವಾದರೂ…

ವ್ಯವಸ್ಥೆ ಎಷ್ಟೇ ಜಾಗೃತವಾದರೂ, ಅದನ್ನು ಮೀರಲು ಕೆಲವರು ಹೊಸ ದಾರಿಗಳನ್ನು ಹುಡುಕುತ್ತಲೇ ಇರುತ್ತಾರೆ.

ಕೆಲವರು ಚಾಪೆ ಕೆಳಗೆ ತೂರಿದರೆ, ಇನ್ನು ಕೆಲವರು ರಂಗೋಲಿ ಕೆಳಗೆ ತೂರಿಸುತ್ತಾರೆ; ಮತ್ತೊಬ್ಬರು ಅದಕ್ಕೂ ಮೀರಿಸಿ ಹೊಸ ಹೊಸ ದಾರಿಯನ್ನೇ ಸೃಷ್ಟಿಸಿಕೊಂಡು ಬಿಡುತ್ತಾರೆ.

ಅಂದರೆ ಮೋಸಕ್ಕೆ ನೂರಾರು ದಾರಿಗಳಿರಬಹುದು… ಆದರೆ ಸತ್ಯದ ದಾರಿಯಲ್ಲಿ ನಡೆಯುವವನಿಗೆ ನ್ಯಾಯ, ನಿಷ್ಠೆ ಮತ್ತು ಸರಿ–ತಪ್ಪಿನ ಅರಿವೇ ದಾರಿ.

ಕೊನೆಗೆ ಈ ವ್ಯವಸ್ಥೆಯಲ್ಲಿನ ಯಾವುದೇ ಲೋಪದ ಹೊರೆ ಬೀಳೋದು ಸಾಮಾನ್ಯ ಜನರ ಜೇಬಿನ ಮೇಲೆಯೇ.
ಆದ್ದರಿಂದ ಗ್ರಾಹಕರು ಎಚ್ಚರವಾಗಿರುವುದು, ಪ್ರಶ್ನಿಸುವುದು ಮತ್ತು ಮೋಸ ಕಂಡರೆ ದೂರು ನೀಡುವುದು—ಇದೇ ವಂಚನೆಗೆ ಕಡಿವಾಣ ಹಾಕುವ ಮೊದಲ ಹೆಜ್ಜೆ.

##PetrolPump #PetrolFraud #FuelFraud #ConsumerRights #ConsumerAwareness #KarnatakaNews #PublicAwareness