ಕ್ಯಾಷ್‌ಲೆಸ್ ಭಾರತಕ್ಕೆ ಹೊಸ ತಿರುವು?

ಅಕ್ಟೋಬರ್ 15ರಿಂದ ₹2,000ಕ್ಕಿಂತ ಹೆಚ್ಚಿನ ಕೆಲವು UPI ವ್ಯಾಪಾರಿ ಪಾವತಿಗಳಿಗೆ MDR

ಇಷ್ಟು ದಿನ ಕೈಯಲ್ಲಿ ಹಣವಿಲ್ಲದಿದ್ದರೂ ಮೊಬೈಲ್ ಇದ್ದರೆ ಸಾಕು… ಅಂಗಡಿಯಿಂದ ಆಸ್ಪತ್ರೆವರೆಗೆ, ಬಿಲ್‌ನಿಂದ ಟಿಕೆಟ್‌ವರೆಗೆ UPI ಮೂಲಕ ಕ್ಷಣಾರ್ಧದಲ್ಲಿ ಪಾವತಿ ಮಾಡುತ್ತಿದ್ದೇವೆ.

UPI ಪಾವತಿಗೆ ಶುಲ್ಕದ ಹೊಸ ನಿಯಮ ಜಾರಿಯಾದ ಬಳಿಕ ಜನರ ಪಾವತಿ ಅಭ್ಯಾಸದಲ್ಲೇ ಬದಲಾವಣೆಯಾಗುತ್ತದೆಯೇ? ಎಂಬ ಕುತೂಹಲ ಮೂಡಿದೆ.ಒಂದೆಡೆ ವೇಗವಾಗಿ ಬೆಳೆದ ಡಿಜಿಟಲ್ ಪಾವತಿ ವ್ಯವಸ್ಥೆ… ಮತ್ತೊಂದೆಡೆ ಶುಲ್ಕದ ಹೊಸ ನಿಯಮ. ಇದರ ಪರಿಣಾಮವಾಗಿ “ಕ್ಯಾಷ್‌ಲೆಸ್” ಪಾವತಿ ಸಂಸ್ಕೃತಿ ಮತ್ತೆ “ಕ್ಯಾಶ್‌ಬೇಸ್‌ಡ್” ವ್ಯವಹಾರದತ್ತ ತಿರುಗಿದರೂ ಅಚ್ಚರಿಯಿಲ್ಲವೇ?

ಈ ಕುತೂಹಲಕ್ಕೆ ಉತ್ತರ ಮುಂದಿನ ದಿನಗಳಲ್ಲಿ ಸಿಗಲಿದೆ.

ಹೊಸ ನಿಯಮದಂತೆ, ₹2,000ಕ್ಕಿಂತ ಹೆಚ್ಚಿನ Person-to-Merchant (P2M) UPI ವಹಿವಾಟುಗಳಿಗೆ 0.4% Merchant Discount Rate (MDR) ಅನ್ವಯವಾಗಲಿದೆ. ಈ ಶುಲ್ಕ ಗರಿಷ್ಠ ₹300ಕ್ಕೆ ಸೀಮಿತವಾಗಿರುತ್ತದೆ. ₹75,000 ಅಥವಾ ಅದಕ್ಕಿಂತ ಹೆಚ್ಚಿನ ವಹಿವಾಟಿಗೂ ಗರಿಷ್ಠ ₹300ರಷ್ಟೇ MDR. ವ್ಯಕ್ತಿಯಿಂದ ವ್ಯಕ್ತಿಗೆ ಮಾಡುವ UPI ಹಣ ವರ್ಗಾವಣೆ ಮಾತ್ರ ಸಂಪೂರ್ಣ ಉಚಿತವಾಗಿರುತ್ತದೆ.

ಉದಾಹರಣೆಗೆ ₹3,000 ಅನ್ನು ವ್ಯಾಪಾರಿಗೆ UPI ಮೂಲಕ ಪಾವತಿಸಿದರೆ 0.4% ದರದಲ್ಲಿ ₹12 MDR ಬರುತ್ತದೆ. ₹50,000ಕ್ಕೆ ₹200 ಮತ್ತು ₹75,000 ಅಥವಾ ಅದಕ್ಕಿಂತ ಹೆಚ್ಚಿನ ವಹಿವಾಟಿಗೆ ಗರಿಷ್ಠ ₹300 ಅನ್ವಯವಾಗುತ್ತದೆ.

ಆದರೆ ಇಲ್ಲಿ ಗ್ರಾಹಕರು ಗಮನಿಸಬೇಕಾದ ಪ್ರಶ್ನೆ ಬೇರೆ. ಸರ್ಕಾರದ ಪ್ರಕಾರ ಈ MDR ಅನ್ನು ಗ್ರಾಹಕರಿಂದ ನೇರವಾಗಿ ವಸೂಲಿ ಮಾಡಬಾರದು. ಬ್ಯಾಂಕ್‌ಗಳಿಗೂ ವ್ಯಾಪಾರಿಗಳು ಈ ಶುಲ್ಕವನ್ನು ಗ್ರಾಹಕರಿಗೆ ವರ್ಗಾಯಿಸದಂತೆ ಸೂಚಿಸಲಾಗಿದೆ. ಹೀಗಾಗಿ ಅಂಗಡಿಯವರು “UPI ಶುಲ್ಕ” ಎಂದು ಪ್ರತ್ಯೇಕವಾಗಿ ಗ್ರಾಹಕರಿಂದ ಹಣ ಪಡೆಯುವುದು ನಿಯಮದ ಉದ್ದೇಶಕ್ಕೆ ವಿರುದ್ಧ.

ಆದರೆ ವ್ಯಾಪಾರಿಯ ವೆಚ್ಚ ಹೆಚ್ಚಾದರೆ, ಆ ಹೆಚ್ಚುವರಿ ವೆಚ್ಚವನ್ನು ವ್ಯಾಪಾರಿಗಳು ತಮ್ಮ ವ್ಯವಹಾರದ ಬೆಲೆ ನಿಗದಿಯಲ್ಲಿ ಹೇಗೆ ನಿರ್ವಹಿಸುತ್ತಾರೆ ಎಂಬುದು ಮುಂದಿನ ದಿನಗಳಲ್ಲಿ ಗಮನಿಸಬೇಕಾದ ವಿಷಯ. ಉತ್ಪನ್ನದ ಬೆಲೆ ಏರಿಕೆಯ ರೂಪದಲ್ಲಿ ಅದರ ಪರೋಕ್ಷ ಪರಿಣಾಮ ಗ್ರಾಹಕರಿಗೆ ತಲುಪುತ್ತದೆಯೇ? ಎಂಬ ಪ್ರಶ್ನೆ ಇಲ್ಲಿ ಮುಖ್ಯವಾಗುತ್ತದೆ. ಇದು ಸಂಭವಿಸುತ್ತದೆ ಎಂದು ಈಗಲೇ ಖಚಿತವಾಗಿ ಹೇಳಲು ಸಾಧ್ಯವಿಲ್ಲ.

ಇನ್ನೊಂದು ಮುಖ್ಯ ವಿಚಾರವೆಂದರೆ, ರೈಲ್ವೆ, ಟೆಲಿಕಾಂ, ವಿಮೆ, ಇಂಧನ ಮತ್ತು ಕೃಷಿ ಇನ್‌ಪುಟ್‌ಗಳಂತಹ ಕೆಲವು ಕ್ಷೇತ್ರಗಳಲ್ಲಿ ₹2,000ಕ್ಕಿಂತ ಹೆಚ್ಚಿನ ವಹಿವಾಟಿಗೆ ₹5ರ ಫ್ಲ್ಯಾಟ್ MDR ನಿಗದಿಯಾಗಿದೆ. ಸಣ್ಣ ವ್ಯಾಪಾರಿಗಳಿಗೂ ಕೆಲವು ವಿನಾಯಿತಿಗಳಿವೆ. ಸರ್ಕಾರದ ಪ್ರಕಾರ ಸುಮಾರು 96% P2M ವಹಿವಾಟುಗಳು ಈ ಬದಲಾವಣೆಯಿಂದ ಪರಿಣಾಮಕ್ಕೊಳಗಾಗುವುದಿಲ್ಲ.

ಹೀಗಾಗಿ “UPI ಸಂಪೂರ್ಣವಾಗಿ ಶುಲ್ಕಯುಕ್ತವಾಗುತ್ತಿದೆ” ಎನ್ನುವುದು ಸರಿಯಾದ ಚಿತ್ರಣವಲ್ಲ. ಆದರೆ ಇಷ್ಟು ವರ್ಷ ಉಚಿತವಾಗಿದ್ದ ದೊಡ್ಡ ಮೊತ್ತದ ವ್ಯಾಪಾರಿ UPI ವಹಿವಾಟುಗಳಿಗೆ MDR ಬರುವುದರಿಂದ ಡಿಜಿಟಲ್ ಪಾವತಿ ವ್ಯವಸ್ಥೆಯಲ್ಲಿ ಹೊಸ ಅಧ್ಯಾಯ ಆರಂಭವಾಗುತ್ತಿದೆ. ಸರ್ಕಾರ ಇದನ್ನು UPI ವ್ಯವಸ್ಥೆಯ ದೀರ್ಘಕಾಲೀನ ನಿರ್ವಹಣೆ ಮತ್ತು ಸುಸ್ಥಿರತೆಗೆ ಅಗತ್ಯವಾದ ಕ್ರಮ ಎಂದು ಹೇಳುತ್ತಿದೆ.

ಕ್ಯಾಷ್‌ಲೆಸ್ ಭಾರತದ ಕನಸು ಮುಂದುವರಿಯುತ್ತದೆಯೇ, ಅಥವಾ ಶುಲ್ಕದ ಹೊಸ ವ್ಯವಸ್ಥೆ ಗ್ರಾಹಕರು ಮತ್ತು ವ್ಯಾಪಾರಿಗಳ ಪಾವತಿ ಅಭ್ಯಾಸದಲ್ಲಿ ಬದಲಾವಣೆ ತರಲಿದೆಯೇ? ಅಕ್ಟೋಬರ್ 15ರ ನಂತರದ ವಾಸ್ತವ ಚಿತ್ರಣವೇ ಇದಕ್ಕೆ ಉತ್ತರ ನೀಡಲಿದೆ.

##UPI #UPICharges #DigitalPayment #CashlessIndia #CashPayment #IndiaNews #BreakingNews